Buhi Bala ang mga Patay? Kon Ano ang Ginasiling sang mga Tawo

ANG tigulang nga itom nga babayi masakiton gid tulukon. Masakit gid ang iya mga tiil amo kon ngaa daw indi sia makalakat. Ang iya dagway indi kinaandan—ang iya buhok ginpilitan sing mapula nga daga, nagasuksok sia sing pila ka bandana, kag ang iya mga kamut kag mga tiil napunihan sing mga anting-anting. Ngaa? Bangod sa sulod sang 50 ka tuig nagpati sia nga ginasuuban sia sang mga espiritu sang iya katigulangan. Mga siruhano ang nagresita sing daga, mga bandana, kag mga anting-anting agod “bulngon” sia.

Isa bala ka tumalagsahon nga pagtuo? Indi gid. Sa Aprika lamang, ang kabuhi sang dimaisip nga katawhan nasentro sa pagpati nga ang napatay nga mga katigulangan may gahom “sa pag-amlig sa ila mga kaliwat ukon sa pagsilot sa ila paagi sa indi malala nga balatian ukon dimalas,” suno sa libro nga African Heritage. Ang amo man nga pagsimba sa katigulangan ginabuhat sa madamo pa nga bahin sang kalibutan. Bisan daw makapakibot ini, ina nga pagsimba mahimo nga anggid sa relihioso nga mga pagtuluohan sang imo ginapuy-an. Sa anong paagi?

Ang mga Hindu kag ang iban nagapati sa reinkarnasyon. Ang mga espiritista nagapati nga sarang makontak sang isa ang patay paagi sa mga pamlang ukon medium. Ang mga Katoliko ginatudloan nga sa kamatayon ang mga sala sang kalabanan nga tawo ginahugasan sa purgatoryo antes sila sa ulihi makalab-ot sa langit apang ang indi na magbag-o nga malaut nagakadto sa kalayuhon nga impierno. Ang kalabanan nga Protestante nagapati nga ang mabuot nagakadto sa langit kag ang malaut ginapaantos sa impierno, kag madamo ang kombinsido nga amo ini ang ginatudlo sang Biblia. Ang iban nga mga tawo nga diutayan lang mapatay kombinsido nga may isa ka butang nga nagabulag sa lawas kon mapatay ini.

Bisan indi palareho ang mga relihion sa ila espesipiko nga mga ideya nahanungod sa pihak nga kinabuhi, ang kalabanan sa ila pareho sa isa ka butang—ang pagtuo nga ang patay buhi.

Sa pagkamatuod ang kamatayon isa ka mapintas nga kaaway, nga nagapukan sa tanan nga kaliwat sang katawhan—manggaranon kag imol, bata kag tigulang. Suno sa Biblia: “Usbong kamo nga nagapahayag sa diutay nga tion kag nian nagakawala.” (Santiago 4:14) Kada adlaw madamo ang nagakapatyan sing hinigugma.

Busa, madamo nga tawo ang nagapalibog: ‘Sa diin sila nagkadto? Napatay gid bala sila ukon buhi pa sila sa iban nga duog? Makita pa ayhan naton sila liwat? Sa diin kita makakita sing matuod nga mga sabat?’