Pagkilala sa Katungdanan sang Cristo sa Kahimusan sang Dios

“SA GINSUGURAN gintuga sang Dios ang langit kag ang duta,” kag ang tanan nga ginhimo niya “maayo gid.” (Gen. 1:1, 31) Ginhimo ni Jehova ang tawo nga may makalilipay nga palaabuton. Pero, temporaryo nga naupangan sang pagrebelde sa Eden ang kalipay sang katawhan. Apang, wala nagbag-o ang katuyuan ni Jehova para sa duta kag sa katawhan. Ginpakita sang Dios nga may kaluwasan para sa matinumanon nga kaliwatan ni Adan. Ipasag-uli ang matuod nga pagsimba, kag dulaon sang Dios ang isa nga malauton lakip ang tanan niya nga kalautan. (Gen. 3:15) Sa liwat, mangin “maayo gid” ang kahimtangan. Himuon ini ni Jehova paagi sa iya Anak, si Jesucristo. (1 Juan 3:8) Busa, kinahanglan naton kilalahon ang katungdanan sang Cristo sa kahimusan sang Dios.—Binu. 4:12; Fil. 2:9, 11.

² Kon ginahunahuna naton ang katungdanan sang Cristo sa kahimusan sang Dios, dapat naton mahangpan nga madamo sang aspekto ang iya katungdanan. Si Jesus nagaalagad subong Manunubos sang katawhan, Mataas nga Saserdote, Ulo sang Cristianong kongregasyon, kag karon bilang Hari sa Ginharian sang Dios. Kon pamalandungan naton ini nga mga katungdanan, magapasalamat pa gid kita sa kahimusan sang Dios kag higugmaon pa gid naton si Cristo Jesus. Ginalaragway sang Biblia ang pila sa iya katungdanan.

³ Sa ministeryo sang Cristo sa duta, nangin maathag nga ang pagpasag-uli sang matinumanon nga katawhan sa Dios matuman paagi kay Jesus. (Juan 14:6) Subong Manunubos sang katawhan, ginhatag ni Jesus ang iya kabuhi subong gawad kabaylo sang madamo. (Mat. 20:28) Gani si Jesus indi lamang halimbawa sang diosnon nga paggawi. Importante man sia nga persona sa katumanan sang katuyuan ni Jehova para sa katawhan. Mapasag-uli kita sa kahamuot sang Dios paagi lamang sa iya. (Binu. 5:31; 2 Cor. 5:18, 19) Ang mahalaron nga kamatayon ni Jesus kag ang iya pagkabanhaw nagpaposible agod matigayon sang matinumanon nga katawhan ang dayon nga mga pagpakamaayo sa idalom sang paggahom sang langitnon nga Ginharian sang Dios.

⁴ Subong Mataas nga Saserdote, si Jesus “makapakita sing kahanuklog sa aton mga kaluyahon” kag makatubos sang sala sang iya dedikado nga mga sumulunod sa duta. Si apostol Pablo nagpaathag: “Kita may mataas nga saserdote nga makapakita sing kahanuklog sa aton mga kaluyahon, ang isa nga natilawan sa tanan nga paagi kaangay sa aton, apang wala sing sala.” Dayon ginpalig-on ni Pablo ang mga nagatuo kay Jesucristo nga hingalitan gid ini nga kahimusan sang pagpasag-uli sa Dios, nga nagasiling: “Gani, magpalapit kita sa trono sang wala tupong nga kaayo nga may kahilwayan sa paghambal, agod matigayon naton ang kaluoy kag ang wala tupong nga kaayo sa tion nga nagakinahanglan kita sang bulig.”—Heb. 4:14-16; 1 Juan 2:2.

⁵ Si Jesus amo man ang Ulo sang Cristianong kongregasyon. Pareho sa iya mga sumulunod sang unang siglo, indi man naton karon kinahanglan ang isa ka tawhanon nga lider. Si Jesus nagatuytoy paagi sa balaan nga espiritu kag paagi sa kalipikado nga kabulig nga mga manugbantay, nga manabat sa iya kag sa iya langitnon nga Amay kon paano nila ginaatipan ang panong sang Dios. (Heb. 13:17; 1 Ped. 5:2, 3) Nagapamulong sing matagnaon tuhoy kay Jesus, si Jehova nagsiling: “Tan-awa! Ginhimo ko sia subong saksi sa mga pungsod, isa ka lider kag pangulo sa mga pungsod.” (Isa. 55:4) Ginpamatud-an ni Jesus nga sia ang katumanan sini nga tagna sang nagsiling sia sa iya mga disipulo: “Indi man kamo magpatawag nga mga lider, kay isa lang ang inyo Lider kag sia amo ang Cristo.”—Mat. 23:10.

⁶ Bilang pagpakita sang iya panghunahuna kag kahanda sa pagbulig sa aton, si Jesus nangagda: “Kari sa akon, kamo tanan nga ginabudlayan kag ginabug-atan, kag papahuwayon ko kamo. Itakod ang akon gota kag magtuon kamo sa akon, kay ako malulo kag mapainubuson sing tagipusuon, kag makakita kamo sing kapahuwayan para sa inyo kaugalingon. Kay ang akon gota mahapos pas-anon kag ang akon lulan mamag-an.” (Mat. 11:28-30) Paagi sa malulo kag makapaumpaw nga pagdumala sa Cristianong kongregasyon, ginpamatud-an ni Jesucristo nga sia “maayo nga manugbantay” bilang pag-ilog sa iya langitnon nga Amay, si Jehova nga Dios.—Juan 10:11; Isa. 40:11.

⁷ Sa iya nahauna nga sulat sa mga taga-Corinto, ginpaathag ni Pablo ang isa pa ka aspekto sang katungdanan ni Jesucristo, nga nagasiling: “Kay kinahanglan maghari sia tubtob mabutang sang Dios ang tanan nga kaaway sa idalom sang iya mga tiil. Apang kon mapasakop na ang tanan nga butang sa iya, ang Anak mismo magapasakop man sa Isa nga nagpasakop sang tanan nga butang sa iya, agod ang Dios gid lang ang magagahom sa tanan.” (1 Cor. 15:25, 28) Antes magkari sa duta, si Jesus amo ang “batid nga manugpangabudlay” sang Dios, kay sia ang una nga gintuga sang Dios. (Hulu. 8:22-31) Sang ginpadala sang Dios si Jesus sa duta, ginhimo niya ang kabubut-on sang Dios sa tanan nga tion. Ginbatas niya ang grabe nga pagtilaw kag napatay nga matutom para sa iya Amay. (Juan 4:34; 15:10) Bangod mainunungon ang iya Anak tubtob sa kamatayon, ginbanhaw sia sang Dios kag gindala sa langit kag ginhatagan sia sing kinamatarong nga mangin Hari sa langitnon nga Ginharian. (Binu. 2:32-36) Bangod sini, ginhatagan sang Dios sing dalayawon nga asaynment si Cristo Jesus nga magpanguna sa linaksa ka gamhanan nga espiritu nga mga tinuga sa paglaglag sang tawhanon nga paggahom kag pagdula sang tanan nga kalautan sa duta. (Hulu. 2:21, 22; 2 Tes. 1:6-9; Bug. 19:11-21; 20:1-3) Dayon ang langitnon nga Ginharian sang Dios nga pagagamhan sang Cristo amo lamang ang magagahom sa bug-os nga duta.—Bug. 11:15.

⁸ Ang aton Huwaran nga si Jesucristo himpit. Ginsugo sia nga atipanon kita. Agod makabenepisyo kita sa iya mahigugmaon nga pagbantay kag pag-atipan, kinahanglan magpabilin kita nga mainunungon kay Jehova kag magdungan sa nagauswag nga organisasyon ni Jehova.

⁹ Ginkilala gid sang mga sumulunod ni Jesus sang unang siglo ang katungdanan sang Cristo sa kahimusan sang Dios. Ginpakita nila ini paagi sa nahiusa nga pagpanghikot sa idalom sang pagkaulo sang Cristo, nga nagapasakop sa iya panuytoy nga ginahatag paagi sa balaan nga espiritu. (Binu. 15:12-21) Si apostol Pablo nagpatuhoy sa paghiusa sang hinaplas nga Cristianong kongregasyon sang nagsulat sia: “Maghambal kita sing kamatuoran kag magpakita sing gugma, agod mangin hamtong kita sa tanan nga paagi bilang pag-ilog sa ulo, ang Cristo. Paagi sa iya ang bug-os nga lawas nagaangtanay sing sibu kag nagabuligay paagi sa tagsa ka lutalutahan nga nagapanghikot sing maayo. Kon ang tagsa ka bahin nagapanghikot sing nagakaigo, nagabulig ini sa pagpatubo sang lawas samtang ginapabakod sini ang lawas paagi sa gugma.”—Efe. 4:15, 16.

¹⁰ Kon ang kada isa sa kongregasyon nagabuligay kag ang tanan nagapanghikot nahisanto sa pagkaulo sang Cristo, magauswag ini kag mahuptan ang mainit nga gugma, nga amo “ang himpit nga higot sang paghiusa.”—Juan 10:16; Col. 3:14; 1 Cor. 12:14-26.

¹¹ Ang mga hitabo sa kalibutan nga katumanan sang tagna sang Biblia nagapamatuod gid nga sugod sang 1914, ginsalig kay Jesucristo ang Ginharian. Nagagahom sia karon sa tunga sang iya mga kaaway. (Sal. 2:1-12; 110:1, 2) Ano ang kahulugan sini para sa mga nagakabuhi karon sa duta? Sa indi madugay, magahulag si Jesus suno sa iya katungdanan subong Hari sang mga hari kag Ginuo sang mga ginuo kon ipadapat na niya ang paghukom sang Dios batok sa iya mga kaaway. (Bug. 11:15; 12:10; 19:16) Dayon, ang ginsaad ni Jehova nga kaluwasan sa pamuno sang pagrebelde sang tawo matuman sa iya mga nahamut-an nga yara sa tuo nga kamot sang Cristo. (Mat. 25:34) Malipayon gid kita kay ginkilala naton ang katungdanan sang Cristo sa kahimusan sang Dios! Kabay nga magpabilin kita nga nahiusa sa pagtuman sang aton ministeryo sa bilog nga kalibutan sa idalom sang pagpanguna sang Cristo sa sining katapusan nga mga adlaw.