Ang Labing Daku nga Pagkatawo sa Duta nga Magadul-ong sa Bug-os Kalibutan nga Kalig-onan

“Kay sa aton natawo ang isa ka bata, sa aton ginhatag ang isa ka anak nga lalaki; kag ang prinsipenhon nga paggahom mangin sa iya abaga. Kag tawgon ang iya ngalan Makatilingala nga Manuglaygay, Dios nga Gamhanan, Dayon nga Amay, Prinsipe sang Paghidait.”—ISAIAS 9:6.

1. Sa idalom ni sin-o pat-od ang bug-os kalibutan nga kalig-onan, kag paano naton nahibaloan ini?

BUG-OS kalibutan nga kalig-onan! Sa idalom sang “Prinsipe sining kalibutan,” nga si Satanas nga Yawa, imposible ini nga damgo. (Juan 12:31, The New English Bible) Apang ang bug-os kalibutan nga kalig-onan sa idalom sang “Prinsipe sang Paghidait,” nga si Jesucristo, isa ka bug-os nga kapat-uran. Ginapasalig kita sa sini ni Jehova sa tagna nahanungod sa pagkatawo kag sa hilikuton sang “Prinsipe sang Paghidait.” Sa Isaias 9:6, 7, aton mabasa: “Kay sa aton natawo ang isa ka bata, sa aton ginhatag ang isa ka anak nga lalaki; kag ang prinsipenhon nga paggahom mangin sa iya abaga. Kag tawgon ang iya ngalan Makatilingala nga Manuglaygay, Dios nga Gamhanan, Dayon nga Amay, Prinsipe sang Paghidait. Nahanungod sa kabuganaan sang prinsipenhon nga paggahom kag sang paghidait wala sing katapusan, sa trono ni David, kag sa iya ginharian sa pagpalig-on sini, sa pagtib-ong sini sa katarungan kag sa pagkamatarong kutob karon tubtob gid sa tion nga wala sing latid. Ang kakugi ni Jehova sang kasoldadosan magahimo sini.”

2. (a) Ano ang mga kahimtangan nga sa idalom sini ginhatag ang tagna sa Isaias 9:6, 7? (b) Paano naton nahibaloan nga tumanon gid ni Jehova ang katipan nga iya ginhimo upod kay David para sa isa ka ginharian nga wala sing katapusan sa iya linya sang kaliwatan?

² Daw ano ka dalayawon nga tagna! Makakulunyag gid usisaon ining tagna nahanungod sa labing daku nga pagkatawo sa duta. Apang antes naton mahangpan ini sing bug-os, dapat naton anay talupangdon ang mga kahimtangan sang ginhatag ining tagna. Panahon yadto sang paghimbon sang mga pungsod sang mga adlaw sang ginharian ni Juda sa idalom ni Hari Ahas. Bisan pa indi sia matutom kay Jehova, gintugutan ang hari nga maglingkod sa trono ni Jehova. Ginpakita ining pagbatas sa iya bangod sang katipan nga nahimo ni Jehova kay David para sa isa ka wala sing katapusan nga ginharian sa linya sang iya kaliwat. Bisan pa gindingot kay David ang pribilehiyo sa pagpatindog sing templo kay Jehova, ginhatagan sia sang Dios sing tal-us nga pagpakamaayo. Ginsambit ini sa mga pulong ni manalagna Natan: “Kag si Jehova nagsiling sa imo nga himuon ka ni Jehova nga panimalay. Kag ang imo panimalay kag ang imo ginharian papag-unon sing dayon sa atubang mo; ang imo trono palig-unon sing dayon.” (2 Samuel 7:11, 16) Nalipay gid si Hari David sa sadto nga saad sang Dios amo kon ngaa ginpaabot niya ang mahimayaon nga katumanan sini.

3. (a) Sa kay sin-o natuman yadto nga katipan upod kay David, kag paano nga tumalagsahon yadto nga katipan? (b) Ano nga tulumuron ang ginhimo sang Yawa tuhoy sa katipan para sa Ginharian?

³ Yadto nga katipan kay David natuman sa daku nga Anak ni David, nga si Jesucristo, ang “Prinsipe sang Paghidait.” Wala na sing iban pa nga harianon nga panimalay sa nawong sang duta ang nakatigayon sina nga katipan para sa ginharian, nga wala sing katapusan sa kabuganaan sang prinsipenhon nga paggahom sini, nga wala sing katapusan sa paghidait. Apang yadto nga katipan para sa Ginharian naghatag sing hangkat sa tanan nga ginharian sang kalibutan nga ang prinsipe ukon manuggahom sini amo si Satanas. Gani nangin tulumuron sang Yawa kag sang iya mga demonyo nga laglagon ang panimalay ni David kag paagi sa amo madula ang paglaum nga makatigayon ini sing permanente nga manunubli. Nakasapo si Satanas sing nakahanda nga instrumento kay Hari Resin sang Siria, kay Hari Peka sang napulo ka tribo nga ginharian sang Israel, kag sa hari sang Asiria.

Paghimbon Batok sa Katipan Para sa Ginharian

4. Paano ginhimo sang Yawa ang iya mga panikasog nga punggan ang pagpanghikot sang katipan ni Jehova para sa Ginharian nga ginhimo upod kay David?

⁴ Ano ang plano sang Yawa? Ang iya tulumuron amo nga piliton si Hari Ahas sang Juda, bangod sa kahadlok, nga makig-alyansa sa hari sang Asiria nga indi nagakaigo. Paano ini nahimo sang Yawa? Bueno, ginpahanabo niya nga maghimbon si Hari Peka sang Israel kag si Hari Resin sang Siria batok sa panimalay ni David. Naghimbon sila nga pahalinon si Ahas gikan sa trono sang Juda agod palingkuron ang ila pinili nga tinawo, nga anak ni Tabeel, subong ido-ido nga hari. Sin-o ining anak ni Tabeel? Talalupangdon nga indi sia kaliwat sang panimalay ni David. Busa, indi sia ang lalaki nga agihan sang katipan sang Dios para sa Ginharian tubtob nga masapwan sini ang permanente nga Manunubli sini sa “Prinsipe sang Paghidait.” Sia nangin tinawo nila, indi tinawo sang Dios, sa trono sang Juda. Sa amo ginabuyagyag sang Biblia ang panikasog ni Satanas nga punggan ang pagpanghikot sang katipan ni Jehova para sa Ginharian nga ginhimo upod kay David.

5, 6. Ano ang reaksion ni Hari Ahas sa paghimbon batok sa panimalay ni David, kag anong makapalig-on nga mensahe ang ginhatag ni Jehova sa iya?

⁵ Paano naghikot si Hari Ahas sa sining pamahog? Sia kag ang iya katawhan nagkurog sa kahadlok. Gani ginhatagan sia ni Jehova sing makapalig-on nga impormasyon nga indi sia makig-alyansa sa hari sang nagabaskog nga kagamhanan sa kalibutan, ang Asiria, subong proteksion. Ginpadala ni Jehova ang iya manalagna nga si Isaias agod makigkita kay Ahas kag idul-ong ining mensahe nga masapwan sa Isaias 7:4-9:

⁶ “Dili magkahadlok . . . bangod nga ang Siria upod ang Efraim [ang nagapanguna nga katapo sang ginharian sang Israel] kag ang anak ni Remalias [Peka] nagbuko sing malaut batok sa imo, nga nagasiling: ‘Magtaklad kita batok sa Juda kag gamuhon ini, kag bulhuan nga sa aton; kag magbutang kita sing lain nga hari sa sulod sini, ang anak ni Tabeel.’ Amo ini ang ginsiling sang Soberanong Ginuong Jehova: ‘Dili ini mahimo, kag dili mahanabo. . . . Kon kamo indi magtuo, sa pagkamatuod indi kamo maglig-on.’”

Tanda sang Kapaslawan sang Paghimbon

7. (a) Ano ang nagdul-ong sa talalupangdon nga tagna sa Isaias 7:14? (b) Ang pagkatawo ni Immanuel isa ka masaligan nga tanda sang ano, kag ang mga anak nga lalaki ni Isaias nag-alagad subong ano?

⁷ Sa amo, gintagna ni Jehova ang pagkapukan sang mga manughimbon. Sadto nga tion nag-abot ang tion para sa tagna sang Dios nga may makapatay-ug sa kalibutan nga pagkaimportante, kay nagtudlo ini sa harianon nga Manunubli sang katipan para sa Ginharian upod kay David. Apang ano ang nagdul-ong sa sadtong talalupangdon nga tagna? Bueno, naghambal si Jehova kay Hari Ahas. Ginsilingan niya si Ahas nga mangayo sing bisan anong milagruso nga tanda nga iya mahunahuna, kag dayon himuon ini ni Jehova subong malig-on nga garantiya nga paslawon sang Dios ang paghimbon batok sa panimalay ni David. Apang wala mangayo si Ahas sing tanda. Ano ang masunod nga natabo? Ang Isaias 7:14 nagasugid sa aton: “Busa si Jehova gid magahatag sa inyo sing tanda: Yari karon! Ang ulay magapanamkon, kag magaanak sing lalaki, kag tawgon niya ang iya ngalan Immanuel.” Ina nga ngalan nagakahulugan sing “Kaupod Naton ang Dios.” Sanglit si Immanuel kag ang duha ka anak nga lalaki ni Isaias nangin mga tanda, ang manalagna nagsiling sa Isaias 8:18: “Yari karon! Ako kag ang kabataan nga ginhatag sa akon ni Jehova mga tanda kag mga katingalahan sa Israel gikan kay Jehova sang kasoldadosan.” Gani ang pagkatawo ni Immanuel isa ka masaligan nga tanda nga ang tanan nga manughimbon kag ang ila mga himbon batok sa katipan sang Dios para sa Ginharian kag sa Manunubli sini indi magmadinalag-on!

8. (a) Ano ang ginsiling sang tagna sa Isaias 7:15, 16 nahanungod sa bata nga lalaki nga si Immanuel, kag ano ang resulta? (b) Ngaa ayhan nagpabilin nga indi pat-od ang pagkanakilala ni Immanuel sang mga adlaw ni Isaias?

⁸ Ang rekord sang Biblia wala nagasiling kon sin-o ang nagbun-ag sa anak nga lalaki nga nagahingalan kay Immanuel. Mahimo nga sia isa ka Judiyong ulay nga nangin ikaduha nga asawa ni manalagna Isaias. Ano man ang natabo, ang tagna nagpadayon sa pagsiling nga sa indi pa magdaku ang bata nga lalaki sa pagkilala sang maayo kag malain, ang duha ka hari nga nagahimbon batok sa panimalay ni David malaglag. (Isaias 7:15, 16) Nagmatuod ini. Mahimo nga ang kabangdanan kon ngaa ang pagkanakilala ni Immanuel sang mga adlaw ni Isaias nagpabilin nga indi pat-od sa aton amo nga agod indi matublag ang igtalupangod sang ulihi nga mga kaliwatan gikan sa Daku Pa nga Immanuel kon mag-abot sia subong isa ka milagruso nga tanda gikan sa langit.

9. (a) Ano ang ginagarantiya sang katumanan sang tanda kag ang pagkapukan sang paghimbon batok sa katipan para sa Ginharian? (b) Ano ang labing daku nga paghimbon sa kalibutan sa tanan nga tion?

⁹ Sa pagkamatuod, sang mga adlaw ni Ahas, may yara lamang diutay nga katumanan sang tanda kag sang pagkapukan sang kalibutanon nga paghimbon batok sa katipan sang Dios para sa Ginharian. Apang gingarantiya sadtong una nga katumanan nga ang tanda kag ang pagkapukan sang paghimbon sang kalibutan matuman sa daku nga paagi sa aton makahalanguyos nga tion. Nagaatubang kita karon sa labing daku nga paghimbon sang kalibutan. Sa anong kahulugan? Bangod ginasikway sing bug-os sang mga pungsod ang kahimusan ni Jehova sa pagdala sing dayon nga paghidait, kag ginapamatukan nila ang mga tiglawas sang “Prinsipe sang Paghidait.” Ang paghimbon ginahimo gid batok sa Manunubli sang katipan para sa Ginharian, ang “Prinsipe sang Paghidait.” Kamusta ang bug-os nga katumanan sang tagna karon? Kon nahantop naton ang tanda, nian mahangpan naton nga ang madangatan sining paghimbon sang kalibutan madugay na nahibaluan.

Pagkatawo sang “Prinsipe sang Paghidait”

10. (a) Sa bug-os nga katumanan sang Isaias 7:14, sin-o ang nag-anak sa bata subong mangin tanda kag Manunubli sang katipan para sa Ginharian? (b) Paano ginaangot ni istoryador Mateo ang tanda ni Immanuel sa panimalay ni David?

¹⁰ Sa bug-os nga katumanan sang tagna, ang ulay nga nanganak sing bata subong tanda kag Manunubli sang katipan para sa Ginharian amo si Maria, isa ka Judiyong ulay gikan sa kaliwat ni Hari David. Ginsugiran sia ni anghel Gabriel nga magaanak sia sing isa ka anak nga lalaki nga tawgon Jesus, nga si Jehova nga Dios “magahatag sa iya sang trono ni David nga iya amay,” kag nga “wala sing katapusan ang iya ginharian.” (Lucas 1:26-33) Gin-angot sang inspirado nga istoryador nga si Mateo ang tanda ni Immanuel sa panimalay ni David. Aton mabasa sa Mateo 1:20-23: “Nagpakita sa iya [Jose] sa damgo ang anghel ni Jehova, nga nagasiling: ‘Jose, anak ni David, dili ka magkahadlok sa pagbaton kay Maria nga imo asawa, kay ang iya ginapanamkon iya sang balaan nga espiritu. Magaanak sia sing lalaki, kag tawgon mo ang iya ngalan Jesus, kay sia amo ang magaluwas sang iya katawhan sa ila mga sala.’ Natabo ini tanan agod matuman ang ginpamulong ni Jehova paagi sa iya manalagna, nga nagasiling: ‘Yari karon! Ang isa ka ulay magapanamkon kag magaanak sing lalaki, kag tawgon nila ang iya ngalan Immanuel,’ nga nagakahulugan, kon badbaron, ‘Kaupod Naton ang Dios.’”

11. San-o kag sa diin natabo ang gintagna nga pagkabun-ag ni Immanuel?

¹¹ San-o kag sa diin natabo ining gintagna nga pagkatawo ni Immanuel? Ang tanan nga mga mata sang mga Judiyo ginpatulok sa husto nga direksion sang mga pulong sang Miqueas 5:2, nga ginbalikwat sa Mateo 2:6: “Kag ikaw, O Betlehem sa duta sang Juda, indi ikaw ang labing diutay nga siudad sa tunga sang mga pangulo sang Juda; kay gikan sa imo magalutaw ang pangulo, nga magabantay sa akon katawhan nga Israel.” Natawo ang “Prinsipe sang Paghidait” sang tuig 2 B.C.E. sa siudad sang Betlehem, kag natuman ang makakulunyag nga tagna sang Isaias 9:6, 7.

12, 13. Sa kay sin-o nagdala sing kadungganan ang pagkatawo sang “Prinsipe sang Paghidait,” kag anong mahimayaon kag makasililaw nga mga pasundayag ang nag-upod sa sini nga pagkatawo?

¹² Sin-o sa aton ang indi magkabig nga isa ka kadungganan kag kalipay ang mangin ginikanan sang isa nga tawgon ang “Prinsipe sang Paghidait”? Busa nagdala ini sing daku nga himaya sa harianon nga Amay sining Prinsipe. Sa kamatuoran, wala pa gid matabo sang una nga ang pagkatawo sang isa ka tawo gin-updan sang mahimayaon kag makasililaw nga mga pasundayag.

¹³ Ang masilaw nga anghel ni Jehova nagpakita sa mga manugbantay nga nagabantay sang ila mga panong sa kagab-ihon sa latagon sa guwa sang Betlehem, kag ang “himaya ni Jehova nagsilak sa palibot nila.” Nian ang anghel nagpahibalo sang pagkatawo bilang katumanan sang tagna sang Dios, nga nagasiling: “Natawo sa inyo karon nga adlaw sa siudad ni David ang Manluluwas, nga si Cristo nga Ginuo.” Nga subong bala kulang pa ang pagkamahimayaon sadto, nagpakita sa langit ang isa ka kadam-an sang mga anghel nga nagadayaw sa Amay sang bag-o matawo nga bata kag nagasiling sa isa ka tingog: “Himaya sa Dios sa kahitaasan, kag paghidait sa duta sa tunga sang mga tawo nga may maayong kabubut-on.” Daw ano ka nagakaigo nga ipahibalo sang mga anghel ang pagkatawo sang natangdo na nga “Prinsipe sang Paghidait” nga magaluntad ang balaan nga paghidait para sa tanan nga tawo nga may maayong kabubut-on sang Dios!—Lucas 2:8-14.

14, 15. (a) Gindayaw sang langitnon nga mga anak sang Dios si Jehova bangod sang anong mga hitabo? (b) Ngaa wala na sing iban pa nga pagkatawo sa bug-os nga maragtas sang tawo ang mapaanggid sa sining isa?

¹⁴ Madugay sa wala pa matawo ang isa nga mangin “Prinsipe sang Paghidait,” gindayaw sang mga anghel ang Dios sa isa ka pinasahi nga okasyon. Natabo yadto sa tion sang pagpanuga sang ginpasad niya ang sadsaran sang duta. (Job 38:4) Nakakita na bala kamo sing mga laragway sang aton duta nga nakuha sang mga astronot gikan sa kahawaan? Nian nakita na ninyo ang nakita anay sang mga anghel. Kag ano ang reaksion sang mga anghel sadto? Ang Job 38:7 nagasugid sa aton: “Nag-ambahan sing tingob ang kabituonan sang kaagahon, kag naghinugyaw sa kalipay ang tanan nga anak sang Dios.”

¹⁵ Ang labing daku nga pagkatawo nga nagpadungog sa duta isa gid ka hitabo nga bangod sini ang mga anak sang Dios naghiusa sang ila tingog sa pag-amba sing pagdayaw. Subong nga ang isa ka dutan-on nga amay ginapanginbulahan sa pagkatawo sang iya panganay nga anak nga lalaki, gani man ang langitnon nga Amay nga amo ang nagpahanabo sining labing daku nga pagkatawo sa duta takus gid pakadakuon paagi sa ambahanon sang mga katapo sang iya langitnon nga pamilya. Daw ano gid kadaku ang kalipay sang balaan nga Persona sa sadtong matahom nga konsierto sang mangin amay sia sa una nga tion sa isa ka bag-o gid nga mga kahimtangan! Wala pa gid sing pagkatawo sa maragtas sang uniberso nga mapaanggid sa pagkatawo sang gintangdo na nga “Prinsipe sang Paghidait.”

Nagasilak ang “Daku nga Kapawa”

16. San-o kag paano natabo ang dugang pa nga katumanan sang Isaias kapitulo 9?

¹⁶ Sang ginsugdan ni Jesus ang iya pagministeryo sa publiko, natuman sing dugang pa ang Isaias kapitulo 9. Tuhoy ini sa una nga duha ka bersikulo, nga nagtagna nga ang “daku nga kapawa” magasilak sa katawhan nga “nagalakat sa kadudulman.” Ang katumanan sadtong mga bersikulo ginpaathag sa aton sang inspirado nga istoryador nga si Mateo sa kapitulo 4, bersikulo 13 tubtob 17: “Kag sang ginbayaan niya ang Nazaret, nagkadto sia [Jesus] kag nagpuyo sa Capernaum nga yara sa ubay sang dagat sa mga distrito sang Zabulon kag Neftali, agod nga matuman ang ginpamulong sang manalagna nga si Isaias, nga nagasiling: ‘O duta sang Zabulon kag duta sang Neftali, nayon sa dagat, sa unhan sang Jordan, Galilea sang mga pungsod! ang katawhan nga naglingkod sa kadudulman nakakita sing daku nga kapawa, kag sa mga naglingkod sa ginsakpan kag sa landong sang kamatayon, ang kapawa nagdilag.’ Kutob nian nagsugod si Jesus sa pagwali, nga nagasiling: ‘Hinulsol kamo, kay ang ginharian sang langit malapit na.’”

17. Ngaa napasilak ni Jesus ang kapawa sa katawhan sang Zabulon kag Neftali, kag ano ang kahulugan sining kapawa para sa mga nagalingkod sa kadudulman?

¹⁷ Ang Zabulon kag Neftali yara nayon sa naaminhan nga ukbong sang Israel kag nagsakop sa distrito sang Galilea. Ang Neftali yara sa ubay sang bug-os nga nakatundan nga baybayon sang Dagat sang Galilea. Gani, paagi sa pagbantala ni Jesus, upod sa iya mga disipulo, sang maayong balita sang Ginharian sang Dios sa sadto nga mga duog, ginpasilak nila ang kapawa sa katawhan didto nga madugay na nga naglingkod sa kadudulman. Si Jesus nagsiling sa Juan 8:12: “Ako amo ang kapawa sa kalibutan. Ang nagasunod sa akon indi maglakat sa kadudulman, kundi may kapawa nga nagahatag sing kabuhi.” Sa amo, paagi kay Jesus ang “mga naglingkod sa ginsakpan kag sa landong sang kamatayon” nakapanag-iya sing “kapawa sang kabuhi” bangod ginhatag niya ang iya kabuhi subong “gawad sang madamo.” Sia ang ginagamit ni Jehova sa pagpasilak sing kapawa nga paagi sa amo ang mga tawo makatigayon sing kabuhi.—Mateo 4:23; 20:28.

18. (a) Ngaa ining “daku nga kapawa” indi lamang para sa katawhan sang Galilea? (b) Ano ang binagbinagon sa masunod nga artikulo?

¹⁸ Ining “dakung kapawa” nga nagasaad sing kaluwasan gikan sa kamatayon kag pagpigos indi lamang para sa mga tawo sang Galilea. Wala bala gintagna ni Isaias nga ang kabuganaan sang pangulohan mangin wala sing katapusan? Kag wala bala gintagna ni Isaias nga ang papel sang “Prinsipe sang Paghidait” mangin daku? Huo, kay ang Isaias 9:6, 7 nagasiling: “Tawgon ang iya ngalan Makatilingala nga Manuglaygay, Dios nga Gamhanan, Dayon nga Amay, Prinsipe sang Paghidait. Sa kabuganaan sang prinsipenhon nga paggahom kag sa paghidait wala sing katapusan.” Binagbinagon namon sa masunod nga artikulo, ang papel ni Jesucristo subong “Makatilingala nga Manuglaygay, Dios nga Gamhanan, Dayon nga Amay,” subong man “Prinsipe sang Paghidait.”

Madumduman Mo Bala—

◻ Ano nga paghimbon ang natabo sang mga adlaw ni Hari Ahas?

◻ Ano ang diutay nga katumanan sang tanda sa Isaias 7:14?

◻ Ano ang bug-os nga katumanan sadto nga tanda?

◻ Ngaa ang pagkatawo sang “Prinsipe sang Paghidait” amo ang labing daku nga pagkatawo sa duta?