Magmaligdong sing Panghunahuna​—⁠Malapit na Ang Katapusan

“Ang katapusan sang tanan nga butang malapit na. Busa, magmaligdong kamo sing panghunahuna, kag magmabinantayon agod makapangamuyo kamo.”​—⁠1 PEDRO 4:⁠7.

 1. (a) Ano nga kapaslawan ang naeksperiensiahan sang isa ka relihioso nga lider kag sang iya mga sumulunod? (b) Bangod wala matuman ang pila ka pagpaabot, anong mga pamangkot ang mahimo ipamangkot?

“NAKABATON ako sing panawag gikan sa Dios sa katapusan nga pangamuyo karon nga gab-i. Nagsiling sia nga 116,000 ka tawo ang magakayab sa langit kag ang lulubngan sang 3.7 milyones ka napatay nga mga tumuluo magabukas ayon sa langit.” Amo ang ginsiling sang lider sang Mis­sion for the Com­ing ­Days sang gab-i sang Oktubre 28, 1992, ang ila gintagna nga adlaw sang paghusay. Apang, sang mag-abot ang Oktubre 29, wala sing tawo nga nagkayab sa langit, kag wala sing lulubngan sang mga patay ang nabuksan. Sa baylo nga sagmiton pa langit, yadtong mga tumuluo sa adlaw sang paghukom sa Korea nakakita lamang sing isa pa ka ordinaryo nga adlaw. Ang mga petsa sang adlaw sang paghukom nag-abot kag nagtaliwan, apang ang mga nagapanagna sang adlaw sang paghukom malaumon gihapon. Ano ang dapat himuon sang mga Cristiano? Dapat bala sila mag-untat sa pagpati nga ang katapusan madasig nga nagahilapit?

 2. Sin-o ang nagpamulong sa mga apostoles tuhoy sa palaabuton nga adlaw sang paghukom, kag sa idalom sang anong mga kahimtangan nahibal-an nila ini?

² Sa pagsabat, balikan naton ang okasyon sang si Jesus nagapakighambal sa iya mga disipulo. Didto, sa distrito sang Cesaria ni Filipo, sa aminhan-sidlangan sang Dagat sang Galilea, sa palibot sang daku nga Bukid sang Hermon, nabatian nila sia nga nagasiling sing prangka nga pagapatyon sia. (Mateo 16:21) Nagsunod ang makapaserioso nga mga pulong. Sa tapos mapaathag sa ila nga ang pagkadisipulo nagakahulugan sing kabuhi sang padayon nga pagsakripisyo sang kaugalingon, si Jesus nagpaandam: “Ang Anak sang tawo magakari sa himaya sang iya Amay kaupod sa iya mga anghel, kag dayon magabalos sia sa tagsa ka tawo suno sa iya binuhatan.” (Mateo 16:27) Nagpamulong si Jesus tuhoy sa isa ka palaabuton nga pagkari. Apang, sa sining okasyon, mangin Hukom sia. Sa sina nga tion ang tanan nga butang nasandig sa kon bala masapwan niya ang isa ka tawo nga nagasunod sa iya sing matutom ukon indi. Ang paghukom ni Jesus ibase sa binuhatan, walay sapayan kon pila ka materyal nga mga butang ang mahimo nga natipon sang isa ka tawo ukon wala. Dapat gid ini tandaan sang iya mga disipulo. (Mateo 16:​25, 26) Busa, si Jesucristo mismo ang nagasiling sa iya mga sumulunod nga paabuton ang iya mahimayaon nga pagkari, sa paghukom.

 3. Paano ginlaragway ni Jesus ang pagkapat-od sang iya palaabuton nga pagkari?

³ Ang masunod nga ginsiling ni Jesus nagailustrar sang pagkapat-od sang iya palaabuton nga pagkari. May awtoridad nga nagsiling sia: “Sa pagkamatuod, nagasiling ako sa inyo, may iban sang mga nagatindog diri nga indi makatilaw sang kamatayon tubtob nga makita nila ang Anak sang tawo nga nagakari sa iya ginharian.” (Mateo 16:28) Ining mga pulong natuman anom ka adlaw sang ulihi. Nakibot ang suod nga mga disipulo ni Jesus sa masanag nga palanan-awon sang iya pagbaylo-dagway. Nakita gid nila ang nawong ni Jesus nga nagasilak subong sang adlaw kag ang iya panapton nagaidlak sa kaputi. Ang pagbaylo-dagway isa ka pauna nga pagtan-aw sang himaya ni Cristo kag sang Ginharian. Daw ano ka makapabakod nga pagpalig-on sa mga tagna tuhoy sa Ginharian! Daw ano kabaskog nga pangpapagsik para sa mga disipulo nga magmaligdong sing panghunahuna!​—⁠2 Pedro 1:​16-19.

Kon Ngaa Hilingagawon nga Magmaligdong sing Panghunahuna

 4. Ngaa dapat mangin alisto sa espirituwal ang mga Cristiano sa iya pagkari?

⁴ Kubos sa isa ka tuig sang ulihi, makita naton si Jesus nga nagalingkod sa Bukid sang mga Olivo, sa liwat nagapakighambal sa iya mga disipulo. Samtang ginatan-aw nila ang siudad sang Jerusalem, ginpaathag niya kon ano ang mangin tanda sang iya palaabuton nga presensia kag dayon nagpaandam: “Busa, bantay kamo, kay wala kamo makahibalo kon sa ano nga adlaw magakari ang inyo Ginuo.” Ang iya mga sumulunod dapat pirme magbantay bangod ang tion sang iya pagkari wala mahibal-i. Dapat sila mangin handa para sa sini.​—⁠Mateo 24:⁠42.

 5. Paano malaragway ang kinahanglanon nga mangin mabinantayon?

⁵ Tuhoy sa paagi sang iya pagkari, ang Ginuo subong sang makawat. Sia padayon nga nagsiling: “Apang hibalua ninyo, nga kon ang agalon sang panimalay nakasayod sa ano nga hugna sang pulaw magaabot ang makawat, magapulaw sia kuntani kag indi sia magtugot nga guhaban ang iya balay.” (Mateo 24:43) Ang makawat wala nagapahibalo sa tagbalay kon san-o sia maabot; ang iya daku nga hinganiban amo ang pagkibot. Busa, dapat pirme magbantay ang tagbalay. Apang, para sa matutom nga Cristiano, padayon sia nga nagapulaw indi bangod sang kahadlok. Sa baylo, ginapahulag sia sang malangkagon nga pagpaabot sa pagkari ni Cristo sa himaya agod paluntaron ang Isa ka Libo ka Tuig nga paghidait.

 6. Ngaa dapat kita magmaligdong sing panghunahuna?

⁶ Walay sapayan sang tanan nga pagbantay, indi dapat pagpakton sang bisan sin-o ang sibu nga adlaw sang iya pagkari. Si Jesus nagsiling: “Bangod sini maghanda man kamo, kay sa takna nga wala ninyo ginapaabot ang Anak sang tawo magakari.” (Mateo 24:44) Busa kinahanglan ang maligdong nga panghunahuna. Kon hunahunahon sang isa ka Cristiano nga sa isa ka adlaw, si Cristo indi magaabot, mahimo nga sa sina gid nga adlaw magaabot sia! Sa pagkamatuod, ang maayo sing katuyuan kag matutom nga mga Cristiano sang una sinsero nga nagtinguha sa pagpakot kon san-o maabot ang katapusan. Apang, sa liwat kag liwat napamatud-an nga matuod ang paandam ni Jesus: “Nahanungod sadtong adlaw kag takna wala sing nakahibalo, bisan pa ang mga anghel sang langit, ukon ang Anak, kundi ang Amay lamang.”​—⁠Mateo 24:⁠36.

 7. Agod mangin mga sumulunod ni Cristo, paano kita dapat magkabuhi?

⁷ Ano, busa, ang dapat naton ihinakop? Nga agod mangin mga sumulunod ni Cristo, dapat kita magkabuhi nga nagapati pirme nga ang katapusan sining malaut nga sistema malapit na.

 8. Ano ang tanda sang mga Cristiano sugod sang una nga mga adlaw sang Cristianismo?

⁸ Ina nga panimuot isa ka tanda sang mga Cristiano, nga ginakilala sang sekular nga mga istoryador kag mga eskolar sang Biblia. Halimbawa, ang mga editor sang The Translator’s New Testament, sa ubos sang tinaga nga “Day” sa ila glosario, nagasiling: “Ang mga Cristiano sang panahon sang B[ag-ong] T[estamento] nagkabuhi nga nagapaabot sang Adlaw (kon sayuron) nga ang karon nga kalibutan upod ang tanan nga kalainan kag kalautan sini laglagon kag si Jesus magabalik sa duta agod hukman ang tanan nga katawhan, sugdan ang isa ka bag-ong dag-on sang paghidait kag ang iya Pagkaginuo sa bug-os nga kalibutan.” Ang Encyclopædia Britannica nagasiling: “Ang tumalagsahon nga pagsangkad sa bug-os nga globo sang Cristianismo talangkod nga may kaangtanan sa pagpaabot sang mga Cristiano sang katapusan nga tion, sa porma sang isa ka nagahilapit nga pagpaabot sang pagbalik ni Cristo. Ang pagpaabot sang mga Cristiano sa katapusan nga tion indi gid isa ka pagkalangkag lamang sa nagapakari nga Ginharian sang Dios nga wala sila sing ginahimo.”

Kon Ano ang Kahulugan sang Magmaligdong sing Panghunahuna

 9. Bisan indi husto ang iban sang mga pagpaabot ni Pedro nahanungod sa Mesias, ngaa masaligon gihapon sia?

⁹ Si apostol Pedro, mga 30 ka tuig sang ulihi sa tapos sadtong suod nga mga pagpakighambal ni Jesus sa iya pinakasuod nga mga disipulo, wala matak-i sa paghulat sang pag-abot sang katapusan. Bisan pa ang una nga pagpaabot niya kag sang iya mga masigkadisipulo nahanungod sa Mesias indi husto, nagsalig gihapon sia nga ang gugma kag gahom ni Jehova amo ang garantiya nga matuman ang ila paglaum. (Lucas 19:11; 24:21; Binuhatan 1:6; 2 Pedro 3:​9, 10) Nagpabutyag sia sing isa ka punto nga mabatian pirme sa Griegong Kasulatan sang magsiling sia: “Ang katapusan sang tanan nga butang malapit na.” Nian ginlaygayan niya ang mga masigka-Cristiano: “Busa, magmaligdong sing panghunahuna, kag magmabinantayon agod nga makapangamuyo kamo.”​—⁠1 Pedro 4:⁠7.

 10. (a) Ano ang kahulugan sang maligdong nga panghunahuna? (b) Ano ang nadalahig sa pagtan-aw sa mga butang sa ila nagakaigo nga kaangtanan sa kabubut-on sang Dios?

¹⁰ Ang “maligdong sing panghunahuna” wala nagakahulugan nga maalam ka gikan sa kalibutanon nga pagtamod. Si Jehova nagsiling: “Laglagon ko ang kaalam sang mga maalam, kag pakawalaon ko ang paghangop sang mga mahangpunon.” (1 Corinto 1:19) Ang tinaga nga gingamit ni Pedro mahimo magkahulugan sing “mangin serioso sing panghunahuna.” Ining espirituwal nga pagkaserioso naangot sa aton pagsimba. Busa, bangod sang malig-on nga panghunahuna, makita naton ang mga butang sa ila nagakaigo nga kaangtanan sa kabubut-on ni Jehova; nahangpan naton kon diin nga mga butang ang importante kag kon diin ang indi. (Mateo 6:​33, 34) Bisan pa malapit na ang katapusan, wala kita nagakadala sa magaris nga estilo sang pagkabuhi; ukon wala nagasapak sa panahon nga aton ginakabuhian. (Ipaanggid ang Mateo 24:​37-39.) Sa baylo, ginagamhan kita sang mahaganhaganon kag balanse nga panghunahuna, disposisyon, kag paggawi, nga ginapabutyag una sa Dios (“magmabinantayon agod makapangamuyo” kag dayon sa aton isigkatawo (“magpakita sing mainit nga gugma sa isa kag isa”).​—⁠1 Pedro 4:​7, 8.

 11. (a) Ano ang kahulugan sang ‘nabag-o sa puwersa nga nagapahikot sa [aton] hunahuna’? (b) Paano ang bag-o nga puwersa sang panghunahuna nagabulig sa aton sa paghimo sing maayong mga desisyon?

¹¹ Ang maligdong nga panghunahuna nagadalahig sing ‘pagbag-o sa puwersa nga nagapahikot sa [aton] hunahuna.’ (Efeso 4:23) Ngaa dapat bag-uhon? Bangod may napanubli kita nga dikahimpitan kag nagapuyo sa makasasala nga mga palibot, ang aton hunahuna ginagamhan sang huyog nga batok sa espirituwalidad. Ina nga puwersa pirme nagatulod sa mga panghunahuna kag mga huyog sa materyalistiko kag makagod nga direksion. Busa, kon ang isa mangin Cristiano, nagakinahanglan sia sing bag-o nga puwersa, ukon mabaskog nga panghunahuna, nga magatulod sa iya mga panghunahuna sa husto nga direksion, ang espirituwal nga direksion, padulong sa pagkahanda para sa pagsakripisyo sang kaugalingon. Sa amo, kon papilion sia, halimbawa, sa edukasyon, karera, trabaho, kalingawan, pagliwaliwa, estilo sang panapton, ukon bisan ano man, ang iya una nga huyog amo ang pagbinagbinag sa isa ka butang gikan sa espirituwal sa baylo sang undanon kag makagod nga pagtamod. Bangod sining bag-o nga panghunahuna, mas mahapos desisyunan ang mga butang sing maligdong kag ginatandaan sa hunahuna nga ang katapusan malapit na.

 12. Paano kita makapabilin nga “mapagros sa pagtuo”?

¹² Ang maligdong nga panghunahuna nagapahangop nga mapagros kita sa espirituwal. Paano kita makapabilin nga “mapagros sa pagtuo”? (Tito 2:⁠2) Dapat naton pakan-on ang aton hunahuna sing husto nga sahi sang kalan-on. (Jeremias 3:15) Ang dalayon nga pagkaon sing ­Pulong sang kamatuoran sang Dios nga ginasakdag sang pagpanghikot sang iya balaan nga espiritu magabulig sa aton sa pagpabilin nga balanse sa espirituwal. Busa, importante ang regular nga pagtuon sing personal, subong man ang pag-alagad sa latagon, pangamuyo, kag pagpakig-upod sa mga masigka-Cristiano.

Kon Paano ang Maligdong nga Panghunahuna Nagaamlig sa Aton

 13. Paano ang maligdong nga panghunahuna nagaamlig sa aton gikan sa paghimo sing binuang nga mga sayop?

¹³ Ang maligdong nga panghunahuna makaamlig sa aton gikan sa paghimo sing binuang nga sayop nga makadula sang kabuhi nga walay katapusan para sa aton. Paano ini posible? Si apostol Pablo naghambal tuhoy sa “kasuguan sang hunahuna.” Para sa isa ka tawo nga may mapagros nga pagtuo, ina nga kasuguan sang hunahuna ginagamhan sang butang nga iya ginakalipayan, nga amo “ang kasuguan sang Dios.” Matuod, ang “kasuguan sang sala” nagapakig-away batok sa kasuguan sang hunahuna. Apang, ang Cristiano mahimo magdaug sa bulig ni Jehova.​—⁠Roma 7:​21-25.

 14, 15. (a) Ano ang duha ka impluwensia nga nagaagaway sa pagkontrol sa hunahuna? (b) Paano naton mapadaug ang hunahuna?

¹⁴ Nagpadayon si Pablo paagi sa pagpatuhay sang hunahuna nga ginagamhan sang makasasala nga unod, nga ang ginatumod amo ang patuyang nga pagkabuhi, kag sang hunahuna nga ginagamhan sang espiritu sang Dios, nga ang ginatumod amo ang nagasakripisyo sang kaugalingon nga pagkabuhi sa pag-alagad kay Jehova. Si Pablo nagsulat sa Roma 8:​5-7: “Ang mga nagakabuhi suno sa unod nagahimulat sang mga butang sang unod, apang ang mga nagakabuhi suno sa espiritu nagahimulat sang mga butang sang espiritu. Apang ang paghunahuna suno sa unod nagakahulugan sing kamatayon, apang ang paghunahuna suno sa espiritu nagakahulugan sing kabuhi kag paghidait; bangod ang panghunahuna suno sa unod batok sa Dios, kay wala ini nagapasakop sa kasuguan sang Dios, kag, sa katunayan, indi gid ini mahimo magpasakop.”

¹⁵ Nian sa bersikulo 11, ginpaathag ni Pablo kon paano ang hunahuna nga nagakooperar sa balaan nga espiritu nagadaug sa inaway: “Kon ang espiritu sang nagbanhaw kay Jesus nagapuyo sa inyo, ang nagbanhaw kay Cristo Jesus magahatag sing kabuhi man sa inyo mga lawas nga mamalatyon paagi sa iya espiritu nga nagapuyo sa inyo.”

 16. Ang maligdong nga panghunahuna nagaamlig sa aton gikan sa anong mga pangganyat?

¹⁶ Busa, bangod sang maligdong nga panghunahuna, indi kita masulay sang lapnag nga mga pangganyat sining kalibutan, nga makilala sa daku nga pagpatuyang sang kaugalingon sa tanan nga sahi sang kalalipayan, materyal nga mga butang, kag seksuwal nga kalautan. Ang aton maligdong nga panghunahuna magasugo sa aton nga ‘malagyo sa pagkamakihilawason’ kag likawan ang malaglagon nga mga resulta sini. (1 Corinto 6:18) Ang aton maligdong nga panghunahuna magatiklod sa aton nga unahon ang mga interes sang Ginharian kag magaamlig sang aton panghunahuna kon ginasulay kita sang ginatanyag nga sekular nga karera nga mahimo magapaluya sang aton kaangtanan kay Jehova.

 17. Paano ang isa ka payunir nga utod nga babayi nagpakita sing maligdong nga panghunahuna sang may obligasyon sia sa paghatag sing kuwarta?

¹⁷ Halimbawa, sa isa ka tropikal nga pungsod sa Bagatnan-sidlangan nga Asia, may isa ka lamharon nga utod nga babayi nga nag-una sang mga interes sang Ginharian. Nagpalambo sia sing gugma sa bug-os tion nga pag-alagad. Sa sina nga pungsod ang kalabanan nga trabaho nagakinahanglan sing anom ukon pito ka adlaw nga pagtrabaho sing bug-os tion. Sang maka­gradwar sia sa unibersidad, ginpaabot sang iya amay, nga indi isa sang mga Saksi ni Jehova, nga magsuweldo sia sing daku nga kantidad para sa pamilya. Apang bangod mabaskog ang iya handum sa pagpayunir, nangita sia sing part-time nga trabaho kag nagsugod sa pagpayunir. Naakig sa sini ang iya amay kag ginpahog sia nga ipanghaboy ang iya mga pagkabutang sa kalye. Bangod sang pagsugal, madamo sia sing utang, kag ginpaabot niya nga bayaran sang iya anak ang iya mga utang. Ang iya manghod nga lalaki nagatuon sa isa ka unibersidad, kag bangod sang mga utang, wala sing kuwarta nga inugbayad para sa iya mga matrikula. Nanaad ang iya manghod nga kon buligan niya sia, sia ang magaatipan sa pamilya kon makatrabaho na sia. Ang iya tagipusuon natunga sa ulot sang iya gugma para sa iya manghod kag sa iya gugma para sa pagpayunir. Sa tapos mabinagbinag sing mahalungon ini nga butang, namat-od sia nga padayunon ang pagpayunir kag mangita sing lain nga trabaho. Bilang sabat sa iya mga pangamuyo, nakakita sia sing maayong trabaho nga indi lamang mahatagan niya sing kuwarta ang iya pamilya kag ang iya manghod kundi mapadayon man niya ang iya una nga gugma, ang pagpayunir.

Pangayua ang Bulig ni Jehova sa Paghupot sing Maligdong nga Panghunahuna

 18. Ngaa mahimo nga ang iban nga mga tawo ginaluyahan sing buot? (b) Anong kasulatan ang mahimo nga magalipay sa mga ginaluyahan sing buot?

¹⁸ Ang iban nga mga sumulunod ni Cristo mahimo nabudlayan sa paghupot sing maligdong nga panghunahuna. Ang ila pailob mahimo nagabuhin bangod ining malaut nga sistema sang mga butang karon nagadugay sangsa ila ginapaabot. Mahimo nga magaluya ang ila buot sa sini. Apang, ang katapusan magaabot. Ginasaad ina ni Jehova. (Tito 1:⁠2) Kag amo man ang iya ginsaad nga dutan-on nga Paraiso. Ginagarantiyahan ina ni Jehova. (Bugna 21:​1-5) Kon mag-abot na ang bag-ong kalibutan, may “kahoy sang kabuhi” para sa tanan nga naghupot sang ila maligdong nga panghunahuna.​—⁠Hulubaton 13:⁠12.

 19. Paano mahuptan ang maligdong nga panghunahuna?

¹⁹ Paano naton mahuptan ang maligdong nga panghunahuna? Pangayua ang bulig ni Jehova. (Salmo 54:⁠4) Magpabilin nga suod sa iya. Nalipay gid kita nga luyag ni Jehova nga mangin suod kita sa iya! “Magpalapit sa Dios, kag sia magapalapit sa imo,” sulat ni disipulo Santiago. (Santiago 4:⁠8) Si Pablo nagsiling: “Magkalipay pirme sa Ginuo. Sa liwat magasiling ako, Magkalipay! Ipakilala ang inyo pagkamakatarunganon sa tanan nga tawo. Ang Ginuo malapit. Dili kamo magpalibog sa bisan ano, kundi sa tagsa ka butang sa pangamuyo kag pag-ampo nga may pagpasalamat ihambal sa Dios ang inyo mga pangabay; kag ang paghidait sang Dios nga nagalabaw sa tanan nga paghangop magatipig sang inyo tagipusuon kag inyo painuino paagi kay Cristo Jesus.” (Filipos 4:​4-7) Kag kon ang mga lulan sining nagatagumatayon nga sistema sang mga butang magbug-at nga daw indi na ninyo madala, itungtong ini kay Jehova, kag sia mismo magaalay-ay sa imo.​—⁠Salmo 55:⁠22.

 20. Sa anong dalanon dapat kita magpadayon, suno sa 1 Timoteo 4:⁠10?

²⁰ Huo, malapit na ang katapusan, gani magmaligdong sing panghunahuna! Maayo ini nga laygay sang nagligad nga 1,900 ka tuig; importante ini nga laygay karon. Padayon naton nga gamiton ang aton maligdong nga panghunahuna sa pagdayaw kay Jehova samtang padayon sia nga nagatuytoy sa aton padulong sa iya bag-ong kalibutan.​—⁠1 Timoteo 4:⁠10.

Paano Mo Sabton?

◻ Ano ang maligdong nga panghunahuna?

◻ Ngaa hilingagawon gid nga magmaligdong sing panghunahuna?

◻ Paano kita mabag-o sa puwersa nga nagapahikot sang aton hunahuna?

◻ Anong dalayon nga pagpakig-away ang dapat naton ipakig-away sa aton hunahuna?

◻ Paano naton mahuptan ang maligdong nga panghunahuna?

[Piktyur sa pahina 15]

Ang pagpalapit sa Dios sa pangamuyo nagabulig sa aton sa paghupot sing maligdong nga panghunahuna

[Piktyur sa pahina 17]

Bangod maligdong sing panghunahuna, indi kita masulay sang mga pangganyat sining kalibutan