Posible Bala ang Matuod nga Pangamlig?

ANG ensayista nga si Ralph Waldo Emerson nagsiling anay: “Ang maluya nga mga tawo nagapati sa swerte . . . Ang mabakod nga mga tawo nagapati nga kon may kabangdanan, may epekto.” Huo, ang isa ka tawo nga nagapati sa gahom sang mga anting-anting kag mga panagang nagapakontrol sang iya kabuhi sa dikitaon nga mga puwersa. Ginasikway niya ang lohika kag pangatarungan kag nagapadaug sa indi makatarunganon kag disparatis nga kahadlok.

Apang, ang Biblia sarang makahilway sa isa gikan sa sina nga mga kahadlok. Ginapakita sini nga ang mga anting-anting kag mga panagang wala sing kusog, wala sing gahom. Paano? Ti, suno sa The New Encyclopædia Britannica, “ang mga anting-ating ginapatihan nga nagakuha sing gahom gikan sa ila kaangtanan [lakip sa iban nga mga butang] sa kinaugali nga mga puwersa.” Ining mga puwersa mahimo nga amo ‘ang mga espiritu sang mga patay’ ukon ‘ang gahom sang swerte.’ Apang maathag nga ginapakita sang Biblia nga ang mga patay “wala gid sing pangalibutan.” (Manugwali 9:⁠5) Sa amo, wala sing mga espiritu sang mga patay nga makabulig ukon makahalit sa mga buhi; ukon may yara dikitaon nga puwersa subong sang swerte nga makabulig sa imo.

Sang panahon sang Biblia, ginpakamalaut sang Dios ang mga nagbiya sa iya, ang mga nagkalipat sang iya balaan nga bukid, “ang mga nagaaman sing latok para sa dios sang Maayong Suwerte kag ang mga nagapuno sing nasimbog nga alak sa dios sang Kapalaran.” Sa baylo nga maamligan, ang mga nagpati sa kapalaran gintangdo sa kalaglagan. “Itangdo ko kamo sa espada,” siling ni Jehova nga Dios.​—⁠Isaias 65:​11, 12.

Paagi sa paghimo sing mga salamangka, ang dumaan nga pungsod sang Babilonia nagtuo man sa pangamlig sang makatalanhaga nga mga gahom. Apang walay sapayan sini, nalaglag ang Babilonia. “Tindog ka karon sa imo mga babaylan kag sa kadam-an sang imo mga diwata,” panghangkat ni manalagna Isaias. “Basi kon makakuha ka sing bulig gikan sa ila . . . Apang indi! ginalapyo ka walay sapayan sang kadam-an sang imo mga laygay.” (Isaias 47:​12, 13, The New English Bible) Sang ulihi yadto nga pungsod nadula. Ang pagtuo sa okulto (labaw sa kinaugali nga gahom) wala makabulig. Sing kaanggid man, wala sing anting-anting, panagang, ukon pangalap ang makahimo sing bisan ano sa pagbulig ukon sa pag-amlig sa imo.

Isa ka Sahi sang Idolatriya

Sa gihapon, mahimo nga ang iban wala sing makita nga makahalalit sa pagdala sing mutya, tiil sang koneho, ukon isa ka relihioso nga medalyon. Indi bala ini daw witiwiti lamang nga mga butang nga indi makahalit? Indi suno sa Biblia. Ginasiling sini nga ang mga butang nga may kaangtanan sa okultismo makahalalit gid.

Ang paggamit sing mga anting-anting isa ka sahi sang idolatriya​—⁠butang nga maathag nga ginapakamalaut sa Pulong sang Dios. (Exodo 20:​4, 5) Matuod, mahimo wala ginabatyag sang isa ka tawo nga ginasimba niya sing direkta ang isa ka anting-anting ukon panagang. Apang wala bala nagapakita sing mayaubon kag masimbahon nga panimuot sa dikitaon nga labaw sa kinaugali nga kagamhanan kon ang isa nagahupot lamang sini? Kag indi bala matuod nga ang masimbahon nga igtalupangod (subong sang paghalok) masami nga ginapakita sa mga anting-anting? Apang ang Biblia, sa 1 Juan 5:​21, nagalaygay sa mga Cristiano: “Maglikaw kamo sa mga diosdios.” Wala bala ini nagalakip sa mga butang nga ginatamod subong mga panagang ukon mga anting-anting?

Ang Siod sang Okulto

Paagi sa paggamit sing mga anting-anting, madamo man ang nasiod sa okulto. Matuod, ang iban mahimo magdala sing mutya ukon bulong bangod sang kinabatasan, indi bangod ginapatihan nila ini. Apang subong nga ang pagpakiat sa isa ka pampam mahimo makadul-ong nga matapikan sing AIDS, ang pagpakiat sa engkanto mahimo man makadul-ong sa makahalalit nga mga resulta. May maayong rason nga gindumilian sang Dios ang mga Israelinhon sa pagsalamangka, pagkababaylan, kag pagpamakot. “Ang bisan sin-o nga nagahimo sining mga butang kangil-aran kay Jehova,” paandam sang Biblia.​—⁠Deuteronomio 18:​10-14.

Ngaa may subong sini ka estrikto nga pagdumili? Bangod ang dikitaon nga mga puwersa sa likod sina nga mga buhat indi amo ang mga espiritu sang mga patay ukon ang gahom sang kapalaran kundi amo si Satanas nga Yawa kag ang iya mga demonyo.⁠a Kag ang paggamit sing mga anting-anting direkta nga naangot sa pagsimba sa mga demonyo. Ang Vine’s Expository Dictionary of Old and New Testament Words nagasiling: “Sa diwatahan, ang paggamit sing mga droga, simple lamang ukon maisog, masami nga ginaupdan sing mga orasyon kag mga pangadi sa mga engkanto, paagi sa nanuhaytuhay nga mga panagang, mga anting-anting, kbp.”

Busa ang isa nga nagahupot sing anting-anting nagatilawtilaw sa espiritismo. May katalagman nga mapaidalom sia sa malaut nga impluwensia kag kontrol sang “dios sining sistema sang mga butang”​—⁠si Satanas nga Yawa. (2 Corinto 4:⁠4) May maayong rason, kon amo, nga ang Biblia nagasugo sa aton nga likawan ang tanan nga sahi sang espiritismo.​—⁠Galacia 5:​19-21.

Pagpanginpadlos Gikan sa Disparatis

Walay sapayan, ang The World Book Encyclopedia nagasiling: “Ang mga disparatis mahimo nga mangin isa ka bahin sang kabuhi tubtob ang mga tawo nagakahadlok sa isa kag isa kag may mga duhaduha nahanungod sa palaabuton.” Apang ang mga Saksi ni Jehova nagabulig sa madamo nga mahilway gikan sa makahalalit nga mga disparatis. Ang isa ka taga-Bagatnan nga Aprika nga babayi naghinumdom: “Ginagamo ako anay sang malaut nga mga espiritu, kag ang akon balay puno sing muti sa pag-amlig sa akon batok sa ila.” Ginbuligan sia sang mga Saksi ni Jehova nga makita ang mga katalagman sang pagpakighampang sa okulto. Ang iya reaksion? “Ginpanghaboy ko ang tanan nga butang nga ginahuptan ko nga may kaangtanan sa demonismo,” siling niya. “Nag-ayo ang akon panglawas. Gindedikar ko ang akon kabuhi kay Jehova kag nagpabawtismo.” Hilway na sia karon gikan sa disparatis kag espiritismo.

Binagbinaga man, ang taga-Nigeria nga albularyo nga nagagamit sing espiritismo sa iya pagpamulong. Sa masami paagi sa mga pamahog kag mga sumpa, ginatabog niya ang mga Saksi ni Jehova gikan sa iya balay kon magduaw sila. Isa ka bes naghanda sia sing isa ka pinasahi nga bulong, gin-orasyonan ini, kag ginhuyop ini sa nawong sang isa ka Saksi! “Indi magaligad ang pito ka adlaw kag mapatay ka!” singgit niya. Pagligad sang pito ka adlaw nagbalik ang Saksi, kag nagdalidali guwa ang albularyo, kay ­pagdumdom niya nakakita sia sing murto! Karon nga napamatud-an na nga wala sing pulos ang iya salamangka, nagsugot sia nga magtuon sa Biblia kag sang ulihi sia mismo nangin Saksi.

Ikaw man sarang mahilway gikan sa mga kadena sang kahadlok kag disparatis. Matuod, mahimo nga indi ini mahapos. Ayhan nagdaku ikaw sa isa ka kultura diin ang paggamit sing mga anting-anting kag mga panagang kinaandan. Ang mga Cristiano anay sa dumaan nga Efeso nag-atubang sina nga hangkat. Nagkabuhi sila sa isa ka kultura nga impluwensiado gid sang espiritismo. Ano ang ginhimo nila sang matun-an nila ang kamatuoran sang Pulong sang Dios? Ang Biblia nagasiling: “Kag indi diutay sang mga naghimo sing salamangka nagdala sing tingob sang ila mga tulun-an kag ginpanutdan nila ini sa itululok sang tanan. Kag gin-isip nila ang bili sini kag nasapwan nga lima ka libo ka bilog nga pilak.”​—⁠Binuhatan 19:⁠19.

Pagtigayon sing Pag-amlig sang Dios

Kon ipanghaboy mo ang tanan nga butang may kaangtanan sa okulto, mabilin ka ayhan nga wala sing pangamlig? Sa kabaliskaran, “ang Dios aton dalangpan kag kusog, isa ka bulig nga madali makita sa tion sang kasisit-an.” (Salmo 46:⁠1) Ang pag-amlig sang Dios ilabi na nga mangin dayag kon laglagon na niya ining malaut nga sistema sang mga butang. “Si Jehova makahibalo magluwas sang mga tawo nga may diosnon nga debosyon gikan sa mga pagsulay, kag magtigana sang mga dimatarong para sa adlaw sang paghukom agod pagautdon.”​—⁠2 Pedro 2:9; ipaanggid ang Salmo 37:⁠40.

Apang, samtang wala pa ina, ‘ang tion kag indi makita nga hitabo nagakahanabo sa aton tanan.’ (Manugwali 9:11) Ang Dios wala nagapanaad nga ang iya mga alagad mangin hilway sa mga kabudlayan ukon nga tamingan niya sila gikan sa tanan nga halit. Walay sapayan, nagapanaad sia nga amligan niya ang aton espirituwalidad kag ang aton kaangtanan sa iya. (Salmo 91:​1-9) Paano? Una, ginahatagan niya kita sing kasuguan kag mga prinsipio nga makahatag sa aton sing kaayuhan kag makaamlig sa aton gikan sa malaut nga impluwensia ni Satanas. (Isaias 48:17) Paagi sa aton pagtuon sang mga dalanon ni Jehova, ‘ang ikasarang sa paghunahuna magabantay sa aton, ang paghantop magaamlig sa aton’​—⁠halimbawa, gikan sa indi mapuslanon ukon makahalalit nga mga hilikuton.​—⁠Hulubaton 2:⁠11.

Ang isa pa ka paagi sang pag-amlig sang Dios sa aton amo ang paghatag sa aton sing “gahom nga labaw sa kinaandan” sa panahon sang pagtilaw. (2 Corinto 4:⁠7) Kag kon ang mga kahimtangan daw indi masarangan sang isa ka Cristiano, nagahatag Sia sing “paghidait sang Dios nga nagalabaw sa tanan nga panghunahuna” agod amligan ang tagipusuon kag panghunahuna. (Filipos 4:⁠7) Huo, ang Cristiano nasangkapan sa “pagtindog sing malig-on batok sa tanan nga pahito sang Yawa.”​—⁠Efeso 6:​11-13.

Paano mo matigayon ina nga pangamlig? Sugdi ini paagi sa pagtigayon sing ihibalo tuhoy kay Jehova kag sa iya Anak, nga si Jesucristo. (Juan 17:⁠3) Daku ang mabulig sa inyo sang mga Saksi ni Jehova sa sini. Samtang ginapauswag mo ang isa ka mainit nga kaangtanan kay Jehova, magasugod ikaw sa pag-eksperiensia sang iya maluluy-on nga pangamlig. Ang Dios nagasiling, subong mabasa naton sa Salmo 91:14: “Bangod nga ginhigugma niya ako, busa luwason ko sia. Amligan ko sia bangod ginkilala niya ang akon ngalan.”

Sa pagkamatuod, kon matutom ka sa iya, pakamaayuhon ikaw sang Dios sa ulihi sing kabuhi nga walay katapusan sa nagapakari nga bag-ong kalibutan. Nagahatag si Jehova sing garantiya para sa mga nagakabuhi sa sina nga tion: “Wala sing magapahadlok sa ila; kay ang baba ni Jehova sang kasoldadusan nagpamulong sini.” (Miqueas 4:⁠4) Wala na sing balatian kag kamatayon. (Bugna 21:⁠4) Apang, bisan sa karon, sarang ikaw makatigayon sing isa ka kadakuon sang kalig-unan​—⁠kon magpalambo ikaw sing isa ka suod nga kaangtanan kay Jehova. Kaangay sang salmista, makasiling ka: “Ang akon bulig nagagikan kay Jehova, ang Magbubuhat sang langit kag duta.”​—⁠Salmo 121:⁠2.

[Footnote]

[Piktyur sa pahina 6]

Ginpanutdan sang mga Cristiano anay sa Efeso ang tanan nga butang nga may kaangtanan sa okultismo

[Piktyur sa pahina 7]

Sa idalom sang Ginharian sang Dios, ang kahadlok madula na