Numeros

30 Dayon nagsiling si Moises sa mga pangulo+ sang mga tribo sang Israel: “Amo ini ang ginsugo ni Jehova: 2 Kon ang isa ka tawo magpanaad+ kay Jehova ukon magpanumpa*+ nga indi niya paghimuon ang pila ka butang, indi niya dapat paglapason ang iya ginhambal.+ Himuon niya ang tanan nga ginpanaad niya.+

3 “Kon ang isa ka pamatan-on nga babayi maghimo sing panaad kay Jehova ukon magpanaad sia nga indi paghimuon ang pila ka butang samtang nagaistar sia sa balay sang iya amay, 4 kag wala magpamalabag ang iya amay sang mabatian sang iya amay ang iya panaad ukon ang panaad niya* nga indi paghimuon ang pila ka butang, dapat niya tumanon ang tanan niya nga panaad, kag dapat niya tumanon ang tanan niya nga panaad nga indi paghimuon ang pila ka butang. 5 Apang kon dumilian sia sang iya amay sang mabatian sang iya amay ang iya mga panaad ukon ang iya mga panaad nga indi paghimuon ang pila ka butang, indi na kinahanglan nga tumanon niya ini. Patawaron sia ni Jehova bangod gindumilian sia sang iya amay.+

6 “Apang kon may bana sia kag yara sia sa idalom sang iya panaad ukon nagsaad sia sing padasudaso sa iya kaugalingon 7 kag nabatian ini sang iya bana apang wala magpamalabag ang iya bana sang adlaw nga nabatian niya ini, dapat niya tumanon ang iya mga panaad ukon ang iya mga panaad nga indi paghimuon ang pila ka butang. 8 Apang kon gindumilian sia sang iya bana sang adlaw nga nabatian niya ini, indi na kinahanglan nga tumanon niya ang iya panaad ukon ang iya ginsaad sing padasudaso,+ kag patawaron sia ni Jehova.

9 “Apang kon magpanaad ang isa ka balo nga babayi ukon ang isa ka diborsiada, dapat niya tumanon ang tanan niya nga panaad.

10 “Apang kon ang babayi yara sa balay sang iya bana sang magpanaad sia ukon sang magpanaad sia nga indi paghimuon ang pila ka butang 11 kag mabatian ini sang iya bana apang wala sia magpamalabag ukon pasugtan sia sang iya bana, dapat niya tumanon ang tanan niya nga panaad ukon ang bisan ano nga panaad niya nga indi paghimuon ang pila ka butang. 12 Apang kon dumilian sia sang iya bana sa adlaw nga mabatian niya ang bisan ano nga panaad niya ukon ang iya panaad nga indi paghimuon ang pila ka butang, indi na kinahanglan nga tumanon niya ini.+ Indi na niya ini pagtumanon bangod nagpamalabag ang iya bana, kag patawaron sia ni Jehova. 13 Ang iya bana amo ang magdesisyon kon bala tumanon niya ukon indi ang iya panaad ukon panumpa nga dingutan ang iya kaugalingon.* 14 Apang, kon wala gid nagapamalabag ang iya bana pagligad sang pila ka adlaw, ginatugutan sia sang iya bana nga tumanon ang tanan niya nga panaad ukon ang tanan niya nga panaad nga indi paghimuon ang pila ka butang, kag dapat niya ini tumanon. Ginatugutan sia sang iya bana nga himuon ini bangod wala magpamalabag ang iya bana sang adlaw nga mabatian niya sia nga nagapanaad. 15 Apang kon magpamalabag ang iya bana pagligad sang pila ka adlaw sa tapos niya mabatian ini, manabat sia tungod sa sala sang iya asawa.+

16 “Amo ini ang mga pagsulundan nga ginsugo ni Jehova kay Moises tuhoy sa bana kag sa iya asawa, kag tuhoy sa amay kag sa iya pamatan-on nga anak nga babayi nga nagaistar sa balay sang iya amay.”