Binuhatan

12 Sa amo nga tion ginhingabot ni Herodes* nga hari ang pila ka miembro sang kongregasyon.+ 2 Ginpatay niya paagi sa espada+ si Santiago nga utod ni Juan.+ 3 Sang nakita niya nga nagpahamuot ini sa mga Judiyo, gindakop man niya si Pedro. (Natabo ini sang Kapiestahan sang Tinapay nga Wala sing Lebadura.)+ 4 Gindakop niya sia kag ginbilanggo.+ Apat ka grupo sang mga soldado ang bulosbulos nga nagbantay sa iya, nga ang tagsa ka grupo may apat ka soldado, kay plano niya nga dalhon* sia sa atubangan sang katawhan pagkatapos sang Paskua.* 5 Samtang yara si Pedro sa bilangguan, ang kongregasyon hanuot nga nagpangamuyo sa Dios para sa iya.+

6 Sang gab-i antes ipaatubang ni Herodes si Pedro sa mga tawo, nagakatulog si Pedro nga nagapos sing duha ka kadena sa tunga sang duha ka soldado, kag may mga guardia nga nagabantay sa puertahan sang bilangguan. 7 Apang ang anghel ni Jehova* nagatindog didto,+ kag nagsilak ang kapawa sa selda. Ginpikpik niya si Pedro sa kilid kag ginpukaw niya sia, nga nagasiling: “Dali, magbangon ka!” Kag nahulog ang mga kadena halin sa iya mga kamot.+ 8 Nagsiling ang anghel sa iya: “Maghimos ka* kag isuksok ang imo sandalyas.” Kag ginhimo niya ini. Dayon nagsiling ang anghel sa iya: “Isul-ob ang imo kunop, kag magsunod ka sa akon.” 9 Kag nagsunod si Pedro sa anghel pagua sa bilangguan, apang wala sia makahibalo nga matuod ang ginhimo sang anghel. Ang matuod, abi niya nakakita sia sang palanan-awon. 10 Naglabay sila sa nahauna kag sa ikaduha nga grupo sang mga guardia kag nakalab-ot sila sa gawang nga salsalon nga nagapadulong sa siudad, kag nagbukas ini. Sang nakagua sila kag nagalakat sa dalan, nagbiya sa iya ang anghel. 11 Sang nakamarasmas na si Pedro, nagsiling sia: “Karon nahibaluan ko na nga ginpadala ni Jehova* ang iya anghel kag ginluwas niya ako sa kamot ni Herodes kag sa tanan nga ginapaabot sang mga Judiyo nga matabo sa akon.”+

12 Sang narealisar ini ni Pedro, nagkadto sia sa balay ni Maria nga iloy ni Juan nga ginatawag Marcos,+ diin madamo nga disipulo ang nagtipon kag nagpangamuyo. 13 Sang nagpanuktok sia sa puertahan, ginkadtuan ini sang isa ka alagad nga babayi nga si Roda agod tan-awon kon sin-o ang nagapanuktok. 14 Sang nakilala niya ang tingog ni Pedro, nalipay gid sia gani wala niya mabuksan ang puertahan, kundi nagdalagan sia sa sulod sang balay kag ginsugid sa ila nga si Pedro yara sa puertahan. 15 Nagsiling sila sa iya: “Nagbuang ka na.” Apang nag-insister gid sia nga matuod ini. Nagsiling sila: “Anghel niya ina.” 16 Apang padayon nga nagpanuktok si Pedro. Sang ginbuksan nila ang puertahan, nakita nila sia kag nakibot sila. 17 Apang ginsinyasan niya sila nga maghipos kag dayon ginsugiran niya sila sing detalyado kon paano sia ginpagua ni Jehova* sa bilangguan, kag nagsiling sia: “Isugid ninyo ini kay Santiago+ kag sa mga kauturan.” Dayon naglakat sia kag nagkadto sa iban nga lugar.

18 Sang adlaw na, nagkinagula ang mga soldado kon ano ang natabo kay Pedro. 19 Ginpangita sia sing maayo ni Herodes kag sang wala sia makita, gin-imbestigar niya ang mga guardia kag nagsugo sia nga silutan sila.+ Dayon halin sa Judea, nagdulhog si Herodes sa Cesarea kag nagpabilin sia didto sa malawig nga tion.

20 Naakig si Herodes sa mga tawo sa Tiro kag sa Sidon. Gani nagsugtanay sila nga magkadto sa iya. Sang nahaylo nila si Blasto, nga manugdumala sa panimalay sang hari, nagpangabay sila nga makig-areglo sa hari, bangod ang ila pungsod nagakuha sing kalan-on sa pungsod sang hari. 21 Isa ka adlaw, sang nagtilipon ang katawhan, nagsuksok si Herodes sing harianon nga bayo kag nagpungko sa lingkuran nga hukmanan kag nagpamulongpulong sa ila. 22 Ang nagtipon nga mga tawo nagsinggit: “Tingog ina sang isa ka dios, kag indi iya sang tawo!” 23 Ginsilutan sia gilayon sang anghel ni Jehova* kag nagmasakit sia, bangod wala niya ginhatag ang himaya sa Dios, kag gin-ulod sia kag napatay.

24 Apang ang pulong ni Jehova* padayon nga naglapnag kag nagdamo pa ang mga tumuluo.+

25 Sang natapos ni Bernabe+ kag ni Saulo ang pagdala sing bulig sa Jerusalem,+ nagbalik sila sa Antioquia kag gin-upod nila si Juan,+ nga ginatawag man nga Marcos.