Binuhatan

14 Didto sa Iconio, magkaupod nga nagsulod si Pablo kag si Bernabe sa sinagoga sang mga Judiyo. Maayo gid sila maghambal amo nga madamo nga mga Judiyo kag mga Griego ang nangin tumuluo. 2 Apang ang mga Judiyo nga wala magtuo nagsugyot kag nag-impluwensia sa mga tawo* sang mga pungsod nga maakig batok sa mga kauturan.+ 3 Gani nagpabilin sila didto sing malawig nga tion kag ginpabakod sila ni Jehova* nga magpanaksi nga may kaisog. Gingamit niya sila nga maghimo sing mga tanda kag makatilingala nga mga butang bilang pamatuod sa mensahe nga ginabantala nila tuhoy sa iya wala tupong nga kaayo.+ 4 Apang, natunga ang mga tawo sa siudad. Ang iban dampig sa mga Judiyo apang ang iban dampig sa mga apostoles. 5 Sang ang mga tawo sang mga pungsod kag ang mga Judiyo upod ang ila mga manugdumala nagplano nga pakahuy-an sila kag batuhon,+ 6 ginsugid ini sa ila, gani nagpalagyo sila sa mga siudad sang Licaonia, Listra kag Derbe, kag sa mga lugar sa palibot.+ 7 Padayon nga ginbantala nila didto ang maayong balita.

8 Didto sa Listra, may isa ka tawo nga nagalumpagi lang kay nabun-ag sia nga lupog, gani indi sia makalakat. 9 Nagapamati sia samtang nagahambal si Pablo. Sang gintulok sia ni Pablo kag nakita niya nga may pagtuo sia nga mag-ayo,+ 10 nagsiling si Pablo sa mabaskog nga tingog: “Magtindog ka.” Gani nagtumbo sia kag naglakat.+ 11 Sang makita sang mga tawo ang ginhimo ni Pablo, nagsinggit sila sa Licaonianhon nga lenguahe: “Ang mga dios nagpakatawo kag nanaug sa aton!”+ 12 Gintawag nila si Bernabe nga Zeus, apang gintawag nila si Pablo nga Hermes, bangod sia ang pirme nga nagahambal. 13 Kay malapit sa gawang sang siudad ang templo ni Zeus, ang saserdote ni Zeus nagdala sing mga toro nga baka kag mga korona nga bulak sa mga gawang sang siudad kag luyag maghalad sang saserdote kag sang mga tawo kay Pablo kag kay Bernabe.

14 Apang, sang nabatian ini sang mga apostoles nga si Bernabe kag si Pablo, gingisi nila ang ila mga bayo kag nagdalagan pakadto sa mga tawo, kag nagsinggit sila: 15 “Ngaa ginahimo ninyo ini? Mga tawo man kami nga may mga kaluyahon pareho sa inyo.+ Ginabantala namon ang maayong balita sa inyo, agod bayaan ninyo ining wala pulos nga mga butang kag magsimba kamo sa buhi nga Dios, nga naghimo sang langit kag duta kag dagat kag sang tanan nga yara sa sini.+ 16 Sang una, gintugutan niya ang tanan nga pungsod nga himuon ang luyag nila,+ 17 apang paagi sa paghimo sing maayo ginpakita niya sa inyo kon sin-o sia,+ nga nagahatag sa inyo sing ulan halin sa langit kag sing bugana nga patubas sa nagakaigo nga tion,+ nga nagahatag sing bugana nga kalan-on kag nagapuno sang inyo tagipusuon sing kasadya.”+ 18 Bisan pa ginsiling nila ini, binudlayan sila nga punggan ang mga tawo nga maghalad sa ila.

19 Apang nag-abot ang mga Judiyo halin sa Antioquia kag sa Iconio kag ginhaylo nila ang mga tawo,+ kag ginbato nila si Pablo kag ginganoy sia pagua sa siudad, nga nagahunahuna nga patay na sia.+ 20 Apang, sang nagtipon sa palibot niya ang mga disipulo, nagtindog sia kag nagsulod sa siudad. Sang masunod nga adlaw nagkadto sila ni Bernabe sa Derbe.+ 21 Sang nabantala na nila ang maayong balita sa amo nga siudad kag nabuligan ang madamo nga tawo nga mangin disipulo, nagbalik sila sa Listra, sa Iconio, kag sa Antioquia. 22 Ginpabakod nila ang mga disipulo*+ didto, kag ginlaygayan sila nga magpakalig-on sa pagtuo kag nagsiling sila: “Dapat kita magsulod sa Ginharian sang Dios paagi sa madamo nga kabudlayan.”+ 23 Nagtangdo man sila sing mga gulang sa tagsa ka kongregasyon.+ Nagpangamuyo sila kag nagpuasa,+ dayon ginsalig nila ining mga gulang kay Jehova,* nga ila gintuuhan.

24 Dayon nagkadto sila sa Pisidia kag nag-abot sa Pamfilia,+ 25 kag sa tapos nila mabantala ang pulong sang Dios sa Perga, nagdulhog sila sa Atalia. 26 Halin didto nagpanakayon sila pakadto sa Antioquia. Diri sila sadto ginsalig sang mga kauturan sa Dios agod pakitaan sila sang wala tupong nga kaayo para sa buluhaton nga ila karon nahimo sing bug-os.+

27 Pag-abot nila sa Antioquia, gintipon nila ang kongregasyon kag ginsugid nila sa ila ang madamo nga butang nga ginhimo sang Dios paagi sa ila. Ginsugid man nila sa ila nga ginbuksan niya para sa mga pungsod ang dalan agod magtuo sila.*+ 28 Gani nagpabilin sila sing malawig nga tion upod sa mga disipulo.