Daw Ano ka Daku ang Imo Gugma?

ANG tagimtim isa ka diutay, may alukaba nga tinuga nga nagapuyo sa dagat. Pila lamang ang naghunahuna sing daku sa sini. Apang, ang tagimtim may isa ka talalupangdon nga ikasarang: Nakahibalo ini kon paano magtapik. Ang iya sekreto: Nagahimu ini sing kola nga tuman kabakud nga ang isa ka manipis nga panit nga 3/10,000 sang isa ka pulgada (0.00762 mm) kadamol may “kusog” nga 7,000 ka libra kada kuadrada pulgada (493 kg/sq cm)! Ang bisan sin-o nga nagtinguha nga sayluhon ang tagimtim gikan sa iya napili nga balayan magapamatuod sa kusog sang iya kabakud magtapik.

Ang mga Cristiano pamilyar sa kaanggid nga butang. Ang organisasyon ni Jehova sa duta ginahuman sang katawhan gikan sa tanan nga mga pungsod, hambal, rasa, kag sosyal nga mga grupo. Apang malig-on ini nga nahiusa. Ang iya sekreto? Ini, man, mabakud magtapik, isa nga mas makusog sang sa kola sang tagimtim. Ginasugiran kita ni apostol Pablo kon ano inang nagapatapik nga bagay sang magsulat sia: “Panapti ang inyo kaugalingon sang gugma, kay amo ini ang himpit nga higut sang paghiusa.”—Colosas 3:14.

Sa pagkamatuod, indi tanan sang ginatawag nga gugma nagapahiusa. Madamung mga inaway ang ginaaway sa ngalan sang “gugma sa pungsod.” Ang makagud nga gugma mahimu magdul-ong sa kahisa. “Ang gugma sa kuarta amo ang gamot sang tanan makahalalit nga mga butang.” (1 Timoteo 6:10) Kag ang kabangdanan sang karon ital-ital nga mga butang amo, sing bahin, ang katunayan nga madamung mga tawo ang “mahigugmaon sang ila kaugalingon.”—2 Timoteo 3:1, 2.

Ano nga sahi sang gugma, nian, ang nagapahiusa sa mga Cristiano? Ang dimakagud, daku nga gugma.

Diin ang Tuboran Sini nga Gugma?

Ini nga pamangkot ginsabat sa tatlo ka malip-ot nga tinaga nga ginsulat ni apostol Juan: “Ang Dios gugma.” (1 Juan 4:8) Ang gugma ni Jehova ginpakita paagi sa iya kalulo sa aton. Ang tanan nga maayong butang nga natigayon naton naghalin sa iya. “Ang tagsa ka maayong hatag kag ang tagsa ka dulot nga himpit nagagikan sa hitaas.” (Santiago 1:17) Matuod ini sa pisikal nga kalibutan nga ginaagom naton, kag labi na sa espirituwal nga mga pagpakamaayo nga ginahatag sing bugana katama sa mainapresyahon nga mga Cristiano.

Ginganyat ni Jesucristo ang aton igtalupangod sa isa pa ka talalupangdon nga pagpadayag sang gugma ni Jehova, nga nagasiling: “Nagpasubang sia [Jehova] sang iya adlaw sa mga malauton kag sa mga maayo kag nagapaulan sa mga matarong kag sa mga dimatarong.” (Mateo 5:45) Kag ang gugma ni Jehova para sa katawhan subong kabilogan nagalabaw pa sa paghatag sing materyal nga mga pagpakamaayo, kay si Jesus nagpaathag: “Ginhigugma gid sang Dios ang kalibutan sa bagay nga ginhatag niya ang iya bugtong nga anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Ano pa ang mas daku nga gugma sa sina?

Paagi sa pagpakita sina nga gugma para sa katawhan, ginapabutyag ni Jehova ang gugma nga malig-on nga nanggamut sa prinsipio. Sa Griegong pamulong, ina nga gugma gintawag nga a·gaʹpe. Ginapakita ni Jehova ining gugma sa mga Cristiano man. Apang, ang iya gugma sa ila may dugang pa nga kinaiya. Kon ang isa ka tawo nagahulag sa gugma sang Dios, ginapabutyag ni Jehova ang phi·liʹa, ang Griegong tinaga nga nagakahulugan “pag-abyanay” ukon “pagpalangga.” Ginapasalig kita ni Jesus: “Ang Amay gid nagapalangga sa inyo, bangod nagpalangga kamo sa akon.”—Juan 16:27.

Iloga ang Gugma sang Dios

Ang gugma nga nagahiusa sa mga Cristiano nagailog sang halangdon nga halimbawa mismo ni Jehova. Subong sang ginsiling ni apostol Juan: “Nagahigugma kita, bangod ginhigugma niya kita una.” (1 Juan 4:19) Ina nga gugma amo ang tanda sang matuod nga Cristiano kag, sa pagkamatuod, bunga sang balaan nga espiritu sang Dios.—Juan 13:34, 35; Galacia 5:22.

Ang gugma sang Cristiano dapat ipatuhoy una kag labaw sa tanan sa iya langitnon nga Amay. Nian, dapat niya higugmaon ang iya isigkatawo. (Mateo 22:37-39) Sanglit ang gugma sang Dios nagasakop sing daku, ang aton gugma sa mga masigka tumuluo, dapat man daku, ‘masangkad.’ Sing nahisuno, ginsilingan ni apostol Pablo ang mga taga-Corinto nga Cristiano: “Ang amon baba nagabuka nga sa inyo, O mga taga-Corinto, nagadaku ang amon tagipusuon. . . . Nagdaku man ang inyo mga tagipusuon.”—2 Corinto 6:11-13.

Paano naton ilugon ang daku nga gugma ni Jehova? Binagbinagon naton ang pila ka halimbawa.

“Pasangkara” ang Gugma sa Pamilya

Nagpaandam si Pablo nga sa “katapusan nga mga adlaw” may yara kakulang sing “kinaugali nga pagpalangga.” (2 Timoteo 3:1-3) Apang, sa Cristianong pamilya, ang gugma dapat nga magbugana, lunsay ang gugma nga nanggamut sa prinsipio (a·gaʹpe) kag ang mainabyanon, mapinalanggaon nga sahi sang gugma (phi·liʹa).—Mateo 10:37; Efeso 5:28; Tito 2:4.

Ang pagpakita sing gugma indi pirme mahapos. Ang problema sa kuarta masami nga nagatuga sing nasaklaw nga mga balatyagon sa pamilya. Ang isa ka tiayon mahimu nga kon kaisa maakig sa mga ginapangayo sang iya tiayon. Ang asawa mahimu nga magabatyag nga ginapatumbayaan ukon ginapasapayan. Madamung mga tin-edyer ang nagabatyag nga ang ila mga ginikanan wala nagahangop sa ila. Paano ini kag ang kaanggid nga mga problema malubad?

Una, ang solusyon amo nga ilugon sang tagsatagsa nga natungdan ang halimbawa sang Dios kag “pasangkaron” ang iya gugma. “Kamo nga mga asawa, magpasakop sa inyo mga bana, subong nga ini kalahamut-an sa Ginuo,” laygay ni Pablo. “Kamo nga mga bana, padayon nga higugmaa ang inyo mga asawa kag indi magkaakig sing mapait sa ila. Kamo nga mga kabataan, tumana ang inyo mga ginikanan sa tanantanan, kay ini kalahamut-an sa Ginuo. Kamo nga mga amay, indi pagpaakiga ang inyo mga anak, agod nga indi sila masuboan.”—Colosas 3:18-21.

Ang pagpangamuyo sing bulig sa pagpadayag sang gugma pat-od nga epektibo kon nagautwas ang mga problema. Gani amo man ang maayo nga komunikasyon sa pamilya kag ang regular nga paghambalanay sa Biblia. (Deuteronomio 6:4-9) Subong sadsaran para sa sinang mahigugmaon nga komunikasyon, nasapwan sang mga pamilya nga mabuligon ang bahin nga “Ang Pulong sang Dios Buhi” sa Ang Lalantawan kag ang isa nga natig-ulohan “Pamangkot sang mga Pamatan-on” sa Magmata! nga magasin.

Daku nga Gugma sa Kongregasyon

Makahalanusbo kon ang mga ginikanan kag ang mga kabataan wala nagahigugmaanay sa isa kag isa. Makahalanusbo man kon ang mga masigka Cristiano wala nagapakita sing gugma sa isa kag isa. Si apostol Juan nagsiling: “Sia nga wala nagahigugma sang iya utod, nga iya makita, indi makahigugma sa Dios, nga indi niya makita.” —1 Juan 4:20.

Ang gugma nagabulig sa aton nga lauman ang pinakamaayo para sa aton espirituwal nga mga kautoran. (1 Corinto 13:4, 7) Mahimu naton makita ang aton utod nga nagapakig-away sa mga problema, ayhan nagaani sang iya ‘ginsab-ug’ bangod sang indi maalamon anay nga mga buhat. (Galacia 6:7) Apang, ang gugma magabulig sa aton nga huptan ang positibo nga panimuot sa iya. Likawan naton ang mga panghunahuna subong sang, ‘Pirme ako nga nagaduhaduha sa iya.’ Bisan pa nga ang aton utod mahimu nga maluya sa pagtuo, sarang naton mapabanaag ang pagpailob ni Jehova sa mga maluya kag sarang mailog ang Iya mahigugmaon nga kaluoy.—2 Pedro 3:9.

Ang gugma nga nagaluntad sa tunga sang mga alagad ni Jehova nagabulig nga mapalig-on ang lamharon nga mga Cristiano sa mabudlay nga mga tinuig sang pagkatin-edyer. Sang ang isa ka Aprikana ginpamangkot kon ano ang nagbulig sa iya nga magpabilin sa matuod nga pagsimba, nagkomento sia: “Sa banta ko indi lamang kon ano ang akon naton-an gikan sa Biblia kundi ang gugma nga akon makita kon magtambong ako sa Cristianong mga miting kag kon paano ako ginbaton ang nagpahamuot sa akon sing labi pa.”

Huo, ang daku nga gugma magahupot sing tingob sa kongregasyon. Apang dumduma, ang gugma ni Jehova nagalab-ot sa tanan nga katawhan. Paano naton sia mailog sa sini?

Higugmaa Yadtong Indi Naton Kilala

Ginpadaku ni Jesus ang isa ka talalupangdon nga paagi nga mapabutyag ang gugma bisan sa mga tawo nga indi naton kilala. Nagsiling sia: “Iwali ining maayong balita sa bug-os napuy-an nga duta nga panaksi sa tanan nga kapungsoran; kag ugaling magaabot ang katapusan.” (Mateo 24:14) Huo, ginapakita sang mga Saksi ni Jehova ang ila gugma para sa iban kon sila nagawali sang maayong balita sa mga tawo nga indi gid nila kilala.

Ang gugma sa katawhan sa kabilogan nagapahulag sa mga Cristiano nga buligan ang mga dumuluong sa iban man nga paagi. Kaangay sang Samaritano sa parabola ni Jesus, ginatinguhaan nila nga mangin maayo nga isigkatawo, ‘nagahimu sing maayo sa tanan,’ sa masami nga may wala ginapaabot nga matahom nga mga resulta. (Galacia 6:10; Lucas 10:29-37) Halimbawa, ang isa ka pamatan-on nga babayi sa Alaska nga nagapakigbahin sa hilikuton nga pag-ebanghelyo mga 160 milyas (260 km) gikan sa iya balay nakasugata sing pigado gid sa pinansial nga pamilya nga ang ila salakyan naabiriya. Sang mabatian ang ila nadangtan, ang amay sang bata naglakbay sing 320 milyas (520 km) agod magbulig. Naghatag ini sing kahigayunan nga manaksi agod sugiran ang pamilya tuhoy sa mga katuyoan kag Ginharian ni Jehova. Pagkatapos nga maton-an ang Biblia, ginsimbulohan sang bana kag asawa ang ila dedikasyon kay Jehova. Karon sila, man, nagaeksperiensia sang kasadya nga ipaambit ang maayong balita sa iban.—Binuhatan 20:35.

Mahigugma Mo Bala Yadtong Nagadumot sa Imo?

Apang, ang Cristianong gugma nagalabaw pa sang sa paghigugma sa mga dumuluong. Ginlaygayan ni Jesus ang iya mga disipulo: “Padayon nga higugmaa ang inyo mga kaaway kag ipangamuyo yadtong nagahingabot; agod nga mapamatod-an ninyo ang inyo kaugalingon nga mga anak sang inyo Amay nga yara sa mga langit, sanglit nagpasubang sia sang iya adlaw sa mga malauton kag sa mga maayo kag nagapaulan sa mga matarong kag sa mga dimatarong.” —Mateo 5:44, 45.

Posible gid bala nga higugmaon yadtong nagahingabot sa aton? Sadtong Inaway Kalibutanon II, ang mga Saksi ni Jehova sa Nazi Alemanya ginsakit sing mapintas kag ginpilit nga mangabudlay sing lakas nga may diutay nga rasyon. Sing hayag, indi nila mabatyagan ang daku nga pagpalangga kag pagkamainabyanon (phi·liʹa) sa ila mga manughingabot. Apang, ila gid ginpakita ang amo man nga may prinsipio nga gugma (a·gaʹpe) nga ginpakita ni Jehova sa tanan nga katawhan. Busa, kon posible, ginapaambit sang mga Saksi sa mga nagahingabot ang nagahatag-kabuhi nga mensahe sang kamatuoran. Kag ang iban sining mga kaaway nangin mga Cristiano sang ulihi.

Madamu sadtong naghingabot sa mga alagad sang Dios ang nagahimu sina nga wala sing hinalung-ong, subong sang ginhimu ni Saul, nga sang ulihi nangin si apostol Pablo. (Galacia 1:13, 14) Kon mahibaloan naton nga inang mga manugpamatok, sa isa ka paagi mga biktima sang butigon nga propaganda ni Satanas, mabuligan kita nga may yara mas mahigugmaon nga panimuot sa ila.—2 Corinto 4:4.

Si Jehova, ang Dios sang kainit kag balatyagon, nalipay sa pagpadya sadtong nagapakita sing daku nga gugma sa pamilya, sa kongregasyon, sa dumuluong, kag bisan sa mga kaaway. Ina nga gugma nagahugpong sing hugot sa mga katapo sang pamilya kag kongregasyon, subong nga ang kola sang tagimtim nagapapanguyapot sa sini sing malig-on gid sa bato. Dugang pa, ginapalig-on sang gugma ang mga taga-guwa nga magkari kag makig-ambit sa Cristianong paghiusa. Indi bala nga may rason kita, nian, nga maghulag sing mainapresyahon sa gugma sang Dios paagi sa pagpadaku sang aton gugma sing labi pa? Sa pagkamatuod, may yara gid! Gani “padayon kita sa paghimu sini sing labi pa.”—1 Tesalonica 4:9, 10.