Ang Pagtamod sang Biblia

Dapat Bala Gamiton sang mga Cristiano ang Rosaryo?

“SI Maria kag ang Rosaryo amo ang labing maayo nga paagi sa pagpalapit sa Labing Gamhanan nga Dios sa pangamuyo.”—Jean.

“Kon kinahanglan mo ang bulig ni Maria, matigayon ini sing labing epektibo paagi sa paggamit sing Rosaryo. Indi gid ako maglakat kon wala ini!”—Kevin.

“Gintudluan kami nga dapat ka mangamuyo sa Dios paagi kay Maria.”—Jeannine, isa anay ka Katoliko nga madre.

May sadsaran gid bala para sa sinang daku nga pagsalig sa Rosaryo? Ginrekomendar bala sang Dios, ni Cristo, ukon ni Maria nga gamiton ini? Ano ang ginasiling sang maragtas kag sang Sagrado nga Pulong sang Dios nahanungod sini?

Ang kalabanan nga tawo nga nagagamit sing Rosaryo nagapati nga naghalin ini sa Cristianismo. Apang, ginapakita sang maragtason nga ebidensia nga ang batasan sa pagsaulo sang pangadi kag pag-isip sini sa uyas sang rosarito ginpetsahan sa wala pa magsugod ang Cristianismo. Nagakomento nahanungod sa ginhalinan sang Rosaryo, ang The World Book Encyclopedia nagareport: “Ang mga rosarito sa pangamuyo may dumaan nga ginhalinan, kag mahimo nga gingamit primero sang mga Budhista. Ginagamit ini sang mga Budhista kag mga Muslim sa ila mga pangamuyo.” Ginakilala sang The Catholic Encyclopedia nga ang mga rosarito sa pangamuyo pamilyar gid anay sa mga indi Cristiano sa sulod sang mga siglo kag madugay na nga ginagamit antes gin-adoptar sang Iglesia Katolika ang Rosaryo.

Si Maria kag ang Rosaryo

Si Maria ginatawag nga “Reyna sang Balaan nga Rosaryo.” Sia ang naglaygay sa mga Katoliko nga “Ipangadi ang Rosaryo.” Ang labing kinaandan nga Rosaryo, “Ang Rosaryo ni Birhen Maria nga Bulahan,” gin-asoy pabalik sa ika-12 nga siglo C.E. kag ginpauswag sang ika-15 nga siglo. Nagaupdanay ang Rosaryo kag si Maria, bangod ginakabig sia nga amo ang promotor sang Rosaryo kag sia ang ginahatagan sing daku nga importansia sa pangadi.

Ngaa ginapadaku gid si Maria kag ang Rosaryo? Bilang sabat ginatudlo sang Cristianong mga awtoridad ang ginsiling ni anghel Gabriel sa iya: “Magkalipay ka, O nahamut-an sing daku nga anak nga babayi! Ang Ginuo kaupod nimo.” (Lucas 1:28, The New American Bible) Nahangpan ni Maria nga ang iya bahin sa pagpanamkon kag pagbun-ag kay Jesus, bisan pa importante, diutay lamang kon ipaanggid sa ginbayaw nga posisyon nga batunon sang Anak nga imabdos niya. Nahanungod sa iya, si anghel Gabriel padayon nga nagsiling: “Mangin daku ang iya dignidad, kag tawgon sia nga Anak sang Labing Mataas. Ang Ginuong Dios magahatag sa iya sang trono sang iya amay. . . Kag ang iya paggahom wala sing katapusan.”—Lucas 1:32, 33, NAB.

Talupangda nga ang igtalupangod isentro, indi kay Maria, kundi sa Anak nga ipanamkon niya—kay Jesus. Sia amo ang isa nga mangin daku kag magagahom subong Hari. (Filipos 2:9, 10) Wala sing ginsiling nahanungod sa pagtangdo kay Maria subong “Reyna sang Balaan nga Rosaryo.” Apang, nakabaton gid man si Maria sing pagpakamaayo; nangin iloy sia ni Jesus.—Lucas 1:42.

Si Maria indi ambisyusa nga babayi, nga luyag magbantog. Malipayon sia kag kontento na nga mangin mapainubuson nga sumilimba sang Labing Mataas nga Dios. Ang iya malum-ok kag mapinasakupon nga disposisyon ginpakita paagi sa iya sabat kay anghel Gabriel sang sia nagsiling: “Ako ulipon [alagad] sang Ginuo.” (Lucas 1:38, The Jerusalem Bible) Sa bug-os niya nga kabuhi, si Maria napamatud-an nga isa ka sinsero nga babayi sang pagtuo, mahigugmaon sa pagkamatarong, maunungon kag matutom nga disipulo ni Jesucristo nga nagbuylog sa mga masigkasumilimba sa pagpangamuyo sing mapainubuson sa Labing Gamhanan nga Dios. Ang dumaan nga mga Cristiano nagpangamuyo kaupod ni Maria, indi sa iya.—Binuhatan 1:13, 14.

Pangamuyo kag ang Rosaryo

Ginatamod sang mga Cristiano ang pangamuyo subong isa ka labing bilidhon nga aman sang Manunuga—isa gid ka dulot nga dapat pakabahandion sing daku. Ang pangamuyo isa ka matinahuron nga pagpakigsugilanon sa Labing Gamhanan nga Dios. Dapat sini ipaalinton ang aton nasulod nga mga balatyagon kag tinagipusuon nga mga panghunahuna. “Ang pangamuyo dapat mangin ekspresyon sang pagpakig-abyan sang isa sa Dios,” siling sang New Catholic Encyclopedia. Ang pagpangabay sa Dios indi gid dapat mangin walay pulos nga rutina, ukon estrikto nga sundon naton ang paborito nga linya sang ginsaulo nga mga tinaga.—Mateo 6:7, 8.

Nakabulig bala ang Rosaryo sa sinang makahulugan nga mga pangamuyo? Si Jeannine nagsiling nga ang pagpangadi sang “Maghimaya Ka Maria” sa Rosaryo “nangin sulitsulit na lamang.” Ang pagsulitsulit sing amoamo gihapon nga mga tinaga sa Rosaryo wala nagpasuod sa iya sa Dios. Siling sang isa pa Katoliko nga madre anay, nga si Lydia: “Wala ako sing nakita nga makatudlo sa Pagrosaryo. Mas gusto ko pa nga magbasa sing mga libro tuhoy sa relihion.” Ang sulitsulit nga mga pangadi wala gid sing pulos, kay ang Dios nagsaad: “Sa wala pa sila magpanawag, ako magasabat.” (Isaias 65:24, NAB; Mateo 6:7, 8, 32) Ginaapresyar kag ginasabat sang Labing Gamhanan nga Dios ang mga pangabay nga ginabungat upod ang husto nga motibo kag nagahalin sa bunayag kag hanuot nga tagipusuon. Ang Rosaryo wala nagabulig sa isa ka tawo nga makapalapit sa Dios upod ang makahulugan kag tinagipusuon nga mga pangamuyo.—Salmo 119:145; Hebreo 10:22.

Kon Paano Magpalapit sa Dios

Ang lamang kalahamut-an nga paagi sa pagpalapit sa “Nagapamati sang pangamuyo” amo ang paagi kay Jesucristo. (Salmo 65:2) Si Jesus maathag nga nagtudlo: “Ako amo ang Dalan, ang Kamatuoran kag ang Kabuhi. Wala sing nagaabot sa Amay kundi paagi sa akon.” (Juan 14:6, JB) Wala gin-agda si Maria nga makigbahin sa sining responsabilidad kag mag-alagad subong manugpatunga. Kon ginhatagan si Maria sining pinasahi nga pribilehiyo, kuntani ginpahibalo ini ni Jehova.—Hebreo 4:14-16; 1 Juan 2:1, 2.

Ang Rosaryo kag ang pagpangadi sang ginsaulo nga mga pangamuyo naghalin sa guwa sang nagapangangkon nga Cristianong mga kadutaan. Ang pagpangamuyo kay Maria nagasupak sang gintudlo ni Jesus, nga “wala sing nagaabot sa Amay kundi paagi sa [iya].” Busa, ang Rosaryo kag si Maria indi ang paagi sang Dios sa pagpalapit sa Iya sa pangamuyo.