Ginaaman ni Jehova ang mga Kinahanglanon sang Trinidad

KUTOB sa iya diutay nga ginsugoran sang 1912, ang hilikuton nga pagbantala sang Ginharian sa Trinidad kag sa iya kaingod nga isla sang Tobago nakaagom sang madamong halintang sang pag-uswag. Ang pinakaulihi nga hitabo—sang Marso 1985—amo ang pagtapos kag pagdedikar sa isa ka tinukod sang sanga sa ilaya sang kapital, sa Port of Spain. Ang bag-ong pasilidad kinahanglanon gid katama, kay ang Trinidad nakaeksperiensia sing pag-uswag nga 79 porsiento sa manugbantala sang Ginharian kutob sang gintukod ang katapusan nga mga pasilidad sang sanga.

Indi mahapos ang magpangita sing nagakaigo nga propiedad sa isa ka diutay, madamo sing populasyon nga isla. Mahal ang lote, kag mahal man ang gasto sa pagpatindog. Apang, gin-aman ni Jehova ining tanan nga mga kinahanglanon. Isa ka matahom kag madali makadtoan nga lugar ang nahamtang malapit lamang sa haywey sang hulugpaan sang eroplano. Ginbuloligan sang mga kautoran ang proyekto, kag ginsakdag gid ini.

Halos ang tagsa ka manugbantala sang Ginharian sa Trinidad nagpakigbahin sa hilikuton sa pagpatindog. Kada talipusposan sang semana isa ka grupo gikan sa isa ka kongregasyon ang nagakari agod magbulig, samtang ang iban naman gikan sa iban nga kongregasyon nagaaman sang pagkaon kag pamahaw. Ang obra sa gab-i ginahimo sing makaduha ukon makatatlo ka beses sa isa ka semana. Bisan tig-ululan nagpadayon ang pagpatindog. Sang tion na nga ibubo ang nahauna nga panalgan, halos 350 ka kautoran ang nagkadto kag nagpasahay sing mga balde sang semento. Ang amon Hindu nga mga kaingod natingala gid! Naghatag ini sing kahigayunan nga panaksihan sila.

Ang gasto sa pagpatindog gintamod man sa kaanggid kag bug-os tinagipusuon nga espiritu. Bisan ang mga utod nga babayi nag-amot sang ila bulawan nga alahas, agod ibaligya kag magamit sa pagpatindog. Isa ka otso anyos nga bata nga lalaki ang nagsulat: “Luyag ko magtrabaho sa tinukod sang sanga, apang bangod ang likod sang akon Daddy masakit kag indi sia makapangabudlay sing lakas, indi ako makakadto sing masunson. Gani ginapadala ko ini nga kuarta nga ginsupot ko agod makabulig sa hilikuton.”

Sa bilog nga pagpatindog, ang pagsakdag ni Jehova maathag. Si Hilary Charles, ang manugtatap sa pagpatindog, nagdumdom sang tion nga napulo na lamang ka sako sang semento ang nabilin kag gintawgan niya ang pabrika sang semento agod makakuha sing dugang pa. Nagsiling sia: “Mabudlay tigayunon ang semento. Nagsiling sila nga sa sunod nga semana pa kami makakuha. Mga alas nuebe ina sang aga. Sang alas dos sadto nga hapon, nakita ko nga nag-abot ang isa ka dekarga sang semento. Ang tsuper sang trak nagsiling: ‘Para sa iban kuntani ini nga semento, apang ginsilingan nila ako nga diri na lang kuno dal-on.’ Indi niya ini mahangpan. Kamut ini ni Jehova”

Ang duha sing panalgan nga tinukod sang sanga daw letra T ang korte, nga ang puertahan didto sa ibabaw—sa nabagatnan nga bahin. Sa tuo sang matahom nga pasilyo, yara ang Kingdom Hall, nga makapalingkod sing mga 200 ka tawo. Ang masangkad nga opisina yara sa wala. Ang ilimprintahan, shipping department, kag lalabhan yara sa naidalom sang mas malaba nga bahin. Sa ibabaw yara ang kusina, ang hulot-kalan-an, kag tululogan—walo ka hulot tulogan, kag ang tagsa may kaugalingon nga paligoan. Ang diutay nga librarya kag hulot nga palahuwayan yara sa naibabaw sang opisina.

Sabado, Marso 16, ang adlaw sang dedikasyon. Si Milton G. Henschel sang Nagadumala nga Hubon sang mga Saksi ang namulongpulong. “Indi lamang ang pag-aman ang nahibaloan ni Jehova, kundi kon ano man ang aton kinahanglan,” siling ni Utod Henschel. Huo, ang bag-o nga pasilidad dulot gikan kay Jehova. Ang sesyon gintakpan sang hanuot nga pangamuyo sang dedikasyon kay Jehova. Malipayon gid kami!

Ang mga Saksi sa Trinidad kag Tobago nalipay katama bangod sang pag-uswag nga ginahatag ni Jehova. Kag nagaabante sila kag nagapadayon sa pagpaabot sang pag-uswag samtang padayon nga ginaaman ang ila mga kinahanglanon subong mga manugbantala sang Ginharian.