“Mga Luha sang Apresasyon”

“MGA luha sang apresasyon, bag-o ko lang mabasa ang artikulo nga ‘Kon Paano Mabuligan ang mga Ginapung-awan sa Pagtigayon Liwat sing Kalipay.’ ” (Ang Lalantawan Marso 15, 1990, pahina 26-30) Amo sini ang umpisa sang isa sang madamo nga sulat sang apresasyon nga nabaton sang Sosiedad para sa mga artikulo tuho sa kapung-aw nga nagguwa sa amon Marso 1 kag Marso 15, 1990 nga mga guwa. Apang, ining partikular nga sulat, naghalin sa isa ka utod nga babayi sa Hapon nga ang iya anak nga pamatan-on nga lalaki nagmasakit kasan-o lang sing schizophrenia. Sia nagapaathag:

“Paglugpay kag pagpalig-on sa ginapung-awan nga kalag kada adlaw, kon kaisa ginakapoy na gid ako sa pagpadayon. Kon maghinagob ang kagab-ihon, ang akon anak ginahugakom sang kahadlok kag kahilas. Gani ginapatomar ko sia sing pildora nga pangpatulog kag nagapungko sa tupad sang iya katre nga ginahuluhaplos ang iya mga kamot kag ginaduludapulay ang iya agtang tubtob nga matulugan sia. Daw subong ini sang pagkulan sang isa ka lapsag sa katre, kag pagligad sang mga isa ka oras, matulugan sia sing hamuok. Amo sina kag mahaw-asan ako, apang sa amo man nga tion, ginasugiran ko ang akon kaugalingon nga ang masunod nga aga magadala naman sing isa pa ka adlaw nga alatubangon.

“Ang akon anak nagasiling, ‘Wala ako sing pulos. Wala na ako sing paglaum.’ Kada adlaw masubo nga nagapamangkot sia, ‘Maayo pa bala ako? San-o ako mauntat sa pag-inom sing bulong? Tubtob san-o magapadayon ini nga sahi sang pagkabuhi?’ Sa sina nga mga tion ginagamit ko ang mga pamangkot sa pagpabag-o sang iya panghunahuna subong sang ginpanugda sang mga magasin, kag nagabulig ini sa iya nga maumpawan diutay. Apang amo lang sini gihapon ang nagakatabo sa amon sa adlaw-adlaw.

“May mga tion man nga ginapatawag sang akon anak ang mga gulang [gikan sa lokal nga kongregasyon] sa tungang-gab-i kon ginahilasan gid sia kag ginapangabay sila nga pangamuyuan sia. Daw nagahatag ini sa iya sing daku nga paumpaw kag nagapalinong sang iya panghunahuna. . . . Sa masami, ang kahimtangan sang akon anak nagalain kon ang akon bana (ditumuluo) wala sa balay bangod sang iya trabaho. Kon mangayo ako sing bulig paagi sa telepono, madamo nga utod ang dalidali nga nagakadto sa amon balay.

“Ginapasalamatan ko kamo, mga utod, gikan sa alibutod sang akon tagipusuon bangod sang inyo pagbalhag sini nga sahi sang mga artikulo sa tion kag tion kag pagpakita nga kamo nagaulikid sa mga kinahanglanon sang mga maluya.”

[Ginpirmahan] H. H.