Gikan sa Amon mga Bumalasa

Gramatika sang Mamalaybay

Naluyagan ko ang pagbasa sang “Tall Sail­ing ­Ships Cap­ti­vate Syd­ney” (September 8, 1988). Apang, ginabatyag ko nga dapat ko ipatalupangod sa inyo ang sala sa ginbalikwat gikan sa binalaybay ni John Mase­field nga “Sea-Fever” nga ginbutang sa kahon. Dapat amo sini: “I must go down to the seas ­again.” Ginlakip ko ang kopya sang ginkuhaan nga materyal.

D. S., Inglaterra

Ang ginkuhaan namon sang binalaybay nga wala sing “go” amo ang Britaniko nga “Oxford Dictionary of Quotations” (Oxford University Press) kag ang “Familiar Quotations,” ni John Bart­lett. Ang awtoridad nagpahibalo sa amon nga ang orihinal nga binalaybay nga wala sing “go” napaidalom sa ginatawag nga “po­et­ic li­cense.”—ED.

Napaslawan nga Tagipusuon

Bag-o ko lang mabasa ang “Paano Ko Malandas ang Napaslawan nga Tagipusuon?” (Pebrero 8, 1988) Ang tanan nga ginsiling ninyo naaplikar sa akon. Ginbugto sang akon nobyo ang amon suod nga pag-abyanay. Naghulag sia suno gid sa ginsiling sang artikulo. Una, ginsikway niya ako subong iya nobya, nga subong bala madula lamang ang problema. Sang wala ini madula, naglingkod lamang sia kag ginpaathag ang kahimtangan. Sa pila ka adlaw, indi ko mapasibu ang akon kaugalingon sa ideya, apang karon, labi na sa tapos mabasa ang artikulo, naumpawan ako, bisan pa indi ako malipayon nahanungod sini. Narealisar ko na karon nga indi ako ang una, ukon ang katapusan, sa pag-eksperiensia sini.

C. V., Brazil

Nakalab-ot ako sa punto nga kinahanglan ko ang bulig sa sini nga topiko. Nakighambal ako sa akon iloy kag sa isa ka abyan, kag pareho sila nagsiling nga buangbuang ako. Nagsiling sila nga magaligad ini. Apang suno sa paglaragway sang Magmata!, napukan gid ako kag napaslawan. Daw subong bala nga wala na sing iban pa nga importante sa kabuhi. Ginhatag sang Magmata! ang bulig nga ginakinahanglan ko labaw sa bisan ano.

M. M., Portugal

Trese anyos ako sadto. Nagdugay ini sing isa ka tuig kag tunga. Nasaklaw gid ako kag naakig nga gindumtan ko ang bisan sin-o nga lalaki. Wala ako nagapakighambal sa bisan sin-o nga lalaki luwas kon kinahanglan gid, ukon luwas kon may asawa sia. Nakita ko karon nga sayop ako. Ang inyo artikulo nakabulig sa akon sa paghangop nga siguro may isa nga magaabot nga mangin mas maayo nga bana.

J. W., Estados Unidos

Ginabatyag ko nga karon yara ako sa mas maayo nga kahimtangan sa emosyon, sa hunahuna kag sa espirituwal sa pagpangita sing tiayon. Maathag nga ginpakita sang artikulo nga wala sing mahapos kag indi masakit nga paagi sa pagtapos sang pagkanakagon. Ini kag ang may kaangtanan nga mga artikulo makahimo sing daku sa pagbulig sa mga pamatan-on agod mangin mas maalam sa pagpakig-angot sa ila pagkanakagon, paagi sa amo ginapadiutay ang mga kasakit sa tagipusuon kag kasubo nga nagaresulta sa pag-asawahay bangod sang simpatiya.

A. U. I., Nigeria

Pagpasayod

Suskritor ako sa inyo mga magasin, bisan pa indi isa sang mga Saksi ni Jehova. Luyag ko pasalamatan kamo sa mga artikulo nga inyo ginabalhag. Mabudlay kag delikado ang akon trabaho sa isa ka ospital sang sikyatriya. Nagaeskwela ako sa tatlo ka tuig nga kurso sa sikyatriya, kag sang nagligad lamang nga pila ka adlaw, naglingkod ako para sa akon nahauna- kag ikaduha-nga-tuig nga eksamin. Ang mga artikulo tuhoy sa pasayod sa Pebrero 8, 1988, nga guwa sang Magmata! mapuslanon gid nga bulig sa akon eksamin sa sosyolohiya. Ginpasad ko gid ang akon paghanda sa inyo magasin! Maayong mga resulta ang akon natigayon. Salamat sa liwat, kag nagapanginbulahan ako sa inyo labing makawiwili nga mga magasin.

P.V., Italya