Ginbag-o Sini nga Libro ang Ila Kabuhi

Sang nagligad nga mga tinuig gindiborsio sang isa ka babayi ang iya bana. Sang ulihi ang iya anak nga si Steve nangin isa sang mga Saksi ni Jehova. Gintinguhaan ni Steve nga wala sing kadalag-an nga hambalon ang iya iloy nahanungod sa iya pagtuluuhan. Ginkadtuan man niya ang iya amay, nga nagatagumatayon sa kanser.

Sa baylo nga magsali hambal, ginbilin na lang ni Steve ang libro nga Mahimu Ka Mabuhi sing Dayon sa Paraiso sa Duta sa tupad sang katre sang iya amay kag nagsiling nga ang pagbasa sini makabulig sa iya. Ginbasa sang iya amay ang libro kag sa iya kaugalingon nga pagbuot nagsugod sia sa pagtambong sa mga miting sang mga Saksi ni Jehova sang Enero 1988.

Samtang, napanilagan sang iloy ni Steve sa mga pagtilipon sang pamilya ang bag-ong personalidad nga ginpasundayag sang iya bana anay. Nahamuot gid sia sa sini amo kon ngaa nagsugot sia nga magtambong sa miting sang mga Saksi ni Jehova. Nagsugod sia sa pagtambong sa mga miting sing regular, kag wala madugay nagapungko na sia upod sa iya bana anay. Sang ulihi ginkasal sila liwat.

Ang amay ni Steve napatay sang Septiembre 1988 apang indi antes sia makasugod sa pagpakigbahin sa Cristianong ministeryo. Ang iloy ni Steve, nga nag-atipan sa iya amay sa tion sang hingapusan nga binulan sang iya balatian, ginbawtismuhan sang Hunyo 1988 kag isa karon ka makugi nga Saksi.

Ang Mahimu Ka Mabuhi sing Dayon sa Paraiso sa Duta isa ka libro nga nagahatag sing paglaum paagi sa pagtudlo sang mga sabat sang Biblia sa mga problema sang kabuhi. Nangin instrumento ini sa pagbag-o sang kabuhi sang madamo. Para sa kasayuran kon paano makatigayon sing kopya, sulati kag ipadala ang kaupod nga kupon.

Luyag ko makabaton sing nahapinan sing matig-a 256-pahina nga libro nga Mahimu Ka Mabuhi sing Dayon sa Paraiso sa Duta. (Magsulat sa direksion sa ubos para sa kasayuran. Sa guwa sang Pilipinas, magsulat sa lokal nga sanga talatapan sang Watch Tower para sa kasayuran. Tan-awa ang pahina 2.)