LEKSION 19
Ang mga Saksi ni Jehova Bala Matuod nga mga Cristiano?
Bilang mga Saksi ni Jehova, nagapati kami nga matuod kami nga mga Cristiano. Ngaa? Binagbinaga kon diin nabase ang amon mga pagpati, kon ngaa ginatawag kami nga mga Saksi ni Jehova, kag kon paano namon ginapakita ang gugma sa isa kag isa.
1. Diin nabase ang mga pagpati sang mga Saksi ni Jehova?
Si Jesus nagsiling: ‘Ang pulong sang Dios kamatuoran.’ (Juan 17:17) Pareho kay Jesus, ginabase gid sang mga Saksi ni Jehova ang ila mga pagpati sa Pulong sang Dios. Binagbinaga ang amon kasaysayan. Sang mga 1870, gintun-an sing maayo sang isa ka grupo sang mga estudyante sang Biblia kon ano gid ang ginatudlo sang Biblia. Ginbase gid nila diri ang ila mga pagpati, bisan pa lain ini sangsa ginatudlo sang simbahan. Dayon ginsugid nila sa iban ini nga mga kamatuoran sa Biblia.a
2. Ngaa ginatawag kami nga mga Saksi ni Jehova?
Ginatawag ni Jehova ang iya mga sumilimba nga iya mga saksi kay nagasugid sila sing kamatuoran parte sa iya. (Hebreo 11:4–12:1) Halimbawa, ang Dios nagsiling sa iya katawhan sadto: “Kamo ang akon mga saksi.” (Basaha ang Isaias 43:10.) Si Jesus gintawag “ang Matutom nga Saksi.” (Bugna 1:5) Gani, sugod sang 1931 gintawag na kami nga mga Saksi ni Jehova. Nalipay gid kami nga makilala sa sini nga ngalan.
3. Paano ginailog sang mga Saksi ni Jehova ang gugma ni Jesus?
Palangga gid ni Jesus ang iya mga disipulo kag daw pamilya na niya sila. (Basaha ang Marcos 3:35.) Ang mga Saksi ni Jehova sa bilog nga kalibutan nahiusa man bilang isa ka pamilya. Gani, brother kag sister ang tawganay namon. (Filemon 1, 2) Ginasunod man namon ang sugo nga ‘higugmaon ang tanan nga kauturan.’ (1 Pedro 2:17) Ginahimo namon ini sa madamo nga paagi, pareho sang pagbulig sa amon mga kauturan sa bilog nga kalibutan sa tion sang kabudlayan.
USISAA PA GID
Usisaon naton ang kasaysayan sang mga Saksi ni Jehova para mahibaluan naton ang dugang nga mga ebidensia nga matuod gid kami nga mga Cristiano.
Ang matuod nga mga Cristiano nagabase sang ila mga pagpati sa Biblia kag ginasugid nila ini sa iban
4. Sa Biblia nabase ang amon mga pagpati
Gintagna ni Jehova nga ang kamatuoran sa Biblia mangin mas maathag. Basaha ang Daniel 12:4 kag footnote, dayon binagbinaga ini nga pamangkot:
Ano ang “magabugana” sa katawhan sang Dios samtang padayon nila nga ginausisa ang Biblia?
Binagbinaga kon paano gintun-an ni Charles Russell upod sang isa ka grupo sang mga estudyante sang Biblia, ang Pulong sang Dios. Tan-awa ang VIDEO, dayon binagbinaga ang masunod nga pamangkot.
Sa video, paano gintun-an sang mga estudyante sang Biblia kag ni Charles Russell ang Biblia?
Kabalo ka bala?
Kon kaisa, nagahimo kami sing mga pagbag-o sa amon mga pagpati. Ngaa? Pareho sa amat-amat nga pagsanag sang palibot samtang nagabutlak ang adlaw, amat-amat man nga ginapaintiende sang Dios ang iya Pulong. (Basaha ang Hulubaton 4:18.) Wala nagabag-o ang Biblia, pero nagahimo kami sing mga pagbag-o sa amon mga pagpati samtang nagaathag pa gid ang amon pag-intiende sa Biblia.
5. Ginahimo gid namon ang kahulugan sang amon ngalan
Ngaa ginatawag kami nga mga Saksi ni Jehova? Tan-awa ang VIDEO, dayon binagbinaga ang masunod nga pamangkot.
Ngaa nagakabagay gid nga tawgon kami nga mga Saksi ni Jehova?
Ngaa mga tawo ang ginpili ni Jehova nga mangin saksi niya? Kay sila ang magapakilala nga sia ang matuod nga Dios, bangod madamo nga kabutigan ang ginasugid parte sa iya. Binagbinaga ang duha sa sini.
Ginatudlo sang pila ka relihion sa ila mga miembro nga gusto sang Dios nga maggamit sila sing mga imahen sa pagsimba sa iya. Pero, basaha bala ang Levitico 26:1, dayon binagbinaga ini nga mga pamangkot:
Ano ang ginatudlo sang Biblia? Ano ang batyagon ni Jehova kon maggamit kita sing mga imahen ukon santos?
Ginatudlo sang iban nga relihion nga Dios si Jesus. Pero, basaha bala ang Juan 20:17, dayon binagbinaga ini nga mga pamangkot:
Ano ang ginatudlo sang Biblia? Isa lang bala ka persona ang Dios kag si Jesus?
Ano ang masiling mo kay ginpadala ni Jehova ang iya mga Saksi para isugid ang kamatuoran parte sa iya kag sa iya Anak?
6. Palangga namon ang isa kag isa
Ginkumparar sang Biblia ang mga Cristiano sa lainlain nga parte sang lawas sang tawo. Basaha ang 1 Corinto 12:25, 26, dayon binagbinaga ini nga mga pamangkot:
Ano ang dapat himuon sang matuod nga mga Cristiano kon nagaantos ang pareho nila nga Cristiano?
Ano ang masiling mo sa ginapakita nga pagpalangga sang mga Saksi ni Jehova sa isa kag isa?
Kon may mga Saksi ni Jehova nga nagaantos sa iban nga lugar, nagabulig gid dayon ang pareho nila nga mga Saksi sa bilog nga kalibutan. Para makita mo ang isa ka halimbawa sini, tan-awa ang VIDEO. Dayon binagbinaga ang masunod nga pamangkot.
Ngaa ang pagbulig sang mga Saksi ni Jehova sa tion sang kalamidad pagpakita sang ila gugma?
Ginapakita sang matuod nga mga Cristiano ang gugma sa tion sang kabudlayan
KON MAGSILING ANG IBAN: “Ang mga Saksi ni Jehova bag-o lang ’na nga relihion.”
San-o nagsugod nga gintawag ni Jehova ang iya mga sumilimba nga mga saksi?
SUMARYO
Ang mga Saksi ni Jehova matuod nga mga Cristiano. Isa kami ka pamilya sang mga sumilimba sa bilog nga kalibutan nga nagabase sang amon mga pagpati sa Biblia kag nagasugid sang kamatuoran parte kay Jehova.
Rebyu
Ngaa ginatawag kami nga mga Saksi ni Jehova?
Ano ang pagkabig namon sa isa kag isa?
Sa banta mo, matuod bala nga mga Cristiano ang mga Saksi ni Jehova?
DUGANG NGA IMPORMASYON
Hibalua pa gid ang amon kasaysayan.
Mga Saksi ni Jehova—Buhi nga Pagtuo, Bahin 1: Nahilway sa Kadulom (1:00:53)
Tan-awa ang isa ka halimbawa kon paano ginbuyagyag sang mga Saksi ni Jehova ang butig nga mga panudlo.
Hibalua ang mga sabat sa imo mga pamangkot parte sa mga Saksi ni Jehova.
“Mga Pirme Ginapamangkot Parte sa mga Saksi ni Jehova” (Pahina sa website)
Akig gid si Stephen sa iban nga rasa gani ginasakit niya sila. Hibalua kon ano ang nakita niya sa mga Saksi ni Jehova nga nagpabag-o sa iya.
“Labi nga Naglain ang Akon Kabuhi” (Ang Lalantawan, Hulyo 1, 2015)
a Sugod sang 1879, mabasa sa amon magasin nga Ang Lalantawan ang kamatuoran nga ginatudlo sang Biblia.