Paano Ko Malandas ang Kabudlayan kon Indi Maayo ang Akon Panglawas?

“ANG himaya sang mga pamatan-on amo ang ila kusog,” siling sang Hulubaton 20:29. (Biblia sang Katilingban sang mga Kristiano) Kon nagamasakit ka ukon may kasablagan sa lawas, mahimo magabatyag ka nga wala naaplikar sa imo ini nga kasulatan. Apang maaplikar gid ini sa imo! Ang matuod, nalandas sang madamo nga mga pamatan-on ang daku gid nga mga kabudlayan tungod sa kasablagan kag wala nagaayo nga mga balatian. Gin-interbyu sang Magmata! ang apat sa sini nga mga pamatan-on.

Si Hiroki nga taga-Japan, may cerebral palsy kutob sa iya pagkabun-ag. “Nagalungayngay ang akon ulo kay indi madala sang akon liog, kag indi ko makontrol ang akon mga kamot,” siling niya. “Kinahanglan ko pirme ang bulig sang iban.”

Si Natalie kag ang iya manghod nga si James sa Bagatnan nga Aprika, ginbun-ag nga mga inano. Subong man, si Natalie may scoliosis, nga nagakurba ang taludtod. “Apat na ka beses nga gin-operahan ako sa taludtod,” siling niya, “kag bangod nagakurba ang akon taludtod, maluya ang akon baga.”

Si Timothy nga taga Britanya, nasayasat nga may chronic fatigue syndrome sang 17 anyos sia. “Wala pa gani duha ka bulan,” siling niya, “ang akon mapagros kag aktibo nga lawas nangin maluya kag indi na gani ako makatindog.”

Si Danielle nga taga-Australia, nasayasat nga may diabetes sang 19 anyos sia. “Bangod ang mga sintoma sang diabetes indi bal-anon,” siling niya, “indi mahibaluan sang mga tawo kon daw ano ini kalubha. Ang matuod, mahimo ako mapatay bangod sa diabetes.”

Kon nagaantos ikaw sing balatian ukon kasablagan sa lawas, walay duhaduha nga mapalig-on ka sang mga ginsiling nanday Hiroki, Natalie, Timothy, kag Danielle. Kon maayo ang imo panglawas, mahimo makabulig ang ila ginsiling nga mahangpan mo pa gid ang mga may balatian ukon kasablagan sa lawas.

Magmata!: Ano gid ang imo nabudlayan sa imo kahimtangan?

Natalie: Para sa akon, mabudlay batunon ang reaksion sang mga tawo kon makita nila ako. Indi ako mapahamtang. Daw ako lang pirme ang ila ginatulok.

Danielle: Tungod sa diabetes, problema gid kon ano ang akon kaunon, kon daw ano kadamo, kag kon ano nga sahi sang pagkaon ang dapat ko limitehan. Ang indi balanse nga pagkaon mahimo magresulta sa hypoglycemia, ang sobra nga pagnubo sang kalamay sa dugo, kag mahimo makoma ako.

Hiroki: May pinasahi ako nga wheelchair nga sibu sa akon panglawason kag isa lang ang akon posisyon sa sulod sang mga 15 ka oras sa isa ka adlaw. Dugang pa, indi ako makatulog sing maayo. Diutay lang nga gahod makabugtaw ako dayon.

Timothy: Sang primero, daw indi ko gid mabaton nga nagamasakit ako. Nahuya ako sa akon kahimtangan.

Magmata!: Ano pa nga mga kabudlayan ang gin-atubang mo?

Danielle: Ginakapoy gid ako bangod sang diabetes. Kinahanglan ko magtulog sing mas malawig sangsa tulog sang mga kaedad ko. Dugang pa, ang diabetes malubha nga sakit nga indi na mag-ayo.

Natalie: Maathag nga ang akon pagkainano may epekto gid sa akon kabuhi. Mabudlay para sa akon ang paghimo bisan sang kinaandan lang nga butang kaangay sang paglab-ot sa mga balaklon sa estante sa balaligyaan. Kon wala ako sing upod sa pagpamalaklon, nabudlayan gid ako.

Timothy: Kinahanglan ko malandas ang sigesige nga kasakit kag ang nagaabot-abot nga depresyon. Sang wala pa ako nagamasakit, aktibo gid ako. May trabaho ako kag lisensia sa pagmaneho. Nagahampang ako sang football kag squash nga hampang. Sa karon, sa wheelchair na lang ako.

Hiroki: Nabudlayan ako sa paghambal. Nagapaluya ini sang akon buot kag nagapangalag-ag ako sa pagsugod sang paghambalanay. Kon kaisa, bangod indi ko makontrol ang akon kamot, masalapay ko ang iban. Kon matabo ini, indi gani ako makasiling “Pasensiaha ako,” bangod sang akon problema sa paghambal.

Magmata!: Ano ang nakabulig sa imo nga malandas ang imo kahimtangan?

Danielle: Ginsentro ko ang akon kabuhi sa maayo nga mga butang. Malipayon ang amon pamilya, may mahigugmaon ako nga mga abyan sa kongregasyon kag labaw sa tanan, si Jehova nga Dios nagasakdag sa akon. Gintinguhaan ko nga makakuha sing pinakabag-o nga impormasyon kon paano makontrol ang diabetes. Nangin responsable ako sa akon kapagros kag ginahimo ko ang akon labi nga masarangan nga atipanon ang akon kaugalingon.

Natalie: Ang pangamuyo amo ang tuburan sang akon kusog. Ginatinguhaan ko nga atubangon ang akon mga problema sing isaisa. Ang pagpabilin nga masako nakabulig sa akon nga indi pirme maghunahuna sing negatibo. Kag may mabuot ako nga mga ginikanan nga akon matuaran.

Timothy: Kada adlaw, nagahimo ako sing espirituwal nga mga hilikuton, bisan malip-ot lang. Halimbawa, ginasugdan ko ang adlaw paagi sa pagbinagbinag sa matag-adlaw nga teksto. Importante gid sa akon ang personal nga pagtuon sa Biblia kag pangamuyo ilabi na kon ginapung-awan ako.

Hiroki: Ginatinguhaan ko nga indi magkabalaka sa mga butang nga wala ako sing may mahimo. Uyang lang ina sa tiempo. Sa baylo, ginahimo ko ang akon labi nga masarangan nga mapauswag ang akon kaangtanan sa Dios, kag wala ko ginahimo nga balibad ang akon balatian agod indi magtuon sa Biblia. Kon indi ako makatulog, ginagamit ko ini nga kahigayunan sa pagpangamuyo.​—Tan-awa ang Roma 12:12.

Magmata!: Paano ka napalig-on sang iban?

Hiroki: Pirme ako ginahatagan sing komendasyon sang mga gulang bisan sa diutay nga butang nga nahimo ko. Ginaupod ako sang mga kauturan nga lalaki kag babayi sa kongregasyon sa ila mga pagduaw liwat kag mga pagtuon sa Biblia.​—Tan-awa ang Roma 12:10.

Danielle: Natandog gid ako sa hanuot nga komendasyon sang mga kauturan nga lalaki kag babayi sa kongregasyon. Pamatyag ko may kabilinggan ako kag nagapalig-on ini sa akon nga magpadayon.

Timothy: Ang isa ka may edad na nga utod nga babayi nagatinguha gid pirme nga maistorya ako sa mga miting. Subong man, ang mga gulang kag ang ila mga asawa nagpalig-on sa akon kag naghatag sing praktikal nga mga panugda. Ginbuligan ako sang isa ka gulang nga 84 anyos nga magpahamtang sing mga tulumuron nga sarang malab-ot. Ang isa ka ministeryal nga alagad nag-agda sa akon nga magbuylog sa iya sa ministeryo, kag ginpatigayon niya nga manghikot kami sa matapan nga mga lugar nga malab-ot sang akon wheelchair.​—Tan-awa ang Salmo 55:22.

Natalie: Nagapasulod pa lang ako sa Kingdom Hall, mainabyanon nga ginatamyaw na ako sang akon mga utod nga lalaki kag babayi sa kongregasyon. Ang mga may edad na pirme nagaistorya sing makapalig-on bisan pa may mga kabudlayan man sila.​—Tan-awa ang 2 Corinto 4:16, 17.

Magmata!: Ano ang nakabulig sa imo nga mahuptan ang positibo nga panimuot?

Hiroki: Subong isa sang mga Saksi ni Jehova, nagapakig-angot ako sa isa ka organisasyon sang mga tawo nga may masanag nga palaabuton. Nakabulig sa akon nga mangin positibo ang paghunahuna nga bahin ako sini nga organisasyon.​—Tan-awa ang 2 Cronica 15:7.

Danielle: Ginahunahuna ko ang akon hamili nga pribilehiyo nga nahangpan ang mga katuyuan sang Dios. May mga tawo nga mapagros, apang indi sila malipayon kaangay ko.​—Tan-awa ang Hulubaton 15:15.

Natalie: Nasapwan ko nga importante nga makig-angot ako sa mga tawo nga may positibo nga panimuot. Napalig-on man ako sang pagbasa sa mga eksperiensia sang iban nga nagaalagad kay Jehova walay sapayan sang mga kabudlayan. Kag kon magkadto ako sa Kingdom Hall, nahibaluan ko pirme nga mapalig-on ako kag mapahanumdom nga isa gid ka pribilehiyo nga mangin Saksi ni Jehova.​—Tan-awa ang Hebreo 10:24, 25.

Timothy: Suno sa 1 Corinto 10:13, indi pagtugutan ni Jehova nga maeksperiensiahan naton ang indi naton masarangan. Gani, kon sigurado ang akon Manunuga nga malandas ko ang pagtilaw, ngaa maghunahuna ako nga indi ko ini masarangan?