Sin-o ang Magapamat-od Kon Ano ang Matuod nga Relihion?

GIN-ATHAG ni Jesus nga may mga porma sang pagsimba nga wala ginakahamut-an sang Dios. Naghambal sia tuhoy sa “butig nga mga manalagna,” kag ginpaanggid sila sa kahoy nga nagapamunga sang wala pulos nga mga bunga amo nga ‘ginpulod ini kag gindap-ong sa kalayo.’ Nagsiling man sia: “Indi ang tagsatagsa nga nagasiling sa akon, ‘Ginuo, Ginuo,’ makasulod sa ginharian sang langit.”​—Mateo 7:15-22.

Sa katunayan, nagsiling pa gani si Jesus tuhoy sa mga nagapangangkon nga sumulunod niya: “Isiling ko sa ila: Wala gid ako makakilala sa inyo! Palayo sa akon, kamo nga mga manugbuhat sang pagkamalinapason.” (Mateo 7:23) Dugang pa, sang nakighambal si Jesus sa mga lider sang relihion sang iya tion, ginpatuhoy ni Jesus sa ila ang ginhambal sang Dios sa apostata nga Israel: “Wala sing pulos ang ila padayon nga pagsimba sa akon, bangod ginatudlo nila subong mga doktrina ang mga sugo sang mga tawo.”​—Marcos 7:6, 7.

Maathag kon amo nga indi tanan nga pagsimba ginakahamut-an sang Dios ukon sang iya Anak. Gani, may mga pagsimba nga indi matuod. Buot bala silingon nga isa lang ka relihion ang nagatudlo sang kamatuoran? Ginasakdag bala sang Dios ang pila ka relihion kag ginasikway niya ang iban? Ukon ginapili lang ayhan sang Dios ang pagsimba sang mga indibiduwal bisan ano man ang ginatudlo sang ila relihion?

Si apostol Pablo nagsulat sa panuytoy sang Dios: “Karon ginalaygayan ko kamo, mga kauturan, paagi sa ngalan sang aton Ginuong Jesucristo nga dapat kamo tanan maghambal nga may paghilisugot, kag dapat wala sing pagbinahinbahin sa tunga ninyo, kundi maghiusa kamo sing nagakaigo sa isa ka hunahuna kag sa isa ka painuino.” (1 Corinto 1:10) Ginapalig-on man sang Biblia ang mga Cristiano nga dapat ‘may pareho sila nga hunahuna kag pareho nga gugma, nga nahiusa sa kalag, kag isa sing panghunahuna.’​—Filipos 2:2.

Kon may amo sini nga paghiusa, nian may isa lamang ka relihion. Nahisuno sa sini, ang Biblia nagasiling nga may “isa ka Ginuo, isa ka pagtuo, isa ka bawtismo.”​—Efeso 4:4, 5.

Ano ang Ginapakita sang Biblia?

Makita naton suno sa rekord sang Biblia nga matuod ang mga ginsambit bag-o lang. Kon usisaon mo ang Biblia, masapwan mo nga nakig-angot ang Dios sa iya katawhan paagi sa isa lang ka porma sang pagsimba. Sang una, ginagamit sang Dios ang mga patriarka, ukon mga ulo sang pamilya nga magtiglawas sa iya. Ang pila sa kilala nga mga patriarka amo sanday Noe, Abram (Abraham), Isaac, kag Jacob.​—Genesis 8:18-20; 12:1-3; 26:1-4; 28:10-15.

Ang mga kaliwatan ni Jacob naulipon sa Egipto. Mapintas sila nga ginpigos sa Egipto, apang nagdamo sila. Ginhilway sila sang Dios kag milagruso nga ginpatabok sa Pula nga Dagat. Nian, gin-adoptar niya sila nga mangin iya katawhan, kag ginhatagan sing kasuguan paagi kay Moises. Sila ang dumaan nga pungsod sang Israel, ang pungsod sang Dios.​—Exodo 14:21-28; 19:1-6; 20:1-17.

Kon talupangdon naton, wala nahamut-an sang Dios ang pagsimba sang mga pungsod sa palibot sang Israel. Ang matuod, ginsilutan pa gani niya ang iya katawhan sang ginsupak nila ang iya mga sugo kag nagbuylog sa pagsimba sang iban nga pungsod.​—Levitico 18:21-30; Deuteronomio 18:9-12.

Ano dapat ang himuon sang mga indi Israelinhon nga luyag magsimba sa matuod nga Dios? Dapat nga biyaan nila anay ang ila butig nga pagsimba kag magbuylog sa Israel sa pagsimba kay Jehova nga Dios. Madamo sa ila ang ginkahamut-an sang Dios kag nangin matutom nga mga alagad niya. May mga babayi nga naghimo sini kaangay ni Rahab nga Canaanhon kag ni Rut nga Moabinhon; mga lalaki kaangay ni Urias nga Hethanon kag ni Ebed-melec nga Etiopianhon; kag mga grupo sang mga tawo kaangay sang mga Gabaonhon. Ang hari sang Israel nga si Solomon tinagipusuon nga nangamuyo para sa tanan, lakip ang mga nagbuylog sa katawhan sang Dios sa matuod nga pagsimba.a​—2 Cronica 6:32, 33.

Sang Makakari Na si Jesus sa Duta

Sang yari na si Jesus sa duta, ang iya mga panudlo amo ang nangin sulundan sang matuod nga pagsimba, kag nag-athag pa gid ang mga katuyuan sang Dios. Sang ulihi, ang matuod nga mga sumilimba gintawag nga “mga Cristiano.” (Binuhatan 11:26) Gani, kon luyag sang mga Judiyo nga kahamut-an sila sang Dios, dapat nila biyaan ang ila naandan nga pagsimba. Indi puede nga bisan diin lang sa duha ang pilion nila ukon magsimba sila sing kinaugalingon. Subong sang natun-an naton sa Pulong sang Dios, ang matuod nga mga sumilimba nahiusa sa “isa ka pagtuo.”​—Efeso 4:4, 5.

Sa karon, daw indi gid mabaton sang iban nga isa lang ka relihion ang ginakahamut-an sang Dios. Apang, amo sini ang mahinakop naton suno sa panudlo sang Biblia. Madamo nga tawo sang una ang may ila anay kaugalingon nga paagi sa pagsimba. Pero sang nahangpan nila ang kamatuoran, ginsunod nila ini. Nagbuylog sila sa matuod nga mga sumilimba ni Jehova, kag ang ila anay mga pagpangduhaduha ginbuslan sing mga pagpakamaayo kag kalipay. Halimbawa, nagsiling ang Biblia nga sang ginbaton sang Etiopianhon ang Cristianismo kag nagpabawtismo, “nagpadayon sia nga masinadyahon sa iya dalanon.”​—Binuhatan 8:39.

Ang bisan sin-o karon nga magbaton kag magsunod sa mga panudlo sang matuod nga relihion, pakamaayuhon man. Apang, paano naton makilala ang matuod nga relihion kay tuman kadamo sang relihion sa karon?

[Nota]

[Retrato sa pahina 5]

Ano ang matabo sa relihion nga nagapamunga sang wala pulos nga bunga?