Mẹnu Wẹ Na Huhlọn Jesu Nado Wà Azọ́njiawu Lẹ?

To whenue Jesu dọho gando jonamẹ go to owhé Falesi he nọ yin Simọni lọ tọn gbè godo, e bẹ gbejizọnlin yẹwhehodidọ tọn devo jẹeji to Galili. Owhe awetọ die he e bẹ lizọnyizọn etọn jẹeji, podọ e ma yin ewọ kẹdẹ wẹ to gbejizọnlin lọ basi. Apọsteli 12 lẹ zọnhẹ ẹ, gọna yọnnu delẹ he mẹ ewọ ko ‘yàn gbigbọ ylankan lẹ sọn bo ko sọ hẹnazọ̀ngbọna.’ (Luku 8:2) Delẹ to yọnnu lọ lẹ mẹ wẹ Malia Magdaleni, Susana gọna Joana, mẹhe asu etọn yin nukunpedonugotọ Ahọlu Hẹlọdi Antipa tọn de.

Dile mẹsusu to ohó Jesu tọn lẹ sè, gbẹtọ lẹ jẹ nudọn ji sinsinyẹn gando azọ́n etọn lẹ go. Ehe họnwun to whenue dawe de he tindo gbigbọ aovi tọn bo yin nukuntọ́nnọ bosọ yin unbọpẹnnọ, yin hinhẹnwa Jesu dè bo yin azọ̀nhẹngbọna. Todin, aovi lọ ko tọ́n sọn dawe lọ mẹ bọ dawe lọ sọgan dọho bosọ mọnú. Ehe hẹn awuji gbẹtọ lọ lẹ bọ yé dọmọ: “Be vlavo e ma yin Visunnu Davidi tọn lọ die?”—Matiu 12:23.

Gbẹtọgun he pli lẹdo owhé he gbè Jesu te lọ sù sọmọ bọ ewọ po devi etọn lẹ po ma tlẹ sọgan dùnú. Ṣigba, e ma yin mẹlẹpo wẹ mọdọ Jesu yin “Visunnu Davidi tọn” he opagbe etọn yin dido lọ. Wekantọ po Falesi delẹ po ko wá sọn kaka Jelusalẹm—ṣigba, e ma yin nado plọnnu sọn Jesu dè kavi nọgodona ẹn. Yé to didọna gbẹtọ lẹ dọmọ: “E tindo Beẹlzebuli” bo gbọnmọ dali to azọ́nwa hẹ “ogán aovi lẹ tọn.” (Malku 3:22) To whenue hẹnnumẹ Jesu tọn lẹ sè gando hunyanhunyan lọ go, yé wá nado wle Jesu. Na whẹwhinwhẹ́n tẹ wutu?

To ojlẹ ehe mẹ, nọvisunnu Jesu tọn titi lẹ ma yise dọ Visunnu Jiwheyẹwhe tọn wẹ ewọ. (Johanu 7:5) Jesu he to zingidi ehe fọndote ma taidi Jesu he yé yọnẹn to whenue yé to whinwhẹ́n dopọ to Nazalẹti. Yé wá tadona kọ̀n dọ nude dona ko jẹdò to apọ̀n etọn mẹ bo dọmọ: “E ko hùn tadu.”—Malku 3:21.

Ṣigba, etẹwẹ kunnudenu lẹ dohia? Jesu ṣẹṣẹ hẹnazọ̀ngbọna dawe de he tindo gbigbọ aovi tọn podọ dawe lọ sọgan mọnú bo dọho todin. Mẹde ma sọgan mọ́n ehe. Enẹwutu, wekantọ lẹ po Falesi lẹ po tẹnpọn nado sawhẹ lalo dokọna Jesu. Yé dọmọ: “Dawe ehe to aovi lẹ yàn jẹgbonu kiki gbọn Beẹlzebuli ogán aovi lẹ tọn gblamẹ.”—Matiu 12:24.

Jesu yọ́n nuhe wekantọ lẹ po Falesi lẹ po to linlẹn, enẹwutu e dọmọ: “Ahọluduta depope he klan sọta ede nọ jẹvọ́, podọ tòdaho kavi owhé depope he klan sọta ede ma na nọte. To aliho dopolọ mẹ, eyin Satani nọ yàn Satani jẹgbonu, be ewọ ko klan sọta ede; to whenẹnu, nawẹ ahọluduta etọn na nọte do?”—Matiu 12:25, 26.

Nuhe e dọ hẹnmẹ lẹnnupọn taun! Falesi lẹ yọnẹn dọ Ju delẹ tindo aṣa lọ nado nọ yàn aovi lẹ jẹgbonu. (Owalọ lẹ 19:13) Enẹwutu, Jesu kanse dọmọ: “Eyin yẹn nọ yàn aovi lẹ jẹgbonu gbọn Beẹlzebuli gblamẹ, gbọn mẹnu gblamẹ wẹ visunnu mìtọn lẹ nọ yàn yé jẹgbonu lo?” To hogbe devo mẹ, whẹsadokọnamẹ yetọn sọgbe hẹ ninọmẹ yetọn pẹpẹ. Jesu sọ zindonukọn dọmọ: “Ṣigba, eyin gbọn gbigbọ Jiwheyẹwhe tọn gblamẹ wẹ yẹn to aovi lẹ yàn jẹgbonu, be Ahọluduta Jiwheyẹwhe tọn ko gbọ mì go.”—Matiu 12:27, 28.

Nado dohia dọ aovi he emi nọ yàn jẹgbonu yin kunnudenu dọ emi dohuhlọn hú Satani, Jesu dọmọ: “Nawẹ mẹde sọgan biọ owhé dawe huhlọnnọ de tọn gbè gánnugánnu bo bẹ nutindo etọn lẹ gbọn, eyin ewọ ma blá dawe huhlọnnọ lọ whẹ́? Kiki to whenẹnu wẹ ewọ sọgan bẹ nuhe to owhé etọn gbè lẹ yì. Mẹdepope he ma tin to adà ṣie mẹ jẹagọdo mi, podọ mẹdepope he ma to gbẹtọ lẹ bẹpli hẹ mi to yé vúnvún pé.” (Matiu 12:29, 30) E họnwun dọ wekantọ lẹ po Falesi lẹ po jẹagọdo Jesu bo gbọnmọ dali dohia dọ azọ́nwatọ Satani tọn lẹ wẹ yé. Yé to gbẹtọ lẹ yàn sọn Visunnu Jiwheyẹwhe tọn dè, yèdọ mẹhe to azọ́nwa po huhlọn Jehovah tọn po.

Jesu na avase agọjẹdomẹtọ kanylantọ enẹlẹ dọmọ: “Onú lẹpo wẹ na yin jijona gbẹtọ lẹ, mahopọnna ylando depope he yé wà po hogbe nùzinzan tọn he yé yizan lẹ po. Ṣigba, mẹdepope he zánnu do gbigbọ wiwe go ma tindo jona kakadoi, ṣigba e hùwhẹ ylando madopodo tọn.” (Malku 3:28, 29) Yí nukun homẹ tọn do pọ́n nuhe enẹ na zẹẹmẹdo na mẹhe to didọ dọ Satani wẹ to nuhe gbigbọ Jiwheyẹwhe tọn to wiwà lẹ wà!