Roma

10 Mga kauturan, ang handum sang akon tagipusuon kag ang akon ginaampo sa Dios tungod sa ila amo nga maluwas sila.+ 2 Mapamatud-an ko nga may kakugi sila sa Dios,+ apang indi suno sa sibu nga ihibalo. 3 Kay wala nila ginasunod ang talaksan sang Dios sa pagkamatarong+ bangod wala nila mahibaluan kon paano ginapakamatarong sang Dios+ ang tawo, kundi nagapanikasog sila nga pamatud-an ang ila kaugalingon nga matarong.+ 4 Kay ang Cristo amo ang katapusan sang Kasuguan,+ agod ang tagsatagsa nga nagatuo sa iya makatigayon sang pagkamatarong.+

5 Kay nagsulat si Moises tuhoy sa pagkamatarong paagi sa Kasuguan: “Ang tawo nga nagahimo sini magakabuhi tungod sini.”+ 6 Apang amo ini ang ginasiling sang Kasulatan tuhoy sa pagkamatarong nga resulta sang pagtuo: “Indi ka magsiling sa imo tagipusuon,+ ‘Sin-o ang makayab sa langit?’+ kon sayuron, sin-o ang makayab sa langit sa pagdala sa Cristo sa idalom, 7 ukon, ‘Sin-o ang manaug sa kadadalman?’+ kon sayuron, sin-o ang manaug sa pagdala sa Cristo sa ibabaw halin sa mga patay.” 8 Apang ano ang ginasiling sang Kasulatan? “Ang pulong sang Dios malapit sa imo, sa imo mismo baba kag sa imo tagipusuon”;+ kon sayuron, “ang pulong” nga ginabaton tungod sa pagtuo, nga aton ginabantala. 9 Kay kon ginabantala mo ini nga pulong sa imo baba, nga si Jesus amo ang Ginuo,+ kag nagatuo ka sa imo tagipusuon nga ginbanhaw sia sang Dios, maluwas ka. 10 Kay ginapakamatarong ang tawo nga may pagtuo sa iya tagipusuon, apang paagi sa iya baba nga nagabantala sini nga pulong,+ matigayon niya ang kaluwasan.

11 Kay ang kasulatan nagasiling: “Wala sing bisan sin-o nga nagatuo sa iya ang mapaslawan.”+ 12 Wala sing kinatuhayan sa ulot sang Judiyo kag sang Griego,+ kay may isa lang ka Ginuo sa tanan, nga nagahatag sing madamo nga pagpakamaayo* sa tanan nga nagapanawag sa iya. 13 Kay “ang tagsatagsa nga nagatawag sa ngalan ni Jehova* maluwas.”+ 14 Apang, paano sila magtawag sa iya kon wala sila nagatuo sa iya? Kag paano sila magtuo sa iya kon wala sila makabati tuhoy sa iya? Kag paano sila makabati kon wala sing magbantala? 15 Paano sila magbantala kon wala sila ginpadala?+ Subong sang nasulat na: “Matahom ang mga tiil sang nagabantala sing maayong balita tuhoy sa maayo nga mga butang!”+

16 Apang, indi ang tanan nagtuman sa maayong balita. Kay nagasiling si Isaias: “Jehova,* sin-o ang nagtuo sa butang nga nabatian halin sa amon?”*+ 17 Gani ang tawo nagatuo lang pagkatapos niya mabatian ang pulong.+ Kag mabatian ang pulong kon may isa nga nagabantala tuhoy sa Cristo. 18 Apang buot bala silingon nga wala nila mabatian ang pulong? Indi, kay ang mga tawo “sa bug-os nga duta nakabati sini, kag ang pinakamalayo nga napuy-an nga duta nakabati sang ila mensahe.”+ 19 Buot bala silingon nga wala makahibalo ang Israel?+ Indi, nakahibalo sila. Nagsiling anay si Moises: “Paimunon ko kamo paagi sa katawhan sang iban nga pungsod; paakigon ko kamo paagi sa buangbuang nga pungsod.”+ 20 Kag maisog nga nagsiling si Isaias: “Nakita ako sang mga tawo nga wala nagapangita sa akon;+ nakilala ako sang mga tawo nga wala nagapamangkot tuhoy sa akon.”+ 21 Apang nahanungod sa Israel nagsiling sia: “Gin-untay ko ang akon kamot sa bug-os nga adlaw sa katawhan nga indi matinumanon kag matig-a sing tagipusuon.”+