Magpasalamat​—⁠Ang Mesianikong Ginharian ni Jehova Nagagahom

“Nagapasalamat kami sa imo, Jehovang Dios nga Labing Gamhanan, . . . bangod nga ginbaton mo ang imo dakung gahom kag nagsugod sa paghari.”​—⁠BUGNA 11:⁠17.

 1. Ano ang ginsiling sang presidente anay sang Watch Tower Society pagkatapos sang iya paglibot sa Europa sang 1911?

TEMPRANO sang 1911, ang presidente sang Watch Tower Society, si C. T. Russell, naghatag sing mga serye nga pamulongpulong sa Biblia sa dalagku nga mga siudad sang Europa. Nagakomento sa sina nga paglibot, si Russell nagsulat sang masunod sa The Watch Tower, sadtong Mayo 15, 1911: “Nakibot kami nga makita ang tuman kadamo nga ebidensia sang kabuganaan bisan diin . . . Nahibaluan sang amon mga bumalasa nga sa pila na ka tuig ginahulat namon ini nga Dag-on nga matapos paagi sa makahaladlok nga tion sang kagamo, kag ginapaabot namon nga matabo ini sing hinali kag sing makusog indi madugay pagligad sang Oktubre, 1914, nga, tubtob sa nahangpan namon sa Kasulatan, amo ang petsa diin ang Panag-on sang mga Gentil​—⁠ang pagpaarkila sang paggahom sa duta sa mga Gentil​—⁠magatapos; busa, ang tion nga ang ginharian sang Mesias gintangdo nga magasugod sa paggahom.” Natuman bala ini nga pagpaabot?

 2. Paano natublag ang paghidait sang 1914, kag upod ang anong masubo nga mga resulta?

² Sa tion sang una nga katunga sang 1914, ang kalibutan daw malig-on kag wala sing peligro sa inaway. Apang hinali nga natublag ang paghidait bangod sang pag-asasinar sa manunubli sang trono sa Austria sang isa ka Serb sang Hunyo 28, 1914. Sang ulihi ang Austria-Hungaryo nagdeklarar sing inaway batok sa Serbia. Ang Russia nagdampig sa Serbia, gani ang Alemanya nagdeklarar sing inaway batok sa Russia sang Agosto 1. Nian ang Alemanya nagdeklarar sing inaway batok sa Pransiya sang Agosto 3; ang Gran Britanya batok sa Alemanya sang Agosto 4; ang Montenegro batok sa Austria-Hungaryo sang Agosto 7; ang Japan batok sa Alemanya sang Agosto 23; ang Austria-Hungaryo batok sa Belgium sang Agosto 28. Madamo ang nagpati nga ang inaway dili magadugay. Sa baylo, naglala ini kag nangin ang labing malain nga inaway sa maragtas tubtob sadto nga tion, kay 19 pa ka pungsod nga nagdampig sa internasyonal nga pagpatulo sang dugo nga nagkutol sang sobra sa 13,000,000 ka kabuhi sang militar kag sibilyan, kag sobra sa 21,000,000 ang nahalitan kag nasamad.

 3, 4. Ano ang natabo sa ulong talatapan sang Sosiedad sadtong Biernes sang aga, sang Oktubre, 2, 1914?

³ Sadtong Biernes sang aga, Oktubre 2, 1914, si Russell nagpahibalo sa katapo sang ulong-talatapan sang Watch Tower Society sa Brook­lyn, Nueva York: “Ang Panag-on sang mga Gentil natapos; ang mga adlaw sang ila mga hari natapos na.” Ginsug-alaw ini sing mainit nga palakpak sang pamilya sa Bethel, “sa balay sang Dios.”

⁴ Ano ang rason ni C. T. Russell kag sang iya mga kaupdanan nga mangin tuman ka malipayon sa sina nga aga sang Oktubre? Diin naghalin ang ekspresyon nga “Panag-on sang mga Gentil”? Ano ang pamatuod nga ang Panag-on sang mga Gentil natapos sang Oktubre 1914? Kag paano ka dapat maapektuhan sina?

Ang Jerusalem kag ang Panag-on sang mga Gentil

 5. Diin naghalin ang ekspresyon nga “Panag-on sang mga Gentil”?

⁵ Ang ekspresyon nga “Panag-on sang mga Gentil,” ukon “gintalana nga tion sang mga pungsod,” naghalin sa dakung tagna ni Jesus nahanungod sa kalaglagan sang Jerusalem. (Lucas 21:​5-36, King James Version) Duha ka adlaw antes nahatag ini, ginpakilala ni Jesus ang iya kaugalingon sa mga pumuluyo sang Jerusalem subong Mesias nila. Samtang mapainubuson nga nagsakay sia sa asno pakadto sa siudad, ang kadam-an nga mga Judiyo nagsinggit sa kadalag-an, subong sang gintagna sang Zacarias 9:⁠9. “Bulahan ang Isa nga nagakari subong Hari sa ngalan ni Jehova,” singgit nila.​—⁠Lucas 19:​28-⁠40.

 6, 7. Ano ang daku nga kasal-anan sa dugo sang nahaunang-siglo nga mga taga-Judea, kag upod ang anong resulta?

⁶ Apang nahibal-an ni Jesus nga ang opinyon sang publiko magabag-o sa ulihi batok sa iya bangod sang daku nga pagdumot sang relihiosong mga lider sang Jerusalem sa idalom sang impluensia sang ila amay, ang Yawa. (Genesis 3:15; Juan 8:44) Wala madugay pagkatapos sadto, sang Nisan 14, ginpangayo sang mga Judiyo ang kamatayon ni Jesus. “Ang iya dugo mahulog sa amon kag sa amon mga anak,” singgit nila sa nagapangalag-ag nga Romanong gobernador. (Mateo 27:​24, 25) Sa baylo nga batunon si Jesus subong Mesianikong Hari, ang pangulong mga saserdote nagsiling: “Wala kami sing hari kundi si Cesar.” (Juan 19:15) Nian ang matuod nga Mesias ginlansang sa usok sang pag-antos agod mapatay, bangod ginsumbong sia sing dimatuod subong rebelde batok sa Roma kag manugpasipala batok sa Dios sang mga Judiyo.​—⁠Marcos 14:​61-64; Lucas 23:2; Juan 18:36; 19:⁠7.

⁷ Sigurado gid nga magaabot ang kasingkal sang Dios sa mga pumuluyo sang Judea bangod sang ila daku nga kasal-anan sa dugo. Ang Jerusalem, upod ang iya daku nga templo, indi na mahimo tawgon “ang siudad sang dakung Hari,” si Jehova. (Mateo 5:35; Lucas 13:​33-35) Pila ka adlaw antes sang kamatayon ni Jesus, gindayaw sang iya mga disipulo ang templo sinang siudad. Sa pagsabat, si Jesus nagtagna: “Nahanungod sining mga butang nga inyo ginatan-aw, magaabot ang mga adlaw nga walay mabilin diri nga isa ka bato sa ibabaw sang isa nga indi malumpag.”​—⁠Lucas 21:​5, 6.

 8. Sang ginhatag ni Jesus ang “tanda” sang mga hitabo nga nagadul-ong sa kalaglagan sang Jerusalem, ano pa ang nadalahig?

⁸ Ang mga disipulo ni Jesus nagpamangkot sa kakibot: “Manunudlo, san-o bala magakahanabo ini, kag ano bala ang tanda kon ini malapit na mahanabo?” (Lucas 21:⁠7) Bilang sabat gintagna ni Jesus sing sibu ang mga hitabo nga nagdul-ong sa pagkalaglag sang Jerusalem, kag gindugang niya ining importante nga prase: “Ang Jerusalem tapakon sang mga Gentil, tubtob nga ang mga panag-on sang mga Gentil matuman.” (Lucas 21:​8-24, KJ) Busa ginpakita sing abanse ni Jesus ang butang nga lampas pa sa kalaglagan sang Jerusalem​—⁠butang nga magahulat “tubtob nga ang mga panag-on sang mga Gentil matuman.” Nahanungod sa “tanda,” si Jesus nagsiling: “Kon makita ninyo nga nagakahanabo ining mga butang, makilala ninyo nga malapit na ang ginharian sang Dios.” (Lucas 21:31) Busa, ang tanda may doble nga katumanan. Ang una, ukon diutay sing kasangkaron, nga katumanan magapakita nga ‘ang kalaglagan sang Jerusalem malapit na.’ (Lucas 21:20) Ang ikaduha, kag daku pa, nga katumanan magaabot kon ang Panag-on sang mga Gentil matapos, kag magapakita ini nga “ang ginharian sang Dios malapit na.”​—⁠Ipaanggid ang Mateo 24:⁠3.

Ang Dutan-on nga Jerusalem Gin-islan sang Superyor nga Siudad

 9. San-o nawasi sang dutan-on nga Jerusalem ang iya kalahamut-an nga tindog, kag ano ang nagtal-us sa sini?

⁹ Paagi sa pagsiling nga ang “Jerusalem tapakon sang mga Gentil, tubtob nga ang mga panag-on sang mga Gentil matuman,” ginapakita bala ni Jesus nga ang dutan-on nga siudad ipasag-uli sa ulihi sa kahamuot sang Dios? Wala. Sang napatay ang hinigugma nga Anak sang Dios, nadula sang dutan-on nga Jerusalem ang iya pinasahi nga tindog sing dayon kag gin-islan sang labi ka superyor nga “siudad sang Dios nga buhi, ang langitnon nga Jerusalem.”​—⁠Hebreo 12:22; Mateo 23:​37, 38; 27:​50, 51.

10. Ano ang buot silingon sang ekspresyon nga “langitnon nga Jerusalem”?

¹⁰ Ang ekspresyon nga “langitnon nga Jerusalem” ginagamit sa Biblia sa paglaragway sa dimalaglag nga langitnon nga Ginharian nga sa sini gintawag ang hinaplas nga mga Cristiano.a (Hebreo 11:10; 12:​22, 28) Sang ginsulat ini ni apostol Pablo, ang dutan-on nga siudad upod ang iya templo ginadayaw pa gihapon sing daku sang mga Judiyo. Gani, ginpahanumdom ni Pablo ang Hebreong mga Cristiano nga “diri wala kita sing siudad nga nagapadayon, kundi nagapangita kita sang siudad nga palaabuton.”​—⁠Hebreo 13:⁠14.

Kon Ngaa Gintawag nga Langitnon nga Jerusalem

11. Sang wala pa nadula sang Jerusalem ang kahamuot ni Jehova, ano ang ginarepresentar sini?

¹¹ Ang Jerusalem madugay na nga kapital sang pungsod sang Israel, nga ang mga hari ginsiling nga “nagalingkod sa trono ni Jehova.” (1 Cronica 29:23) Subong man, si Jehova nakigkatipan kay David nga ang pagkahari magapabilin sa iya panimalay sing dayon. Subong nga ang modernong-adlaw nga mga kapital, subong sang Washington, Moscow, Canberra, kag Pretoria, ginagamit sa pagpakilala sa ila mga gobierno, ang Jerusalem gingamit man sa Biblia sa pagrepresentar sa ginharian ni David.​—⁠2 Samuel 7:16; Lucas 1:⁠32.

12. Paano gin-aplikar ang termino nga “Panag-on sang mga Gentil”?

¹² Ang ginharian ni David limitado sing sakop, nagalab-ot lamang sa ginhatag sang Dios nga mga dulunan sang dumaan nga Israel. Busa ang dutan-on nga Jerusalem isa lamang ka tipo sang Mesianikong Ginharian nga magagahom halin sa langit kag ang sakop sini amo ang bug-os nga duta. (Salmo 2:​2, 7, 8; Daniel 7:​13, 14; 2 Timoteo 4:18) Busa, ang libro nga The Time Is At Hand, ginbalhag sang Watch Tower Society sang 1889, maathag nga nagsiling: “Ang termino nga ‘Panag-on sang mga Gentil’ gin-aplikar sang aton Ginuo sa sinang bal-ot sang maragtas sang duta sa ulot sang pagkuha sa tipiko nga Ginharian sang Dios, ang Ginharian sang Israel (Ezeq. 21:​25-27), kag sang pagsugod kag pagtukod sang antitipo sini, ang matuod nga Ginharian sang Dios.”

Mga Panag-on sang mga Gentil​—⁠Daw Ano Kalawig?

13. San-o nagsugod ang Panag-on sang mga Gentil, kag ngaa amo sina ang imo sabat?

¹³ Ang tipiko nga ginharian sang Dios ginpukan ni Nabocodonosor nga hari sang Babilonia sang 607 B.C.E. Sa ikapito nga Judiyong bulan, sang mga tungatunga sang Oktubre, ang duta nahapay.b (2 Hari 25:​8, 9, 22, 25, 26) Bilang pamatuod nga natabo ini paagi sa pagpahanugot sang Dios, si Jehova nga Dios naghatag sing damgo kay Nabocodonosor. Nagdalahig ini sa isa ka kahoy nga ginpulod kag gintugutan nga magtubo liwat pagligad sang panag-on nga “makapito.” Ang damgo may una nga katumanan sang si Nabocodonosor ginpasag-uli sa trono pagkatapos sang iya umalagi nga pagkabuang.​—⁠Daniel 4:​10-17, 28-36.

14. Ano ang pangunang punto sang damgo ni Nabocodonosor?

¹⁴ Apang, ang tema sang damgo ni Naboconodor nagpakita nga ang pangunang katumanan sini nagdalahig sa tipiko nga Ginharian sang Dios, nga gintugot sadtong Gentil nga hari nga ‘pudlon.’ Ang damgo naghinakop paagi sa sining pinamulong sang katuyuan: “Nga ang mga nagakabuhi makakilala nga ang Labing Mataas Manuggahom sa ginharian sang mga tawo kag nagahatag sini sa bisan kay sin-o nga buot ­niya, kag nagapahamtang sa ibabaw sini sang isa nga labing kubos gid sa mga tawo.”​—⁠Daniel 4:⁠17.

15. Paano kalipikado si Jesucristo subong “ang isa nga labing kubos sa katawhan”? (Mateo 11:⁠29)

¹⁵ Isa lamang ka tawo ang kalipikado tawgon nga “isa nga labing kubos gid sa mga tawo.” Ang bugtong nga Anak sang Dios nagpamatuod sang iya kaugalingon nga amo sina paagi sa kinabubut-on nga pagbiya sang iya langitnon nga himaya agod mabun-ag subong isa ka tawo, subong si Jesus, nga nag-antos sing labi ka makahuluya kag mapintas nga kamatayon sa kamot ni Satanas. (Filipos 2:​3, 5-11) Pagkatapos sia mabanhaw pabalik sa langitnon nga himaya, si Jesus naghulat tubtob natapos ang panag-on nga makapito sang paggahom sang Gentil antes sia naglingkod sa trono subong Mesianikong Hari sa ibabaw sang katawhan.​—⁠Hebreo 10:​12, 13.

16. Paano nagabulig ang tolon-an sang Bugna sa mga Cristiano nga makalkular kon san-o natapos ang maka­pito?

¹⁶ Apang paano nahangpan sang mga Saksi ni Jehova ang kalawigon sang makapito? Ginapakita sang Biblia nga ang “isa ka tion kag mga tion kag tunga sa tion,” ukon tatlo kag tunga ka tion, katumbas sa 1,260 ka adlaw. (Bugna 12:​6, 14) Busa, ang pagdoble sina nga numero, ukon sing makapito, nagatumbas sa 2,520 ka adlaw. Bangod sang matagnaon nga sadsaran sang “isa ka adlaw sa isa ka tuig,” ang makapito katumbas sa 2,520 ka tuig. (Numeros 14:34; Ezequiel 4:⁠6) Paagi sa sini nga kalkulasyon, ang Panag-on sang mga Gentil, nga nagsugod sang Oktubre 607 B.C.E., nagtapos 2,520 ka tuig sang ulihi sang Oktubre 1914.

17. Anong makalilipay nga pahibalo ang ginpahibalo sang 1914?

¹⁷ Sang Oktubre 1914, gintangdo ni Jehova nga Dios ang iya hinigugma nga Anak, si Ginuong Jesucristo, sa trono sang langitnon nga Ginharian. Sang ulihi, ang palanan-awon sa Bugna sang Cristianong si apostol Juan nagsugod nga mangin matuod, kag sarang mahimo ang pahibalo: “Ang ginharian sang kalibutan nangin iya sang aton Ginuo [si Jehova] kag sang iya Cristo, kag magahari sia [si Jehova] tubtob sa walay katubtuban.” (Bugna 1:10; 4:1; 11:15) Daw ano ka mahimayaon nga balita ini kag daw ano gid nga rason nga ikalipay sang tanan nga mga masigkamanunubli kag mga sakop sina nga Ginharian!​—⁠Bugna 11:⁠17.

18. Ngaa natabo sa katawhan ang makasulubo nga mga kahimtangan kutob sang 1914?

¹⁸ Huo, para sa kalabanan nga katawhan, wala gid sing dapat nga ikalipay sa duta sugod sang 1914. Apang ang mailo nga mga kahimtangan sa duta pamatuod nga ang pagginahom ni Satanas malapit na matapos. Paano naton ini nahibaluan? Ginapakita sang tolon-an sang Bugna nga ang pagtukod sa Ginharian sang Dios magaresulta sa inaway sa langit. Si Satanas kag ang iya mga demonyo pagaitagbong gikan sa langit kag latiran sa palibot sang aton duta. Sa tapos nakita ini nga kadalag-an sa matagnaon nga palanan-awon, si Juan nakabati sing mabaskog nga tingog nga nagasiling: “Magkalipay, O langit kag kamo nga nagapuyo sa sini! Kailo sa duta kag sa dagat, kay ang Yawa nagpanaug sa inyo, sa dakung kasingkal, bangod nga nakahibalo sia nga may malip-ot lamang sia nga tion.”​—⁠Bugna 12:​1-12.

19. Ngaa nagapasalamat gid sing daku ang matuod nga mga Cristiano nga magkabuhi sa sini nga tion?

¹⁹ Ang nagalain nga mga kahimtangan sa kalibutan kutob sang 1914 pamatuod nga ang palanan-awon ni Juan nangin isa ka katunayan kag nga ang katapusan sang tanan nga katawhan nga nagadumili sa pagpasakop sa pagkasoberano sang Dios makatalagam nga nagahilapit na. (Lucas 21:​10, 11, 25-32) Daw ano ka makalilipay magkabuhi sa sining matahom nga tion nga si Jehova nga Dios, ang Labing Gamhanan, magahusay sang dakung hulusayon sang iya pagkasoberano sa ibabaw sang duta! Nian, ang duta pagahimuon nga isa ka matahom nga paraiso, kag ang matarong nga mga tawo nga makalampuwas pagahimuon nga himpit. Bisan ang mga patay pagabanhawon kag hatagan sing kahigayunan nga makalipikar para sa kabuhi nga walay katapusan.​—⁠Bugna 20:​1-3, 12, 13; 21:​3-5.

Moderno nga Kinahanglanon Para sa Pagpasibu

20. (a) Sa duta, sin-o ang napamatud-an nga matuod nga mga alagad ni Jehova antes sang 1914? (b) Anong mga pagpasibu ang handa nga himuon sang matutom nga hinaplas nga mga Cristiano?

²⁰ Sa sulod sang 38 ka tuig antes sang 1914, gintudlo sang mga Estudyante sang Biblia, subong nga amo anay ang pagtawag sa mga Saksi ni Jehova, ina nga petsa subong ang tuig nga ang Panag-on sang mga Gentil matapos.c Daw ano ka tumalagsahon nga pamatuod ina nga sila matuod nga mga alagad ni Jehova! Apang, kaangay sang nahaunang-siglo nga mga alagad sang Dios, may sayop man sila nga mga pagpaabot. Halimbawa, ginpaabot nila nga ang bug-os nga kadamuon sang hinaplas nga mga Cristiano pagabayawon pa langit sang Oktubre 1914. Naghunahuna man sila nga ang inaway nga nagsugod sang 1914 magadul-ong ­sing direkta sa katapusan sang kalibutan ni Satanas.

21. Anong disiplina ang naeksperiensiahan sang matuod nga mga Cristiano sang Inaway Kalibutanon I?

²¹ Apang, sang ulihi, narealisar sang hinaplas nga mga Cristiano nga madamo pa sila sing hilimuon sa duta. Bangod sang ila padayon nga pagpanaksi sa publiko sadtong Inaway Kalibutanon I, nag-agom sila sing daku nga paghingabot gikan sa politikal nga mga awtoridad, sa sugyot sang klero sang Cristiandad. (Salmo 2:​1-6) Ang hilikuton sang matuod nga mga Cristiano naapektuhan gid sing daku sadtong Hunyo 21, 1918, sang ang pangunang mga opisyales sang Watch Tower Society sa Estados Unidos ginpamatbatan sing 20 ka tuig nga pagkabilanggo bangod sang dimatuod nga panumbungon.

22, 23. (a) Ano ang ginhimo sang matutom nga hinaplas nga mga Cristiano kutob sang 1919, kag upod ang anong duha ka resulta? (b) Ano ang modernong antitipiko dimatutom nga Jerusalem?

²² Hinali nga natapos ang Inaway Kalibutanon I sang Nobiembre 1918. Nian, sang Marso 25, 1919, ang mga opisyales sang Watch Tower Society ginpaguwa sa bilanggoan. Sang ulihi napamatud-an sila nga wala sing sala. Nabuksan ang wala ginpaabot nga panag-on sang paghidait para sa matutom nga hinaplas nga mga Cristiano, kaanggid sa mga kahigayunan nga natabo sa unang mga disipulo ni Cristo pagkatapos nga ang balaan nga espiritu ­ginbubo sa ila sang 33 C.E.​—⁠Binuhatan 2:​17-21, 41.

²³ Kutob sang 1919, ang matutom nga hinaplas nga mga Cristiano subong isa ka grupo makugi nga nagtuman sang sugo may kaangtanan sa pinamulong ni Jesus sa Mateo 24:14: “Iwali ining maayong balita sang ginharian sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” Subong resulta, halos apat ka milyon ka “iban nga mga karnero” ni Cristo ang naghugod sang ila kabuhi sa pag-alagad kay Jehova nga nahiusa sa hinaplas nga nagkalabilin. (Juan 10:16) Ang Cristiandad, sa idalom sang impluensia sang iya klero, padayon nga nagapamatok sa mensahe sang Ginharian. Ang iya daku nga pagkaluyag sa tawhanon nga mga padugi sa politika kag sa iya paghingabot sa mga Saksi ni Jehova nagaanggid sa makakilibang nga pagtrato kay Cristo sang nahaunang-siglo nga mga pumuluyo sang Judea. Subong nga ginhukman ni Jehova ang Jerusalem sadto anay, himuon man niya ini sa antitipiko dimatutom nga Jerusalem, nga amo, ang Cristiandad. Kag samtang ang kaliwatan nga nakabati sang mensahe sang paghukom ni Cristo nagkabuhi agod maeksperiensiahan ang kalaglagan nga gintagna niya, ang karon man nga kaliwatan kutob sang 1914 “indi magtaliwan” antes ang gintagna nga “dakung kapipit-an” magaabot.​—⁠Mateo 24:​21, 22, 34.

24. Agod makalampuwas pasulod sa bag-ong kalibutan sang Dios, ano ang dapat naton himuon?

²⁴ Ano ang dapat naton himuon agod makalampuwas sa dakung kapipit-an kag magkabuhi sa bag-ong kalibutan sang Dios? Bisan ano man anay ang aton sayop nga mga pagpaabot, dapat kita magbantay nga indi magtulog sa aton Cristianong mga katungdanan. (Habacuc 2:3; 1 Tesalonica 5:​1-6) Diutay na lang katama ang nakadumdom sang mga hitabo kutob sang 1914. Busa, dapat kita mangin alisto; wala sing tion nga dapat wasihon. (Mateo 24:​42) Ang tanan nga maluyag makalampuwas sa katapusan sang malaut nga kalibutan ni Satanas dapat maghulag karon sa paagi nga nagapakita sing pag-ugyon sa inspirado nga mga pulong: “Nagapasalamat kami sa imo, Jehovang Dios nga Labing Gamhanan, . . . bangod nga ginbaton mo ang imo dakung gahom kag nagsugod sa paghari.”​—⁠Bugna 11:⁠17.

[Mga footnote]

Paano Ka Magasabat?

◻ Ano ang ginarepresentar sang dumaan nga Jerusalem, apang paano sini nawasi ang iya dungganon nga tindog?

◻ San-o nagsugod kag natapos ang Panag-on sang mga Gentil, kag upod ang anong gintagna nga resulta?

◻ Ano ang ginalaragway sang kalaglagan sang dimatutom nga Jerusalem?

◻ Paano naton nahibaluan nga malapit na ang dakung kapipit-an, kag ano ang dapat naton himuon agod makalampuwas sa sini?

[Piktyur sa pahina 16]

Nadula sang Jerusalem kag sang iya templo ang iya dungganon nga tindog, apang padayon nga ginpakamaayo sang Dios ang iya Anak, nga Mesias, nagasugilanon pa sa iya sing direkta halin sa langit