“Binagbinaga Ninyo sing Maayo ang Isa nga Nagbatas”

1-3. (a) Daw ano ka daku nga kasakit ang ginbatyag ni Jesus sa hardin sang Getsemane, kag ano ang rason? (b) Ano ang masiling tuhoy sa halimbawa ni Jesus sa pagbatas, kag ano nga mga pamangkot ang nagautwas?

MAHUOL gid ang kahimtangan. Karon pa lang maagihan ni Jesus ang subong sini nga kalisang sa hunahuna kag balatyagon. Yara na sia sa katapusan nga mga takna sang iya kabuhi sa duta. Kaupod sang iya mga apostoles, nagkadto sia sa isa ka pamilyar nga duog, ang hardin sang Getsemane. Masunson na sia anay nga nakigkita sa ila diri. Apang, sini nga gab-i, kinahanglan niya ang tion nga mag-isahanon. Ginbilin niya ang iya mga apostoles kag nagkadto sia sa nasulod nga bahin sang hardin kag nagpangamuyo nga nagaluhod. Hanuot gid sia nga nagpangamuyo kag bangod sang daku nga kasakit, ang iya balhas nangin “subong sang mga tinulo sang dugo nga nagatupa sa duta.”​—Lucas 22:39-44.

² Ngaa nabalaka gid si Jesus? Matuod, nahibaluan niya nga sa dili madugay magaatubang sia sing sobra nga pisikal nga pag-antos, apang indi amo ini ang rason sang iya kalisang. May ginapamensar sia nga mas importante pa nga butang. Nabalaka gid sia sa ngalan sang iya Amay kag nahibaluan niya nga ang palaabuton sang tawhanon nga pamilya nasandig sa pagpabilin niya nga matutom. Nahibaluan ni Jesus kon daw ano gid ka importante nga magbatas sia. Kon mapaslawan sia, mapakahuy-an niya ang ngalan ni Jehova. Apang wala mapaslawi si Jesus. Sang ulihi sina nga adlaw, sang antes sia mahunusan sing ginhawa, si Jesus nga nagpahamtang sing labing maayo nga halimbawa sang pagbatas sa duta nagsinggit sing madinalag-on: “Natuman na!”​—Juan 19:30.

³ Ginalaygayan kita sang Biblia nga ‘binagbinagon sing maayo ang isa [si Jesus] nga nagbatas.’ (Hebreo 12:3) Gani nagautwas ang pila ka importante nga mga pamangkot: Ano ang pila ka pagtilaw nga ginbatas ni Jesus? Ano ang nagbulig sa iya sa pagbatas? Paano naton mailog ang iya halimbawa? Apang, antes naton sabton ini nga mga pamangkot, usisaon anay naton kon ano ang kahulugan sang pagbatas.

4, 5. (a) Ano ang kahulugan sang “pagbatas”? (b) Paano naton mailustrar nga ang pagbatas indi lamang pag-eksperiensia sang di-malikawan nga kabudlayan?

⁴ Sa tion kag tion, “nagaantos [kita tanan] sang nanuhaytuhay nga pagtilaw.” (1 Pedro 1:6) Kon makaeksperiensia kita sing pagtilaw, nagakahulugan bala ini nga nagabatas kita? Wala. Ang Griego nga nombre para sa “pagbatas” nagakahulugan sing “ikasarang sa pagbato ukon indi pagpangampo sa atubangan sang kabudlayan.” Tuhoy sa sahi sang pagbatas nga ginsambit sang mga manunulat sang Biblia, ang isa ka iskolar nagpaathag: “Isa ini ka panimuot nga nagabulig nga antuson ang mga butang, indi bangod wala ka sing mahimo, kundi bangod sang daku nga paglaum . . . Isa ini ka kinaiya nga nagabulig sa isa ka tawo nga atubangon ang problema. Isa ini ka kinaiya nga nagabulig nga tamdon ang pinakamabudlay nga pagtilaw nga isa ka kalipay bangod sa pihak sang kasakit makita mo ang tulumuron.”

⁵ Gani, ang pagbatas indi lamang pag-eksperiensia sang di-malikawan nga kabudlayan. Sa Biblia, ang pagbatas nagakahulugan sing kapag-on, nga ginahuptan ang husto nga panimuot sa hunahuna kag ang pagkamalaumon sa atubangan sang mga pagtilaw. Binagbinaga ang isa ka ilustrasyon: Duha ka lalaki ang ginbilanggo sa magkapareho nga mga kahimtangan apang sa magkatuhay gid nga mga rason. Ang isa, nga ginbilanggo bangod nakahimo sia sing krimen, akig kag masinulub-on. Ang isa naman, nga isa ka matuod nga Cristiano kag ginbilanggo bangod sang iya katutom, nagpabilin nga mapag-on kag positibo sing panimuot bangod gintamod niya ang natabo sa iya subong isa ka kahigayunan nga mapamatud-an niya ang iya pagtuo. Ang kriminal indi gid makabig nga isa ka halimbawa sang pagbatas, samtang ang mainunungon nga Cristiano isa ka halimbawa sining labing maayo nga kinaiya.​—Santiago 1:2-4.

 6. Paano naton mapalambo ang pagbatas?

⁶ Ang pagbatas kinahanglan agod matigayon naton ang kaluwasan. (Mateo 24:13) Apang, indi duna sa aton ining importante nga kinaiya. Ang pagbatas dapat palambuon. Paano? “Ang kapipit-an nagapatubas sing pagbatas,” siling sang Roma 5:3. Huo, kon luyag gid naton mapalambo ang pagbatas, indi kita dapat mag-isol sing mahinadlukon sa tanan nga mga pagtilaw sa pagtuo. Sa baylo, dapat naton ini atubangon. Mapalambo naton ang pagbatas kon ginaatubang kag ginalandas naton ang lainlain nga sahi sang mga pagtilaw adlaw-adlaw. Ang tagsa ka pagtilaw nga mabatas naton nagapabakod sa aton nga atubangon ang masunod pa nga pagtilaw. Sa pagkamatuod, indi naton mapalambo ang pagbatas kon kita lang. “Nagasandig [kita] sa kusog nga ginahatag sang Dios.” (1 Pedro 4:11) Agod buligan kita nga magpabilin nga mapag-on, ginhatag ni Jehova sa aton ang labing maayo nga bulig​—ang halimbawa sang iya Anak. Usisaon naton sing maayo ang walay kasawayan nga rekord ni Jesus sa pagbatas.

7, 8. Ano ang ginbatas ni Jesus samtang nagahilapit ang katapusan sang iya kabuhi sa duta?

⁷ Samtang nagahilapit na ang katapusan sang iya kabuhi sa duta, si Jesus nagbatas sing lainlain nga mga kapintas. Dugang sa daku gid nga kahuol nga naagihan niya sa iya katapusan nga gab-i, hunahunaa ang kasubo nga ginbatyag niya kag ang kahuluy-an nga gin-antos niya. Ginluiban sia sang isa ka suod nga kaupod, ginbayaan sia sang iya labing suod nga mga abyan, kag ilegal nga ginbista sia sang mga katapo sang labing mataas nga relihioso nga hukmanan sang pungsod nga nagyaguta sa iya, nagdupla sa iya, kag nagsumbag sa iya. Apang, ginbatas niya ini nga may dignidad kag kabakod.​—Mateo 26:46-49, 56, 59-68.

⁸ Sa iya katapusan nga mga takna, si Jesus nagbatas sing daku gid nga pisikal nga pag-antos. Ginlapdusan sia, kag ginbakol sing grabe nga nagresulta sa “madalom kag daw kurit nga mga pilas kag sa sobra nga pagdugo.” Ginlansang sia, kag ginpatay nga nagresulta sa “amat-amat nga kamatayon upod ang sobra gid nga kasakit kag pag-antos.” Hunahunaa gid ang daku nga kasakit nga ginbatyag niya samtang ginapulpog ang dalagku nga mga lansang sa iya mga kamot kag mga tiil sa usok. (Juan 19:1, 16-18) Handurawa gid ang tuman nga kasakit nga ginbatyag niya sang ang usok nga ginlansangan sa iya ginpatindog kag nagakabit ang iya mabug-at nga lawas kag ang iya nagabuad-ad nga likod nagasag-id sa usok. Kag ginbatas niya ining sobra nga pisikal nga kasakit samtang nagabatyag sia sing kalisang kaangay sang ginlaragway sa pamuno sini nga kapitulo.

 9. Ano ang kahulugan sang pagpas-an sang aton “usok sang pag-antos” kag pagsunod kay Jesus?

⁹ Subong mga sumulunod ni Cristo, ano ang mahimo nga batason naton? Si Jesus nagsiling: “Kon ang bisan sin-o luyag magsunod sa akon, . . . pas-anon [niya] ang iya usok sang pag-antos kag padayon nga magsunod sa akon.” (Mateo 16:24) Ang ekspresyon nga “usok sang pag-antos” nga gingamit diri malaragwayon nga nagapatuhoy sa pag-antos, kahuluy-an, ukon kamatayon pa gani. Ang pagsunod kay Cristo indi mahapos. Ang aton Cristianong mga talaksan nagahimo sa aton nga tuhay. Ginadumtan kita sang kalibutan bangod indi kita bahin sini. (Juan 15:18-20; 1 Pedro 4:4) Walay sapayan sini, handa kita nga pas-anon ang aton usok sang pag-antos​—huo, handa kita nga mag-antos, kag mapatay pa gani, sa baylo nga mag-untat sa pagsunod sa aton Huwaran.​—2 Timoteo 3:12.

10-12. (a) Ngaa ang mga pagkadihimpit sang mga yara sa palibot niya isa ka pagtilaw sa pagbatas ni Jesus? (b) Ano ang pila sa mabudlay nga mga kahimtangan nga ginbatas ni Jesus?

¹⁰ Sa iya ministeryo, si Jesus nag-atubang sang iban pa nga mga pagtilaw bangod sang mga pagkadihimpit sang mga yara sa palibot niya. Dumduma nga isa sia ka “batid nga manugpangabudlay,” nga gingamit ni Jehova sa pagtuga sa duta kag sa tanan nga kabuhi nga yari sa sini. (Hulubaton 8:22-31) Gani nahibaluan ni Jesus kon ano ang katuyuan ni Jehova para sa katawhan; dapat nila ipabanaag ang Iya mga kinaiya kag magkabuhi nga may himpit nga panglawas. (Genesis 1:26-28) Sang yari si Jesus sa duta, nakita niya ang masubo nga mga resulta sang sala sa tuhay nga panan-aw​—sia mismo isa ka tawo, nga may tawhanon nga balatyagon kag emosyon. Daw ano gid kasakit para sa iya nga makita kon daw ano na gid kalayo ang mga tawo sa orihinal nga pagkahimpit nanday Adam kag Eva! Busa ang pagbatas ni Jesus gintilawan. Maluyahan bala sia sing buot kag mag-untat, kag tamdon ang makasasala nga mga tawo subong wala na gid sing paglaum? Tan-awon naton.

¹¹ Nagkasubo gid si Jesus bangod sang indi pagsapak sang mga Judiyo amo nga nagtangis sia sing dayag. Nag-ugdaw bala ang iya kakugi ukon nag-untat bala sia sa pagbantala bangod sang ila panimuot? Sa kabaliskaran, “nagpanudlo sia sa templo adlaw-adlaw.” (Lucas 19:41-44, 47) “Nasubuan gid” sia sa katig-a sang tagipusuon sang mga Fariseo nga nagpanilag sing maayo kon bala ayuhon niya ang isa ka tawo sa Inugpahuway. Nahadlok bala sia sa sining nagapakamatarong sa kaugalingon nga mga manugpamatok? Wala gid! Nagpabilin sia nga malig-on kag gin-ayo ang tawo​—sa tunga mismo sang sinagoga!​—Marcos 3:1-5.

¹² May butang pa nga mahimo nga mabudlay gid para kay Jesus​—ang kaluyahon sang iya labing suod nga mga disipulo. Subong sang natun-an naton sa Kapitulo 3, dalayon sila nga nagpakita sang paghandum sing kabantugan. (Mateo 20:20-24; Lucas 9:46) Indi lang makaisa nga ginlaygayan sila ni Jesus nga magmapainubuson. (Mateo 18:1-6; 20:25-28) Apang, mahinay sila sa pagsunod. Ti, sa iya katapusan nga gab-i upod sa ila, “nagbaisay” sila kon sin-o ang labing daku sa ila! (Lucas 22:24) Nangampo bala si Jesus sa ila, nangatarungan nga wala na sila sing paglaum nga magbag-o? Wala. Bangod pirme mapailubon, nagpabilin sia nga positibo kag malaumon, kag padayon nga gintan-aw ang ila maayo nga mga kinaiya. Nahibaluan niya nga ginahigugma nila si Jehova sing tinagipusuon kag luyag nila nga himuon ang Iya kabubut-on.​—Lucas 22:25-27.

13. Ano nga mga pagtilaw nga kaanggid man sa ginbatas ni Jesus ang mahimo naton atubangon?

¹³ Mahimo kita mag-atubang sing mga pagtilaw nga kaanggid man sa ginbatas ni Jesus. Halimbawa, mahimo kita makasumalang sang mga tawo nga indi interesado ukon nagapamatok pa gani sa mensahe sang Ginharian. Magaluya bala ang aton buot bangod sining negatibo nga mga reaksion, ukon padayon bala kita nga magabantala sing makugi? (Tito 2:14) Mahimo nga matilawan kita bangod sang mga pagkadihimpit sang aton Cristianong mga kauturan. Mahimo nga masaklaw kita bangod sang ila walay pasunaid nga pulong ukon walay patugsiling nga buhat. (Hulubaton 12:18) Mangampo na bala kita sa aton mga masigkatumuluo bangod sang ila mga kasaypanan, ukon padayon bala kita nga magpaumod sa ila mga kasaypanan kag tan-awon ang maayo sa ila?​—Colosas 3:13.

14. Ano ang duha ka butang nga nagbulig kay Jesus nga magtindog nga malig-on?

¹⁴ Ano ang nagbulig kay Jesus nga magtindog nga malig-on kag huptan ang iya integridad walay sapayan sang tanan nga pagpakahuya, pagkasubo, kag pag-antos nga gin-atubang niya? Duha ka tumalagsahon nga butang ang nagbulig kay Jesus. Una, nagsalig sia kay Jehova, nagpakitluoy sa “Dios nga nagahatag sing pagbatas.” (Roma 15:5) Ikaduha, nagtan-aw sia sa unahan, ginhunahuna kon ano ang resulta sang iya pagbatas. Binagbinagon naton sing isaisa ini nga mga butang.

15, 16. (a) Ano ang nagapakita nga wala magsandig si Jesus sa iya kaugalingon nga kusog agod makabatas? (b) Daw ano ka daku ang pagsalig ni Jesus sa iya Amay, kag ngaa?

¹⁵ Bisan pa nga si Jesus himpit nga Anak sang Dios, wala sia magsandig sa iya kaugalingon nga kusog agod makabatas. Sa baylo, nagdangop sia sa iya langitnon nga Amay kag nagpangayo sing bulig gikan sa hitaas paagi sa pangamuyo. Si apostol Pablo nagsulat: “Nag-ampo [si Cristo] kag nagpangabay man sa Isa nga makaluwas sa iya sa kamatayon, nga may mabaskog nga paghibi kag mga luha.” (Hebreo 5:7) Talupangda nga si Jesus wala lamang nagpangabay kundi nag-ampo man. Ang tinaga nga “nag-ampo” nagapatuhoy sa tinagipusuon gid kag hanuot nga pagpangabay​—huo, ang pagpakitluoy sing bulig. Ang paggamit sing pangmadamo nga ‘mga pag-ampo’ nagapakita nga si Jesus indi lamang makaisa nga nagpakitluoy kay Jehova. Sa pagkamatuod, si Jesus sulitsulit kag hanuot nga nagpangamuyo sa hardin sang Getsemane.​—Mateo 26:36-44.

¹⁶ Bug-os ang pagsalig ni Jesus nga sabton ni Jehova ang iya mga pag-ampo, kay nakahibalo sia nga ang iya Amay amo ang “Manugpamati sang pangamuyo.” (Salmo 65:2) Sang wala pa sia magkabuhi subong tawo, nakita sang panganay nga Anak kon paano ginsabat sang iya Amay ang mga pangamuyo sang mainunungon nga mga sumilimba. Halimbawa, ang Anak saksi sa mga langit sang ginpadala ni Jehova ang isa ka anghel sa pagsabat sa tinagipusuon nga pangamuyo ni manalagna Daniel​—bisan sa wala pa makatapos si Daniel sa pagpangamuyo. (Daniel 9:20, 21) Gani, ano ang rason nga indi magsabat ang Amay sang ginbubo sang iya bugtong nga Anak ang iya tagipusuon “nga may mabaskog nga paghibi kag mga luha?” Ginsabat gid ni Jehova ang mga pakitluoy sang iya Anak kag nagpadala sia sing anghel agod pabakuron sia sa pagbatas sa idalom sang mabudlay nga pagtilaw.​—Lucas 22:43.

17. Agod makabatas, ngaa dapat kita magsalig kay Jehova, kag paano naton ini himuon?

¹⁷ Agod makabatas, dapat man kita magsalig kay Jehova​—sa Dios nga ‘nagahatag sing gahom.’ (Filipos 4:13, Maayong Balita nga Biblia) Kon nakita gani sang himpit nga Anak sang Dios ang kinahanglanon nga magpangayo sing bulig kay Jehova, ano pa ayhan kita! Kaangay ni Jesus, dapat kita makitluoy sing sulitsulit kay Jehova. (Mateo 7:7) Bisan pa wala kita nagapaabot nga magduaw ang isa ka anghel, isa ka butang ang mapat-od naton: Sabton sang aton mahigugmaon nga Dios ang mga pangabay sang mainunungon nga Cristiano nga “padayon nga nagaampo kag nagapangamuyo sa adlaw kag gab-i.” (1 Timoteo 5:5) Bisan ano pa nga mga pagtilaw ang mahimo nga atubangon naton​—balatian man, kamatayon sang isa ka hinigugma, ukon paghingabot gikan sa mga manugpamatok—​sabton ni Jehova ang aton hanuot nga pagpangayo sing kaalam, kaisog, kag kusog agod makabatas.​—2 Corinto 4:7-11; Santiago 1:5.

18. Paano nagtan-aw si Jesus sa kon ano ang sa unahan sang iya pag-antos?

¹⁸ Ang ikaduha nga butang nga nagbulig kay Jesus nga makabatas amo nga nagtan-aw sia sa unahan, sa kon ano ang nagahulat sa iya pagkatapos sang pag-antos. Tuhoy kay Jesus, ang Biblia nagsiling: “Tungod sa kalipay nga ginbutang sa iya atubangan ginbatas niya ang usok sang pag-antos.” (Hebreo 12:2) Ang halimbawa ni Jesus nagapakita kon paano nagapanghikot ang paglaum, kalipay, kag pagbatas. Mahimo ini masumaryo subong sang masunod: Ang paglaum nagaresulta sa kalipay, kag ang kalipay sa pagbatas. (Roma 15:13; Colosas 1:11) Si Jesus may makalilipay nga palaabuton. Nahibaluan niya nga mabindikar niya ang pagkasoberano sang iya Amay kag magawad niya ang tawhanon nga panimalay gikan sa sala kag kamatayon kon magmatutom sia. Naglaum man si Jesus nga magagahom sia subong Hari kag magaalagad subong Mataas nga Saserdote, nga magaresulta sa dugang nga pagpakamaayo para sa matinumanon nga mga tawo. (Mateo 20:28; Hebreo 7:23-26) Paagi sa pagpatuhoy sang igtalupangod sa palaabuton kag sa paglaum sa iya atubangan, nakasapo si Jesus sing daku gid nga kalipay, kag yadto nga kalipay nagbulig sa iya agod makabatas.

19. Kon nagaatubang sing mga pagtilaw sa pagtuo, paano naton pahikuton ang paglaum, kalipay, kag pagbatas tungod sa aton?

¹⁹ Kaangay ni Jesus, kinahanglan nga pahikuton naton ang paglaum, kalipay, kag pagbatas tungod sa aton. “Magkasadya sa paglaum,” siling ni apostol Pablo. Nian nagdugang sia: “Magbatas sa idalom sang kapipit-an.” (Roma 12:12) Nagaatubang ka bala karon sing daku gid nga pagtilaw sa pagtuo? Kon amo magtan-aw ka sa unahan. Indi pagkalimti nga ang imo pagbatas magahatag sing kadayawan sa ngalan ni Jehova. Hupti sing maathag ang hamili nga paglaum sa Ginharian. Handurawa nga yara ka sa nagapakari nga bag-ong kalibutan sang Dios, kag hunahunaa nga nagaagom ka sang mga pagpakamaayo sang Paraiso. Ang paghulat sa katumanan sang makalilipay nga mga butang nga ginsaad ni Jehova​—lakip na ang pagbindikar sa iya pagkasoberano, pagdula sang kalautan sa duta, kag pati na ang balatian kag kamatayon—​magapahalipay sang imo tagipusuon, kag ina nga kalipay magabulig sa imo nga mabatas ang bisan ano man nga pagtilaw nga maatubang mo. Kon ipaanggid sa katumanan sang paglaum sa Ginharian, ang bisan ano nga pag-antos sa sining sistema sang mga butang “umalagi kag mamag-an” gid.​—2 Corinto 4:17.

20, 21. Tuhoy sa pagbatas, ano ang ginapaabot ni Jehova sa aton, kag ano dapat ang mangin determinasyon naton?

²⁰ Nahibaluan ni Jesus nga indi mahapos nga mangin sumulunod niya, ang dalanon nga nagakinahanglan sing pagbatas. (Juan 15:20) Handa sia nga magpakita sing halimbawa sa sini nga dalanon, kay nahibaluan niya nga magapabakod ini sa ila. (Juan 16:33) Matuod nga si Jesus naghatag sing himpit nga halimbawa sang pagbatas, apang kita indi himpit. Ano ang ginapaabot ni Jehova sa aton? Si Pedro nagpaathag: “Si Cristo mismo nag-antos tungod sa inyo, nga nagabilin sa inyo sang huwaran agod sundon ninyo sing maayo ang iya mga tikang.” (1 Pedro 2:21) Sa iya pag-atubang sa mga pagtilaw, nagbilin si Jesus sing “huwaran,” ang talaksan nga dapat ilugon.a Ang iya rekord sang pagbatas mapaanggid sa mga “tikang,” ukon mga agi sang tiil. Indi naton masunod sing himpit ang iya mga tikang, apang mahimo naton ini masundan “sing maayo.”

²¹ Gani, mangin determinasyon naton nga sundon ang halimbawa ni Jesus sa aton bug-os nga masarangan. Indi gid naton pagkalimtan nga kon sundon naton sing maayo pa ang mga tikang ni Jesus, labi pa nga masangkapan kita sa pagbatas “tubtob sa katapusan”​—ang katapusan sining daan nga sistema sang mga butang ukon ang katapusan sang aton karon nga kabuhi. Wala kita makahibalo kon diin ang mauna, apang ang nahibaluan naton amo ini: Padyaan ni Jehova ang aton pagbatas tubtob sa walay katubtuban.​—Mateo 24:13.