Mangin Bunayag sa Tanan nga Butang

Gusto sang tanan nga bunayag ukon honest ang ila mga abyan. Gusto man ni Jehova nga honest ang iya mga abyan. Pero indi ini mahapos, kay madamo nga tawo ang indi honest. Ano ang mga benepisyo kon honest kita sa tanan nga butang?

1. Ngaa importante gid nga mangin honest?

Kon honest kita, ginapakita naton kay Jehova nga palangga naton sia kag ginarespeto. Pamensara: Nabal-an ni Jehova ang tanan naton nga ginapensar kag ginahimo. (Hebreo 4:13) Nalipay sia kon makita niya nga honest kita. Ang iya Pulong nagasiling: “Ginakangil-aran ni Jehova ang mga malimbungon, apang nagapakig-abyan Sia sing suod sa mga matarong.”—Hulubaton 3:32.

2. Sa ano nga mga paagi dapat kita mangin honest?

Gusto ni Jehova nga ‘maghambal kita sing matuod sa isa kag isa.’ (Zacarias 8:16, 17) Ano ang buot silingon sini? Kon nagapakig-istorya kita sa aton pamilya, mga kaupod sa obra, mga kauturan, ukon mga opisyal sang gobierno, wala kita nagabutig ukon nagahatag sing sala nga impormasyon. Ang honest nga mga tawo wala nagapangawat ukon nagapanonto sa iban. (Basaha ang Hulubaton 24:28 kag Efeso 4:28.) Kag nagabayad sila sing insakto nga buhis. (Roma 13:5-7) Pila lang ini ka paagi nga mapakita naton nga ‘bunayag kita sa tanan nga butang.’—Hebreo 13:18.

3. Ano ang mga benepisyo kon honest kita?

Kon kilala kita nga honest, saligan kita sang iban. Makabulig kita nga mapabatyag sa kada isa sa kongregasyon nga bahin sila sang isa ka pamilya. Mangin matinlo ang aton konsiensia. Kon honest kita, ‘mapatahom man naton ang panudlo sang aton Manluluwas, ang Dios,’ kag maganyat ang iban nga kilalahon kag simbahon Sia.—Tito 2:10.

USISAA PA GID

4. Malipay si Jehova kon honest kita

Basaha ang Salmo 44:21 kag Malaquias 3:16, dayon binagbinaga ini nga mga pamangkot:

• Ngaa sala gid pensaron nga matago naton kon ano ang matuod?

• Ano sa banta mo ang batyagon ni Jehova kon ginasugid naton ang matuod, bisan pa mabudlay ini himuon?

5. Mangin honest pirme

VIDEO: Ano ang Makahatag sang Kalipay?—Matinlo nga Konsiensia (2:32)

Basaha ang Hebreo 13:18, dayon binagbinaga kon paano kita mangin honest . . .

• sa aton pamilya.

• sa ulubrahan ukon eskwelahan.

• sa iban pa nga sitwasyon.

6. Mga benepisyo kon honest kita

Sa primero, basi magresulta sa mga problema kon honest kita. Pero amo ini ang pinakamaayo mo nga himuon. Basaha ang Salmo 34:12-16, dayon binagbinaga ini nga pamangkot:

• Ano ang imo nabenepisyo kay honest ka?

1. Kon honest ang bana kag asawa, mabakod ang ila pag-asawahay

2. Kon honest ang empleyado, saligan sia sang iya amo

3. Kon honest ang isa, maayo ang iya reputasyon sa mga opisyal sang gobierno

SUMARYO

Gusto ni Jehova nga ang iya mga abyan honest sa tanan nila nga ginahambal kag ginahimo.

Rebyu

• Sa ano nga mga paagi dapat kita mangin honest?

• Ngaa sala gid pensaron nga matago naton kon ano ang matuod?

• Ngaa gusto mo mangin honest pirme?

DUGANG NGA IMPORMASYON

Paano tudluan sang mga ginikanan ang ila kabataan nga indi magbinutig?

Magsugid sing Matuod (1:44)

Ano ang mga benepisyo kon himuon naton ang aton mga promisa?

Himua ang Imo mga Promisa Para Pakamaayuhon Ka (9:09)

Binagbinaga kon ngaa dapat kita magbayad sing buhis bisan pa wala ini ginagamit sa insakto.

“Buhis—Dapat Mo Bala Bayaran?” (Ang Lalantawan, Septiembre 1, 2011)

Ano ang nakabulig sa isa ka manugtunto nga mangin honest nga tawo?

“Natun-an Ko nga si Jehova Maluluy-on kag Mapinatawaron” (Ang Lalantawan, Mayo 1, 2015)