Indi si Jehova ang Dapat Basulon

“Kaangay sang amay nga nagakaawa sa iya mga anak, sa amo si Jehova nagakaawa sa mga nagakahadlok sa iya. Kay nakahibalo sia sang aton kahimtangan, nagadumdom sia nga kita yab-ok.”—SALMO 103:13, 14.

1, 2. Sin-o si Abraham, kag paano ang iya hinablos nga si Lot nakapuyo sa malaut nga siudad sang Sodoma?

INDI si Jehova ang may salabton sa mga kabudlayan nga mahimo naton maagihan bangod sang aton mga sayop. Nahanungod sini binagbinaga kon ano ang natabo sang nagligad nga mga 3,900 ka tuig. Si Abraham (Abram) nga abyan sang Dios kag ang iya hinablos nga si Lot nangin tuman ka bugana. (Santiago 2:23) Sa katunayan, ang ila mga pagkabutang kag mga kahayupan tuman kadamo sa bagay nga “indi sila makapuyo sing tingob.” Dugang pa, may kasuayon sa tunga sang mga manugbantay sang kahayupan sang duha ka lalaki. (Genesis 13:5-7) Ano ang himuon nahanungod sini?

² Agod matapos ang pagsinuay, si Abraham nagpanugda nga magbulagay sila, kag ginpapili niya una si Lot. Bisan si Abraham mas magulang kag nagakaigo kuntani para sa iya hinablos nga papilion sia sang pinakamaayo nga duog, ginpili ni Lot ang pinakaali nga rehiyon—ang bug-os nga distrito sang Naubos nga Jordan nga may bugana nga tubig. Ang naguwa nga dagway madayaon, kay sa kaingod yara ang manubo sing moral nga mga siudad sang Sodoma kag Gomorra. Nagsaylo sang ulihi si Lot kag ang iya panimalay sa Sodoma, kag nabutang sa peligro ang ila espirituwalidad. Dugang pa, gindala sila nga bihag sang gindaug ni Hari Kedorlaomer kag sang iya mga alyado ang hari sang Sodoma. Ginluwas sila ni Abraham kag sang iya mga tinawo, apang si Lot kag ang iya panimalay nagbalik sa Sodoma.—Genesis 13:8-13; 14:4-16.

3, 4. Ano ang natabo kay Lot kag sa mga katapo sang iya panimalay sang ginlaglag sang Dios ang Sodoma kag Gomorra?

³ Bangod sang tiko nga kailigbon sa sekso kag moral nga kalautan sang Sodoma kag Gomorra, si Jehova namat-od nga laglagon yadto nga mga siudad. Maluluy-on nga ginpadala niya ang duha ka anghel nga nagtuytoy kay Lot, sa iya asawa, kag sa ila duha ka anak nga babayi paguwa sa Sodoma. Indi sila dapat magbalikid, apang ang asawa ni Lot nagbalikid, ayhan nagkanugon sa materyal nga mga butang nga nabilin. Bangod sina, nangin haligi sia nga asin.—Genesis 19:1-26.

⁴ Daku nga kadulaan ang naagihan ni Lot kag sang iya mga anak nga babayi! Dapat bayaan sang iya mga anak ang mga lalaki nga ila palamanhon. Si Lot wala na karon sing asawa kag sing materyal nga manggad. Sa katunayan, nagpuyo na lamang sia sang ulihi sa lungib kaupod sang iya mga anak nga babayi. (Genesis 19:30-38) Ang gintan-aw niya nga tuman kaayo nangin kabaliskaran gid. Bisan nakahimo sia sing mabug-at nga sayop, gintawag sia sang ulihi nga “ang matarong nga si Lot.” (2 Pedro 2:7, 8) Kag pat-od gid nga indi si Jehova nga Dios ang dapat basulon sa mga sayop ni Lot.

“Mga Sayop—Sin-o Bala ang Makahantop?”

5. Ano ang ginbatyag ni David nahanungod sa mga sayop kag makahas nga mga buhat?

⁵ Bangod dihimpit kag makasasala, kita tanan nagasayop. (Roma 5:12; Santiago 3:2) Kaangay ni Lot, mahimo kita madaya sang naguwa nga mga dagway kag mahimo magsala sa aton desisyon. Busa, si salmista David nagpakiluoy: “Mga sayop—sin-o bala ang makahantop? Hukmi ako nga walay sala gikan sa tinagong mga sayop. Punggi man ang imo alagad gikan sa makahas nga mga buhat; dili sila pagpagahuma sa akon. Nian mangin himpit ako, kag magapabilin nga hilway gikan sa dakung paglalis.” (Salmo 19:12, 13) Nakahibalo si David nga basi makahimo sia sing mga sala nga wala gani sia sing hinalung-ong. Gani, nangayo sia sing kapatawaran sa mga paglalis nga ayhan natago bisan sa iya. Sang nakasala sia sing daku bangod sang sugyot sang iya dihimpit nga unod sa paghimo sing sayop nga dalanon, ginhandum niya sing daku ang bulig ni Jehova. Luyag niya nga punggan sia sang Dios gikan sa makahas nga mga buhat. Indi niya luyag nga ang kakahas mangin nagapangibabaw niya nga panimuot. Sa baylo, handum niya ang mangin bug-os sa iya debosyon kay Jehova nga Dios.

6. Ano nga lugpay ang matigayon gikan sa Salmo 103:​10-14?

⁶ Subong dedikado nga mga alagad karon ni Jehova, dihimpit man kita kag busa nagasayop. Kaangay ni Lot, halimbawa, mahimo nga indi maayo ang mapilian naton tuhoy sa lugar nga aton puy-an. Ayhan ginapaligad naton ang kahigayunan nga mapasangkad ang aton balaan nga pag-alagad sa Dios. Bisan nakita ni Jehova ina nga mga kasaypanan, kilala niya yadtong may tagipusuon nga nahuyog sa pagkamatarong. Bisan kon makasala kita sing mabug-at apang nagahinulsol, si Jehova nagahatag sing kapatawaran kag bulig kag padayon nga nagatamod sa aton subong diosnon nga mga indibiduwal. “Wala sia maghisayo suno sa aton mga sala; ukon nagbalos sa aton suno sa aton mga kalautan,” siling ni David. “Kay subong nga ang mga langit mataas labaw sa duta, amo kadaku ang iya mahigugmaon nga kalulo ayon sa mga nagakahadlok sa iya. Subong sa kalayo sang sidlangan sa katundan, amo kalayo ang iya pagpahilayo sa aton sang aton mga paglalis. Kaangay sang amay nga nagakaawa sa iya mga anak, sa amo si Jehova nagakaawa sa mga nagakahadlok sa iya. Kay nakahibalo sia sang aton kahimtangan, nagadumdom sia nga kita yab-ok.” (Salmo 103:10-14) Ang aton maluluy-on nga langitnon nga Amay magabulig man sa aton sa pagpangayo sing pasaylo sa aton kasaypanan ukon magahatag sa aton sing isa pa ka kahigayunan sa pagpasangkad sang aton balaan nga pag-alagad, sa iya kadayawan.

Ang Sayop nga Basulon ang Dios

7. Ngaa nagaantos kita sing mga kailo?

⁷ Kon may matabo nga malain, huyog sang tawo nga basulon ang iban ukon ang pila ka butang sa natabo. Ginabasol pa gani sang iban ang Dios. Apang si Jehova wala nagapahanabo sinang mga kabudlayan sa katawhan. Nagahimo sia sing maayo, indi sing makahalalit nga mga butang. Ti, “nagapasubang sia sang iya adlaw sa mga malauton kag sa mga maayo, kag nagapaulan sa mga matarong kag sa mga dimatarong”! (Mateo 5:45) Ang pinakapangunang rason kon ngaa nagaantos kita sing mga kailo amo nga kita nagapuyo sa kalibutan nga ginapalakat sang makagod nga mga prinsipio kag yara sa gahom ni Satanas nga Yawa.—1 Juan 5:19.

8. Ano ang ginhimo ni Adan sang nangin indi maayo ang tanan para sa iya?

⁸ Ang pagbasol kay Jehova nga Dios tungod sang mga kabudlayan nga ginadala sa aton sang aton mga kasaypanan dimaalamon kag makatalagam. Magabili pa ini sang aton mismo kabuhi. Ang nahaunang tawo, si Adan, dapat kuntani naghatag sa Dios sing dungog tungod sang tanan nga maayong butang nga ginbaton niya. Huo, dapat kuntani nagpasalamat sing daku si Adan kay Jehova tungod sang kabuhi mismo kag tungod sang mga kabulahanan nga gin-agom niya sa katulad-parke nga puluy-an, ang katamnan sang Eden. (Genesis 2:7-9) Ano ang ginhimo ni Adan sang nangin indi maayo ang tanan bangod ginlapas niya si Jehova kag ginkaon ang ginadumilian nga bunga? Si Adan nagreklamo sa Dios: “Ang babayi nga ginhatag mo sa akon nga mangin kaupod ko, ginhatagan niya ako gikan sa kahoy, kag nagkaon ako.” (Genesis 2:15-17; 3:1-12) Sa pagkamatuod, indi naton dapat pagbasulon si Jehova, subong sang ginhimo ni Adan.

9. (a) Kon magaantos kita sing mga kabudlayan bangod sang aton dimaalamon nga mga buhat, sa diin kita makakuha sing lugpay? (b) Suno sa Hulubaton 19:​3, ano ang ginahimo sang iban kon nagadala sila sing mga kabudlayan sa ila kaugalingon?

⁹ Kon magaantos kita sing mga kabudlayan bangod ang aton mga buhat dimaalamon, makakuha kita sing lugpay gikan sa ihibalo nga labi nga nahangpan ni Jehova ang aton mga kaluyahon sang sa aton kag hilwayon niya kita gikan sa aton kahimtangan kon hatagan naton sia sing eksklusibo nga debosyon. Dapat naton pasalamatan ang balaan nga bulig nga nabaton naton, wala nagabasol sa Dios tungod sang mga problema kag mga kabudlayan nga ginadala naton sa aton kaugalingon. Nahanungod sini ang maalam nga hulubaton nagasiling: “Ang kabuangon sang tawo nagapatiko sang iya dalanon, kag ang iya tagipusuon naakig kay Jehova.” (Hulubaton 19:3) Ang isa pa ka badbad nagasiling: “Ang iban nga mga tawo nagahalit sang ila kaugalingon paagi sa ila binuang nga mga buhat kag nian ginabasol ang GINUO.” (Today’s English Version) Ang isa pa gid ka badbad nagasiling: “Ang pagkaignorante sang tawo nagagumon sang iya kahimtangan kag nagasingkal sia batok kay Jehova.”—Byington.

10. Paano ang kabuangan ni Adan ‘nagpatiko sang iya dalanon’?

¹⁰ Nahisuno sa prinsipio sining hulubaton, si Adan nagpanghikot sing makagod kag ang iya binuang nga panghunahuna ‘nagpatiko sang iya dalanon.’ Ang iya tagipusuon nagtalikod kay Jehova nga Dios, kag naglakat sia sa iya kaugalingon makagod, independiente nga dalanon. Ti, nangin walay kabalaslan si Adan kay ginbasol niya ang iya Manunuga kag busa naghimo sang iya kaugalingon nga kaaway sang Labing Mataas! Ang sala ni Adan nagdala sing kalaglagan sa iya kaugalingon nga dalanon kag sang iya panimalay. Daku gid ini nga paandam sa aton! Yadtong nahuyog sa pagbasol kay Jehova tungod sang dimaayo nga mga kahimtangan maayo nga magapamangkot sang ila kaugalingon: Ginapadunggan ko bala ang Dios tungod sang maayong mga butang nga ginaagom ko? Nagapasalamat bala ako nga may kabuhi ako subong isa sang iya mga tinuga? Mahimo bala ayhan nga ang akon mismo mga kasaypanan ang nagahatag sing kabudlayan sa akon? Nagakabagay bala ako sa kahamuot ukon bulig ni Jehova bangod sang pagsunod sa iya panuytoy, subong sang mabasa sa iya inspirado nga Pulong, ang Biblia?

Katalagman Bisan Para sa mga Alagad sang Dios

11. Nahanungod sa Dios, sa ano nakasala ang unang-siglo nga Judiyong relihiosong mga lider?

¹¹ Ang Judiyong relihiosong mga lider sang unang siglo C.E. nagpangangkon nga nagaalagad sa Dios apang nagpatumbaya sang iya pulong sang kamatuoran kag nagsalig sa ila kaugalingon nga paghangop. (Mateo 15:8, 9) Bangod ginbuyagyag ni Jesucristo ang ila sayop nga panghunahuna, ginpapatay nila sia. Sang ulihi, ginpakita nila ang daku nga kaakig batok sa iya mga disipulo. (Binuhatan 7:54-60) Tuman gid ka tiko ang dalanon sadtong mga tawo nga sing aktuwal nagkaakig sila batok kay Jehova mismo.—Ipaanggid ang Binuhatan 5:34, 38, 39.

12. Anong halimbawa ang nagapakita nga bisan ang pila ka mga indibiduwal nga nagapakig-upod sa Cristianong kongregasyon nagabasol kay Jehova tungod sang ila mga kabudlayan?

¹² Bisan ang pila ka mga indibiduwal sa Cristianong kongregasyon nagpalambo sing makatalagam nga panghunahuna, nagabasol sa Dios tungod sang mga kabudlayan nga gin-antos nila. Halimbawa, nasapwan sang gintangdo nga mga gulang sa isa ka kongregasyon nga kinahanglan hatagan ang isa ka bataon nga minyo nga babayi sing malulo apang malig-on nga Makasulatanhon nga laygay batok sa pagpakig-upod sa isa ka kalibutanon nga lalaki. Sa isa ka paghambalanay, ginbasol niya ang Dios nga wala sia pagbuligi nga mabatuan ang pagsulay nga gindala sa iya sang iya padayon nga pagpakig-upod sa lalaki. Nagsiling sia sing aktuwal nga akig sia sa Dios! Ang Makasulatanhon nga pangatarungan kag sulit-sulit nga panikasog agod buligan sia wala magmadinalag-on, gani ginpaguwa sia sang ulihi sa Cristianong kongregasyon bangod sang imoral nga dalanon.

13. Ngaa likawan ang mayamuhon nga panimuot?

¹³ Ang mayamuhon nga espiritu mahimo magadul-ong sa isa ka tawo nga basulon si Jehova. Ang “mga didiosnon” nga nagsulod sa unang-siglo nga kongregasyon may amo sina kalain nga espiritu, kag gin-updan ini sang iban nga mga sahi sang makapalain sa espirituwal nga panghunahuna. Subong sang ginsiling ni disipulo Judas, ining mga tawo “nagabaylo sang bugay sang aton Dios sa kaulag kag nagapanghiwala sang aton isa lamang ka Agalon kag Ginuo, si Jesucristo.” Si Judas nagsiling man: “Ini sila mga palakumod, mga mabinasulon nga nagagawi suno sa ila mga kailigbon.” (Judas 3, 4, 16) Ang maunungon nga mga alagad ni Jehova maalamon nga magapangamuyo nga sila may mainapresyahon nga espiritu, indi ang mayamuhon nga panimuot nga mahimo magapaakig sa ila sa ulihi tubtob sa punto nga madula nila ang pagtuo sa Dios kag mabutang sa katalagman ang ila kaangtanan sa iya.

14. Ano ang mahimo nga reaksion sang isa kon ginpaakig sang masigka-Cristiano, apang ngaa indi ini ang nagakaigo nga dalanon?

¹⁴ Ayhan magahunahuna ka nga indi ini matabo sa imo. Apang, ang mga butang nga nagalain bangod sang aton mga kasaypanan ukon sang iban mahimo nga sa ulihi magatiklod sa aton nga basulon ang Dios. Halimbawa, ang isa mahimo maakig sa ginasiling ukon ginahimo sang isa ka masigkatumuluo. Ang akig nga indibiduwal—ayhan isa nga nagaalagad kay Jehova sing maunungon sa madamo na nga tinuig—mahimo nian nga magasiling: ‘Kon ina nga tawo yara sa kongregasyon, indi ako magtambong sa mga miting.’ Mahimo sia maakig sing daku sa bagay nga nagasiling sia sa iya tagipusuon: ‘Kon magapadayon ini, indi ko luyag nga mangin bahin sang kongregasyon.’ Apang dapat bala nga ang isa ka Cristiano may amo sina nga panimuot? Kon ginpaakig ka sang isa pa ka dihimpit nga tawo, ngaa abi maakig ikaw sa bug-os nga kongregasyon sang katawhan nga kalahamut-an sa Dios kag nagaalagad sa iya sing maunungon? Ngaa ang isa nga nagdedikar kay Jehova magauntat sa paghimo sang balaan nga kabubut-on kag sa amo ginaulamid ang Dios? Daw ano ka maalamon nga tugutan ang isa ka indibiduwal ukon mga kahimtangan nga gub-on ang imo maayo nga kaangtanan kay Jehova? Sa pagkamatuod, binuang kag sala ang mag-untat sa pagsimba kay Jehova nga Dios tungod sang bisan ano nga rason.—Santiago 4:17.

15, 16. Sa ano nakasala si Diotrefes, apang paano naggawi si Gayo?

¹⁵ Handurawa nga yara ikaw sa kongregasyon man sang mahigugmaon nga Cristiano nga si Gayo. “Nagahimo [sia] sing matutom nga butang” sa pagpakita sing pagkamaabiabihon sa nagaduaw nga mga masigkatumuluo—kag sa mga dumuluong pa! Apang maathag nga sa amo man nga kongregasyon, yara ang bugalon nga si Diotrefes. Wala niya pagbatuna nga may pagtahod si Juan, ang isa sang mga apostoles ni Jesucristo. Sa katunayan, nagwakal pa gani sing malain nga mga pulong si Diotrefes nahanungod kay Juan. Ang apostol nagsulat: “Sa wala pa maayawi sina, wala man niya [Diotrefes] pagbatuna ang mga kauturan, kag sila nga buot ginadumilian niya kag ginasubol gikan sa kongregasyon.”—3 Juan 1, 5-10.

¹⁶ Kon nagkadto si Juan sa kongregasyon, tuyo niya nga ipahanumdom ang ginhimo ni Diotrefes. Samtang, ano ang reaksion ni Gayo kag sang iban nga maabiabihon nga mga Cristiano sa sina nga kongregasyon? Wala sing ginapakita sa Kasulatan nga ang bisan sin-o sa ila nagsiling: ‘Tubtob yari sa kongregasyon si Diotrefes, indi ko luyag mangin bahin sini. Indi mo na ako makita sa mga miting.’ Walay duhaduha nga si Gayo kag ang iban kaangay niya nagtindog nga malig-on. Wala nila gintugutan ang bisan ano nga magapauntat sa ila sa paghimo sang balaan nga kabubut-on, kag pat-od nga wala sila naakig kay Jehova. Wala, sa pagkamatuod, kag wala sila magpadala sa malimbungon nga mga padihot ni Satanas nga Yawa, nga nalipay kuntani kon nangin dimatutom sila kay Jehova kag nagbasol sa Dios.—Efeso 6:10-18.

Indi Magkaakig kay Jehova!

17. Paano kita dapat magpanghikot kon ang pila ka indibiduwal ukon sitwasyon nagapaakig ukon wala nagapahamuot sa aton?

¹⁷ Bisan pa kon ang pila ka indibiduwal ukon sitwasyon sa kongregasyon wala nagpahamuot ukon nagpaakig sa isa ka alagad sang Dios, ang isa nga nagakaakig nagapatiko gid sang iya mismo dalanon kon mag-untat sia sa pagpakig-upod sa katawhan ni Jehova. Ina nga tawo wala nagagamit sing nagakaigo sang mga ikasarang sa paghantop. (Hebreo 5:14) Gani mangin determinado nga atubangon ang tanan nga mga kailo subong manughupot sing integridad. Hupti ang pagkamaunungon kay Jehova nga Dios, kay Jesucristo, kag sa Cristianong kongregasyon. (Hebreo 10:24, 25) Ang kamatuoran nga nagadul-ong sa kabuhi nga dayon indi makita sa iban pa.

18. Bisan indi naton pirme mahangpan ang balaan nga mga pagpakig-angot, sa ano kita makapat-od nahanungod kay Jehova nga Dios?

¹⁸ Dumduma man nga si Jehova wala nagasulay kay bisan sin-o sang malaut. (Santiago 1:13) Ang Dios, nga amo gid ang larawan sang gugma, nagahimo sang maayo, labi na sa mga nagahigugma sa iya. (1 Juan 4:8) Bisan indi naton pirme mahangpan ang balaan nga mga pagpakig-angot, makasalig kita nga si Jehova nga Dios indi gid mapaslawan sa paghimo kon ano ang labing maayo para sa iya mga alagad. Subong sang ginsiling ni Pedro: “Busa magpaubos kamo sang inyo kaugalingon sa idalom sang gamhanan nga kamot sang Dios, agod nga bayawon niya kamo sa nagakaigo nga tion. Magtugyan sang inyo tanan nga paghimud-os sa iya, kay sia nagakabalaka sa inyo.” (1 Pedro 5:6, 7) Huo, si Jehova tunay nga nagakabalaka sa iya katawhan.—Salmo 94:14.

19, 20. Paano kita dapat magpanghikot, bisan kon ang mga pagtilaw sa aton nagapung-aw sa aton kon kaisa?

¹⁹ Busa, indi pagtuguti ang bisan ano ukon ang bisan sin-o nga magsandad sa imo. Subong gid sang ginsiling sang salmista, “may daku nga paghidait ang mga nagahigugma sang kasuguan [ni Jehova], wala sila sing kahigayunan sa pagkasandad.” (Salmo 119:165) Kita tanan nagaagom sing mga pagtilaw, kag mahimo ini magapung-aw kag magapasubo sa aton kon kaisa. Apang indi gid pagtuguti ang kaakig nga maglambo sa imo tagipusuon, labi na batok kay Jehova. (Hulubaton 4:23) Paagi sa iya bulig kag Makasulatanhon nga sadsaran, atubanga ang mga problema nga malubad mo kag batasa ang nagapadayon.—Mateo 18:15-17; Efeso 4:26, 27.

²⁰ Indi gid pagtuguti ang imo emosyon nga magpanghikot ka sing binuang kag busa nagapatiko sang imo dalanon. Magpamulong kag magpanghikot sa paagi nga magapahalipay sang tagipusuon sang Dios. (Hulubaton 27:11) Manawag kay Jehova sa hanuot nga pangamuyo, nakahibalo nga nagaulikid gid sia sa imo subong isa sang iya mga alagad kag magahatag sa imo sing paghangop nga kinahanglanon agod magpabilin sa banas sang kabuhi kaupod sang iya katawhan. (Hulubaton 3:5, 6) Labaw sa tanan, indi magkaakig sa Dios. Kon may problema, dumduma pirme nga indi si Jehova ang dapat basulon.

Paano Mo Sabton?

◻ Anong sayop ang ginhimo ni Lot, apang paano sia gintamod sang Dios?

◻ Ano ang balatyagon ni David nahanungod sa mga sayop kag makahas nga mga buhat?

◻ Kon may problema, ngaa indi naton dapat basulon ang Dios?

◻ Ano ang magabulig sa aton sa paglikaw nga maakig batok kay Jehova?

[Laragway sa pahina 15]

Sang nagbulag kay Abraham, ginpili ni Lot ang dimaayo tuhoy sa iya duog nga puy-an