Pagkanatural

ANG pagpabutyag mo sang imo kaugalingon sa natural nga paagi makabulig sa imo nga makuha ang pagsalig sang iban. Magasalig ka bala sa ginasiling sang isa ka tawo nga may maskara? Magasalig bala ikaw kon ang nawong sa maskara mas guwapo sangsa nagahambal mismo? Indi gid. Busa sa baylo nga magpakunokuno, mangin kon ano gid ikaw.

Ang pagkanatural indi dapat masal-an nga pagpasapayan. Ang indi husto nga gramatika, sayop nga pagmitlang, kag indi maathag nga paghambal indi nagakaigo. Dapat man likawan ang kinanto nga hambal. Dapat naton pirme ipadayag ang nagakaigo nga dignidad, sa aton man paghambal kag paggawi. Ang isa ka tawo nga nagapakita sining pagkanatural indi sobra ka pormal ni nabalaka sing sobra sa pagpahamuot sa iban.

Sa Ministeryo sa Latagon. Kon nagapalapit ka sa isa ka balay ukon sa isa ka tawo nga yara sa publiko nga duog agod panaksihan sia, ginakulbaan ka bala? Ang kalabanan sa aton ginakulbaan, apang para sa pila mas mabaskog ini nga balatyagon sangsa iban. Bangod sang tension mahimo nga ang tingog mangin indi natural ukon nagakurog, ukon bangod sang kakulba mahimo nga mangin balik-awot ang paghulaghulag sang mga kamot ukon ulo.

Mahimo maatubang sang isa ka manugbantala ini nga problema bangod sang pila ka rason. Ayhan ginahunahuna niya ang impresyon sa iya ukon nagapalibog kon bala ang iya presentasyon mangin madinalag-on. Kinaandan lamang ini, apang nagautwas ang mga problema kon ginahatagan sing daku gid nga atension ini nga mga butang. Kon ginakulbaan ka antes makigbahin sa ministeryo, ano ang makabulig? Amo ang maayo nga paghanda kag hanuot nga pagpangamuyo kay Jehova. (Binu. 4:29) Hunahunaa ang daku nga kaluoy ni Jehova sa pag-agda sa mga tawo nga agumon ang himpit nga kapagros kag kabuhi nga dayon sa Paraiso. Hunahunaa ang mga tawo nga ginapanikasugan mo nga buligan kag ang kinahanglanon nga mabatian nila ang maayong balita.

Dumduma man nga ang mga tawo may hilway nga pagbuot, gani mahimo nila batunon ukon sikwayon ang mensahe. Matuod man ini sang nagpanaksi si Jesus sa dumaan nga Israel. Ang imo asaynment amo lamang ang pagbantala. (Mat. 24:14) Bisan pa nga indi ka paghambalon sang mga tawo, ang imo presensia magapanaksi na. Magamadinalag-on ka bangod ginpahanugutan mo nga gamiton ka ni Jehova sa pagtuman sang iya kabubut-on. Sa mga okasyon nga may kahigayunan ka sa paghambal, mangin ano ang imo panghambal? Kon matun-an mo nga isentro ang imo mga panghunahuna sa mga kinahanglanon sang iban, mangin makagalanyat kag natural ang imo paghambal.

Sa imo pagpanaksi, kon nagahulag ka kag nagahambal subong sang ginahimo mo kada adlaw, mapahamtang ang imo mga tagpalamati. Mahimo pa gani nga batunon nila ang Makasulatanhon nga mga panghunahuna nga luyag mo ipaambit sa ila. Sa baylo nga magpamulongpulong sa ila, makigsugilanon sa ila. Mangin mainabyanon. Magpakita sing interes sa ila, kag pamatii ang ila mga komento. Sa pagkamatuod, kon kinahanglanon sa isa ka lenguahe ukon lokal nga kultura ang pagsunod sa kinabatasan sa pagpakita sing pagtahod samtang nagapakighambal sa mga dumuluong, dapat sundon mo ini. Apang mangin handa ka pirme sa pagyuhum.

Sa Plataporma. Kon nagapakighambal ka sa isa ka grupo, ang isa ka natural, nagapakigsugilanon nga estilo sang paghambal amo pirme ang labing maayo. Sa pagkamatuod, kon madamo ang tumalambong, kinahanglan nga mas mabaskog ang imo tingog. Kon ginatinguhaan mo nga sauluhon ang imo pamulongpulong ukon kon detalyado gid ang imo mga nota, ayhan nabalaka gid ikaw sa paghambal sini sing eksakto. Ang nagakaigo nga pagpabutyag sang mga tinaga importante, apang kon hatagan ini sing sobra nga atension, ang paghambal mangin indi relaks kag sobra ka pormal. Madula ang pagkanatural sini. Ang imo mga ideya dapat abanse nga nahunahuna sing maayo, apang hatagi gid sing igtalupangod ang mga ideya, indi ang eksakto nga pagpabutyag sang mga tinaga.

Matuod man ini kon ginainterbyu ka sa miting. Maghanda sing maayo, apang indi pagbasaha ukon pagsauluha ang imo mga sabat. Ihambal ini nga may kinaugali nga pagbulubag-o sang tingog agod ang imo mga komento makagalanyat kag natural.

Bisan ang maayo nga mga kalidad sang paghambal kon masobrahan mangin indi natural sa tagpalamati. Halimbawa, dapat maathag ang imo paghambal kag husto ang pagmitlang apang indi tubtob sa punto nga ang imo paghambal sobra ka pormal ukon artipisyal pamatian. Ang empatiko ukon deskriptibo nga mga kumpas, kon ginahimo sing maayo, makapapagsik sa imo pamulongpulong, apang ang mga kumpas nga daw pilit ukon nasobrahan makatublag sa imo ginasiling. Gamita ang nagakaigo nga kabaskugon sang tingog, apang tinguhai nga indi mangin sobra katunog. Sa pulupanag-on, maayo nga papagsikon mo ang imo paghambal, apang dapat mo likawan nga mangin bombastiko. Ang pagbulubag-o sang tingog, kapagsik, kag balatyagon dapat gamiton tanan sa paagi nga indi masentro ang igtalupangod sa imo kaugalingon ukon masaw-ahan ang imo mga tagpalamati.

Ang pila ka tawo kinaugali nga may paagi sa pagpabutyag sang ila kaugalingon, bisan wala sila nagapamulongpulong. Ang iban daw nagapakigsugilanon lang sa ila paghambal. Ang importante nga butang amo ang paghambal sing nagakaigo adlaw-adlaw kag ang paggawi nga may Cristianong dignidad. Nian kon yara ka sa plataporma, mangin mas mahapos na lang sa imo ang paghambal kag pagkumpas sing natural.

Kon Nagabasa Sing Dayag. Kinahanglan ang pagpanikasog agod mangin natural ang pagbasa sing dayag. Agod mahimo ini, hibalua ang panguna nga mga ideya sang materyal nga imo pagabasahon, kag talupangda kon paano ini ginapasangkad. Hunahunaa ini sing maayo; kay kon indi, magabasa ka lamang sing mga tinaga. Hibalua ang pagmitlang sa indi pamilyar nga mga tinaga. Maghanas sa pagbasa sing mabaskog agod matigayon ang nagakaigo nga pagbulubag-o sa kataason ukon katunugon sang tingog kag matingob ang mga tinaga sa paagi nga nagapaalinton sing maathag sa mga ideya. Sulitsulita ini tubtob mangin talunsay ang imo pagbasa. Tun-i sing maayo ang materyal agod nga kon basahon mo ini sing mabaskog, ang imo pagbasa daw isa ka mapagsik pamatian nga paghambalanay. Amo ini ang pagkanatural.

Sa pagkamatuod, kalabanan sang aton ginabasa sing dayag naghalin sa aton pasad-sa-Biblia nga mga publikasyon. Magluwas sa mga asaynment sa pagbasa sa Teokratikong Eskwelahan Para sa Ministeryo, nagabasa kita sing mga kasulatan sa ministeryo sa latagon kag kon nagapamulongpulong sa plataporma. Ang mga utod nga lalaki ginatangduan sa pagbasa sing materyal nga ginatun-an sa Pagtinuon sa Lalantawan kag sa Pagtinuon Sang Kongregasyon sa Libro. Ang pila ka kalipikado nga mga utod nga lalaki may mga asaynment sa pagbasa sing mga manuskrito sa mga tumalambong sa kombension. Nagabasa man ikaw sang Biblia ukon sang iban nga mga materyal, basaha ang mga bahin nga may mga kinutlo sa paagi nga daw buhi pamatian. Kon pila ka tawo ang ginakutlo, bulubag-uha diutay ang imo tingog para sa tagsatagsa. Isa ka paandam: Indi magsobra ka dramatiko, apang butangi sing kabuhi ang pagbasa sa natural nga paagi.

Ang pagbasa sing natural daw nagapakigsugilanon. Indi ini artipisyal pamatian kundi may kombiksion.