Kon Ngaa ang Kahimtangan sang Reklamador Indi Makalilipay

ANG kalipay nangin kasubo sa sulod lamang sang pila ka semana. Ang una nga paghinugyaw sang mga Israelinhon tungod sang ila bag-ong kahilwayan gikan sa pagkaulipon sa Egipto nahimo nga diutay nga pagyamo tungod sa pagkaon. Sa ikaduha nga bulan pagkatapos sila magbiya sa Egipto, ang dikontento nga pungsod nagsiling nga luyag pa nila ang kahimtangan sang ulipon sangsa mabudlay nga pangabuhi sa kamingawan. Sa mga binulan nga nagsunod, ining reklamador nga espiritu nagpaluya sang ila determinasyon nga tumanon si Jehova kag naghalit sang mga paglaum sadto nga kaliwatan nga makasulod sa Ginsaad nga Duta.​—⁠Exodo 16:​1-3; Numeros 14:​26-30.

Sa pagkamatuod, ang pagreklamo indi lamang limitado sa isa ka kaliwatan ukon sa isa ka tawo. Sin-o bala ang wala kon kaisa nagareklamo nahanungod sa trabaho, pagkaon, paniempo, kabataan, kaingod, ukon bili sang balaklon? Ang tawhanon nga pagkadihimpit nagapahuyog sa isa sa pagreklamo.​—⁠Roma 5:12; Santiago 3:⁠2.

Ngaa tuman kadali sa aton magreklamo? Ayhan nagabatyag kita sing pagluya sang buot, kabang-awan, ukon kataka. Ang pagreklamo mahimo nga isa ka pagpautwas sang aton kapaslawan, ukon mahimo nga isa ini ka indi direkta nga paagi sa pagsiling: “Mas maayo ako sangsa iban!” Kon kaisa ang mga reklamo ginagatungan sang mga pagbanggianay sa personalidad. Subong man, may matuod nga mga reklamo.

Bisan ano man ang sadsaran nga kabangdanan, subong sang ginapakita sang nasambit na nga halimbawa sang mga Israelinhon, ang pagreklamo mahimo nga makahalalit kon ini nagapadayon. Ang isa ka tawo mahimo mangin dalayon nga reklamador, nagakumod bisan nahanungod sa mga paagi ni Jehova sa paghimo sing mga butang. Ngaa makatalagam gid ina? Kag paano dapat atubangon sing nagakaigo ang makatarunganon nga mga reklamo?

Makatarunganon nga mga Reklamo

Kon ang reklamo indi gid man serioso, ang una nga pamangkot nga dapat naton ipamangkot amo, Sarang ko bala ini kalimtan sa gugma? Matuod, mahimo nga may makatarunganon kita nga rason nga magreklamo batok sa isa, ayhan bisan sa masigkatumuluo. Ayhan gintratar niya kita sing dimalulo ukon dimakatarunganon. Apang, ang pagreklamo sa iban nahanungod sa dimaayo nga pagtratar magapauswag bala sang mga butang? Ano bala ang ginarekomendar sang Biblia nga reaksion naton? Ang Colosas 3:13 nagasiling: “Padayon sa pagpinaumuray kag sa pagpinatawaray kon ang isa may inugsumbong batok sa isa. Subong nga si Jehova nagpatawad sa inyo, amo man ang himuon ninyo.” Gani bisan pa kon ang isa ka reklamo may rason, ginarekomendar sang Kasulatan ang mapinatawaron nga panimuot sa baylo sang reklamador nga espiritu.​—⁠Mateo 18:​21, 22.

Ano kon isa ini ka butang nga tuman kabug-at kalimtan? Mahimo nga may maayong rason agod magreklamo. Sang ang “pagsinggit” nakalab-ot kay Jehova nahanungod sa Sodoma kag Gomorra, naghulag sia agod lubaron ang makahuluya nga kahimtangan sadtong malain nga mga siudad. (Genesis 18:​20, 21) Ang isa pa ka makatarunganon nga rason nag-utwas dili madugay pagkatapos sang Pentecostes 33 C.E. Sang ang pagkaon ginpanagtag sa imol nga mga balo, ginpaburan ang nagapamulong sing Hebreo nga mga kababayin-an. Sing halangpunon, naghinakit ang nagapamulong sing Griego nga mga balo. Sang ulihi, ang reklamo nakalab-ot sa mga apostoles, kag gilayon nga nag-organisar sila sing isa ka grupo sang sangkol nga mga lalaki sa pagtadlong sang problema.​—⁠Binuhatan 6:​1-6.

Ang gintangdo nga Cristianong mga gulang karon indi man dapat magpalantang sa paghimo sing kinahanglanon nga mga tikang kon ginapatalupangod sa ila ang serioso nga mga butang. Ang Hulubaton 21:13 nagasiling: “Ang bisan sin-o nga nagapabungol sa pagsinggit sang imol, sia man magasinggit apang indi sia pagpamatian.” Sa baylo nga dipagsapakon ang makatarunganon nga reklamo, ang mga gulang dapat mamati sing mahinuklugon. Sa pihak nga bahin, makakooperar kita tanan paagi sa pagsugid sa mga gulang sang serioso nga mga reklamo, sa baylo nga ipamaba ini sa tanan nga magapama⁠ti.

Walay sapayan, ginabaton sing prangka sang kalabanan sa aton nga may mga tion nga ang tawhanon nga pagkadihimpit nagahimo sa aton nga magreklamo sing dikinahanglanon. Ang maid-id nga pag-usisa sa pagginawi sang mga Israelinhon sa kamingawan magabulig sa aton sa paghangop sang katalagman sang pagtugot sa talagsa nga pagyamo nga magdaku nga mangin isa ka reklamador nga espiritu.

Ang Pagtamod sang Dios sa mga Reklamador

Ang pagkumod sang mga Israelinhon nahanungod sa suplay nga pagkaon nagapakita sang duha ka duna nga katalagman sang pagreklamo. Una, ang pagreklamo makalalaton. Ang kasaysayan nagasiling nga “ang bug-os nga katilingban sang katawhan sang Israel nagkumod batok kay Moises kag kay Aaron sa kamingawan.” (Exodo 16:⁠2) Mahimo nga ang pila nagsugod sa pagreklamo nahanungod sa kakulang sing pagkaon, kag wala madugay ang tanan na nagreklamo.

Ikaduha, masunson nga ginapadaku sang reklamador ang problema. Sa sining kaso, ang mga Israelinhon nagsiling nga maayo pa ang ila kahimtangan sa Egipto, diin makakaon sila sing madamo nga tinapay kag karne suno sa luyag nila. Nagreklamo sila nga gindala sila sa kamingawan agod lamang mapatay sa gutom.​—⁠Exodo 16:⁠3.

Amo gid bala sina ka makatalagam ang kahimtangan sang mga Israelinhon? Ayhan ang ila suplay nga pagkaon nagadiutay, apang nakita na nga daan ni Jehova ina nga problema, kag sa natalana nga tion nag-aman sia sing manna sa pagpaayaw sang ila pisikal nga mga kinahanglanon. Ang ila sobra nga mga reklamo nagpakita sing bug-os nga kakulang sing pagsalig sa Dios. Samtang sa Egipto makatarunganon sila nga nagreklamo nahanungod sa mapintas nga mga kahimtangan. (Exodo 2:23) Apang sang ginhilway sila ni Jehova gikan sa kahiulipnan, nagsugod sila sa pagreklamo nahanungod sa pagkaon. Indi ina makatarunganon nga pagkumod. “Ang inyo mga pagkumod indi batok sa amon, kundi batok kay Jehova,” paandam ni Moises.​—⁠Exodo 16:⁠8.

Ining reklamador nga espiritu sang mga Israelinhon nadayag sa liwat kag liwat. Sa sulod sang isa ka tuig ang manna nangin kabangdanan sang reklamo. (Numeros 11:​4-6) Wala madugay pagkatapos sadto ang malain nga report gikan sa 10 sang 12 ka Israelinhon nga lampitaw nagpautwas sing reklamo nahanungod sa ginakunokuno nga mga katalagman may kaangtanan sa pagbihag sa Ginsaad nga Duta. Ang mga tawo nagsobra pa paagi sa pagsiling: “Kabay kuntani nga nagkalamatay kami sa duta sang Egipto, ukon nagkalamatay kami kuntani sa sining kamingawan!” (Numeros 14:⁠2) Daw ano ka daku nga kakulang sing apresasyon! Indi makakilibot, si Jehova nagsiling kay Moises: “Tubtob pa bala san-o magatamay sa akon ini nga katawhan, kag tubtob pa bala san-o nga indi sila magtuo sa akon?” (Numeros 14:11) Yadtong dimapasalamaton nga mga reklamador gintagudilian nga maglibotlibot sa kamingawan sa 40 ka tuig tubtob magtaliwan yadto nga kaliwatan.

Si apostol Pablo nagapahanumdom sa aton sini nga halimbawa. Ginapaandaman niya ang mga masigka-Cristiano nga indi gid mangin kaangay sadtong mga Israelinhon nga nangin palakumod, nga napatay lamang sa kamingawan. (1 Corinto 10:​10, 11) Sing maathag, ang dimakatarunganon nga pagkumod kag ang espiritu sang pagreklamo mahimo makapaluya sang aton pagtuo kag makadul-ong sa dikahamuot ni Jehova.

Apang, si Jehova mapailubon sa iya mga alagad nga ayhan nagareklamo kon kaisa bangod sang makapaluya nga mga sirkunstansia. Sang nalagyo si Elias padulong sa Bukid sang Horeb bangod sang paghingabot sang malaut nga si Reyna Jesebel, kombinsido sia nga ang iya hilikuton subong manalagna natapos na. Nagdumdom sia nga sia na lamang ang sumilimba ni Jehova nga nabilin sa duta. Sa pagpabakod sang pagtuo ni Elias, ginhatagan sia primero sang Dios sing isa ka pagpasundayag sang Iya balaan nga gahom. Nian ginsugiran ang manalagna nga may 7,000 pa ka matutom nga alagad ni Jehova sa Israel kag nga madamo pa sila sing hilimuon. Gani, nalipatan ni Elias ang iya mga reklamo kag nagpadayon nga may bag-o nga kusog. (1 Hari 19:​4, 10-12, 15-18) Samtang ang Cristianong mga gulang nagapakita sing paghantop, makapamulong man sila sing malugpayon sa mga matutom, nagapahangop sa ila sang ila katungdanan sa katumanan sang katuyuan sang Dios.​—⁠1 Tesalonica 5:⁠14.

Pagdaug sa Espiritu sang Pagreklamo

Paano madaug ang espiritu sang pagreklamo? Ti, yadtong ginahatagan sing pamatuod nahanungod sa halit nga ginahatag sang tabako sa lawas may makusog nga rason sa pag-untat sa pagpanigarilyo. Sa kaanggid, ang paghangop kon ngaa ang espiritu sang pagreklamo makahalalit katama magapahulag sa aton nga untatan ang bisan anong batasan sa pagreklamo.

Anong mga benepisyo ang matigayon sadtong nagalandas sang reklamador nga espiritu? Ang isa ka importante nga benepisyo nga matigayon sadtong nagalikaw sa pagreklamo amo nga matamod nila ang mga butang sing Makasulatanhon kag sing mas makatarunganon. Ang reklamador kis-a lang nagadulog sa pagpamensar sang problema gikan sa pagtamod ni Jehova. Ang nagreklamo nga mga Israelinhon nalipat nga ginhilway sila ni Jehova nga Dios gikan sa kahiulipnan kag nga gintunga sing milagruso ang mga tubig sang Dagat nga Mapula tungod sa ila. Ang ila negatibo nga panghunahuna nagbulag sa ila sa gahom sang Dios kag nagdula sang ila kalipay. Subong resulta, ang ila pagsalig kay Jehova nadula.

Dugang pa, ang isa ka tawo nga sarang makahimo sing makatarunganon nga pagbinagbinag sang iya mga problema makahantop kon ang iya kaugalingon nga mga kasaypanan amo ang ginatunaan sang iya mga kabudlayan. Mahimo gid nga indi na niya himuon liwat ina nga sayop. Ginpaandaman ni Jeremias ang iya mga masigka-Israelinhon nga indi magreklamo nahanungod sa mga kabudlayan nga naagihan nila pagkatapos malaglag ang Jerusalem. Ang ila pag-antos isa ka direkta nga resulta sang ila kaugalingon nga mga kasal-anan, kag amo sina ang kinahanglan nila nga mahangpan agod maghinulsol kag magbalik kay Jehova. (Panalabiton 3:​38, 40) Sa kaanggid, ginmulay ni disipulo Judas ang “didiosnon nga mga tawo” nga nagsikway sang panuytoy ni Jehova kag “mga reklamador sa ila nadangatan sa kabuhi.”​—⁠Judas 3, 4, 16.

Subong sang ginsiling anay sang maalam nga si Hari Solomon, “ang tagipusuon nga malipayon maayo nga bulong, apang ang espiritu nga buong nagapamala sang mga tul-an.” (Hulubaton 17:22) Ang reklamador nga espiritu nagapakag-as sa aton kag nagakuha sang aton kalipay. Nagapakita ini sing pagkanegatibo, indi sing pagkamalaumon. Apang yadtong nagatuon sa paghunahuna kag sa pagpamulong sing ‘takus dayawon’ may masinadyahon nga tagipusuon, nga mahimo magapabatyag sa ila sing maayo pa.​—⁠Filipos 4:⁠8.

Sa walay duhaduha, ang aton kabuhi mangin mas makalilipay kon talupangdon naton ang maayo nga mga kinaiya sang iban sa baylo sang ila mga kaluyahon. Malipay kita kon ginabaton naton ang mabudlay nga mga sirkunstansia kag ginahuptan ang kasadya sa baylo nga magkumod nahanungod sa aton mga kapaslawan. Bisan ang mga pagtilaw mahimo mangin kabangdanan sang kalipay kon ginatamod naton ini nga isa ka kahigayunan sa pagpabakod sang aton pagtuo kag sa pagpalig-on sang aton pagbatas.​—⁠Santiago 1:​2, 3.

Importante man dumdumon nga kon kita magakumod, ginahalitan lamang naton ang aton kaugalingon. Paagi sa pirme nga pagreklamo, ginapaluya naton ang pagtuo sang iban. Ang malain nga report sang napulo ka Israelinhon nga lampitaw naghimo sa bug-os nga pungsod nga tamdon ang pagbihag sa Ginsaad nga Duta nga isa ka walay paglaum nga panikasog. (Numeros 13:25–14:⁠4) Sang isa pa ka okasyon, nagkasubo gid si Moises bangod sang dalayon nga pagkumod sang mga tawo amo kon ngaa ginpangayo niya kay Jehova nga kuhaon ang iya kabuhi. (Numeros 11:​4, 13-15) Sa pihak nga bahin, kon ihambal naton ang mga butang sa makapalig-on nga paagi, mahimo naton mapabakod ang pagtuo sang iban kag magaamot sa ila kalipay.​—⁠Binuhatan 14:​21, 22.

Bisan pa mahimo kita masulay nga magreklamo nahanungod sa aton mga kaupod sa trabaho, sa aton mga abyan, sa aton pamilya, ukon bisan sa mga gulang sa kongregasyon, luyag ni Jehova nga ang iya katawhan ‘magmainit sa paghigugmaanay.’ Ina nga gugma nagapahulag sa aton nga takpan ang mga kasaypanan sang iban sa baylo nga padakuon ang ila mga sayop. (1 Pedro 4:⁠8) Sing mapasalamaton, ginadumdom ni Jehova nga kita yab-ok lamang kag wala nagabantay sang aton mga sayop. (Salmo 103:​13, 14; 130:⁠3) Kon ginatinguhaan naton tanan nga ilugon ang iya halimbawa, walay duhaduha nga indi kita magreklamo.

Kon ang katawhan ipasag-uli sa kahimpitan, wala sing isa ang may kabangdanan nga magreklamo nahanungod sa iya kabuhi. Sa wala pa ina nga tion magaabot, kinahanglan naton batuan ang pagsulay nga magreklamo tuhoy sa iban ukon tuhoy sa aton kaugalingon mabudlay nga mga kahimtangan. Agod ipakita nga nagasalig kita kay Jehova kag tunay nga nagahigugma sa aton mga masigkatumuluo, “padayon [naton] nga himuon ang tanan nga butang sa walay pagkumod.” (Filipos 2:14) Magapahamuot ini kay Jehova kag magabenepisyo sa aton sing daku. Para sa aton kaugalingon nga kaayuhan kag sang iban, nian, indi naton pagkalimtan nga ang kahimtangan sang reklamador indi makalilipay.

[Piktyur sa pahina 20]

Bisan ang milagruso nga aman sang Dios nga manna nangin kabangdanan sang reklamo