LEKSION 58
Padayon nga Mangin Matutom kay Jehova
Indi gid gusto sang matuod nga mga Cristiano nga may makapauntat sa ila pag-alagad kay Jehova. Sigurado amo man sini ang ginabatyag mo. Ginapabaloran ni Jehova ang imo katutom sa iya. (Basaha ang 1 Cronica 28:9.) Ano ang mahimo magtesting sang imo katutom kay Jehova, kag ano ang makabulig sa imo nga masarangan ini?
1. Paano testingan sang iban ang aton katutom kay Jehova?
Mahimo tinguhaan sang iban nga pauntaton kita sa pag-alagad kay Jehova. Sin-o ang puede maghimo sini? Ang pila nga nagbiya sa kamatuoran nagasugid sang kabutigan parte sa organisasyon sang Dios para magluya ang aton pagtuo. Ginatawag sila nga mga apostata. Nagapalapta man ang pila ka lider sang relihion sang sala nga impormasyon parte sa aton para mag-untat sa pag-alagad kay Jehova ang mga nagapati dayon sa sini. Delikado gid kon istoryahon naton ang mga apostata, basahon ang ila mga libro ukon mga blog, buksan ang ila mga website, ukon tan-awon ang ila mga video. Si Jesus nagsiling parte sa mga tawo nga gusto paluyahon ang matutom nga nagaalagad kay Jehova: “Pabay-i ninyo sila. Mga bulag sila nga mga manugtuytoy. Kon ang bulag magtuytoy sa isa pa ka bulag, pareho sila nga mahulog sa buho.”—Mateo 15:14.
2. Ano nga mga desisyon ang mahimo magtesting sa aton katutom kay Jehova?
Bangod palangga naton si Jehova, wala kita nagaentra sa bisan ano nga ginahimo sang butig nga relihion. Dapat wala man sing labot sa butig nga relihion ang aton obra ukon ginaentrahan nga organisasyon ukon mga aktibidades. Si Jehova nagpaandam sa aton: “Gua kamo sa [Babilonia nga Daku], katawhan ko.”—Bugna 18:2, 4.
USISAA PA GID
Usisaon naton kon ano ang himuon mo para indi mapaluya sang iban ang imo katutom kay Jehova. Kag kon paano mo mapakita ang imo katutom paagi sa paggua sa Babilonia nga Daku.
3. Mag-andam sa butig nga mga manunudlo
Ano dapat ang aton reaksion kon makabati kita sang negatibo nga mga impormasyon parte sa organisasyon ni Jehova? Basaha ang Hulubaton 14:15, dayon binagbinaga ini nga pamangkot:
Ngaa indi kita dapat magpati dayon sa bisan ano nga mabatian naton?
Basaha ang 2 Juan 9-11, dayon binagbinaga ini nga mga pamangkot:
Ano dapat ang aton pagtratar sa mga apostata?
Bisan pa wala kita nagaistorya sa mga apostata, paano kita maimpluwensiahan gihapon sang ila mga panudlo?
Ano sa banta mo ang batyagon ni Jehova kon ginapamatian naton ang sala nga impormasyon parte sa iya kag sa iya organisasyon?
4. Padayon nga mangin matutom sa Dios bisan nakasala ang isa ka utod
Kon nabal-an naton nga nakahimo sing mabug-at nga sala ang isa sa kongregasyon, ano ang dapat naton himuon? Binagbinaga ang isa ka prinsipio sa Kasuguan sang Dios nga ginhatag niya sa Israel sang una. Basaha ang Levitico 5:1.
Base sa sina nga bersikulo, kon nabal-an naton nga nakahimo sing mabug-at nga sala ang isa ka utod, dapat naton ini isugid sa mga gulang. Pero antes naton ini himuon, mas maayo nga hambalan naton ang nakasala nga sia mismo ang magsugid sa mga gulang. Kon indi sia, ang aton katutom kay Jehova ang magapahulag sa aton nga isugid sa mga gulang ang aton nahibaluan. Paano ginapakita sini nga palangga naton . . .
si Jehova nga Dios?
ang isa nga nakasala?
ang mga kauturan sa kongregasyon?
Kon nabal-an mo nga may nahimo nga sala ang pareho mo nga Cristiano, buligi sia!
5. Maggua sa Babilonia nga Daku
Basaha ang Lucas 4:8 kag Bugna 18:4, 5, dayon sabta ini nga mga pamangkot:
Nakalista pa bala ang akon ngalan nga miembro pa ako sang butig nga relihion?
Miembro bala ako sang isa ka organisasyon nga may labot sa iban nga relihion?
Ang akon bala obra nagasuporta sa butig nga relihion?
May ginahimo pa bala ako nga dapat ko untatan para makagua ako sa butig nga relihion?
Kon may huo ako nga sabat bisan diin sa sini nga mga pamangkot, ano ang dapat ko himuon?
Sa ano man nga sitwasyon, maghimo sing desisyon nga indi ka pagkonsiensiahon kag nagapakita sang imo katutom kay Jehova.
Ano ang himuon mo kon ginapangayuan ka sang amot para sa charity sang isa ka relihion?
KON MAGSILING ANG IBAN: “Gusto ko mabal-an kon ano ang ginasiling sang mga apostata parte sa mga Saksi ni Jehova para mapangapinan ko ang kamatuoran.”
Husto bala ina? Ngaa?
SUMARYO
Para padayon kita nga mangin matutom kay Jehova, indi kita dapat makig-upod sa mga nagatinguha nga magpatalang sa aton.
Rebyu
Ngaa indi kita dapat magpamati sa bisan ano nga impormasyon halin sa mga apostata?
Ano dapat ang aton himuon kon nabal-an naton nga ang isa ka utod nakahimo sing serioso nga sala?
Ano ang dapat naton himuon para masunod ang paandam nga maggua sa butig nga relihion?
DUGANG NGA IMPORMASYON
Hibalua kon ano dapat ang imo reaksion kon may ginapalapta nga sala nga impormasyon parte sa mga Saksi ni Jehova.
“Matuod Bala ang Impormasyon nga Nabaton Mo?” (Ang Lalantawan, Agosto 2018)
Paano mo mabal-an nga ang organisasyon ukon mga activity nagasuporta sa Babilonia nga Daku?
Ano ang ginhimo sang pila ka apostata para paluyahon ang aton pagtuo?
Sa eksperiensia nga “Bata Pa Ako, Ginapangita Ko Na ang Dios,” hibalua kon paano nakagua sa butig nga relihion ang isa ka pari sang Shinto.
“Ang Biblia Nagapabag-o sang Kabuhi” (Ang Lalantawan, Hulyo 1, 2011)