Esdras

6 Gani nagsugo si Hari Dario, kag nagpangusisa sila sa mga talaguan sang mga manuskrito* nga ginataguan man sang bilidhon nga mga butang sa Babilonia. 2 Kag sa napamakuran nga lugar sa Ecbatana sa probinsia* sang Media, may nakita sila nga linukot, kag amo ini ang nasulat nga mensahe:

3 “Sa nahauna nga tuig ni Hari Ciro, nagsugo sia tuhoy sa balay sang Dios sa Jerusalem:+ ‘Tukuron liwat sang mga Judiyo ang balay agod makahalad sila sa sini. May kataason ini nga 60 ka maniko* kag kasangkaron nga 60 ka maniko kag pabakuron nila ang mga pundasyon sini.+ 4 Ang mga pader sang balay dapat nga may tatlo ka sampaw sang dalagku nga mga bato kag isa ka sampaw sang mga tablon;+ kag ang gasto sa sini kuhaon sa bahandian sang hari.+ 5 Ang bulawan kag ang pilak nga mga suludlan nga ginkuha ni Nabocodonosor sa templo sa Jerusalem kag gindala sa Babilonia,+ dapat man ibalik sa lugar sini sa balay sang Dios.’+

6 “Gani kamo, Tattenai nga gobernador sa Tabok sang Suba,* Setar-bozenai kag ang inyo kaupod nga mga gobernador sa Tabok sang Suba,+ indi kamo magpasilabot dira. 7 Pabay-i ninyo ang pag-obra sa balay sang Dios. Tukuron liwat sang gobernador sang mga Judiyo kag sang mga gulang sang mga Judiyo ang balay sang Dios sa ginatindugan sini anay. 8 Nagamando man ako kon ano ang inyo himuon para buligan ang mga gulang nga mga Judiyo sa pagtukod sang balay sang Dios: Hatagan ninyo sila gilayon sing galastuhon halin sa bahandian sang hari,+ ang buhis nga nakuha sa Tabok sang Suba. Indi kamo mag-untat sa paghatag sa ila.+ 9 Kag ihatag ninyo adlaw-adlaw sa mga saserdote sa Jerusalem ang bisan ano man nga pangayuon nila para sa dulot nga sinunog sa Dios sang langit: mga baka+ ukon mga karnero nga lalaki,+ mga kordero,+ trigo,+ asin,+ alak,+ kag lana,+ 10 agod padayon sila nga maghalad sang nagapahamuot nga dulot sa Dios sang langit kag magpangamuyo para sa kaayuhan sang hari kag sang iya mga anak.+ 11 Kag kon may maglapas sini nga sugo, kuhaon ang isa ka tablon sa iya balay kag ibayaw sia kag ibutang sa sini,* kag ang iya balay himuon nga kasilyas* sang tanan nga tawo. 12 Kabay nga laglagon sang Dios nga nagpili sini nga duog para sa iya ngalan+ ang bisan sin-o nga hari kag katawhan nga magsupak sini nga sugo kag magguba sang balay sang Dios sa Jerusalem. Ako si Dario, ang nagahatag sini nga sugo. Himua ninyo ini gilayon.”

13 Gani gintuman gilayon nanday Tattenai nga gobernador sa Tabok sang Suba, Setar-bozenai+ kag sang ila mga kaupod ang tanan nga ginsugo ni Hari Dario. 14 Tungod napalig-on sang pagpanagna ni Hageo+ nga manalagna kag ni Zacarias+ nga apo ni Iddo; ang mga gulang sang mga Judiyo nagpadayon sa pagtukod kag nagdasig ang ila pag-obra.+ Gintukod nila ini kag gintapos ini suno sa sugo sang Dios sang Israel+ kag suno sa sugo sang mga hari sang Persia nga sanday Ciro,+ Dario,+ kag Artajerjes.+ 15 Sang ikatlo nga adlaw sang bulan sang Adar,* sang ikan-om nga tuig sang paghari ni Dario, natapos nila ang balay.

16 Dayon malipayon nga ginhiwat sang mga Israelinhon, mga saserdote, mga Levinhon,+ kag sang mga nagbalik halin sa pagkatapok ang inagurasyon* sang balay sang Dios. 17 Kag sa inagurasyon sang balay sang Dios naghalad sila sang 100 ka baka, 200 ka karnero nga lalaki, 400 ka kordero, kag subong halad tungod sa sala sang bug-os nga Israel 12 ka kanding nga lalaki, suno sa kadamuon sang tribo sang Israel.+ 18 Kag nagtangdo sila sang mga saserdote suno sa ila mga grupo kag sang mga Levinhon suno sa ila mga dibisyon agod mag-alagad sa Dios sa Jerusalem,+ suno sa ginasiling sa libro nga ginsulat ni Moises.+

19 Ginhiwat sang mga nagbalik ang Paskua* sang ika-14 nga adlaw sang nahauna nga bulan.+ 20 Nagpaninlo sang ila kaugalingon+ ang mga saserdote kag mga Levinhon gani nangin matinlo sila tanan. Dayon gin-ihaw nila ang sapat nga halad para sa Paskua para sa tanan nga nagbalik, para sa ila mga kaupod nga saserdote, kag para sa ila kaugalingon. 21 Kag ang mga Israelinhon nga nagbalik halin sa pagkatapok nagkaon kaupod ang tanan nga nagpain sang ila kaugalingon sa pagkadimatinlo sang mga pungsod agod magsimba* kay Jehova nga Dios sang Israel.+ 22 Ginhiwat man nila sing malipayon ang Kapiestahan sang Tinapay nga Wala sing Lebadura+ sa sulod sang pito ka adlaw, kay ginpahalipay sila ni Jehova kag ginpahulag niya ang hari sang Asiria+ agod suportahan sila* sa pag-obra sang balay sang matuod nga Dios sang Israel.