Mangin Matinumanon sa mga Nagapanguna sa Inyo

“Tumana ang mga nagapanguna sa inyo kag magpasakop sa ila, kay nagapulaw sila tungod sa inyo mga kalag subong nga sila ang magahatag sing husay.”​—⁠HEBREO 13:⁠17.

 1. Paano kita makabenepisyo gikan sa binuhatan sang Cristianong mga manugtatap?

SI Jehova nag-aman sing mga manugtatap sa iya organisasyon sa sining “tion sang katapusan.” (Daniel 12:4) Nagapanguna sila sa pag-atipan sa kaangay sang mga karnero, kag ang ila pagdumala makapasulhay. (Isaias 32:​1, 2) Dugang pa, ang mahigugmaon nga pagdumala sang mga gulang nga malulo sa panong sang Dios nagapangalagad subong proteksion gikan kay Satanas kag sa sining malaut nga sistema sang mga butang.​—⁠Binuhatan 20:​28-30; 1 Pedro 5:​8; 1 Juan 5:⁠19.

 2. Paano gintamod sang iban si apostol Pablo, apang anong panimuot sa mga gulang ang nagakaigo?

² Apang paano mo ginatamod ang mga gulang? Sa imo tagipusuon, nagasiling ka bala: ‘Indi gid ako magakadto sa isa ka gulang sa sining kongregasyon kon may problema ako, kay wala ako sing salig sa ila’? Kon amo sina ang imo balatyagon, ginapadaku mo bala sing sobra ang ila mga pagkadihimpit? Sa dumaan nga Corinto, ang iban nagsiling nahanungod kay apostol Pablo: “Ang iya mga sulat maunod kag gamhanan, apang ang iya tindog maluya kag ang iya pagpamulong walay pulos.” Apang, gintangdoan sang Dios si Pablo sa isa ka ministeryo kag gingamit sia subong “apostol sa mga pungsod.” (2 Corinto 10:​10; Roma 11:​13; 1 Timoteo 1:12) Nian, ginalauman nga magbatyag ka kasubong sang utod nga babayi nga nagsiling: “May yara kita pinakamaayo nga hubon sang mga gulang sa kalibutan. Yari sila dira mismo sa pagbulig kon kinahanglanon.”

Ngaa Dapat Sila Tumanon?

 3. Kon ang Ginuo yara sa espiritu nga aton ginapakita, paano naton dapat tamdon ang Cristianong kabulig nga mga manugbantay?

³ Sanglit ang Cristianong kabulig nga mga manugbantay gin-aman sang Dakung Manugbantay, nga si Jehova nga Dios, ano sa banta mo ang luyag niya nga itamod naton sa ila? Sa pagkamatuod, ginapaabot sang Dios sa aton nga sundon naton ang pasad sa Biblia nga panuytoy nga mabaton paagi sa mahigugmaon nga mga manugtatap sa idalom sang pagdumala sang Nagadumala nga Hubon sang mga Saksi ni Jehova. Nian ‘ang Ginuo mangin yara sa espiritu nga ginapakita naton,’ magaagom kita sing paghidait, kag mapalig-on kita sa espirituwal.​—⁠2 Timoteo 4:​22; ipaanggid ang Binuhatan 9:​31; 15:​23-32.

 4. Paano naton maaplikar sing personal ang Hebreo ­13:7?

⁴ Si Pablo naglaygay: “Dumduma ang nagapanguna sa inyo, nga naghambal sa inyo sang pulong sang Dios, kag samtang ginapamalandungan ninyo ang resulta sang ila pagginawi iloga ang ila pagtuo.” (Hebreo 13:7) Sa tunga sang unang mga Cristiano, ang mga apostoles nanguna. Sa karon, makita naton ang nagahuman sa Nagadumala nga Hubon sang mga Saksi ni Jehova, ang iban gintangdo nga mga manugtatap, kag mga lalaki sang “dakung kadam-an” nga nagapanguna sa aton. (Bugna 7:9) Bisan pa wala kita ginalaygayan sa pag-ilog sang kalidad sang ila tingog, tindog, ukon iban pa tawhanon nga kinaiya, dapat naton himuon ang aton pagginawi nga maayo ang resulta paagi sa pag-ilog sang ila pagtuo.

 5. Sa duta karon, kay sin-o gintugyan ang pangunang responsabilidad sa pag-atipan sa Cristianong kongregasyon, kag ano ang takus sa ila?

⁵ Sa duta karon, ang pangunang responsabilidad sa pagtatap sa aton espirituwal nga mga kinahanglanon gintugyan sa “matutom kag mainandamon nga ulipon.” Ang tiglawas sini nga Nagadumala nga Hubon nagapanguna kag nagapahituhog sa bug-os kalibutan nga pagbantala sang Ginharian nga hilikuton. (Mateo 24:​14, 45-47) Mahimo gid matamod ining gintangdo sang espiritu nga mga gulang subong espirituwal nga mga gobernador, kay ang Hebreo 13:7 sarang mabadbad: “Dumduma ang mga nagadumala . . . sa inyo.” (Kingdom Interlinear) Bangod sang kapin sa 60,000 ka kongregasyon kag sobra sa 3,500,000 ka manugbantala sang Ginharian, ang 12 ka gulang nga nagahuman sa Nagadumala nga Hubon ‘madamo sing himuon sa hilikuton sang Ginuo.’ (1 Corinto 15:58) Bangod sang ginhatag sang Dios sa ila nga asaynment, nagakabagay sila sang aton bug-os nga kooperasyon, subong nga ang unang-siglo nga nagadumala nga hubon may kooperasyon sang unang mga Cristiano.​—⁠Binuhatan 15:​1, 2.

 6. Ano ang pila ka butang nga ginhimo sang mga gulang sa kaayuhan sang katawhan ni Jehova?

⁶ Ang mga manugtatap gintangdo sang espiritu sa pagtatap sa espirituwal nga mga kinahanglanon sang kongregasyon. (Binuhatan 20:28) Ginatatap nila nga ang mensahe sang Ginharian ginabantala sa teritoryo sang lokal nga kongregasyon. Ining Makasulatanhon kalipikado nga mga lalaki nagahatag man sang espirituwal nga panuytoy sa mahigugmaon nga paagi. Sila nagalaygay, nagapaumpaw, kag nagapanaksi sa ila espirituwal nga mga kauturan nga lalaki kag babayi, sa katuyuan nga sila magalakat nga takus sa Dios. (1 Tesalonica 2:​7, 8, 11, 12) Bisan pa kon ang isa makahimo sing sayop nga tikang sa wala niya ini mamulalungi, ginatinguhaan nila nga ipasag-uli sia sa “espiritu nga malulo.”​—⁠Galacia 6:⁠1.

 7. Anong laygay ang ginhatag ni Pablo sa Hebreo 13:​17?

⁷ Ang aton mga tagipusuon ginapahulag sa pagkooperar sa sinang mahigugmaon nga mga manugtatap. Nagakaigo ini, subong sang ginsulat ni Pablo: “Tumana ang nagapanguna sa inyo kag magpasakop sa ila, kay nagapulaw sila tungod sa inyo mga kalag subong nga sila ang magahatag sing husay; maghimo sila sini nga may kalipay kag indi nga may pagbakho, kay ina walay kapuslanan sa inyo.” (Hebreo 13:17) Paano naton hangpon ini nga laygay?

 8, 9. (a) Nahisuno sa Hebreo 13:​17, ngaa dapat kita magmatinumanon sa mga nagapanguna? (b) Ano ang maayo nga epekto sang aton pagkamatinumanon kag pagkamapinasakupon?

⁸ Ginalaygayan kita ni Pablo sa pagtuman sa mga nagadumala sa aton sa espirituwal. Dapat kita “magpasakop,” magsunod sa sining kabulig nga mga manugbantay. Ngaa? Bangod ‘nagapulaw sila tungod sa aton mga kalag,’ ukon kabuhi nga dedikado sa Dios. Kag paano sila “nagapulaw”? Diri ang presente nga active indicative sang Griegong berbo a·gru·pneʹo literal nga nagakahulugan nga ang mga gulang “wala nagatulog.” Nagapahanumdom ini sa aton nahanungod sa nagaisahanon nga manugbantay nga nagapaligad sang katulugon agod amligan ang iya panong gikan sa mga katalagman sa tion sang kagab-ihon. Ang mga gulang nagahinguyang kon kaisa sing walay tulog nga kagab-ihon sa mapangamuyuon nga pagkabalaka sa panong sang Dios ukon sa paghatag sing espirituwal nga bulig sa mga masigkatumuluo. Ginaapresyar gid naton sing daku ining matutom nga pag-alagad! Sa pagkamatuod, indi naton luyag mangin kaangay sang “mga didiosnon” sang kaadlawan ni Judas nga ‘nagapakawalay pulos sa pagbulut-an kag nagapasipala sa mga halangdon,’ sa gintangdo nga Cristianong mga gulang nga ginhatagan sing hatag-Dios nga himaya, ukon dungog.​—⁠Judas 3, 4, 8.

⁹ Indi mahamuot si Jehova kon indi kita mangin matinumanon kag mapinasakupon sa Cristianong mga manugtatap. Mangin mabug-at man ini sa ila kag mahimo magahalit sa aton sa espirituwal. Kon indi kita magkooperar, ang mga gulang mahimo magabuhat sang ila mga katungdanan nga may pagbakho, ayhan sa espiritu nga naluyahan ang buot nga mahimo magaresulta sa pagkawasi sang kalipay sa aton Cristianong mga hilikuton. Apang ang aton pagkamatinumanon kag pagkamapinasakupon nagapauswag sang diosnon nga paggawi kag nagapabakud sang aton pagtuo. ‘Ang Ginuo mangin kaupod sa espiritu nga ginapakita naton,’ kag ang kalipay nagaluntad sa kahimtangan nga may kooperasyon, paghidait, kag paghiusa.​—⁠2 Timoteo 4:​22; Salmo 133:⁠1.

10. Suno sa 1 Timoteo 5:​17, ngaa ang pagdumala sa maayong paagi takus sing kadungganan?

¹⁰ Ang aton pagkamatinumanon kag pagkamapinasakupon sa mga gulang sa kongregasyon wala nagakahulugan nga kita mga manugpahamuot sa tawo. Indi ina makasulatanhon, kay ang unang-siglo nga Cristianong mga ulipon ginsugo sa pagtuman sa ila mga alagad, “indi sa pag-alagad nga sa mata, subong nga mga tawo, kundi sa kabunayag sang tagipusuon, nga nahadlok kay Jehova.” (Colosas 3:​22; Efeso 6:​5, 6) Ang mga manugtatap nga ‘nagadumala sing maayo kag nagapangabudlay sa pagwali kag sa pagpanudlo’ takus sang kadungganan una bangod ang ila pagpanudlo pasad sa Pulong sang Dios. Subong sang ginsulat ni Pablo: “Ang mga gulang nga nagadumala sing maayo pag-isipon nga takus sa pilo nga kadungganan, labi na gid ang mga nagapangabudlay sa pagwali kag sa pagpanudlo. Kay ang kasulatan nagasiling: ‘Dili mo pagbusalan ang baka nga nagalinas sang trigo’; kag: ‘Ang mamumugon takus sang iya suhol.’ ”​—⁠1 Timoteo 5:​17, 18.

11. Paano matigayon sang gulang ang “pilo nga kadungganan,” apang ano ang dapat niya likawan?

¹¹ Ang pinamulong ni Pablo nga ginbalikwat bag-o lang nagapakita nga ang materyal nga bulig makatarunganon nga mahatag sa nagaatipan sa espirituwal nga intereses sang iban. Apang, wala ini nagakahulugan nga ang mga gulang dapat magbaton sing suhol, kag ang “pilo nga kadungganan” indi isa ka butang nga natigayon sang gulang. Magahalin ini sa mga katapo sang kongregasyon, apang indi gid niya dapat paghimuon ang iya katungdanan sa pagtigayon sing gahom ukon materyal nga mga pagkabutang. Indi sia dapat magtinguha sang iya kaugalingon nga himaya ukon magpakig-upod lamang sa mga manggaranon kag patumbayaan ang iban. (Hulubaton 25:​27; 29:​23; Judas 16) Sa baylo, ang manugtatap dapat magbantay sang panong sang Dios ‘sing kinabubut-on, indi tungod sa didungganon nga daug, kundi sa may pagkahanda.’​—⁠1 Pedro 5:⁠2.

12. Paagi sa pagdumdom sa ano nga mabuligan kita sa pagtuman sa mga nagapanguna sa aton?

¹² Mabuligan kita sa pagtuman kag sa pagpadungog sa mga nagapanguna kon dumdumon naton nga ang Dios mismo nag-aman sang mga gulang. (Efeso 4:​7-13) Bangod kay gintangdo sila sang espiritu kag ang organisasyon sang Dios may importante nga duog sa kabuhi sang mga Saksi ni Jehova, pat-od gid nga luyag naton ipakita ang pasalamat kag pagtahod sa teokratikong mga kahimusan. Dugang pa, mahimo naton ginabuligan ang mga bag-ohan sa pagpalambo sining panimuot kon nagapakita kita sing maayong halimbawa sang pagkamatinumanon kag pagkamapinasakupon sa mga nagapanguna sa tunga naton.

Ngaa Apresyahon ang Ila Pag-alagad?

13. (a) Anong nagasumpakil nga mga pagtamod sa pagpanguna ang nagaluntad sa kalibutan kag sa organisasyon sang Dios? (b) Ano ang aton maayong rason sa pagsalig sa mga tawo nga nagapanguna sa tunga naton? (c) Sa baylo nga ipadaku ang mga pagkadihimpit sang mapisan nga mga gulang, ano dapat ang himuon naton?

¹³ Sa kalibutan, yara ang huyog sa pagsikway sa pagpanguna. Subong sang ginsiling sang isa ka manuglektyur: “Ang mataas nga nibel sang edukasyon nagpauswag sa ikasarang sa bagay nga ang mga sumulunod nangin tuman ka mamulayon nga halos imposible ang magpanguna.” Apang ang espiritu sang hilway nga panghunahuna wala nagaluntad sa organisasyon sang Dios, kag may maayong rason kita sa pagsalig sa mga lalaki nga nagapanguna sa tunga naton. Halimbawa, yadtong nakasugata lamang sang Makasulatanhon nga mga kinahanglanon ang gintangdo subong mga gulang. (1 Timoteo 3:​1-7) Ginhanas sila nga mangin malulo, mahigugmaon, kag mabuligon, apang malig-on sa pagpanguyapot sa matarong nga mga talaksan ni Jehova. Ginatuman sang mga gulang ang Makasulatanhon nga kamatuoran, ‘nagpangalig-on sa pulong nga matuod nga suno sa natudlo, agod makasarang sila sa pagpanglaygay sa maayo nga pagtulon-an.’ (Tito 1:​5-9) Sa pagkamatuod, indi naton dapat pakadakuon ang ila tawhanon nga pagkadihimpit, kay kita tanan dihimpit. (1 Hari 8:​46; Roma 5:12) Sa baylo nga magbatyag sing kabang-awan bangod sang ila mga limitasyon kag pagpasapayan sa ila laygay, apresyahon kag batunon naton ang pasad sa Biblia nga panuytoy sang mga gulang subong naghalin sa Dios.

14. Nahisuno sa 1 Timoteo 1:​12, paano dapat tamdon sang gulang ang pag-alagdan nga gintangdo sa iya?

¹⁴ Si Pablo, isa ka mainapresyahon nga tawo, nagsiling: “Nagapasalamat ako sa nagpabakud sa akon tungod sini, si Cristo Jesus nga aton Ginuo, bangod ginkabig niya ako nga matutom sa pagtangdo sa akon sa iya pag-alagdan.” (1 Timoteo 1:12) Inang pag-alagdan, ukon pagserbisyo, naglakip sang pagbantala nga hilikuton kag pag-alagad sa mga masigkatumuluo. Bisan pa nga ang manugtatap gintangdoan sang balaan nga espiritu sa pag-alagad subong manugbantay, indi ini dapat magpabatyag sa iya nga superyor sa iban, kay sia mismo bahin sang panong sang mga tulad-karnero sang Dios. (1 Pedro 5:4) Sa baylo, dapat sia magpasalamat nga ang Ulo sang kongregasyon, si Jesucristo, nag-isip sa iya nga takus sa pag-alagad sa mga katapo sang panong kag nga ang Dios nagkalipikar sa iya paagi sa paghatag sa iya sing ihibalo, kaalam, kag paghangop. (2 Corinto 3:5) Sanglit ang gulang may rason sa pagpasalamat tungod sang iya hatag-Dios nga mga pribilehiyo, ang iban nga mga katapo sang kongregasyon dapat mag-apresyar sining pag-alagdan, ukon pagserbisyo.

15. Ano ang kahulugan sang laygay ni Pablo sa 1 Tesalonica 5:​12, 13?

¹⁵ Ang mga Saksi ni Jehova nagapasalamat sa organisasyon nga gintukod sang Dios sa sining katapusan nga mga adlaw, kag ina nga apresasyon nagapahulag sa aton sa pagtahod sa mga gulang. Dapat kita mangin malipayon sa pagkooperar sing bug-os sa mga kahimusan nga ginahimo nila sa aton kaayuhan. Si Pablo nagsiling: “Apang ginapakiluoy namon sa inyo, mga kauturan, nga tahuron ninyo ang mga nagapangabudlay sa tunga ninyo kag nagamando sa inyo sa Ginuo kag nagalaygay sa inyo; kag pakamahala sila sing daku gid sa gugma bangod sang ila buhat.” (1 Tesalonica 5:​12, 13) Ang pag-aplikar sining laygay nagadala sing kalipay kag pagpakamaayo ni Jehova.

Mangin Maabtik sa Pagtuman sang Laygay

16, 17. Anong laygay ang mahimo ihatag sang mga gulang nahanungod sa pag-asawahay, kag ano ang magaresulta gikan sa pagtuman sini?

¹⁶ Si Pablo naglaygay kay Tito nga ‘maglaygay kag magsabdong sa bug-os nga pagbulut-an.’ (Tito 2:15) Sing kaanggid, ang mga tiglawas sang Dios karon nagatuytoy sa aton sa mga prinsipio kag mga kasuguan sang Biblia. May maayong mga rason agod batunon ang sulitsulit nga laygay nga tumanon ang laygay kag panuytoy sang organisasyon ni Jehova kag sang gintangdo nga mga gulang.

¹⁷ Sa pag-ilustrar: Mahimo laygayan sang mga gulang ang Cristiano nga sundon ang laygay sang Biblia nga magminyo “sa Ginuo lamang.” (1 Corinto 7:​39; Deuteronomio 7:​3, 4) Mahimo nila ipakita nga ang pagminyo sa dibawtismado nga tawo mahimo magdul-ong sa mabug-at nga mga problema, subong nga si Hari Solomon nakasala sing daku paagi sa pagkuha sing dumuluong nga mga asawa, nga nagganyat sang iya tagipusuon sa dimatuod nga mga dios kag pahilayo kay Jehova. (1 Hari 11:​1-6) Mahimo man ipaathag sang mga gulang nga ginpabulagan ni Esdras sa Judiyong mga lalaki ang ila paganong mga asawa, kag si Nehemias nagsiling nga ang nagaminyo sa mga dimatinuohon ‘naghimo sing daku nga malaut sa paglapas batok sa Dios.’ (Nehemias 13:​23-27; Esdras 10:​10-14; tan-awa Ang Lalantawan, Septiembre 15, 1982, pahina 31; Nobiembre 15, 1986, pahina 26-30.) Ang mga pagpakamaayo kag kaayawan nga napahamut-an si Jehova nagaresulta bangod sang pag-aplikar sinang Makasulatanhon nga laygay nga ginahatag sang mahigugmaon nga mga gulang.

18. Nagabinagbinag sang ginsulat ni Pablo sa 1 Corinto 5:​9-13, ano ang dapat nga reaksion naton kon ang isa ka katapo sang pamilya na-disfellowship?

¹⁸ Nagakaigo man nga tahuron ang hudisyal nga mga desisyon sang mga gulang. Ginsilingan ni Pablo ang mga Cristiano sa Corinto nga “dili magpakig-upod sa bisan kay sin-o nga ginhingalanan nga utod kon sia makihilawason ukon mahamkunon ukon diwatahan ukon mapasipalahon ukon palahubog ukon malugos, bisan sa pagkaon dili magpakig-upod sa iya.” Dapat nila ‘isikway ang tawo nga malaut sa tunga nila.’ (1 Corinto 5:​9-13) Apang ano ang himuon mo kon isa sang imo mga himata ang gin-disfellowship? Bisan mahimo kinahanglan ang limitado nga pagpakig-angot sa pag-atipan sa mga katapo sang pamilya, ang tanan espirituwal nga pagpakig-upod sa na-disfellowship nga himata dapat utdon. (Tan-awa Ang Lalantawan, Abril 15, 1988, pahina 26-31.) Sa pagkamatuod, ang katutom sa Dios kag sa iya organisasyon dapat magpahulag sa aton nga tahuron ang hudisyal nga mga desisyon sang mga manugtatap.

19. Ano dapat ang himuon naton kon ginapakita sa aton sang mga gulang nga nagalakat kita sa sayop nga dalanon sa espirituwal?

¹⁹ Indi mahapos ang magpabilin sa makitid nga dalan padulong sa kabuhi. Agod magpabilin, dapat naton sundon ang panuytoy nga ginahatag sang Pulong sang Dios kag sadtong gintugyanan sang mga responsabilidad sa pagbantay sa iya organisasyon. (Mateo 7:​13, 14) Kon nagalakbay kita sa lainlain nga siudad nga sakay sang awto kag nagsayop sa pagliko, kinahanglan ang aksion agod tadlungon ang aton dalanon. Kon indi, indi gid kita makalab-ot sa aton kaladtuan. Sing kaanggid, kon ginapakita sa aton sang mga gulang nga nagalakat kita sa sayop nga dalan sa espirituwal, ayhan paagi sa pagpangaluyag sa isa ka dimatinuohon, dapat naton gilayon tumanon ang ila Makasulatanhon nga laygay. Isa ini ka paagi sa pagpakita nga tunay kita nga “nagasalig kay Jehova.”​—⁠Hulubaton 3:​5, 6.

Pagtahod Bisan sa Magagmay nga mga Butang

20. Anong pamangkot ang ipamangkot naton sa aton kaugalingon nga makabulig sa aton sa pagpakita sing pagtahod sa panuytoy sang mga gulang bisan sa magagmay nga mga butang?

²⁰ Dapat kita magpakita sing pagtahod sa panuytoy sang mga gulang bisan sa magagmay nga mga butang. Gani mahimo naton pamangkuton ang aton kaugalingon: ‘Nagakooperar bala ako kon ang mga gulang nagapangabay sa aton sa pagduaw sa masakiton ukon sa paghanas sa mga bag-ohan sa pag-alagad sa latagon? Ginabaton ko bala gilayon ang mga bahin sa mga miting kag ginahandaan ini sing maayo? Nagapamati bala ako kon ang mga gulang nagahatag sing pagsulundan nahanungod sa pagtigana sang pulungkuan sa mga kombension, sa aton pamayo, kag iban pa? Nagakooperar bala ako kon ginapangabay nila kita nga magbulig sa pagtinlo sa Kingdom Hall, magreport gilayon sang aton pag-alagad sa latagon, ukon mag-abot sa miting sing husto sa tion?’

21. Anong mga pulong ni Jesus ang ginapahanumdom sang aton pagpakita sang pagtahod sa mga gulang?

²¹ Ginaapresyar sang mga manugtatap sa kongregasyon ang aton kooperasyon, kag nagaresulta ini sa daku nga kaayuhan. Sa katunayan, ang aton pagkamatinahuron kag pagkooperar bisan sa magagmay nga mga butang nagapahanumdom sa aton sang pinamulong ni Jesus: “Ang matutom sa diutay gid matutom man sa madamo.” (Lucas 16:10) Sa pagkamatuod, luyag naton kabigon nga matutom.

Padayon sa Pagtuman sa Mahigugmaon nga Pagdumala

22. Ano ang iban sa mga benepisyo nga nagaresulta gikan sa mahigugmaon nga pagdumala sang matutom nga ulipon kag sang mga gulang sa kongregasyon?

²² Ang mga benepisyo nga nagaresulta gikan sa mahigugmaon nga pagdumala sang matutom nga ulipon kag sang mga gulang sa kongregasyon nagapamatuod nga ang bugana nga pagpakamaayo ni Jehova yara sa iya dutan-on nga organisasyon. Dugang pa, ang lantip nga panuytoy sang mga gulang nagahisanto sa ila mga ikasarang kag nagapauswag sang paghiusa sa tunga naton. Nagaresulta man ini sa tingob kag madinalag-on nga panikasog sa pagpauswag sang intereses sang Ginharian. Sa pagkamatuod, ang isa ka positibo nga resulta sang aton mainapresyahon nga pagtuman sa pagdumala sang nagadumala amo nga ginapakamaayo sang Dios ang aton pagbantala kag paghimo sing disipulo nga hilikuton. (Mateo 28:​19, 20) Ang aton pagpakigkooperar sa mga gulang nagahanda man sa aton para sa kabuhi nga dayon sa bag-ong sistema sang mga butang.

23. Sa kapawa sang 1 Juan 5:​3, ano ang ginapahulag sa aton nga himuon?

²³ Sanglit ginahigugma naton si Jehova, ang pagtuman sa iya indi isa ka dimaayo nga katungdanan. Si apostol Juan nagsulat: “Ini amo ang gugma sang Dios, nga bantayan ta ang iya mga sugo; kag ang iya mga sugo indi mabug-at.” (1 Juan 5:3) Ang matutom nga mga Cristiano malipayon nga nagatuman sang mga sugo ni Jehova kag ginapahulag sa pagkooperar sa mga gintugyanan sang pagdumala sa kongregasyon. Mapasalamaton gid kita nga mangin yara sa organisasyon sang Dios kag matigayon inang “mga hiyas sa mga tawo”! (Efeso 4:8) Upod ang daku nga pagsalig nga ang Dios nagatuytoy sang iya katawhan, nian, pirme kita magmatinumanon sa sadtong may pribilehiyo nga manguna sa tunga sang mga Saksi ni Jehova.

Ano ang Imo Komento?

◻ Ngaa dapat mangin matinumanon sa mga nagapanguna sa tunga naton?

◻ Ano ang dapat nga panimuot naton nahanungod sa pag-alagad nga ginahimo sang mapisan nga mga gulang?

◻ Ngaa dapat mangin maabtik sa pagtuman sa laygay nga ginahatag sang mga gulang?

◻ Anong mga benepisyo ang nagaresulta gikan sa aton mainapresyahon nga pagsunod sa mahigugmaon nga pagdumala?

[Blurb sa pahina 24]

Nagakooperar ka bala sa mga gulang paagi sa pagbaton sa mga bahin sa mga miting, paagi sa pagbulig sa pagtinlo sa Kingdom Hall, paagi sa pagreport gilayon sang imo hilikuton sa pag-alagad sa latagon, kag sa iban nga mga paagi?

[Piktyur sa pahina 23]

Nalipay si Pablo sa pagwali sang maayong balita kag sa pag-alagad sa mga masigkatumuluo. Subong gulang, nagapasalamat ka bala sa imo hatag-Dios nga pribilehiyo sang pag-alagad?