Nagasabat Ka Bala nga May Kaakig?

“Ang mahumok nga panalabton nagapalugpay sang kasingkal, apang ang matigdas nga pulong nagapaibwal sang kaakig.” Amo sina ang ginasiling sang Hulubaton 15:1.

Kon ginapaakig ka sang iban, matiklod ka bala nga sabton man sia? Magadul-ong ina sa grabe nga resulta.

Sa Siudad sang Nueva York, isa ka pamatan-on nga babayi ang nagpauli sa tapos sang mainit nga pagpakigbais bangod sang mapigaw nga serbisyo sa balaligyaan sang pizza kag ginsugid niya ang tuhoy sini sa iya tiyo. Ang iya tiyo nagbalik didto agod makighambal sa tag-iya sang balaligyaan. Nag-utwas ang inaway, kag ginpatay sang tag-iya sang balaligyaan sang pizza ang tawo.

Ang pagsunod bala sa laygay sang bag-o lang ginsambit nga hulubaton nakabulig sa kahimtangan kaangay sina? Dumduma ang hitabo may kahilabtanan kay Abigail kag kay David, nga narekord sa 1 Samuel 25:2-35. Si David nakahimo man kuntani sang grabe sayop sang makabaton sia sing malain nga balita gikan sa mga pamatan-on nga nagpauli halin kay Nabal, nga bana ni Abigail. Napatulo kuntani ang wala sing sala nga dugo. Ang malum-ok nga panalabton ni Abigail, kag ang iya malulo nga mga buhat kag pagpaubos, nagpalugpay sa kaakig ni David kag sang iya tinawo.