Ginhatagan Ako ni Jehova sing Kusog

PANUGIRON NI EKUMBA OKOKA

NATAWO ako sa isa ka “Cristiano” nga panimalay sa isa ka pungsod sa Sentral nga Aprika, kag nagdaku ako nga may gugma sa Dios. Ang akon amay isa ka makugi nga predikador sa lego, kag pirme ako anay nagaupod sa iya kon magtudlo sia sa simbahan ukon sa mga sesyon para sa pangamuyo sa pribado nga mga puluy-an. Sanglit daw isa ako ka debotado nga bata, ginpili ako sang iban nga mga predikador sa lego sa pag-alagad sa tupad sang pari sa tion sang Misa. Ginsilingan pa gani ako nga sa pila ka adlaw magatuon ako sing pagkapari.

Apang, kon gab-i, isa ako ka nagapanguna nga manugkanta kag manugsaot sa isa ka lokal nga orkestra, ang Matumba-Ngomo. Sa sina nga trabaho, nagbuylog ako sa pamatan-on nga mga lalaki kag mga babayi sang amon distrito sa tanan nga sahi sang imoralidad. Apang nagalaum gihapon ako nga maghupot sing isa lamang ka asawa kag sa ulihi makadto sa langit agod magpuyo upod sa mga “santo.” Wala ko makita ang kinahanglanon nga dapat tinluan ko ang akon kabuhi bangod, suno sa doktrina sang Katoliko, ang tanan ko nga sala ginapatawad kada Sabado sang gab-i sa tion sang kumpisar.

Nagsugod ang mga Kabudlayan

Sang 1969, samtang nagaeskwela ako sa kolehiyo, nabatyagan ko nga nagapalanakit ang akon mga lutalutahan. Wala ko mahibal-an kon ano ang kabangdanan sini, apang sang mga bulan nga nagsunod, naggrabe ini. Walay sapayan nga ang akon mga ginikanan kilala nga mga Katoliko, namat-od sila nga ipatan-aw ako sa lainlain nga mga diwata, nga nagsiling nga may naghiwit sa akon, apang paagi sa ila mga pangamuyo kag mga bulong, magaayo ako. Walay sapayan, nagsugod ako sa pagkiangkiang, kag sang 1970, indi na gid ako makalakat, bisan pa may baston ako. Sa sadto nga punto, ginhunahuna ko nga indi na ako magadugay.

Sang Pebrero 1972 namat-od sang ulihi ang akon amay nga dalhon ako sa ospital sa Wembo Nyama. Nadugayan ang pagtener ko sa ospital sa bagay nga gintawag nila ako nga tag-iya sini! May mga tawo nga nagakadto sa ospital, kag tapos mag-ayo, nagaguwa, kag dayon nagabalik pagligad sang pila ka tion nga lain naman ang problema, apang didto gihapon ako! Kinahanglan magpauli ang akon amay agod atipanon ang alanyon nga humay, apang sini nga tion may asawa na ako, upod ang duha ka kabataan, kag bisan 21 anyos lamang ang akon palangga nga asawa, gin-atipan niya ako kag nangita sia sing trabaho agod maatipan niya ang amon mga kinahanglanon.

Walay sapayan, ginpung-awan gid ako nahanungod sa bug-os nga kahimtangan. Sa edad nga 24, nagagrabe gihapon ako, samtang ang akon mga abyan nagaayuhan, madamo sa ila may dalayon nga trabaho. Ginbatyag ko nga daw mangin maayo gid para sa tanan kon maghikog ako. Gani, ginpanagtag ko ang tanan ko nga pagkabutang sa akon mga anak kag sa akon mga utod, nga wala sila ginasugiran kon ano ang akon plano. Wala ako sing ginbilin para sa akon kaugalingon kundi ang akon lamang paborito nga kamisadentro nga luyag ko amo ang ipasul-ob sa akon kon ilubong ako.

Umpisa sang Isa ka Bag-o nga Kabuhi

Nian may isa sang mga Saksi ni Jehova nga ginpahigda sa isa ka katre sa tupad ko. Bisan pa bulag ang iya isa ka mata kag may katalagman nga madula niya ang panulok sa isa pa ka mata niya, sa gilayon nagpanaksi sia sa akon gikan sa Biblia nahanungod kay Jehova kag sa Ginharian. Pagligad sang pila ka adlaw, nagguwa sia sa ospital, apang gintugyan niya ako sa pila ka Saksi nga nagduaw sa iya. Sa tapos sang dugang pa nga mga paghambalanay, ini man sila naglakat, apang ang isa sa ila nagpadayon sa pagtuon upod sa akon paagi sa sulat. Ginhatagan man niya ako sing nanuhaytuhay nga publikasyon sang Biblia, nga ginbasa ko upod ang daku nga kalipay.

Sa sining paagi nakabaton ako sing espirituwal nga pagkaon, kag ang akon kapung-aw amat-amat nga nangin kalipay. Daw subong bala nga “asido” ang ginpainom sang akon iglesia, apang karon nagabaton ako sing tubig sang kabuhi. Ginpasalamatan ko si Jehova sa akon tagipusuon nga ginhilway niya ako gikan sa disparatis nga mga pagtuluuhan, subong sang Trinidad, pagkadimamalatyon sang kalag, kahadlok sa patay, kag pagsimba sa mga ginikanan.

Sini nga tion luyag ko na magguwa sa ospital. Nian nabatian ko nga duha ka pamilya sang bug-os tion nga mga ministro ang ipadala sa Wembo, Nyama, gani namat-od ako nga magpabilin tubtob mag-abot sila. Daw ano nga kalipay ang nabatyagan ko sang mag-abot sila sang ulihi kag ginduaw ako sa ospital! Karon mahimo ko na mapadayon ang akon pagtuon sa Biblia sing personal sa baylo sang sa sulat lamang.

Pagligad sang pila ka adlaw, ginpamangkot ko sila kon may miting sila sa Kingdom Hall, subong sang nabasa ko sa mga magasin. Ginsugiran nila ako nga ginahiwat nila ang tanan nila nga miting sa isa ka diutay nga kamalig nga ginapuy-an sang isa sa ila. Nagsiling man sila nga malipay sila sa pagdala sa akon didto paagi sa bisikleta! Walay sapayan sang daku nga kasakit sa akon taludtod kag sa akon tanan nga lutalutahan, malipayon nga gintambungan ko ang tanan nga miting. Sang matuman ko ang mga kinahanglanon, naghatag ako sing report kada bulan subong indi bawtismado nga manugbantala, sugod sang Abril 1974.

Tatlo ka bulan sang ulihi, ginsimbolohan ko ang akon dedikasyon kay Jehova paagi sa pagpatugmaw sa tubig. Nagpanaksi ako sa medikal nga mga tinawo sang ospital, sa mga pasyente didto, sa Protestante nga mga misyonero nga nagduaw, kag sa mga katapo sang akon pamilya​—⁠walay sapayan sang daku nga pagpamatok sang akon pamilya. Sini nga tion, nagpanaksi ako samtang nagahigda sa akon katre ukon nagasakay sa wheel­chair nga ginpagamit sa akon sang ospital tubtob nga nakabakal ako sang akon kaugalingon.

Ang Pagbatas Nagdala sing mga Benepisyo

Walay sapayan sang pagpamatok sang akon pamilya, nagpadayon ako sa paglakat sa dalanon ni Jehova kag ginpakamaayo ako sing bugana. Nagtindog ang akon asawa sa kamatuoran kag ginbawtismuhan sang 1975. Namat-od kami nga magpuyo sa Katako-Kombe, nga sa diin may yara na isa ka establisado nga kongregasyon. Nabalaka ang amon ginikanan nahanungod sa amon bangod may nagsugid sa ila nga ang tanan nga Saksi pamatyon sa 1975. Sang magdumili kami nga talikdan ang amon pagpakig-upod sa mga Saksi, nag-untat sila sa pagpadala sa amon sing pagkaon, kag namigado gid kami. Madumduman ko nga isa ka bes ang akon gamay nga anak nga lalaki nalipong sa gutom bangod isa ka adlaw kag tunga nga wala kami sing makaon. Apang gindalhan kami dayon sang amon Cristianong kauturan sing isda kag pagkaon. Sang ulihi, ginbuligan kami liwat sang akon mga ginikanan, apang ang amon kauturan wala gid mag-untat sa paghatag sa amon sing materyal nga bulig.

Sang Pebrero 1975 ang akon natuo nga butkon naparalisado kag nagluya. Apang ginhuptan ko ang akon pagtuo kag determinado ako nga padayunon ang akon pag-alagad kay Jehova nga may kalipay. Nalipay ako sa pagsiling nga ang akon butkon nagbaskog liwat sang ulihi, kag mahulaghulag ko ini gihapon tubtob karon, nga bangod sini mabuksan ko ang akon Biblia kag magamit ang mga publikasyon sang Sosiedad.

Maisugon sa Atubangan sang mga Awtoridad

Sang 1977 ginsumbong ako sang lokal nga komisyoner sa atubangan sang rehiyonal nga komisyon, nga bag-o lang magdakop sa isa ka espesyal payunir sa malapit nga kongregasyon. Isa ka adlaw ginpatawag ako sang korte sa isa ka soldado. Nangamuyo ako upod sa akon pamilya, ginpalig-on ko ang kongregasyon, kag dayon nag-upod ako sa iya. Bangod sa espiritu ni Jehova, nakahatag ako sing maisugon nga sabat sa mga panumbungon, kag sa tapos sang malawig nga pagpakighambal sa sibil kag militar nga mga awtoridad, ginbuhian ako upod sa espesyal pa­yunir.

Pila ka bulan sang ulihi, ginpatawag naman ako sang isa pa ka komisyoner, kag sa liwat, sa bulig ni Jehova, napangapinan ko ang maayong balita nga may kalipay kag kaisog. Malawig nga nakighambal ako sa sini nga tawo, kag sa katapusan sini, ginbuhian niya ako kag sia mismo ang nagduso sang akon wheel­chair paguwa sa iya opisina. Nian nagsiling sia sa mahinay nga tingog: “Kadto ka sa akon balay karon sa gab-i.” Sa tapos sang pila ka pagduaw, naumpisahan ko ang pagtuon sa Biblia upod sa iya. Sang ulihi, nangin pito ang akon pagtuon sa Biblia upod sa nanuhaytuhay nga mga tawo sa awtoridad. Ang kalabanan sa ila nagatambong sa mga miting sang kongregasyon nga ginahimos sa lokal.

Espesyal nga Pag-alagad

Nangamuyo ako kay Jehova nga buligan ako, walay sapayan sang akon balatian, sa pagtuman sang akon sumpa nga alagdon sia sa bug-os ko nga kusog. Bisan pa wala ako magpalista sing opisyal, gintinguhaan ko nga lab-uton ang mga kinahanglanon sang isa ka auxiliary nga payunir. Ginbuligan ako ni Jehova nga magmadinalag-on, gani naghatag ako sing aplikasyon para sa sini nga pag-alagad sa mga bulan sang Hunyo tubtob Oktubre. Nian ginbaton sang Sosiedad ang akon aplikasyon nga mangin regular nga payunir, kag ginsugdan ko ini nga pag-alagad sang Nobiembre 1976. Sang Septiembre 1977 nakompleto ang akon kalipay sang makabaton ako sing asaynment subong espesyal nga payunir upod sa kongregasyon sa Katako-Kombe.

Paano ko ini nahimo? Ginkobrehan ko ang teritoryo nga sakay sa akon wheel­chair sa bulig sang akon palangga nga asawa kag sang kauturan sa kongregasyon. Kon kaisa nagalakat gani ako nga isahanon nga nagagamit sing saklay. Ginadumdom ko pirme ang determinasyon sang mga apostoles kag mga disipulo ni Jesus. (Binuhatan 14:​21, 22; Hebreo 10:​35-39) Sa kada tion nga matumba ako, nagapangamuyo ako kay Jehova nga indi ako pagtugutan nga maluyahan sing buot kundi, sa baylo, hatagan ako sing kusog nga magpadayon sa pag-alagad sa iya. Ginatandaan ko ang matahom nga saad nga narekord sa tagna ni Isaias, nga “ang piang magalumpat subong sang usa.”​—⁠Isaias 35:⁠6.

Samtang ginadugangan ko ang akon pag-alagad, dugang pa nga nalandas ko ang akon pisikal nga kasablagan. Sang 1978 nakatigayon ako sing pribilehiyo nga mag-eskwela sa King­dom Min­istry ­School sa Lubumbashi, nga nagkinahanglan sing paglakbay sa kabilugan nga 2,000 kilometros paagi sa trak, barko, kag tren. Sa pagkamatuod, dugang pa nga ginpabaskog ako ni Jehova para sa sini nga paglakbay. (Isaias 12:​2; 40:29) Karon malakat ko gani​—⁠nga may daku nga kabudlayan​—⁠ang tubtob sa 100 metros nga wala sing saklay. Kombinsido ako nga ginpamatian ni Jehova ang akon pangamuyo sang 1973 nga hatagan ako sing kusog sa pag-alagad sa iya nga may determi­nasyon.

Bag-o nga Asaynment

Sang 1984, pagligad sang pito ka tuig sa kongregasyon sa Katako-Kombe, nakabaton ako sing bag-o nga asaynment nga magpanghikot upod sa kongregasyon sa Lodja-Centre. Pagligad sang isa ka tuig nakaumpisa kami sing bag-o nga pagtinuon sa libro nga 12 kilometros ang kalayuon, kag wala lang madugay nakaumpisa kami sing isa pa sa kalayuon nga 30 kilometros gikan sa sina nga pagtinuon. Ining naulihi ginkilala sa gilayon subong isa ka iso­lated ­group kag sang 1988 ginbaton subong isa ka kongregasyon, nga sa karon nagaalagad ako subong isa ka gulang.

Ang pagpayunir nangin maayo gid para sa akon, sa espirituwal kag sa pisikal. Kon magguwa ako nga may saklay, ginahimo ko ang ehersisyo nga ginarekomendar sa akon sang mga doktor. Mas mabaskog ako karon kay sang magsugod ako sa pagpayunir, kag ang akon handum amo nga padayunon ining hilikuton tubtob sa katapusan. Nalangkag ako nga makita kon paano ako buligan ni Jehova sa “paglumpat subong sang usa” sa tion nga indi ko na kinahanglan batason ang kasakit sining balatian.

Upod ang akon bug-os nga tagipusuon, ginapasalamatan ko ang aton langitnon nga Amay, nga naghatag sa akon sing kusog, kaisog, kag sang bug-os tion nga pag-alagad. Treintay seis anyos na ako karon, kag pagligad sang 11 ka tuig nga pagpayunir, nagalaum ako nga magpadayon, bisan ano man ang nagahulat sa palaabuton. Determinado ako nga gamiton ang akon bug-os nga kusog sa pagpadungog kag sa pagdayaw sa daku nga Dios nga si Jehova.

[Piktyur ni Ekumba Okoka sa pahina 26]