“Ang Ginalagas sang Manok sa Ulanan...”

Sang koresponsal sang Magmata! sa Nigeria

SANG nabaton sang amon magamay nga kongregasyon sa nabagatnan nga Nigeria ang suplay sini nga tract nga Kingdom News Num. 34, nga ginpanagtag sa bug-os nga kalibutan, nalangkag kami nga dalhan sing mga kopya ang tanan nga bahin sang amon teritoryo. Indi yadto mahapos nga hilikuton. May mga kampo sang kaumhan sa amon teritoryo, nga nagatanom sing balinghoy, ubi, kag iban pa nga kalan-on. Ining mga kampo nahamtang sa tunga sang tropikal nga rain forest. Ang pagkadto sa sini mabudlay apang indi imposible. Ti, kabubut-on sang Dios nga mapalab-utan ang tanan nga sahi sang tawo sing maayong balita, bisan ang mga mangunguma sa kagulangan.​—⁠1 Timoteo 2:​3, 4.

Gani, sang Oktubre 16, 1995, 18 sa amon ang naghalin sang 7:30 s.a. padulong sa isa ka kampo nga uma nga Abomgbada, mga 3.5 kilometros ang kalayuon. May mga alagyan nga dapat kami mag-ubog sa sapa. Ang tubig tagahawak.

Agod makadtuan ang isa pa ka kampo sa amo man nga adlaw, dapat kami mag-ubog sa mas daku nga sapa. Sa sining tion, apat lamang ka utod nga lalaki kag isa ka utod nga babayi ang nagtabok. Ang iban nagpabilin.

Nasapwan namon ang madamo nga tawo nga luyag mamati sadto nga adlaw. Nagdugang sa amon kalipay ang gintawag namon nga ang amon masiot nga bahin. Samtang nagapanlakaton kami, nagpamupo kami kag nagkaon sing pila ka prutas nga nagatubo sa talon. Nakapakigsugilanon kami sa maabiabihon nga mga mangunguma nga nag-apresyar sa amon panikasog nga makadtuan sila; ginhatagan nila kami sing mga kahil agod mabulong ang amon kauhaw. Nasugilanon namon ang mga 250 ka tawo, ginpanagtag ang tanan nga tract nga dala namon.

Isa ka Daku nga Hangkat

Ang daku gid nga hangkat natabo duha ka adlaw sang ulihi. Sa dose kilometros nga kalayuon nahamtang ang Ose Anasi, isa ka kampo nga ayhan wala pa gid malab-ot paagi sa organisado nga pagbantala. Nangalag-ag ang iban sa pagkadto didto. Ang pagtabok sa Suba Urasi makatalagam, kag madamo sa amon ang indi makahibalo maglangoy. Mahimo makatalagam ang pag-ubog bangod sa matalom nga mga tuod sang kahoy. Madanlog ang lunangon nga mga bahin, kag mahimo masamaran ang isa kon madanlog sia. Ang iban nga ginhimo-himo nga mga taytay indi mabakod. May mga man-ug, mga buaya, kag mga sapa nga madamo sing linta.

Apang 16 sa amon ang namat-od nga maglakat. Naglakat kami sing mga 1.5 kilometros antes nagsakay sa bangka agod tabukon ang masulog kag makatalagam nga Suba Urasi. Agod makalab-ot sa bangka, kinahanglan manaug kami sa dulhugon kaayo nga banglid. Tingulan sadto, kag ang suba nagaawas. Ang duta sa bug-os nga lugar nagalunang; kag kon tingulan, madanlog ini kaayo. Sang pagpanaug namon sa bangka, namutikan namon nga ang alagyan nangin isa ka sapa nga isa ka metros ang kadalumon sa iban nga bahin. Didto nagsugod ang amon daku nga mga problema.

Gin-ubog namon ining sapa nga alagyan sa sulod sang 30 minutos. Tuman kadanlog sang duta amo nga madamo sa amon ang natumba sa lunangon nga tubig, nagkalabasa ang amon mga Biblia, mga magasin, kag mga tract. Masadya kami, amo nga kon may madanlog, nagakadlaw kami tanan, lakip na ang natumba.

Sang natabok namon ang magamay nga sapa, may nagtapik nga mga linta sa amon mga batiis. Ang isa ka utod nga babayi nga gintapikan sing linta sa batiis nagsiyagit. Nagsinggitan pa sia gihapon sa tapos nga makakas ang linta. Ginkadlawan man namon ini subong bahin sang pagpasimpalad, kag nagpadayon kami.

Sang pagtabok namon sa isa pa ka sapa, namat-od ang isa ka utod nga lalaki nga indi mag-ubog subong sa ginhimo sang iban kundi maglumpat. Nalumpat niya ang tubig apang wala sia makalikaw sa lunang. Nakadanlog sia, kag naghapaon sa lunang. Nagtindog sia, gin-usisa ang iya kaugalingon, nakita nga wala sia sing samad, kag dayon nagsiling: “Wala problema; bahin ini sang eksperiensia.” Nadumduman namon nga si apostol Pablo nakaeksperiensia man sing “mga katalagman sa mga suba,” ayhan mas grabe pa sa naagihan namon.​—⁠2 Corinto 11:⁠26.

Gintabok namon ang ginhimo-himo nga taytay, nga makatalagam tulukon, apang natabok ini namon tanan. Pagkatapos sadto nagdanlog pa gid ang duog, amo nga pirme kami nagakatumba.

May upod kami nga isa ka regular payunir nga utod nga lalaki nga halos 70 anyos ang edad. Sadto nga aga nagkadto sia agod magpakamaayo sa amon paglakat. Apang pagkatapos namon pangamuyo para sa pagpakamaayo ni Jehova, namangkot sia: “Paano ako makapabilin samtang kamo magguwa sa pagbantala?” Namilit sia nga mag-upod, kag wala sing nakakumbinsi sa iya nga magpabilin. Nagsiling sia nga si Jehova mangin kaupod niya. Gani nag-upod sia.

Sang nagkayaon sia sa madanlog nga duta, wala sing nagkadlaw. Nabalaka, namangkot kami kon nasakitan sia. Sia nagsabat: “Wala. Ginhinayhinayan ko lang ang pagkatumba agod indi masakitan ang duta.” Nagkadlaw kami kag nadumduman namon ang Isaias 40:​31, nga nagasiling nga “ang mga nagalaum kay Jehova magabag-o sang ila kusog.”

Mainapresyahon nga mga Manugpamati

Nakaabot gid man kami sa amon kaladtuan. Makapalig-on gid ang reaksion sang mga tawo. Ang isa ka tawo hinadlukan sang makita niya kami nga nagapadulong sa iya payag, apang sang mahibaluan niya kon sin-o kami, sia nagsiling: “Nabudlayan ako magpati nga naglakbay kamo sing mabudlay agod lamang bantalaan kami. Ginaapresyar gid namon ini.” Nagsabat kami sing isa ka lokal nga hulubaton: “Ang ginalagas sang manok sa ulanan importante sa iya.” Nahangpan ini sang tawo.

Ang isa pa ka mangunguma nagsiling: “Kon ang pagbantala nakalab-ot sa sining duog, buot silingon nga ang kaluwasan naglab-ot sa amon.” Madamo ang may mga pamangkot, nga ginsabat namon. Ginpangabay nila kami nga magbalik, kag nangako kami nga mabalik.

Sa Ose Anasi nakapahamtang kami sing mga 112 ka tract​—⁠tanan nga dala namon. Sing tingob, nakabantala kami sa mga 220 ka tawo.

Sang pagpauli namon, nagtalang kami. Ang pagbalik sa inagihan namon sa kampo magalawig sing isa ka oras kag tunga, kag nagahinampot na ang kagab-ihon. Nangamuyo kami kay Jehova kag namat-od nga magpadayon, bisan pa nagakahulugan ini nga mag-ubog kami sa makatalagam nga sapa nga tagahawak ang kadalumon.

Sang nakatabok na kami, nasapwan namon ang husto nga dalan kag nakibot kami sang madiskobrehan namon nga yara na kami sa ikap-at sang lima ka bahin sang dalan pauli. Ang pagtalang namon nangin isa gali ka paglaktod nga nagbuhin sang amon paglakbay sing dimagkubos isa ka oras! Siempre, nalipay kami tanan kag nagpasalamat kay Jehova. Samtang nagatunod ang adlaw, nakapauli kami​—⁠kapoy kag gutom apang malipayon gid.

Sang ulihi, samtang ginahambalan namon ang mga eksperiensia sadto nga adlaw, ang isa ka utod nga babayi nagsiling: “May nabatian na ako tuhoy sa lugar nga aton ginkadtuan, gani nahibaluan ko nga madanlog ako. Kon indi lang tungod sa maayong balita, indi gid ako magkadto sa sining lugar, indi bisan pa ihatag sa akon ang tanan nga manggad sa kalibutan!” Ang isa ka utod nga lalaki nagsiling: “Nalab-ot gid man sing maayong balita ang Ose Anasi!”

[Retrato sa pahina 17]

Pagtabok sa lokal nga taytay

Gintabok namon ang madamo nga sapa nga may mga linta

Sa ubos sining makatalagam nga dalan, nagsakay kami sa bangka agod tabukon ang Suba Urasi