3 Juan

1 Halin sa tigulang nga lalaki* para sa hinigugma nga si Gayo, nga ginahigugma ko gid.

2 Hinigugma nga utod, ginapangamuyo ko nga padayon nga mangin maayo ang imo kahimtangan kag panglawas, subong nga nagauswag ka* sa karon. 3 Kay nalipay gid ako sang nag-abot ang mga kauturan kag nagpamatuod nga ginahuptan mo ang kamatuoran, kag padayon ka nga nagalakat sa sini.+ 4 Wala na sang makapahalipay sa akon* sangsa sini: Ang mabatian ko nga ang akon mga anak nagalakat sa kamatuoran.+

5 Hinigugma nga utod, matutom ka sa bisan ano nga hilikuton nga ginahimo mo para sa mga kauturan, bisan pa indi mo sila kilala.+ 6 Ginpamatud-an nila sa kongregasyon ang imo gugma. Kon maglakat na sila, palihug buligi sila sa paagi nga makapahalipay sa Dios.+ 7 Kay nagalakat sila tungod sa iya ngalan, kag wala sila nagakuha sang bisan ano nga butang+ halin sa mga tawo sang mga pungsod. 8 Gani, obligado kita nga abiabihon ang amo sina nga mga tawo,+ agod mangin mga masigkamanugpangabudlay kita sa kamatuoran.+

9 May ginsulat ako sa kongregasyon, apang wala ini ginbaton nga may pagtahod+ ni Diotrefes, nga luyag magpulupangulo sa ila.+ 10 Gani kon mag-abot ako dira, ipatalupangod ko ang iya mga ginahimo nga pagpalapta sang malain nga sugilanon batok sa amon.*+ Indi pa sia kontento sa sini, wala man niya ginaabiabi nga may pagtahod ang mga kauturan;+ kag ang mga luyag mag-abiabi sa ila, ginatinguhaan niya nga punggan kag sikwayon sa kongregasyon.

11 Hinigugma nga utod, indi pag-iluga ang malain, apang iluga ang maayo.+ Ang isa nga nagahimo sang maayo naghalin sa Dios,+ apang ang isa nga nagahimo sang malain wala makakita sa Dios.+ 12 Maayo ang ginasugid nila tanan tuhoy kay Demetrio kag ginapamatud-an ini sang kamatuoran. Sa katunayan, nagapamatuod man kami tuhoy sa iya, kag nakahibalo ka nga matuod ini.

13 Madamo pa kuntani ako sang isiling sa imo, apang indi ko luyag nga isulat lang ini. 14 Kay nagalaum ako nga makigkita kag makighambal sa imo sa gilayon.

Kabay nga may paghidait ka.

Ang mga abyan nagapangamusta sa imo. Ipalab-ot man ang akon pangamusta sa tagsa ka abyan.