Buhi Bala ang mga Patay? Kon Ano ang Ginasiling sang Dios

NAGLUPAD ang isa ka eroplano gikan sa siudad sa Nabagatnan nga Aprika padulong sa isa ka banwa nga mga 250 ka milya (400 km) ang kalayuon. Ang nakasakay sa eroplano amo ang piloto kag ang iya 12 anyos nga anak nga babayi. Apang sang magtinguha sila sa paghugpa subong emerhensya, nahulog ang eroplano kag napatay sila nga duha.

“Si Jehova nga Dios lamang ang nakahibalo sang kasakit kag kadulaan nga akon ginbatyag, subong man sang kabudlay nga dapat ko landason,” siling ni Betty, ang asawa kag iloy. Paano niya ini naatubang? “Pirme ako nagapangamuyo sa pagpangayo sing kaisog kag kusog sa paglandas agod nga mabuligan ko man ang iban sa paglandas.” Daku nga paumpaw ang natigayon ni Betty gikan sa ginasiling sang Dios nahanungod sa kahimtangan sang mga patay kag sa ginalauman nga pagkabanhaw.

Ano ang ginasiling sang Dios nahanungod sa mga patay? Ang Biblia nagasabat: “Ang patay wala makahibalo sing bisan ano.” (Manugwali 9:5, The Jerusalem Bible) Gani wala sing pangalibotan ang mga patay. Subong lamang sina ka simple. Nian ngaa kadamo gid sang nagapati sang kabaliskaran? Bangod nalimbongan sila sang isa ka daku kag dumaan nga limbong nga lapnag sa bilog nga duta!

Isa ka Limbong sa Bug-os nga Duta

Nagsugod ini tanan sa una nga butig. Ang maragtason nga rekord sa tolon-an nga Genesis sang Biblia nagahatag sing detalye. Ini nagasiling: “Dili ka magkaon gikan sa kahoy sang pagkilala sang maayo kag malaut, kay sa adlaw nga magkaon ka sa iya mapatay ka nga totoo.” (Genesis 2:17) Si Jehova nga Dios yadto nga nagapakighambal sa una nga tawo nga si Adan. Karon, ipaanggid ini sa Genesis 3:1-4, nga sa diin si Satanas, nga nagahambal paagi sa man-ug, naghaylo kay Eva nga lalison ang Dios, nga nagasiling: “Dili kamo mapatay nga totoo.” Gani ginsupak ni Satanas ang ginsiling sang Dios. Bangod sini sia ang una nga nagbinutig, kag sia nangin “amay sang kabutigan.”—Juan 8:44; Bugna 12:9.

Apang napatay sanday Adan kag Eva, kag gani amo man ang dimaisip nga minilyon pa. Paano ini nalusutan sang butigon nga si Satanas? Paagi sa pagtanum sang ulihi sing ideya nga, bisan pa ang lawas nagakapatay, may butang nga nagapadayon sa pagkabuhi. Nian ini nangin isa ka doktrina sang dumaan nga mga relihion kag ginsamo sa Griegong pilosopiya. Busa, ang pagpati tuhoy sa pagkadimamalatyon sang kalag halos lapnag sa bug-os nga uniberso. Kag para sa madamo nga nagapati nga ang ila napatay nga mga hinigugma nagakabuhi sa iban nga duog, ayhan isa ini ka makapaumpaw nga ideya. Apang, ang importante nga pamangkot amo: Matuod bala ini?

Indi Bala Mapatay ang Imo Kalag?

Ang tinaga nga “pagkadimamalatyon” tatlo ka beses nga makita sa Biblia, tanan sa Cristianong Griegong Kasulatan. Ang pag-usisa kon paano ini ginagamit nagahimo sang isa ka butang nga maathag: Ang tawo sa kinaugali indi dimamalatyon.

Binagbinaga, halimbawa, ang ginsiling ni apostol Pablo sa 1 Timoteo 6:15, 16 nga sa diin ginlaragway niya si Jesucristo subong “Hari sang mga hari kag Ginuo sang mga ginuo, nga amo lamang ang may pagkadimamalatyon.” Gani paano si Jesus tuhay sa tanan nga “mga hari” kag “mga ginuo”? Sia dimamalatyon; sila mamalatyon.

Matuod, ginsaaran sing pagkadimamalatyon ang mga sumulunod ni Cristo nga gintawag sa paghari upod sa iya sa langit. (1 Pedro 1:3, 4) Sa amo, aton mabasa sa 1 Corinto 15:53, 54: “Ining mamalatyon kinahanglan magsuklob sing pagkadimamalatyon. Apang kon . . . ining mamalatyon magsuklob sing pagkadimamalatyon, nian matuman ang pulong nga nasulat: ‘Ang kamatayon ginlamon sing dayon.’” Apang talupangda nga ang pagkadimamalatyon ‘ginasuklob.’ Isa ini ka padya para sa matutom kag pinili nga mga Cristiano. Indi ini isa ka butang nga ginapanubli sang tanan nga tawo.

Dugang pa, ang Biblia wala nagasiling nga ang tawo may yara ukon ginhatagan sing kalag. Sa baylo, ini nagasiling: “Kag ginhimo ni Jehova nga Dios ang tawo gikan sa yab-ok sang duta kag ginhuypan ang iya ilong sing ginhawa sang kabuhi, kag ang tawo nangin buhi nga kalag.” (Genesis 2:7; ipaanggid ang 1 Corinto 15:45.) Ang mangin isa ka butang tuhay sa pagtigayon sing isa ka butang. Wala sing bisan sin-o nga magasupak sa kamatuoran nga ang mangin ido tuhay sa pagtigayon sing ido! Subong man, ang mangin kalag indi pareho sa pagtigayon sing kalag.

Nga indi tanan nga tawo nagabaton sing pagkadimamalatyon maathag sa madamo nga pagpatuhoy sang Biblia sa pagkapatay sang kalag. Halimbawa: “Ang kalag nga nagapakasala—ini gid mapatay.” (Ezequiel 18:4, 20) “Sa pagkamatuod, ang tagsa ka kalag nga indi magpamati sa sadtong Manalagna laglagon gikan sa tunga sang katawhan.”—Binuhatan 3:23.

Sanglit wala kita sing dimamalatyon nga mga kalag, ano ang nagakatabo kon mapatay kita? ‘Nagatulog’ kita, kay bangod sang halad nga gawad ni Cristo, may yara paglaum nga pagkabanhaw. (1 Corinto 15:22) Sang mapatay si Lazaro si Jesus nagsiling: “Makadto ako didto agod pukawon sia sa katulugon.” Nian nagpaathag sia: “Si Lazaro napatay.” (Juan 11:11-14) Si Pablo naghambal man nahanungod sa mga “nagakatulog sa kamatayon.” (1 Tesalonica 4:13, 14; 1 Corinto 15:20) Kon amo, kon ang patay nagakatulog . . .

May Pagbugtaw Bala?

Binagbinaga ining makatilingala nga danyag: Nagtipon ang isa ka kadam-an sa atubangan sang kuweba sa Betania malapit sa Jerusalem. Didto si Jesus upod kanday Maria kag Marta, mga utod ni Lazaro, nga bag-o lang mapatay kag ang iya bangkay ginhamyang sa sulod sang kuweba nga natakpan sing isa ka bato. “Kuhaa ninyo ang bato,” sugo ni Jesus. Si Marta namatok: “Ginuo, sa sining tion mabaho na sia, kay apat na sia ka adlaw nga napatay.” Apang sa tapos sang malip-ot nga pangamuyo si Jesus nagsinggit: “Lazaro, guwa ka!” Kag ang tawo nga si Lazaro nagguwa! (Juan 11:38-44) Mahanduraw mo bala ang katingala kag kalipay sang kadam-an—labi na nanday Maria kag Marta?

Kon buhi si Lazaro sa sulod sadtong apat ka adlaw, indi bala nga kuntani ginsugid niya ini sa tanan? Apang wala sing rekord nga naghambal sia nahanungod sa bisan anong eksperiensia samtang patay sia, kag dugang pa nga nagpalig-on nga ang Biblia nagasiling, “Ang patay wala makahibalo sing bisan ano.”—Manugwali 9:5, JB.

Indi tumalagsahon ang kaso ni Lazaro. Sa isa ka duog nga ginatawag Nain, nasugata ni Jesus ang lubong sang isa ka pamatan-on nga lalaki. Si Jesus nagsiling: “Pamatan-on, nagasiling ako sa imo, Bangon ka!” Kag ano ang natabo? “Ang patay nagbangon kag nagsugod sa paghambal.” (Lucas 7:11-17) Apang, diri liwat, may ginhambal bala ang pamatan-on nga lalaki nahanungod sa isa ka duog nga ginakadtoan sang mga tawo kon mapatay sila? Wala, kay maathag nga napatay lamang sia.

Sanday Jesus, Pablo, Pedro, Elias, kag Eliseo nagbanhaw tanan sing mga patay. Wala sing bisan sin-o sa sini nga napatay ang nagsiling nahanungod sa pihak nga kinabuhi.

Ining makatilingala nga mga milagro nagahatag sing pauna nga laragway sang lamang nga paagi nga ang kalabanan sang mga patay mabuhi liwat—paagi sa pagkabanhaw padulong sa kabuhi sa duta sa idalom sang Ginharian sang Dios. Si Jesus nagsiling: “Dili kamo matingala sini, kay ang takna magaabot nga ang tanan nga yara sa mga lulubngan magapamati sang [akon] tingog kag magaguwa.” (Juan 5:28, 29) Mangin isa ina ka labing makakulunyag nga eksperiensia para sa mga makabaton sing pribilehiyo sa pagkabuhi sa idalom sang paggahom sang Ginharian ni Cristo sa isa ka libo ka tuig, nga tuman na kalapit karon. (Bugna 20:4, 6) Ang pagkabanhaw nga paglaum nagapamatuod nga ang mga patay indi mahimo nga buhi. Kon ang mga tawo banhawon pa, nian dapat sila anay madulaan sing kabuhi.

Ang Iban Mahimo Mamangkot . . .

Kamusta naman ang mga pangangkon sang mga espiritista kag sang iban nga nakabaton sila sing mga mensahe gikan sa mga patay? Wala bala ini nagapamatuod nga ang mga patay buhi? Wala. Si Satanas tuman ka tuso, isa ka puno nga manuglimbong nga sa masami “nagapakunokuno subong isa ka anghel sang kapawa.” (2 Corinto 11:14, The New English Bible) Sia kag ang iya mga demonyo may ikasarang, kag masami nga ginahimo nila, sa pagpakunokuno subong mga espiritu sang mga tawo nga napatay! Busa, ang kasugoan ni Jehova sa Israel maathag nga nagsiling: “Ang bisan sin-o nga nagakadto sa manugpaguwa sing espiritu . . . ukon bisan sin-o nga nagapamangkot sa patay . . . butang nga kangil-aran kay Jehova.” (Deuteronomio 18:10-12) Nagsiling man si Jehova nga ang mga nagabuhat sing espiritismo “indi makapanubli sang ginharian sang Dios” kundi laglagon.—Galacia 5:19-21; Bugna 21:8.a

Kamusta naman sila nga nagapangangkon nga may naeksperiensiahan sila sang diutayan lang sila mapatay? Wala bala ina nagapamatuod nga ang espiritu ukon kalag nagaguwa sa lawas kon mapatay? Si George Gallup, Jr., manugsurbe sang opinyon sang publiko sa E.U., nag-usisa sini nga bagay kag ginbalhag niya ang mga resulta sa Adventures in Immortality. Ang mga doktor kag mga sientipiko nga gin-interbyu nagaduhaduha sa pagkamatuod sang mga report tuhoy sa diutayan nga pagkapatay. Ang isa ka biopisisista nga taga-Maryland nagsiling: “Mga eksperiensia ini sang hunahuna sa isa ka kahimtangan nga indi normal . . . Ang utok tuman kasibod nga organo kag makahimo sing madamo nga daya kon abusuhan mo ini—tan-awa ang mga eksperiensia sang mga nahubog sa droga.” Ang isa ka saykayatris nga taga-Ohio nagsiling: “Ining mga report mga pantasya ukon pagdalamguhanon lamang.” Ang isa ka taga-Michigan nga sientipiko nagsiling: “Mga pantasya ini nga bunga sang trauma.”

Si Gallup nakadangat sa konklusion nga ang mga report tuhoy sa malapit nga kamatayon “indi gid makabig nga pamatuod sang pagkadimamalatyon ukon sang pihak nga kinabuhi.” Sia nagdugang: “Mahimo nga dramatiko lamang ini nga mga hitabo sa sulod nga bug-os nga ginadrama sa mga hunahuna sang mga nagaeksperiensia sing pisikal nga trauma.” Nagsiling man sia nga ang iban nga mga relihioso nagapaathag sina nga mga eksperiensia subong “bahin sang estratehiya sang mga demonyo sa pagdaya sa mga tawo.” (Italiko amon.) Ang ginsiling ni Jehova nga Dios madugay na amo gihapon ang matuod: “Ang patay wala sing nahibaloan.”—Manugwali 9:5, JB.

Ano ang Dapat Mo Himuon?

Mag-andam sa mga ideya ukon mga panudlo nga napasad sa una nga butig ni Satanas—“dili kamo mapatay nga totoo.” (Genesis 3:1-5) Batona ang ginatudlo sang Pulong sang Dios, nga kon mapatay ang tawo “nagakawala ang iya mga hunahuna.” (Salmo 146:4) Batona man nga ang nagakatulog nga mga patay magabangon sa tion sang mahimayaon nga paggahom sang Ginharian sang Dios, nga ginapangamuyo sang madamo, kon ‘banhawon ang mga matarong kag mga dimatarong.’—Binuhatan 24:15; Mateo 6:9, 10.

Ang balatianon nga babayi nga ginsambit sa amon nahauna nga artikulo nagkalipay sang ginsugiran sia sang ginasiling sang Dios nahanungod sa mga patay kag nahanungod sa malimbungon nga mga demonyo. Ginguba niya ang iya mga anting-anting kag ang iban pa nga mga butang sang espiritista kag pagligad sang pila ka adlaw nag-ayo ang iya pamatyag. Ginabuligan na niya karon ang iban pa sa pagpanginpalos gikan sa pagsimba sa demonyo.

Ang balo nga babayi nga namatyan sing mga hinigugma sa nahulog nga eroplano ginpaumpawan sining panghunahuna: Sanglit wala sing nahibaloan ang mga patay nga bisan ano, ang tion para sa ila wala na. Gani gikan sa ila pagtamod magamata sila sing hinali sa isa ka dutan-on nga paraiso sa idalom sang Ginharian sang Dios! Nagakalipay sia nga buligan ang iban pa sa paghibalo nga sa dili madugay “pahiran ni Jehova ang luha sang tanan nga nawong.” (Isaias 25:8) Ginapaabot niya ang adlaw nga, paagi sa pagkabanhaw, mabuhi ang iya napatay nga mga hinigugma.

[Footnote]