Pagsabat sa Panawag sa mga Pulo sang Micronesia

ANG mga ngalan kaangay sang Truk, Yap, Ponape, Guam, kag Saipan mahimo nga pamilyar sa imo. Apang ano naman ang Belau, Rota, Kosrae, Nauru, ukon Kiribati? Ini kag ang iban pa mga bahin sang kapin sa 2,000 ka pulo kag atoll nga nalapta sa mga pito ka milyon walo ka gatos ka libo ka kilimetro kuadrado sang Nakatundan nga Pasipiko kag nakilal-an sing tingob subong Micronesia, ukon magagmay nga mga pulo.

Sa sulod sining malapad nga kadakuon, nga halos nga pareho ang kadakuon sa Aus­tra­lia ukon sa kontinental nga Estados Unidos, ang mga Saksi ni Jehova masako sa pagbantala sang maayong balita sang Ginharian. (Marcos 13:10) Sa karon, ini nga hilikuton ginahimo sang mga 740 ka manugbantala sang Ginharian sa 13 ka kongregasyon. Sa pagkamatuod, daku ang kinahanglanon para sa dugang nga mga manugpangabudlay sa pagpaluntad sing tig-alani sa sining malagyo nga mga pulo sang dagat.—Ipaanggid sa Jeremias 31:10.

Sang nagligad nga 20 ka tuig ukon kapin pa, ang mga indibiduwal halin sa Hawaii, Pilipinas, Can­a­da, Estados Unidos, kag Aus­tra­lia nagsabat sa panawag kag nagmisyonero sa mga pulo sang Micronesia. Sang mag-abot ang una sa ila sang 1965, may yara lamang 76 ka manugbantala sang Ginharian sa kabug-osan sining malapad nga teritoryo. Apang, sang 1987, 4,510 ka tawo ang nagtambong sa Memoryal sang kamatayon ni Jesucristo. Sing maathag, ang mga pagpangabudlay sang mga Cristiano bangod sa gugma sa sulod sang madamong tinuig ginpakamaayo sing bugana.

Sa karon, may 49 ka misyonero nga nagaalagad sa 14 ka puluy-an sang mga misyonero nga nalapta sa mga pulo, ang tanan nagapanghikot sa idalom sang pagtatap sang sanga sang ­Watch Tow­er So­ci­e­ty sa ­Guam. Ang ila gugma kay Jehova kag sa ila mga kaingod sa Micronesia amo ang nagpahulag sa ila nga sabton ang misyonero nga panawag. Ano ang mga eksperiensia nila samtang nagaalagad sa sining nabaw-ing nga mga pulo? Kon tuhoy sa bag-ong mga hambal kag mga batasan, ano nga mga hangkat ang nalandas nila? Kag ano ang nagbulig sa ila nga magpabilin sa ila mga asaynment? Pamatian naton ang iban sa ila nahanungod sa ila hilikuton sa sining mga pulo.

Ang Hangkat sang Bag-ong mga Hambal

May yara walo ukon siam ka panguna nga hambal sa Micronesia. Apang bangod wala ini ginakabig nga nasulat nga mga hambal, mabudlay para sa bag-ong mga misyonero ang makakita sing mga libro agod magamit sa pagtuon sini. Apang, ginpangabudlayan nila ini. Ang isa ka epektibo nga metodo, siling sa ila, amo ang pagpanikasog nga magamit dayon kon ano ang ila natun-an sa pagbantala nga hilikuton. Ti, madumduman pa gihapon nila ang madamong makahalam-ot—kag makahuluya—nga mga hitabo nga natabo sang gintinguhaan nila nga himuon ina.

Si Roger, nga tumandok sang Hawaii, nagasugid sang isa sina nga sitwasyon sang mag-abot sia primero sa Belau 13 ka tuig na ang nagligad. “Sang ang isa ka tagbalay nagsiling, ‘Katoliko ako,’ ang lamang nga tinaga sa Palau nga nahibaluan ko nga isabat amo ang ‘Ngaa?’” Dayon ang tagbalay nagpaathag sing malawig. “Wala ko mahangpi bisan isa sang ginsiling niya. Sang makatapos na sia, ginsiling ko ang isa pa ka tinaga nga nahibaluan ko, ‘Salamat,’ kag naglakat!”

Nadumduman ni Salvador, nga nagkadto sa Truk kaupod sang iya asawa, nga si Helen, sang napulo ka tuig ang nagligad, ang panikasog niya nga pamangkuton ang isa ka taga-Truk nga babayi kon bala luyag niya magmalipayon (pwa­pwa). Sa baylo, namangkot sia kon bala luyag niya magmabdos (pwopwo). Kag si Ze­nette, nga naghalin sa Can­a­da upod sa iya bana, nga si David, nagdumdom sang tion nga nagsiling sia “Salamat” (kilisou) apang nahambal ang “Langaw sa kabayo” (kiliso). Apang, nahibaluan na nila karon sing maayo ina nga mga tinaga.

Sang magsaylo si ­James sa pulo sang Kos­rae pagkatapos sang apat ka tuig nga pag-alagad sa Ponape, nagbalik sia liwat sa uno. Nadumduman niya ang panikasog nga amiguhon ang isa ka tagbalay. Apang sa baylo nga mamangkot sing “Kamusta ka?” ginsilingan niya sia sing, “Makahalam-ot ka”! Karon, pagligad sang napulo ka tuig, nagsiling sia: “Sang primero, mabudlay ihambal ang iban nga mga tinaga sa Kos­rae bangod kay daw mga pamuyayaw ini sa Ingles.”

Walay sapayan, ina nga mga eksperiensia wala magpaluya sa sining mga misyonero gikan sa pagpadayon sang ila pagtuon sa hambal. “Diutay lamang ang mahimo nga bulig sa mga tawo kon indi mo pagtun-an ang hambal,” siling sang isa ka misyonero. “Nagahatag ini sing matuod nga pangpahulag sa pagtuon sing makugi.”

Mga Batasan kag mga Disparatis

Sa mga bag-uhan, daw makahalam-ot ang madamong lokal nga batasan. Halimbawa, nakilala ni David ang isa ka tawo nga naghingalan sang iya tatlo ka anak nga lalaki nga Sar­dine, Tuna, kag Spam. Sang ulihi, ginpakilala sia sa tatlo ka lalaki nga nagahingalan kay De­sire, Sin, kag Repent. Si Ze­nette nasaw-ahan nga ginatawag sang mga tawo ang ila mga lolo kag lola nga Papa kag Mama kag ang ila mga ginikanan sa ila una nga ngalan. Sang mag-abot primero si Sheri halin sa Hawaii, naham-ot gid sia nga ginagamit sang mga tawo ang ila ilong sa pagtudlo sang direksion. Kag madugaydugay nga tion ang ginkinahanglan agod maanad sa sining batasan: Kon ang isa ka babayi magasulod sa publiko nga tinipon “nagalakat” sia nga nagaluhod pakadto sa iya “pulungkuan” sa salog sa pagpakita sing pagtahod sa mga lalaki.

Madamo man ang mga disparatis. Sa Mar­shall Is­lands, halimbawa, kon may mapatay ang pamilya nagabutang sing pagkaon, sigarilyo, kag bulak sa lulubngan sang napatay. Ukon kon ang pispis magalupad sa palibot sang balay nga nagahuni, ginahangop ini nga may katalagman kag may mapatay sa pamilya.

Ang iban nga mga pulo nadalahig katama sa espiritismo. Isa sa ila amo si Jon. Isa anay ka gulang sa iglesia sang Protestante, sarang niya mapaguwa ang mga demonyo paagi sa mga pangadi kag paagi sa paggamit sing medisina nga ginhimo halin sa lana sang lubi.

“Isa ka adlaw nagpakita ang isa ka malaw-ay nga hitsura sang demonyo nga subong kalapad sang ganhaan sa puertahan sang akon hulot,” panugiron ni Jon. Sang primero abi ni Jon nagadamgo sia apang narealisar niya sang ulihi nga nagabugtaw gid sia.

“Ginsilingan ako sang demonyo nga sia ang ginhalinan sang akon mga ikasarang sa pagsalamangka. Nakibot ako sa sini kag nagpalibog ako kon ngaa ang mga demonyo magapanghikot paagi sa akon, nga isa ka deakono sang simbahan, kag kon ngaa ginapangabay sang ministro ang akon yawan-on nga mga serbisyo.” Napakig-angotan sang ulihi sang mga Saksi nga misyonero si Jon kag nagsugod sa pagtuon sa Biblia.

“Daku ang akon kalipay sa paghibalo sang kamatuoran nahanungod sa mga demonyo kag nahanungod sa kon paano makilala ang matuod nga relihion,” panugiron ni Jon. Naghalin sia sa iya iglesia kag nag-untat sa pagbuhat sang demonismo. Sa karon ginapaandaman niya ang iban nga likawan ang yawan-on nga mga buhat.—Deuteronomio 18:9-13; Bugna 21:8.

Paglab-ot sa Magagmay nga mga Pulo

Isa ka daku nga hangkat ang pagdala sang maayong balita sa katawhan sa magagmay naguwa nga pulo. Sing masami ang lamang nga paagi sa paglab-ot sa ila amo ang pagkuha sing ‘pass­es’ sa sakayan sang kopra. Kon magdulog ang sakayan sa tagsa ka magagmay nga pulo sa sulod sang pila ka oras ukon adlaw sa pagkuha sing karga, ang mga misyonero kag ang iban nga mga manugbantala sang Ginharian masako sa pagpanaksi sa mga taga-pulo. Ang semanal nga pagpalayag sa radyo amo ang isa pa ka paagi sa pagdala sang maayong balita sa ila.

Ang mga pumuluyo sang naguwa nga mga pulo masunson nagalakbay pakadto sa daku nga mga sentro nga pulo para sa pagkaon, sa pagpabulong, kag sa pagbutho. Samtang yadto didto, ayhan makapakigsugilanon sila sa mga Saksi ni Jehova kag mahimo makatigayon sing literatura sa Biblia. Ang interes ginatatap paagi sa sulat ukon kon ang mga manugbantala nagaduaw sang ila pulo. Isa ka mag-asawa ang napakig-angotan sa sining paagi sa Majuro sa Mar­shall Is­lands kag nian nagpauli sa ila tumandok nga pulo sang Ai­luk, 400 ka kilometro ang kalayuon. Nian nagsugod sila sa pag-uswag sa ila paghangop sa Biblia. Sang ulihi naghalin sila sa ila iglesia, ginhimo nga legal ang ila pag-asawahay, kag nagpabawtismo. Sa karon ang duha makugi nga nagabantala sa ila nabaw-ing nga pulo, masunson nagaalagad subong aux­il­iary payunir.

Ginagamit sang mga misyonero sa Ponape, Truk, kag Belau ang ila kaugalingon nga mga sakayan sa pagpanaksi sa pulo. Bangod wala sing pasilidad sa pagdungka sa kalabanan nga lugar, masunson sila nga nagalusong pakadto sa hunasan nga tubtob sa tuhod ang lunang. Ang kalabanan nga mga pumuluyo mainabyanon kag ginaabiabi ang mga bisita paagi sa paghumlad sang ila hinabol nga banig sa salog para sa ila kag sa pagserbi sa ila sang mabugnaw nga tubig sang butong. Ginatipon ang bilog nga pamilya kag nagapamati sila sing maayo. Bangod madamo ang wala sing kuarta, indi dikinaandan nga makita ang mga manugbantala nga nagabalik pagkatapos sang duha ukon tatlo ka adlaw nga puno ang ila sakayan sing mga prutas nga ginbayluhan sing literatura sa Biblia.

Mga Sakripisyo kag mga Padya

Para sa mga misyonero, ang kabuhi sa mga pulo indi pareho sa kon ano sa ila ginhalinan. Dapat sila maanad sa pirme nga pagkapatay sang suga kag kakulang sing tubig, nga nagadepende sa tubig sang ulan para sa suplay nila. Sa iban nga mga pulo, wala sing koryente, tubig, ukon mga gripo, wala sing sementado nga mga dalan, kag wala sing mga awto. Apang natun-an sang mga misyonero ang magpasibusibu. “Kon makita ko ang mga kauturan nga nagaistar sa mga balay nga nahuman sing gintambitambi nga barateya kag salog, nahanuklog kami sa ila, kag nagabulig ini sa amon nga mangin timbang sa amon mga kinahanglanon kag mga luyag,” siling ni Julian, nga nag-alagad sing matutom sa sulod sang 17 ka tuig sa Guam kag sa Mar­shall Is­lands.

Si Rod­ney kag si Sheri nagkadto sa Truk halin sa Hawaii. Nagsiling si Rod­ney: “Sing prangka, naeksperiensiahan ko ang kakibot sa kultura.” Sa karon, napulo ka tuig sang ulihi, nagsulat sia: “May makalilipay katama kami nga hilikuton nga himuon diri. May mga problema man kami kag mga kalipay; kon kaisa nagabatyag nga nagaluya ang buot kag masinulub-on. Apang luyag namon nga padayon nga himud-osan ang amon katuyuan sa kabuhi sa misyonero nga hilikuton diri.” Kag si Sheri malipayon nga nagsugpon: “Ang masinakripisyuhon sa kaugalingon nga mga tawo mga malipayon nga tawo.”

Sa pagkamatuod, ang ila mga sakripisyo ginpadyaan sing daku. Si Clemente kag ang iya asawa, nga si Eu­nice, nga nagkari sa Mar­shall Is­lands sang napulo ka tuig ang nagligad, karon nagahiwat sing 34 ka semanal nga pagtuon sang Biblia sa puluy-an. “Napulog-apat sa mga estudyante ang nagsimbulo sang ila dedikasyon kay Jehova paagi sa pagpatugmaw sa tubig,” balita niya, “kag ang iban nagauswag padulong sa bawtismo. Inang nagaluwas sing kabuhi nga hilikuton daku sing balor sa amon mga mata.” Si ­James, nga isa ka misyonero sa sulod sang kapin sa napulo ka tuig, nagsiling: “Isa gid ka pagpakamaayo nga makita ang pagbatas sang aton mga taga-Kos­rae nga kauturan kada tuig.” Didto sa Belau, si Roger nagkomento: “Ginpakamaayo kami sing isa ka bag-ong Kingdom Hall kag isa ka matutom nga grupo sang mga manugbantala.” Kag nagadumdom sang nagligad nga mga tuig, si Placido nagsiling: “Ang pagtuytoy kag balaan nga espiritu ni Jehova mapamatud-an sa amon kabuhi. Nagbulig ini sa amon nga mangin suod sa iya.”

Ina nga mga eksperiensia nagpalig-on sa mga misyonero nga magpabilin sa ila mga asaynment. Madamo sa ila ang makabalikid kag makadumdom sang pagtukod sang unang kongregasyon sa ila lugar. Kaangay ni apostol Pablo, nalipay sila sing pinasahi nga ‘wala magtukod sa sadsaran sang iban nga tawo.’ (Roma 15:20) Ang ila balatyagon ginpabutyag sing maayo sa sining komento: “Daku pa ang hilikuton nga pagahimuon. Nagapati ako nga buksan ni Jehova ang madamong kahigayunan nga magpasulod sing dugang nga mga katulad-karnero sa mga pulo, kag may pribilehiyo kami sa pagpakigbahin sa sini.”

“Ang pagpakamaayo ni Jehova—amo ang nagapamanggad, kag wala sia nagadugang sing kasubo sa sini,” siling sang Biblia sa Hulubaton 10:22. Ang mga nagsabat sa misyonero nga panawag sa mga pulo sang Micronesia naka­eks­periensia sa pagkamatuod sini nga pagpakamaayo upod ang kalipay kag kaayawan nga nagahalin sa pag-alagad kay Jehova.