Pagsakdag sa Hilikuton sang Ginharian sa Lokal kag sa Bug-os nga Kalibutan

BILANG katumanan sang tagna ni Jesus tuhoy sa katapusan nga mga adlaw, ginabantala sang mga Saksi ni Jehova ang maayong balita “tubtob sa pinakamalayo nga bahin sang duta.” (Binu. 1:8; Mat. 24:14) Sa paghimo sini, maalwan nga ginahatag nila ang ila tion kag kusog sa pagpaambit sang espirituwal nga mga butang. Bangod nagasalig sila nga ginaamanan ni Jehova ang iya mga masigkamanugpangabudlay, padayon nila nga ginauna ang Ginharian sang Dios sa ila kabuhi. (Mat. 6:​25-​34; 1 Cor. 3:​5-9) Ang mga resulta nagapamatuod gid sang kahamuot kag pagpakamaayo ni Jehova.

² Sang nakita sang iban ang aton pamaagi sa pagbantala kag nahibaluan nila nga ginapanagtag naton ang mga Biblia kag literatura sa Biblia nga wala sing bayad, nagapamangkot sila: “Paano ninyo ini nahimo?” Matuod, ang pag-imprinta kag pagpanagtag sang mga Biblia kag literatura sa Biblia may daku nga kagastuhanan. Daku man ang gasto sa pagpatindog kag pagmentinar sang mga puluy-an Bethel para sa mga ministro nga nagatrabaho sa mga imprintahan, nagadumala sang pagbantala nga hilikuton, kag nagaalagad sa iban pa nga paagi para mapalapnag ang maayong balita. Dugang pa, ang mga manugtatap sang sirkito, misyonero sa latagon, espesyal payunir, kag iban pa nga yara sa espesyal nga bug-os tion nga pag-alagad ginahatagan sing materyal nga suporta agod makapadayon sila sa ila hilikuton. Ginapakita sini nga agod masakdag ang pagbantala sang maayong balita sa aton adlaw, sa lokal man ukon sa bug-os nga kalibutan, daku nga kuarta ang kinahanglan. Diin nagahalin ang kuarta?

³ Madamo sang nagaapresyar sang hilikuton sa pagtudlo sang Biblia sang mga Saksi ni Jehova ang malipayon nga nagaamot sa bug-os kalibutan nga hilikuton. Apang, mga Saksi mismo ang panguna nga nagasakdag sini nga hilikuton. Nagapadala sila sing boluntaryo nga mga amot sa lokal nga mga sanga talatapan sang mga Saksi ni Jehova. Mga mahinatagon sila kaangay man sa mga alagad sang Dios sang una nga maalwan nga nagsakdag sa pagpatindog sang duog sang pagsimba para kay Jehova. (Ex. 35:20-​29; 1 Cron. 29:9) Ang iban nga dulot naggikan sa mga pagkabutang nga ginpasubli sang mga napatay, samtang ang pila ka amot naghalin sa mga indibiduwal, mga kongregasyon, kag mga sirkito. Ginatingob ini, kag amo ini ang pundo nga ginagamit agod mapadayon ang ministeryo.

⁴ Ginakabig man nga pribilehiyo sang mga Saksi ni Jehova nga gamiton ang ila kuarta kag iban pa nga pagkabutang sa pagpauswag sang hilikuton. Si Jesus kag ang iya mga disipulo may kahon sang kuarta nga ginakuhaan sang pundo para sa mga galastuhon. (Juan 13:29) Ang Biblia nagasugid sa aton tuhoy sa mga babayi nga nag-alagad kay Jesus kag sa iya mga disipulo. (Mar. 15:40, 41; Luc. 8:3) Ginpasalamatan gid ni apostol Pablo ang materyal nga bulig nga mahigugmaon nga ginhatag sang mga interesado sa pagpalapnag sing maayong balita kag sa mga luyag magsakdag sa iya ministeryo. (Fil. 4:14-16; 1 Tes. 2:9) Ginasunod gihapon sang mga Saksi ni Jehova ini nga halimbawa sang makugi nga pag-alagad kag maalwan nga paghatag. Gani, nangin posible nga matanyagan bisan diin ang mga bunayag sing tagipusuon sang “tubig sang kabuhi nga wala sing bayad.”—Bug. 22:17.

⁵ Ang mga gasto sang lokal nga kongregasyon ginasuportahan man paagi sa boluntaryo nga mga amot. Wala sing pagpangolekta; ukon pagbanabana kon pila ang dapat ihatag sang kada isa, ukon pagpangayo sing kuarta. May mga kahon alamutan sa mga duog tilipunan agod ang kada isa makapakigbahin sa paghatag “suno sa ginpamat-od niya sa iya tagipusuon.”​—2 Cor. 9:7.

⁶ Ang kuarta nga ginaamot ginagamit ilabi na sa pagpalakat kag pagmentinar sang Kingdom Hall. Ang hubon sang mga gulang mahimo magdesisyon nga ipadala ang iban nga kuarta sa lokal nga sanga talatapan sang mga Saksi ni Jehova para sa pagpauswag sang bug-os kalibutan nga hilikuton. Isa ka resolusyon parte sa sini ang himuon sang kongregasyon. Paagi sini, madamo nga kongregasyon ang regular nga nagaamot sa bug-os kalibutan nga hilikuton. Kon ang tanan alisto sa lokal nga mga kinahanglanon nga nagautwas kon kaisa, indi na kinahanglan nga magpahibalo pirme parte sa amot.

⁷ Pagkatapos sang tagsa ka miting, duha ka utod nga lalaki ang magatipon sang kuarta nga ginhulog sa mga kahon alamutan kag ginarekord nila ini. (2 Hari 12:9, 10; 2 Cor. 8:20) Ang hubon sang mga gulang magahimo sing nagakaigo nga kahimusan sa pagtago sini nga mga pundo tubtob mapadala ini sa sanga talatapan ukon magamit sa kinahanglanon sang kongregasyon. Ang utod nga lalaki nga nagauyat sang kuenta sang kongregasyon nagahimo sing bulanan nga statement agod ipahibalo ini sa kongregasyon, kag kada tatlo ka bulan ang koordenitor sang hubon sang mga gulang nagahimo sing kahimusan sa pag-awdit sang kuenta.

⁸ Ang mga gasto sa mga asembleya, lakip ang iban nga gasto sang sirkito, ginabayaran paagi sa mga amot sang mga Saksi nga katapo sang sirkito. May mga kahon alamutan sa mga pasilidad sang asembleya agod mahatag ang boluntaryo nga mga amot sa sirkito. Dugang pa, para mabayaran ang iban pa nga kagastuhanan, mahimo nga makahatag sing amot ang mga kongregasyon sa iban nga tion.

⁹ Maayo gid kon ang amot sang sirkito bastante sa pagkobre sang kinahanglanon nga kagastuhanan, kag may sobra para iamot sa bug-os kalibutan nga hilikuton. Pero kon ang pundo sang sirkito indi bastante para tabunan ang nagasto sa asembleya ukon ang galastuhon para sa masunod nga asembleya, subong sang deposito para magamit ang pasilidad, mahimo sulatan sang manugtatap sang sirkito ang mga kongregasyon parte sa ila pribilehiyo sa pag-amot. Hambalan ini sang tagsa ka hubon sang mga gulang kag desisyunan kon pila ang mahatag sang ila kongregasyon sa pundo sang sirkito. Dayon ipresentar nila ini sa ila kongregasyon paagi sa isa ka resolusyon.

¹⁰ Kon may dapat hambalan parte sa pinansial nga nagakinahanglan sang presensia sang mga gulang sang sirkito, isa ka miting ang hiwaton sa adlaw sang sirkito nga asembleya. Ang tanan nga desisyon magluwas sa nahambalan na nga daan nga kagastuhanan sang sirkito dapat ipasar subong resolusyon nga ginkasugtan sang mga gulang. Dapat isulat sa sini nga mga resolusyon ang eksakto nga kantidad kag dapat ipresentar para aprobahan sa tagsa ka tion nga gamiton ang pundo sang sirkito.

¹¹ May kahimusan nga ginhimo para regular nga i-audit ang account sang sirkito.

¹² Ang isa ka katuyuan sang kahon sang kuarta nga ginahuptan ni Jesus kag sang iya mga disipulo amo ang pagbulig sa mga imol. (Mar. 14:3-5; Juan 13:29) Ini nga Cristianong responsibilidad nagpadayon kay si Jesus nagsiling: “Ang mga imol kaupod ninyo pirme.” (Mar. 14:7) Paano subong ginahimo sang mga Saksi ni Jehova ini nga responsibilidad?

¹³ Kon kaisa, ang mga matutom sa kongregasyon mahimo nagakinahanglan sing materyal nga bulig bangod sang katigulangon, kasablagan sa lawas, ukon iban pa nga problema nga indi nila kontrolado. Ang mga miembro sang pamilya, himata, kag iban pa nga nakahibalo sa sini mahimo mapahulag nga magbulig. Nahisuno ini sa ginsiling ni apostol Juan: “Kon ang isa bastante sa iya pangabuhi sa sini nga kalibutan kag nakita niya ang iya utod nga nagakinahanglan, apang wala sia magpakita sing kaluoy sa iya utod, paano naton masiling nga may gugma sia sa Dios? Mga anak, maghigugma kita, indi paagi sa hambal ukon sa dila, kundi paagi sa sinsero nga binuhatan.” (1 Juan 3:17, 18; 2 Tes. 3:6-12) Ang matuod nga pagsimba nagalakip sang pag-atipan sa mga matutom nga ayhan nagakinahanglan sing materyal nga bulig.—Sant. 1:27; 2:14-17.

¹⁴ Sa iya nahauna nga sulat kay Timoteo, ginpaathag ni apostol Pablo kon paano ihatag ang materyal nga bulig sa mga takus. Mabasa mo ang iya laygay sa 1 Timoteo 5:3-21. Panguna nga responsibilidad sang tagsa ka Cristiano nga atipanon ang mga kinahanglanon sang iya panimalay. Ang mga tigulang ukon may mga kasablagan dapat buligan sang ila mga anak, apo, ukon iban pa nga malapit nga himata. Kon kaisa, ang mga ahensia sang gobierno ukon iban pa nga programa sang katilingban nagahatag sing materyal nga bulig, gani mahimo mabuligan sang mga himata ukon sang iban ang kubos nga mag-aplay agod matigayon ini nga bulig. Mahimo mag-utwas ang sitwasyon diin kinahanglan buligan sang kongregasyon sa pila ka paagi ang imol nga kauturan nga madugay na nga nagaalagad sing matutom. Kon wala sing katapo sang pamilya ukon iban pa nga himata nga makabulig sa ila kag wala sing nagakaigo nga bulig nga matigayon halin sa mga ahensia sang gobierno, ang hubon sang mga gulang makahimo sing nagakaigo nga mga rekomendasyon sa pagbulig. Ginakabig sang mga Cristiano nga isa ka pribilehiyo nga mapaambit ang ila materyal nga mga pagkabutang sa mga bululigan.

¹⁵ Madamo nga kauturan ang mahimo magakinahanglan sing bulig bangod sang paghingabot, inaway, linog, baha, tiggulutom, ukon iban pa nga kalamidad nga kinaandan na sa sining makahalanguyos nga mga tion. (Mat. 24:​7-9) Sa sini nga mga kahimtangan, mahimo nga indi mabuligan sang lokal nga mga kongregasyon ang isa kag isa, gani ginagiyahan sang Nagadumala nga Hubon ang mga panikasog sang kauturan sa iban nga lugar agod mahatag ang bulig. Kaanggid ini sa pag-aman sing pagkaon sang mga Cristiano sa Asia Minor sa kauturan sa Judea sang may tiggulutom. (1 Cor. 16:​1-4; 2 Cor. 9:​1-5) Paagi sa pag-ilog sang ila halimbawa, ginapamatud-an naton ang aton gugma sa aton kauturan kag ginapakita nga matuod kita nga mga disipulo ni Jesucristo.​—Juan 13:35.

¹⁶ Ang mga Biblia kag literatura sa Biblia may importante nga papel sa pagpalapnag sang mensahe sang Ginharian. Sa masami, isa ka ministeryal nga alagad ang ginaasayn sang hubon sang mga gulang sa pagtatap sa suplay sang mga literatura sang kongregasyon. Ang mga utod nga lalaki nga nagatatap sa sining mga suplay nagahimo sing maayo sa ila mga responsibilidad. May sibu sila nga rekord agod may bastante nga suplay para sa kinahanglanon sang kongregasyon.

¹⁷ Subong dedikado nga mga Cristiano, nahibaluan naton nga ang aton tion, mental kag pisikal nga mga ikasarang, mga talento, kag materyal nga mga pagkabutang, bisan ang aton mismo kabuhi mga regalo halin sa Dios kag gintuyo para gamiton sa pag-alagad sa iya. (Luc. 17:10; 1 Cor. 4:7) Paagi sa paggamit sing nagakaigo sa tanan naton nga ginapanag-iyahan, ginapakita naton kon daw ano kadalom ang aton gugma kay Jehova. Luyag naton padunggan si Jehova paagi sa aton hamili nga mga pagkabutang, kay nakahibalo kita nga nalipay sia sa bisan ano nga dulot nga ginahatag subong pagpakita sang bug-os kalag nga debosyon. (Hulu. 3:9; Mar. 14:3-9; Luc. 21:1-4; Col. 3:23, 24) Si Jesus nagsiling: “Nakabaton kamo nga wala sing bayad, gani maghatag kamo nga wala sing bayad.” (Mat. 10:8) Samtang ginahatag naton ang aton kaugalingon kag ang aton manggad sa pag-alagad kay Jehova, makabaton man kita sing daku nga kalipay.—Binu. 20:35.