Pagsapo sang Yabi sa Utudnon nga Pagpalangga

“Idugang sa inyo . . . diosnon nga debosyon ang utudnon nga pagpalangga.”​—⁠2 PEDRO 1:​5-7.

 1. Ano ang isa sang pangunang mga rason kon ngaa ang pagtilipon sang katawhan ni Jehova malipayon nga mga okasyon?

ISA ka manugbulong nga indi Saksi ni Jehova ang nagtambong anay sa gradwasyon sang iya anak nga babayi sa Watch Tow­er ­School of Gil­e­ad, diin ginhanas sia subong misyonera. Daku gid ang pagdayaw niya sa malipayon nga kadam-an nga naghunahuna sia nga diutay lamang ang nagamasakit sa tunga sini nga katawhan. Ano gid ang nagpahalipay sa sadtong kadam-an? Tuhoy sina, ano ang nagahimo sa tanan nga pagtinipon sang katawhan ni Jehova, sa mga kongregasyon, sa sirkito nga mga asambleya, kag sa distrito nga mga kombension, nga malipayon nga mga okasyon? Indi bala ang utudnon nga pagpalangga nga ginapakita nila sa isa kag isa? Sing dimapangduhaduhaan, ang utudnon nga pagpalangga amo ang isa ka rason kon ngaa ginasiling nga wala na sing iban pa nga relihiosong grupo ang nakatigayon sing daku nga kasadya, kalipay, kag kaayawan gikan sa relihion subong sang mga Saksi ni Jehova.

 2, 3. Anong duha ka Griegong tinaga ang nagapatuhoy kon ano ang dapat nga mabatyagan naton sa isa kag isa, kag ano ang tuhay nga mga kinaiya?

² Mapaabot gid naton nga makita inang utudnon nga pagpalangga bangod sang ginsiling ni apostol Pedro sa 1 Pedro 1:22: “Karon nga ginputli ninyo ang inyo mga kalag tungod sang inyo pagkamatinumanon sa kamatuoran kag sang resulta nga disalimpapaw nga utudnon nga pagpalangga, maghigugmaanay kamo sing hanuot gikan sa tagipusuon.” Ang isa sang sadsaran nga mga elemento sang Griegong tinaga nga ginbadbad diri nga “utudnon nga pagpalangga” amo ang phi·liʹa (pagpalangga). Ang kahulugan sini halos pareho sa kahulugan sang a·gaʹpe, ang tinaga nga masunson ginabadbad nga “gugma.” (1 Juan 4:⁠8) Samtang ang utudnon nga pagpalangga kag gugma masunson nga ginagamit sing buslanay, may espesipiko ini nga mga kinaiya. Indi naton ini dapat igumon sa isa kag isa, subong sang madamong manugbadbad sang Biblia. Sa sining artikulo kag sa isa nga nagasunod, binagbinagon naton ang tagsa sining mga tinaga.

³ Tuhoy sa kinatuhayan sining duha ka Griegong tinaga, ang isa ka iskolar nagsiling nga ang phi·liʹa “isa gid ka tinaga sang kainit kag kasuod kag pagpalangga.” Sa pihak nga bahin, ang a·gaʹpe labi nga nagahilabot sa hunahuna. Busa samtang ginasilingan kita nga higugmaon (a·gaʹpe) ang aton mga kaaway, wala kita sing pagpalangga sa ila. Ngaa wala? Bangod ang “malain nga kaupdanan nagadunot sang mapuslanon nga mga batasan.” (1 Corinto 15:33) Dugang nga nagapakita nga may kinatuhayan amo ang mga pinamulong ni apostol Pedro: “Idugang sa inyo . . . utudnon nga pagpalangga ang gugma.”​—⁠2 Pedro 1:​5-7; ipaanggid ang Juan 21:​15-17.⁠a

Mga Halimbawa sang Pinasahi Gid nga Utudnon nga Pagpalangga

 4. Ngaa si Jesus kag si Juan may pinasahi nga pagpalangga para sa isa kag isa?

⁴ Ang Pulong sang Dios nagahatag sa aton sing madamong maayo nga mga halimbawa sang pinasahi gid nga utudnon nga pagpalangga. Ining pinasahi nga pagpalangga indi resulta sang umalagi nga kaluyag kundi pasad sa pag-apresyar sa tumalagsahon nga mga kinaiya. Walay duhaduha nga ang labing kilala nga halimbawa amo ang pagpalangga ni Jesucristo kay apostol Juan. Sing dimapangduhaduhaan, si Jesus may utudnon nga pagpalangga sa tanan niya nga matutom nga mga apostoles, kag bangod ina sang maayo nga rason. (Lucas 22:28) Ang isa ka paagi nga ginpakita niya ini amo ang paghugas sang ila mga tiil, busa nagatudlo sa ila sing pagpaubos. (Juan 13:​3-16) Apang may pinasahi nga pagpalangga si Jesus kay Juan, nga sulitsulit nga ginasambit ni Juan. (Juan 13:23; 19:26; 20:⁠2) Bisan pa nga si Jesus may rason agod ipakita ang pagpalangga sa iya mga disipulo kag sa iya mga apostoles, si Juan mahimo nga naghatag kay Jesus sing rason nga palanggaon sia sing pinasahi bangod sang iya mas tudok nga apresasyon kay Jesus. Makita naton ini gikan sa mga sinulatan ni Juan, lunsay sa iya Ebanghelyo kag sa iya inspirado nga mga sulat. Daw ano kasunson nga ginsambit niya ang gugma sa sadtong mga sinulatan! Ang mas daku nga apresasyon ni Juan sa espirituwal nga mga kinaiya ni Jesus makita sa kon ano ang ginsulat niya sa Juan kapitulo 1 kag 13 tubtob 17, subong man sa sulitsulit nga pagpatuhoy niya sa wala pa mangin tawo nga pagluntad ni Jesus.​—⁠Juan 1:​1-3; 3:13; 6:​38, 42, 58; 17:5; 18:⁠37.

 5. Ano ang masiling nahanungod sa pinasahi nga pagpalangga nanday Pablo kag Timoteo para sa isa kag isa?

⁵ Sa kaanggid, indi naton luyag pasapayanan ang pinasahi gid nga utudnon nga pagpalangga ni apostol Pablo kag sang iya Cristiano nga kaupod nga si Timoteo sa isa kag isa, nga, sing pat-od, bangod sang pag-apresyar nila sa mga kinaiya sang isa kag isa. Ang mga sinulatan ni Pablo nagaunod sing maayong mga komento nahanungod kay Timoteo, subong sang: “Wala ako sing tawo nga kaangay sa iya nga magakabalaka sing matuod gid sa inyo kahimtangan. . . . Nakahibalo kamo sang pamatuod nga ginhatag niya tuhoy sa iya kaugalingon, nga subong sang anak nga upod sa amay nag-alagad sia upod sa akon sa pagpalapnag sang maayong balita.” (Filipos 2:​20-22) Madamo sing personal nga pagpatuhoy sa iya mga sulat kay Timoteo ang nagapakita sang mainit nga pagpalangga ni Pablo kay Timoteo. Halimbawa, talupangda ang 1 Timoteo 6:20: “O Timoteo, bantayi ang natugyan sa imo.” (Tan-awa man ang 1 Timoteo 4:​12-16; 5:23; 2 Timoteo 1:5; 3:​14, 15.) Ang pagpaanggid labi na sang mga sulat ni Pablo kay Timoteo sa iya sulat kay Tito nagapakita sang pinasahi nga pagpalangga ni Pablo sa sining pamatan-on. Ayhan amo man sina ang balatyagon ni Timoteo sa ila pag-abyanay, subong sang matalupangdan gikan sa pinamulong ni Pablo sa 2 Timoteo 1:​3, 4: “Ginadumdom ko ikaw sa walay langan sa akon mga pangamuyo, . . . ginahidlaw nga makita ka, samtang ginapanumdom ko ang imo mga luha, agod nga mapun-an ako sing kalipay.”

 6, 7. Ano ang balatyagon nanday David kag Jonatan para sa isa kag isa, kag ngaa?

⁶ Ang Hebreong Kasulatan nagahatag man sing maayong mga halimbawa, subong sang iya ni David kag ni Jonatan. Mabasa naton nga pagkatapos napatay ni David si Goliat, “ang kalag ni Jonatan natingob sa kalag ni David, kag ginhigugma sia ni Jonatan subong sang iya kaugalingon nga kalag.” (1 Samuel 18:⁠1) Ang apresasyon sa halimbawa ni David sang kakugi para sa ngalan ni Jehova kag ang iya pagkawalay kahadlok sa pagpakig-away sa higante nga si Goliat walay duhaduha nga amo ang ginbangdan sang pinasahi nga pagpalangga ni Jonatan kay David.

⁷ Daku gid ang pagpalangga ni Jonatan kay David nga ginrisgo niya ang iya kaugalingon nga kabuhi sa pagpangapin kay David gikan kay Haring Saul. Wala gid maakig si Jonatan nga ginpili ni Jehova si David nga mangin masunod nga hari sang Israel. (1 Samuel 23:17) May tudok man nga pagpalangga si David kay Jonatan, nga maathag gikan sa ginsiling niya sang ginlalawan ang kamatayon ni Jonatan: “Nagakalisod ako tungod sa imo, utod ko nga Jonatan, manayanaya ka gid sa akon. Ang imo gugma sa akon makatilingala nga nagalabaw sa gugma sang mga babayi.” Sa pagkamatuod, ang tudok nga apresasyon nagtanda sang ila kaangtanan.​—⁠2 Samuel 1:⁠26.

 8. Sin-o ang duha ka babayi nga nagpakita sing pinasahi nga pagpalangga sa isa kag isa, kag ngaa?

⁸ May maayong halimbawa man kita sa Hebreong Kasulatan sang pinasahi nga pagpalangga sa bahin sang duha ka babayi, si Noemi kag ang iya nabalo nga umagad nga si Rut. Dumduma ang ginsiling ni Rut kay Noemi: “Dili ako pagpilita sa pagbiya sa imo, sa pagbalik gikan sa pagsunod sa imo; kay bisan diin ka makadto magakadto ako, kag bisan diin ka magpaligad sing gab-i magapaligad ako. Ang imo katawhan mangin akon katawhan, kag ang imo Dios akon Dios.” (Rut 1:16) Indi bala kita maghinakop nga si Noemi, bangod sang iya paggawi kag sang iya pagpamulong tuhoy kay Jehova, nagbulig nga mapautwas ining mainapresyahon nga sabat ni Rut?​—⁠Ipaanggid ang Lucas 6:⁠40.

Ang Halimbawa ni Apostol Pablo

 9. Ano ang nagapakita nga si Pablo huwaran tuhoy sa utudnon nga pagpalangga?

⁹ Subong sang nakita na naton, si apostol Pablo may pinasahi gid nga pagpalangga kay Timoteo. Apang nagpahamtang man sia sing dalayawon nga halimbawa sang pagpabutyag sing mainit nga utudnon nga pagpalangga para sa iya mga kauturan sa kabilugan. Ginsilingan niya ang mga gulang gikan sa Efeso nga “sa sulod sang tatlo ka tuig, sa gab-i kag sa adlaw, wala [sia] mag-untat sa paglaygay nga may mga luha sa tagsatagsa.” Mainit nga utudnon nga pagpalangga? Indi gid ini mapangduhaduhaan! Kag amo man sina ang ila balatyagon kay Pablo. Pagkabati nila nga indi na nila sia makita liwat, “sila tanan naghibi sing tama, kag ginhakos nila si Pablo kag ginhalukan sia.” (Binuhatan 20:​31, 37) Utudnon nga pagpalangga pasad sa apresasyon? Huo! Ang iya utudnon nga pagpalangga nakita man gikan sa iya mga pinamulong sa 2 Corinto 6:​11-13: “Ang amon baba nagabuka nga sa inyo, O mga taga-Corinto, nagadaku ang amon tagipusuon. Wala kamo ginapiuti sa amon, kundi ginapiutan kamo sa inyo kaugalingon nga malum-ok nga pagpalangga. Karon, subong nga balos​—⁠nagapamulong ako subong nga sa mga anak⁠—​magdaku man ang inyo tagipusuon.”

 10. Anong kakulang sing utudnon nga pagpalangga ang nagdul-ong sa pag-asoy ni Pablo sang iya mga pagtilaw sa 2 Corinto kapitulo 11?

¹⁰ Sing maathag, madamo sang mga taga-Corinto kulang sing mainapresyahon nga utudnon nga pagpalangga para kay apostol Pablo. Busa, ang iban sa ila nagyamo: “Ang iya mga sulat maunod kag gamhanan, apang ang iya tindog maluya kag ang iya pagpamulong walay pulos.” (2 Corinto 10:10) Amo ina kon ngaa ginpatuhuyan ni Pablo ang ila “lutaw gid nga mga apostoles” kag napahulag nga isugid ang mga pagtilaw nga ginbatas niya, subong sang narekord sa 2 Corinto 11:​5, 22-33.

 11. Ano ang pamatuod nahanungod sa pagpalangga ni Pablo para sa mga Cristiano sa Tesalonica?

¹¹ Ang mainit nga pagpalangga ni Pablo para sa mga gin-alagaran niya ilabi na nga makita gikan sa iya pinamulong sa 1 Tesalonica 2:8: “Sanglit may malum-ok nga pagpalangga sa inyo, nahamuot kami sa pagpaambit sa inyo, indi lamang sang maayong balita sang Dios, kundi man sang amon kaugalingon nga mga kalag, bangod nga nangin mahal gid kamo sa akon.” Sa katunayan, daku gid ang pagpalangga niya sa sining bag-ong mga kauturan nga sang indi na sia makahulat nga makabalita nahanungod sa ila kaayuhan​—⁠nalangkag gid sia sa paghibalo kon paano nila ginbatas ang paghingabot⁠—​ginpadala niya si Timoteo, nga naghatag sing maayong balita nga nagpahalipay sing daku kay Pablo. (1 Tesalonica 3:​1, 2, 6, 7) Ang Insight on the Scriptures nagasiling: “Ang suod nga higot sang utudnon nga pagpalangga nagluntad sa tunga ni Pablo kag sadtong mga gin-alagaran niya.”

Apresasyon​—⁠Ang Yabi sa Utudnon nga Pagpalangga

 12. Ano ang mga rason para ipakita naton ang mainit nga pagpalangga sa aton mga kauturan?

¹² Sa pagkamatuod, ang yabi sa utudnon nga pagpalangga amo ang apresasyon. Indi bala nga ang tanan nga dedikadong mga alagad ni Jehova may mga kinaiya nga ginaapresyar naton, nga nagakabagay sang aton pagpalangga, nagahimo sa aton nga pakamahalon sila? Kita tanan nagapangita una sang Ginharian sang Dios kag sang iya pagkamatarong. Kita tanan nagapakig-away sing maisog batok sa aton tatlo ka kinaandan nga mga kaaway: si Satanas kag ang iya mga demonyo, ang malauton nga kalibutan nga kontrolado ni Satanas, kag ang napanubli nga makagod nga mga huyog sang makasasala nga unod. Indi bala naton dapat pirme dumdumon nga ang aton mga kauturan nagahimo sang bug-os nila nga masarangan walay sapayan sang mga kahimtangan? Ang tagsatagsa sa kalibutan yara sa kiliran ni Jehova ukon ayhan ni Satanas. Ang aton dedikadong mga utod nga lalaki kag babayi yara sa kiliran ni Jehova, huo, sa aton kiliran, kag busa nagakabagay sang aton utudnon nga pagpalangga.

 13. Ngaa dapat kita may mainit nga pagpalangga para sa mga gulang?

¹³ Kamusta ang aton apresasyon sa aton mga gulang? Indi bala nga dapat naton sila ilabi na nga mahalon bangod sang pagpangabudlay nila sing lakas sa kaayuhan sang kongregasyon? Kaangay naton tanan, kinahanglan nila saguron ang ila kaugalingon kag ang ila mga pamilya. May mga obligasyon man sila kaangay naton nga magtuon sing personal, magtambong sa mga miting sa kongregasyon, kag makigbahin sa ministeryo sa latagon. Dugang pa, may obligasyon sila nga handaan ang mga bahin sang programa sa mga miting, maghatag sing pamulongpulong publiko, kag atipanon ang mga problema nga nagautwas sa kongregasyon, nga kon kaisa nagakinahanglan sing inoras sang hudisyal nga pag-usisa. Sa pagkamatuod, luyag naton “pakamahalon ina nga mga sahi sang tawo.”​—⁠Filipos 2:⁠29.

Pagpakita sing Utudnon nga Pagpalangga

 14. Anong mga kasulatan ang nagasugo sa aton nga ipakita ang utudnon nga pagpalangga?

¹⁴ Agod pahamut-an si Jehova, dapat naton ipakita ang mainit nga balatyagon sang utudnon nga pagpalangga sa aton mga masigkatumuluo, subong sang ginhimo nanday Jesucristo kag Pablo. Aton mabasa: “Sa [utudnon nga pagpalangga] maghigugmaay kamo sing malum-ok sa isa kag isa.” (Roma 12:​10, Kingdom Interlinear) “Tuhoy sa [utudnon nga pagpalangga], wala kamo nagakinahanglan nga magsulat kami sa inyo, kay kamo mismo gintudluan sang Dios nga maghigugmaanay sa isa kag isa.” (1 Tesalonica 4:​9, Int) “Padayuna ang inyo [utudnon nga pagpalangga].” (Hebreo 13:​1, Int) Pat-od gid nga nahamuot ang aton langitnon nga Amay kon ginapakita naton ang utudnon nga pagpalangga sa iya dutan-on nga mga anak!

 15. Ano ang pila ka paagi sa pagpakita sing utudnon nga pagpalangga?

¹⁵ Sang panahon sang mga apostoles ang mga Cristiano may kinabatasan sa pagtamyaw sa isa kag isa nga may “balaan nga halok” ukon “halok sang paghigugma.” (Roma 16:16; 1 Pedro 5:14) Isa gid ka pagpakita sing utudnon nga pagpalangga! Karon, sa kalabanan nga mga bahin sang duta, ang labing nagakaigo nga pagpakita amo ang mainabyanon gid nga yuhum kag ang mainit nga pagkamustahanay. Sa Latin nga mga kadutaan, subong sang Mexico, may panamyaw sa dagway sang paghakos, isa gid ka pagpakita sing pagpalangga. Ining mainit nga pagpalangga sining mga kauturan ayhan amo ang rason sang daku nga pag-uswag sa ila mga kadutaan.

 16. Ano ang aton mga kahigayunan agod ipakita ang utudnon nga pagpalangga sa aton mga Kingdom Hall?

¹⁶ Sa pagsulod naton sa Kingdom Hall, ginapanikasugan gid bala naton nga ipakita ang utudnon nga pagpalangga? Ayhan makapamulong kita sing makapalig-on, ilabi na sa mga ginapung-aw. Ginasugo kita nga “magpamulong sing malinugpayon sa napung-awan nga mga kalag.” (1 Tesalonica 5:14) Isa gid ina ka paagi nga mapaalinton naton ang kainit sang utudnon nga pagpalangga. Ang isa pa ka maayong paagi amo ang pagpakita sing apresasyon sa isa ka matahom nga pamulongpulong publiko, sa isa ka bahin sa programa nga nahatag sing maayo, sa maayong panikasog nga nahimo sang estudyante nga humalambal sa Teokratikong Eskwelahan sa Pagministro, kag iban pa.

 17. Paano natigayon sang isa ka gulang ang pagpalangga sang kongregasyon?

¹⁷ Kamusta ang pag-agda sa lainlain nga mga kauturan sa aton puluy-an para sa isa ka panihapon ukon ayhan sa isa ka pamahaw pagkatapos sang miting kon maaga pa? Indi bala naton pagtugutan nga mangibabaw ang laygay ni Jesus sa Lucas 14:​12-14? Isa anay ka misyonero ang gintangdo subong nagadumala nga manugtatap sa isa ka kongregasyon nga ang tanan nga iban pa lainlain sing rasa. Namutikan niya ang kakulang sing utudnon nga pagpalangga, gani ginhimud-usan niya nga tadlungon ang kahimtangan. Paano? Kada Domingo, gin-agda niya ang lainlain nga panimalay para sa isa ka panihapon. Sa hingapusan sang isa ka tuig, ang tanan nagpakita sing mainit nga utudnon nga pagpalangga sa iya.

 18. Paano naton mapakita ang utudnon nga pagpalangga sa aton nagamasakit nga mga kauturan nga lalaki kag babayi?

¹⁸ Kon ang isa ka utod nga lalaki ukon babayi nagamasakit, sa balay ukon sa ospital, ang utudnon nga pagpalangga magapahulag sa aton nga pahibaluon sia nga nabalaka kita. Ukon kamusta yadtong nagapuyo sa nurs­ing ­home? Ngaa indi sila pagduawon sing personal, tawgan sa telepono, ukon padal-an sing kard nga nagapabutyag sing mainit nga mga balatyagon?

 19, 20. Paano naton ginapakita nga ang aton utudnon nga pagpalangga nagsangkad?

¹⁹ Kon nagapakita sing utudnon nga pagpalangga, mapamangkot naton ang aton kaugalingon, ‘Ang akon bala utudnon nga pagpalangga may ginapasulabi? Ang mga butang subong sang duag sang panit, edukasyon, ukon materyal nga mga pagkabutang nagaimpluwensia bala sang pagpakita ko sing utudnon nga pagpalangga? Kinahanglan bala nga pasangkaron ko ang akon utudnon nga pagpalangga, subong sang ginlaygay ni apostol Pablo nga himuon sang mga Cristiano sa Corinto?’ Ang utudnon nga pagpalangga magapahulag sa aton nga tamdon sing positibo ang aton mga kauturan, apresyahon sila tungod sang ila maayong mga kinaiya. Ang utudnon nga pagpalangga magabulig man sa aton nga magkalipay sa espirituwal nga pag-uswag sang aton mga kauturan sa baylo nga magkahisa sa sini.

²⁰ Ang utudnon nga pagpalangga magapaalisto man sa aton sa pagbulig sa aton mga kauturan sa ministeryo. Dapat nga subong ini sang ginasiling sang isa sang aton mga ambahanon (Numero 92):

“Give kind assistance to all the weak,

So that with boldness they too can speak.

Never neglect those of tender years,

Help them grow strong and get rid of their fears.”

 21. Anong sabat ang mapaabot naton kon ginapakita naton ang utudnon nga pagpalangga?

²¹ Gani indi naton pagkalimtan nga sa pagpakita sing utudnon nga pagpalangga, ang prinsipio nga ginpamulong ni Jesus sa iya Sermon sa Bukid naaplikar: “Hatag kamo, kag kamo hatagan. Sukob nga maayo, dinasok, naligoligo, nga nagaawas, ihatag nila sa imo sabak. Kay sa talaksan nga ginataksan ninyo takson kamo liwat.” (Lucas 6:38) Mabuligan kita mismo kon ginapakita naton ang utudnon nga pagpalangga, ginapabutyag ang pagtahod sa mga alagad ni Jehova kaangay naton. Malipayon gid yadtong nagakalipay sa pagpakita sing utudnon nga pagpalangga!

[Footnote]

Paano Mo Sabton?

◻ Anong Griegong tinaga ang nagapatuhoy sa aton mga emosyon, kag paano sila magkatuhay?

◻ Ano ang yabi sa utudnon nga pagpalangga?

◻ Ano ang aton Makasulatanhon nga mga halimbawa sang pinasahi gid nga utudnon nga pagpalangga?

◻ Ngaa dapat kita may mainit nga pagpalangga para sa aton mga kauturan kag para sa mga gulang?

[Piktyur sa pahina 15]

Ginlaygayan ni apostol Pedro ang iya mga kauturan nga idugang ang utudnon nga pagpalangga sa ila pagtuo kag sa iban pa nga Cristianong mga kinaiya