Mga Pamangkot Gikan sa mga Bumalasa

◼ Si Jehova kag si Jesus bala ang ginapatuhuyan sa Hulubaton 30:4, nga nagapamangkot: “Sin-o bala ang iya ngalan, kag sin-o bala ang ngalan sang iya anak?”

Ginapakita sini nga bersikulo kon daw ano ka limitado ang tawo kon ipaanggid sa Labing Mataas. Ang retorikal nga mga pamangkot sini sarang mapamangkot tuhoy kay bisan sin-o nga tawo, apang ini nga mga pamangkot dapat magadul-ong sa nagapangatarungan nga tawo padulong sa Manunuga.

Ang manunulat nga si Agur namangkot: “Sin-o bala ang nagkayab sa langit kag nagkunsad? Sin-o bala ang nagtipon sang mga hangin sa iya mga kinuum? Sin-o bala ang nagputos sang mga tubig sa iya panapton? Sin-o bala ang nagtukod sang tanan nga ukbong sang duta? Sin-o bala ang iya ngalan, kag sin-o bala ang ngalan sang iya anak, sa pagkamatuod nakahibalo ka?”—Hulubaton 30:1, 4.

Wala sing dihimpit nga tawo ang nagkayab sa langit kag nagbalik nga nakahibalo sang tanan; wala sing tawo ang makasarang sa pagpugong sa hangin, sa dagat, ukon sa geolohiko nga mga puersa nga nagakatabo sa duta. Gani, si Agur namangkot, ‘May kilala ka bala nga ngalan ukon pamilya sang bisan sin-o nga tawo nga nakahimo sini nga butang?’ Magasabat kita sing wala.—Ipaanggid ang Job 38:1–42:3; Isaias 40:12-14; Jeremias 23:18; 1 Corinto 2:16.

Gani, magatan-aw kita luwas sa tawhanon nga pahibalo agod mahibaluan ang isa nga may labaw sa tawo nga gahom sa pagkontrol sang kinaugali nga mga puersa. Apang, wala kita ginalatiri sa paghibalo nahanungod sa iya paagi sa pagpanilag sang iya mga ginahimo. (Roma 1:20) Amo sini bangod sia, kon sa aton pa, nagkunsad dala ang impormasyon nahanungod sa iya kaugalingon kag sa iya mga hinimoan. Naghatag sia sing ispisipiko nga impormasyon. Halimbawa, ginhimo niya ini sang ‘magkunsad’ sia agod ihatag ang Kasuguan kay Moises sa Bukid sang Sinai. (Exodo 19:20; Hebreo 2:2) Ginbuligan man niya ang iya mga alagad nga apresyahon ang iya makahulugan nga ngalan, si Jehova. (Exodo 3:13, 14; 6:3) Sang ulihi, ginpakilala niya ang iya Anak, nga ginhingalanan Jesus kag literal nga nagkunsad halin sa langit nga dala ang dugang nga impormasyon tuhoy sa Manunuga.—Juan 1:1-3, 14, 18.

Dapat ini magabulig sa aton tanan nga malab-ot ang pila ka konklusion: Kaangay ni Agur, indi kita makatigayon sing matuod nga kaalam gikan lamang sa aton kaugalingon. (Hulubaton 30:2, 3) Kag indi kita makahingalan kay bisan sin-o nga tawo nga superlatibo sa gahom ukon ihibalo. Busa, mapainubuson naton nga matamod ang Isa nga makasarang sa paghatag sang kaalam nga kinahanglan naton. Amo ini ang Isa nga Labing Gamhanan, nga ang ngalan aton makilala kag nga ang Anak napatay agod matubos kita kag makatigayon sang kabuhi nga walay katapusan.—Mateo 20:28.