Paggamit sing Gin-asayn nga Materyal

GINAPAANGGID sang Biblia ang Cristianong kongregasyon sa lawas sang tawo. Ang tagsa ka bahin importante, apang “indi tanan pareho sing hilikuton.” Nahisuno sa sini, dapat kita manghikot sa bisan ano nga pribilehiyo nga gintugyan sa aton. Kinahanglan nga nahangpan naton kag ginahatagan sing daku nga igtalupangod ang bisan ano nga asaynment sa pamulongpulong sa baylo nga pakadiutayon ang importansia sang pila ka topiko bangod ginahunahuna naton nga ang iban nga topiko mas makawiwili. (Roma 12:​4-8) Ang matutom kag mainandamon nga ulipon nga klase amo ang may responsabilidad sa pag-aman sang espirituwal nga pagkaon sa “nagakaigo nga tion.” (Mat. 24:45) Kon ginagamit naton ang aton mga ikasarang sa pagpasangkad sing mga pamulongpulong suno sa mga instruksion nga nabaton naton, ginapakita naton ang apresasyon sa sini nga kahimusan. Nagabulig ini sa maayo nga pagpanghikot sang kongregasyon sa kabug-usan.

Kon Ano ang Ilakip. Kon ginhatagan ka sing asaynment sa isa ka topiko sa eskwelahan, pat-ura nga pasangkaron ina lang nga topiko kag indi ang iban pa. Sa kalabanan nga kahimtangan, ang espesipiko nga reperensia ginahatag. Kon wala ka ginsilingan kon ano nga naimprinta nga materyal ang gamiton subong basihan sang imo pamulongpulong, mahimo ka magkuha sing materyal gikan sa mga reperensia nga luyag mo. Apang, samtang ginahanda mo ang imo pamulongpulong, pat-ura nga ang bug-os nga presentasyon napasad sa gin-asayn nga topiko. Sa pagpamat-od kon ano ang ilakip, kinahanglan mo man binagbinagon ang imo mga tagpalamati.

Tun-i sing maayo ang reperensia, nagaanalisar sang mga kasulatan nga nalakip sa sini. Nian binagbinaga kon paano ini gamiton sing labing epektibo agod makabenepisyo ang mga tagpalamati. Magpili sing duha ukon ayhan tatlo ka punto gikan sa naimprinta nga materyal agod gamiton subong panguna nga mga punto sa imo pamulongpulong. Subong man, magpili gikan sa gin-asayn nga materyal sing mga kasulatan nga ginabuko mo nga basahon kag ipaathag.

Daw ano kadamo nga bahin sang materyal ang imo dapat tuptupan? Ang masarangan mo lamang ipaathag sing epektibo. Indi pag-isakripisyo ang epektibo nga pagpanudlo agod lamang malakip ang madamo nga impormasyon. Kon ang pila ka materyal wala nagahisanto sa katuyuan sang imo pamulongpulong, magkonsentrar sa mga bahin nga magabulig sa imo sa paglab-ot sina nga tulumuron. Gikan sa gin-asayn nga materyal, gamita ang labing impormatibo kag mapuslanon sa imo mga tagpalamati. Ang imo tulumuron sa sining lalaygayan nga punto indi agod makita kon daw ano kadamo ang imo matuptupan, kundi ang paggamit sa kon ano ang gin-asayn subong basihan sang imo pamulongpulong.

Ang imo pamulongpulong wala gintuyo nga mangin sumaryo lamang sang gin-asayn nga materyal. Dapat planuhon mo nga ipaathag ang pila ka punto, pasangkaron ini, iilustrar ini, kag kon mahimo maghatag sing halimbawa sa pag-aplikar sini. Ang dugang nga mga ideya dapat gamiton sa pagpasangkad sing importante nga mga punto gikan sa gin-asayn sa imo nga materyal sa baylo nga islan ina nga materyal.

Ang mga kauturan nga lalaki nga kalipikado subong mga manunudlo mahimo agdahon sa ulihi nga maghatag sing instruksion sa Miting sa Serbisyo. Nahangpan nila nga kinahanglan gamiton sing epektibo ang gin-asayn nga materyal sa baylo nga bayluhan ini sang iban pa. Sing kaanggid, ang mga kauturan nga lalaki nga nagahatag sing pamulongpulong publiko ginahatagan sing mga balayan nga sundon. Nagatugot ini sing pila ka pagpasibu, apang maathag nga ginapakita sini ang panguna nga mga punto nga pasangkaron, ang nagasakdag nga mga argumento nga gamiton, kag ang mga kasulatan nga nagahatag sing sadsaran para sa pamulongpulong. Ang pagtuon kon paano magtudlo nga nagagamit sang gin-asayn nga materyal subong basihan isa ka importante nga bahin sang paghanda para sa iban pa nga mga asaynment sa pamulongpulong.

Ini nga paghanas makabulig man sa imo nga makadumala sang progresibo nga mga pagtuon sa Biblia sa puluy-an. Matun-an mo nga isentro ang atension sa ginatun-an nga materyal sa baylo nga magsipak sa topiko paagi sa pagpadaku sing iban nga butang nga mahimo makawiwili apang indi kinahanglanon sa pagpahangop sing topiko. Apang, kon nahangpan mo ang matuod nga katuyuan sini nga tulun-an, indi ka mangin tuman ka estrikto sa pagsunod lamang sa ginatun-an nga materyal amo nga indi ka na makapaathag sing dugang nga mahimo kinahanglan sang estudyante.