Ang Mag-utod nga Makihilawason

Sa Ezequiel kapitulo 23, mabasa naton ang pagpakamalaut sa katawhan sang Dios bangod indi sila matutom. Ini nga kapitulo madamo sing pagkaanggid sa kapitulo 16. Pareho sa kapitulo 16, naggamit man ang kapitulo 23 sing malaragwayon nga pagpakighilawas. Mabasa nga ang Jerusalem manghod sang Samaria. Ginapakita sang duha ka kapitulo nga ginsunod sang manghod ang iya magulang nga nangin makihilawason, pero mas malain pa ang iya ginhimo nga kalautan kag pagpakighilawas. Sa kapitulo 23, ginpangalanan ni Jehova ining duha ka mag-utod: Ang magulang nga si Ohola, amo ang Samaria, ang kapital sang napulo ka tribo nga ginharian sang Israel; ang manghod nga si Oholiba, amo ang Jerusalem, ang kapital sang Juda.a—Ezeq. 23:1-4.

May dugang pa nga pagkaanggid ang duha ka kapitulo. Mahimo ang talalupangdon gid amo ini: Ang mga makihilawason, mga asawa anay ni Jehova pero nagluib sa iya. Isa pa, nagapromisa man ini sing paglaum. Sa kapitulo 23, mabasa ang indi direkta nga paglaum parte sa pagpasag-uli, pero kaanggid ini sa kapitulo 16 sang nagsiling si Jehova: “Pauntaton ko ang imo maulag nga paggawi kag ang imo pagpakighilawas.”—Ezeq. 16:16, 20, 21, 37, 38, 41, 42; 23:4, 11, 22, 23, 27, 37.

Sang una, ginapaathag sang aton mga publikasyon nga ang duha ka mag-utod, si Ohola kag si Oholiba, nagalarawan sa Cristiandad nga natunga sa Katoliko kag Protestante. Pero paagi sa pangamuyo, pagpamalandong, kag dugang nga pag-research, may pila ka pamangkot nga nag-utwas. Nangin asawa bala ni Jehova ang Cristiandad sa bisan ano nga kahulugan? Nakigkatipan bala sia kay Jehova? Wala gid. Wala pa nagaluntad ang Cristiandad sang naghimo si Jesus sing “bag-o nga katipan” sa espirituwal nga Israel, kag indi man sia bahin sinang espirituwal nga pungsod sang hinaplas nga mga Cristiano. (Jer. 31:31; Luc. 22:20) Nagluntad lang ang Cristiandad sa tapos nga mapatay ang mga apostoles. Nagsugod sia sa pagluntad sang ikap-at nga siglo C.E. bilang apostata kag malain nga organisasyon nga ginahuman sang mga “hilamon”—ang butig nga mga Cristiano—sa tagna ni Jesus parte sa trigo kag hilamon.—Mat. 13:24-30.

Ari ang isa pa ka kinatuhayan: Si Jehova naghatag sing paglaum nga ipasag-uli ang indi matutom nga Jerusalem kag Samaria. (Ezeq. 16:41, 42, 53-55) Base sa Biblia, may ginhatag man bala nga paglaum sa Cristiandad? Wala! Wala na sia sing paglaum pareho sa tanan nga relihion sang Babilonia nga Daku.

Sanday Ohola kag Oholiba wala nagalarawan sa Cristiandad. Pero ang impormasyon parte sa ila makabulig sa aton nga maintiendihan ang mas importante nga punto: kon ano ang ginabatyag ni Jehova sa mga nagapasipala sa iya balaan nga ngalan kag sa wala nagatuman sa iya talaksan para sa putli nga pagsimba. Nakasala gid sa sini ang Cristiandad kay madamo sang iya relihion ang nagapangangkon nga ginasimba nila ang Dios nga mabasa sa Biblia. Isa pa, nagapangangkon sila nga lider nila ang pinalangga nga Anak ni Jehova, si Jesucristo. Pero wala man ini nagahisanto sa ila panudlo nga si Jesus bahin sang trinidad kag wala man nila ginatuman ang maathag nga sugo nga ‘indi mangin bahin sang kalibutan.’ (Juan 15:19) Paagi sa iya aktibo nga pagpakigbahin sa pagsimba sa mga diosdios kag pulitikal nga kinagamo, ginapamatud-an gid sang Cristiandad nga bahin sia sang “dakung makihilawason nga babayi.” (Bug. 17:1) Sigurado nga ang iya madangatan pareho man sa madangatan sang bug-os kalibutan nga emperyo sang butig nga relihion!