Pagpaambit sing Paghangop sa Namibia

SA PILA ka hambal nga nabatian mo ang ekspresyon nga “Wala ako makahibalo”? “Hi nokuzuva,” siling sang Herero nga babayi, sa iya kinabatasan nga malaba nga bayo kag korte-torotot nga kalo. “Nghi udite ko,” sabat sang Kwanyama nga bata nga babayi, nga nagayuhum. “Kandi uvite ko,” sabat sang Ndonga nga tagaminuro, nga nagapakido sang iya mga abaga. “Kapi na kuzuvha,” siling sang isa ka Kwangali nga manugbantay-kanding.

Sila tanan nagasiling sing, “Wala ako makahibalo.” Ginalaragway sini sing maayo nga ang mga Saksi ni Jehova sa Namibia nagaatubang sing mabudlay nga mga problema sa hambal sa pagtinguha nila nga malab-ot ang 1,370,000 ka pumuluyo sa sining malapad nga teritoryo nga mga 824,000 kilometros kuwadrados!

Kag indi katingalahan! Indi lamang Herero kag Nama nga katawhan kundi Ovambo man, Kavango, Tswana, Caprivian, Himba, Bushman, kag Damara nga katawhan sang Namibia ang may ila kaugalingon nga mga hambal. Kon ipaanggid, ang mga Saksi nasangkapan sing literatura sang Biblia sa Ingles kag Afrikaans lamang. Sing maathag, agod ang kamatuoran mahangpan sang madamo pa nga katawhan, ang pagbadbad nga hilikuton importante. Nagsugod ini sa tuman ka diutay nga paagi madamong tinuig na ang nagligad sa Windhoek, ang kapital nga siudad sang ginatawag anay nga Bagatnan-Katundan nga Aprika.

“Sa Windhoek, ginpamatukan sing daku sang simbahan kag sang mga pulis ang amon pagpanaksi nga hilikuton,” panugiron ni Dick Waldron. Upod sang iya asawa, si Coralie, nagkadto sia sa sining pungsod sang 1953 subong isa ka gradwado sang Watchtower Bible School of Gilead. “Wala kami gintugutan sa mga lugar diin nagapuyo ang mga itom, kag gingamo kami kon kaisa kon nakita nga nagapakigsugilanon sa mga itom. Sang ulihi nakakita kami sing isa ka lugar diin wala kami gingamo—ang mamala nga pangpang sang Suba sang Gammans! Sa guwa lamang ini sang siudad. Ginalipdan sang mga kahoy nga akasya, nagdumala kami sing mga pagtuon sa Biblia didto.”

Didto man nga ang mga publikasyon sang Watch Tower una nga ginbadbad sa lokal nga mga hambal. Naglakip ini sang pila ka mga tract sa Kwanyama kag sang polyeto nga “Ining Maayong Balita sang Ginharian” sa Nama. Si Brother Waldron nagasugid sang isa ka makahalam-ot nga inagihan may kaangtanan sini nga polyeto, nga ginbuligan badbad sang isa ka interesado nga lalaki. Ang Nama nga katumbas indi makita para sa dinalan nga, “Si Adan isa ka himpit nga tawo.” Gani ang interesado nagsiling: “Isulat mo na lang nga si Adan kaangay sang luto nga peach. Mahangpan na ina sang mga Nama nga sia himpit.” Amo ini anay kon paano ginsugdan ang pagpaambit sang paghangop sa Kasulatan sa madamo sa tunga sang tumandok nga katawhan sang Namibia.—Ipaanggid ang Daniel 11:33.

Paglab-ot sa Isa ka Importante nga Hitabo

Ang isa ka importante nga hitabo nalab-ot sang temprano nga bahin sang dekada 1970 sang ang libro nga Ang Kamatuoran nga Nagadul-ong sa Kabuhi nga Dayon ginbadbad sa Ndonga kag Kwanyama. Amo ini ang duha ka pangunang hambal nga ginapamulong sang kalabanan nga mga taga-Namibia sa Ovamboland, mga 700 kilometros aminhan sang Windhoek. Nian gintukod ang isa ka puluy-an sang mga payunir sa Ondangwa, isa ka purok sa Ovamboland. Agod buligan ang mga interesado sa sining lugar nga makabenepisyo gikan sa semanal nga paghinun-anon sa Biblia pasad sa Ang Lalantawan, ang mga espesyal payunir nga nagaalagad sa Ovamboland gintangdo sa pagbadbad sang sumaryo sang Ingles nga artikulo nga tulun-an sa Ndonga kag Kwanyama.

Ang “opisina” sang translation amo ang isa ka dibisyon sa pamusod sang garahe diin ang mga kopya sang ginbadbad nga materyal sang Lalantawan ginapaagi sa daan nga makina sa pagkopya. Indi mahapos ang magkonsentrar sa sining nagakinahanglan sing madamo nga tion kag kusog nga hilikuton, kay ang mga kahimtangan karaan kag ang temperatura sa tig-ilinit nagapromedyo sa ulot sang 38 kag 44 degrees Celsius. Apang, diri sini nga ang bag-ong mga brosyur kag ang libro nga Mahimu Ka Mabuhi sing Dayon sa Paraiso sa Duta ginbadbad.

Samtang ang mga kongregasyon gintukod sa Ovamboland kag sa iban nga mga bahin sa Namibia, ang reaksion amo nga ang mas daku kag mas maayo nga lugar kinahanglanon. Dugang pa, ang mas sentro nga lokasyon mas maayo agod mahatagan sing igtalupangod ang mga kinahanglanon sang iban nga mga bahin sang pungsod. Samtang, ang pag-ihig-ihig batok sa pagbantala sang Ginharian nga hilikuton nag-ugdaw. Gani natigayon ang permiso sa pagsugod patindog sa isa ka daku nga lote nga gindonar sang isa sang mga Saksi ni Jehova sa Wind­hoek. Sang ulihi, kapin sa 40 ka boluntaryo nga mga manugpangabudlay ang nagdayon sa lugar nga ginpatindugan, kag sang Disiembre 1990 ang mga opisina sang transla­tion natapos.

Karon, sa masulhay nga mga opisina kag mga hulot sa sining moderno nga tinukod, ang hilikuton sa pagdala sing paghangop sa madamo nagadasig. Ang bag-ong literatura padayon nga ginabadbad sa Herero kag Kwangali. Tuhoy sa Ndonga kag Kwanyama, ang duha-sing-hambal nga binulan nga edisyon nga Ang Lalantawan nagaguwa karon sa de-kolor. Nagaunod ini sang tanan nga mga artikulo nga tulun-an kag subong man sang iban nga materyal. Sa pagkamatuod, tuhay gid ini gikan sa diutay nga ginsuguran sa mamala nga pangpang sang suba madamong tinuig na ang nagligad.

Ang “wala ako makahibalo” malaka na lang mabatian. Sa baylo, kapin sa 600 ka Saksi ni Jehova sa Namibia ang nagapasalamat sing daku sa ila langitnon nga Amay, kag makasiling sila karon: “Ang pagbukas sang imo mga pulong nagahatag sing kapawa, nagahatag ini sing paghangop sa bunayag.”—Salmo 119:130.

[Mga Laragway sa pahina 25]

Pagbantala sing maayong balita sa tunga sang Herero nga katawhan

Pagbadbad sing Cristianong mga publikasyon sa pagbulig sa katawhan sang Namibia

Mga opisina sang translation sa Namibia