2 Cronica

33 Nagaedad si Manases+ sing 12 ka tuig sang nangin hari sia, kag naggahom sia sa Jerusalem sing 55 ka tuig.+

2 Ginhimo niya ang malain sa panulok ni Jehova, pareho sang makangilil-ad nga mga buhat nga ginhimo sang mga pungsod nga gintabog ni Jehova sa atubangan sang katawhan sang Israel.+ 3 Ginpatindog niya liwat ang sagrado nga mataas nga mga duog nga ginguba sang iya amay nga si Ezequias,+ kag naghimo sia sing mga halaran para sa mga Baal kag sing sagrado nga mga poste.* Kag nagyaub sia sa tanan nga butang sa langit kag nag-alagad sa sini.+ 4 Naghimo man sia sing mga halaran sa balay ni Jehova,+ nga tuhoy sini nagsiling si Jehova: “Magapabilin ang akon ngalan sa Jerusalem tubtob san-o.”+ 5 Naghimo sia sing mga halaran sa duha ka luwang sang balay ni Jehova para sa tanan nga butang sa langit.+ 6 Ginsunog* niya bilang halad ang iya mga anak+ sa Nalupyakan sang mga Anak ni Hinom;+ nagahimo sia sing madyik,+ nagapamakot sia, ginahimo niya ang ginahimo sang babaylan, kag nagtangdo sia sing mga espiritista kag mga manugpakot sing mga hitabo.+ Malain gid ang iya ginhimo sa panulok ni Jehova, nga nagpaakig sa Iya.

7 Ginbutang niya ang iya ginhimo nga tinigib nga imahen sa balay sang matuod nga Dios+ nga tuhoy sa sini nagsiling ang Dios kay David kag kay Solomon nga iya anak: “Ibutang ko sing permanente ang akon ngalan sa sini nga balay kag sa Jerusalem nga ginpili ko sa tanan nga tribo sang Israel.+ 8 Indi ko na pagpahalinon ang Israel sa duta nga ginhatag ko sa ila mga katigulangan, kon tumanon nila ang tanan nga ginsugo ko sa ila, ang bug-os nga Kasuguan, ang mga pagsulundan kag ang mga desisyon nga ginhatag sa ila paagi kay Moises.” 9 Ginpatalang ni Manases ang Juda kag ang mga pumuluyo sang Jerusalem, gani ginhimo nila ang mas malain pa sangsa ginhimo sang mga pungsod nga ginlaglag ni Jehova sa atubangan sang mga Israelinhon.+

10 Nagpakighambal si Jehova kay Manases kag sa iya katawhan, apang wala sila magpamati.+ 11 Gani ginpasalakay ni Jehova sa ila ang mga pangulo sang mga soldado sang hari sang Asiria. Gindakop nila si Manases paagi sa mga kaw-it,* kag gingapos nila sia sing duha ka kadena nga saway kag gindala sa Babilonia. 12 Sang nabudlayan na gid sia, nagpakiluoy sia kay Jehova nga iya Dios* kag nagpaubos gid sang iya kaugalingon sa atubangan sang Dios sang iya mga katigulangan. 13 Padayon sia nga nagpangamuyo sa Iya kag natandog Sia sang iya pakiluoy kag ginpamatian Niya ang iya pangabay, gani ginbalik Niya sia sa paghari sa Jerusalem.+ Dayon nakilala ni Manases nga si Jehova ang matuod nga Dios.+

14 Pagkatapos sini, nagpatindog sia sing pader sa gua sang Siudad ni David+ sa katundan sang Gihon+ sa nalupyakan* tubtob sa Gawang sang Isda,+ kag nagalibot ang pader sa siudad kag naglab-ot ini sa Ofel.+ Mataas gid ang pader nga iya ginhimo. Nagtangdo man sia sing mga pangulo sang mga soldado sa tanan nga siudad sa Juda nga may mabakod nga depensa. 15 Dayon ginpanguha niya ang mga dios sang iban nga mga pungsod kag ang imahen sang diosdios sa balay ni Jehova+ kag ang tanan nga halaran nga ginhimo niya sa bukid sang balay ni Jehova+ kag sa Jerusalem, kag ginpahaboy niya ini sa gua sang siudad. 16 Ginpakay-o man niya ang halaran ni Jehova+ kag naghalad sa sini sing mga halad sa pag-ambitanay+ kag mga halad sa pagpasalamat.+ Ginsilingan niya ang Juda nga mag-alagad kay Jehova nga Dios sang Israel. 17 Apang nagahalad gihapon ang katawhan sa sagrado nga mataas nga mga duog, pero para ini kay Jehova nga ila Dios.

18 Tuhoy sa iban pa nga natabo sa kabuhi ni Manases, ang iya pangamuyo sa iya Dios, kag ang ginsiling sa iya sang mga nagasugid sing mga palanan-awon sa ngalan ni Jehova nga Dios sang Israel, nasulat ini tanan sa kasaysayan sang mga hari sang Israel. 19 Nasulat man sa mga sinulatan sang mga nagasugid sing mga palanan-awon ang iya pangamuyo+ kag ang pagsabat sa iya pakiluoy, ang tanan niya nga sala kag pagkadimatutom,+ ang mga lugar nga ginhimuan niya sing sagrado nga mataas nga mga duog kag ginbutangan sing sagrado nga mga poste*+ kag sing tinigib nga mga imahen antes sia magpaubos sang iya kaugalingon. 20 Sang ulihi, napatay si Manases pareho sang iya mga katigulangan, kag ginlubong nila sia sa iya balay. Si Amon nga iya anak amo ang nagbulos sa iya bilang hari.+

21 Nagaedad si Amon+ sing 22 ka tuig sang nangin hari sia, kag naggahom sia sa Jerusalem sing duha ka tuig.+ 22 Ginhimo niya ang malain sa panulok ni Jehova, pareho sang ginhimo sang iya amay nga si Manases.+ Naghalad si Amon sa tanan nga tinigib nga imahen nga ginhimo sang iya amay nga si Manases,+ kag nag-alagad sia sa sini. 23 Apang wala sia magpaubos sa atubangan ni Jehova,+ indi pareho sang ginhimo nga pagpaubos sang iya amay nga si Manases.+ Sa baylo, gindugangan pa gid ni Amon ang iya mga sala. 24 Sang ulihi, naghimbon ang iya mga alagad batok sa iya+ kag ginpatay nila sia sa iya mismo balay. 25 Apang ginpatay sang katawhan sini nga duta ang tanan nga naghimbon batok kay Hari Amon,+ kag ginbulos nila bilang hari si Josias+ nga iya anak.