Maisugon nga Pagtuo sang Aton Taga-Rwanda nga Kauturan

SANG maaga sang l994 nahalawhaw ang kalibutan sa balita tuhoy sa lapnag nga pagpamatay sa pungsod sang Rwanda sa Aprika. Nagdabdab ang mapintas nga inaway sibil​—⁠ang resulta sang siniglo nga pagdumtanay.

Nagapangatubang sa bug-os nga pagkalusod sang kasuguan kag kahim-ong, ang kapin sa 2,000 ka Saksi ni Jehova sa Rwanda napilitan sa pagpalagyo agod maluwas ang ila kabuhi. Mga 1,300 ang nagdangop sa mga kampo sang mga refu­gee sa kaiping nga ­Zaire kag Tan­za­nia, apang ang iban wala makahingagaw sa pagpalagyo. Ginakasubo namon nga ibalita nga mga 400 sang aton kauturan nga lalaki kag babayi​—⁠mga hamtong kag kabataan, pat-od nga mga sibilyan tanan​—⁠ang napatay sa sining binuang nga kasingki. Ang mga Cristiano sa bug-os nga kalibutan nagapangalisod sa pagkadula sining maisog nga mga manughupot sing integridad kag naumpawan sa saad sang Biblia tuhoy sa pagkabanhaw.​—⁠Juan 11:⁠25.

Ano ang kahimtangan sining nakalampuwas nga kauturan nga lalaki kag babayi? Nagpadala sing mga gulang ang pila ka mga pungsod sa pag-usisa sini. Ang isa ka balita nagsugid nga ang kauturan sa Rwanda nagaatubang sa kahimtangan nga “may dignidad kag kaisog.” Halimbawa, ang isa sang una nga mga pangabay sang kauturan amo ang literatura sa Biblia. ‘Daw nabalaka pa sila sing labi nga makabaton sing espirituwal nga pagkaon sangsa materyal nga bulig, bisan pa kinahanglanon gid nila ang madamo nga mga butang,’ hinakop sang balita. Bisan pa sinadto ang kahimtangan sang kampo, ‘ang bahin nga ginapuy-an sang kauturan amo ang pinakamatin⁠lo.’

Ang Watch Tower Society naghatag sing pundo agod ipamakal sing pagkaon, mga habol, mga bayo, mga sapatos, kag bulong. Ang aton mga kauturan sa Pransia maalwan nga nag-amot, kag sang maaga sang Hunyo, kapin sa duha ka tonelada nga mga galamiton ang ginpadala sa aton nagakinahanglan nga taga-Rwanda nga kauturan.

Indi katingalahan, ining mga hitabo nagresulta sa maayo nga panaksi. Ang mga tumalan-aw natandog sang kamatuoran nga ang aton kauturan sa Rwanda nakabaton sinang bulig kag pagsakdag halin sa kaupod nga mga Saksi, kag napaambit nila ini nga bulig sa iban. Ang pila nagkomento nga ang mga Saksi lamang ang ginaduaw sang mga katapo sang ila relihion!

Ang nadangatan sang aton kauturan sa Rwanda nagapahanumdom sa aton nga sa sining “katapusan nga mga adlaw,” ang mga tawo mangin “mabangis” kag “masingki.” (2 Timoteo 3:​1-5; Today’s English Version) Kag bisan pa si Jehova wala nagasaad sa iya katawhan sing milagruso nga pag-amlig gikan sa pisikal nga mga katalagman, nagasaad sia nga amligan ang ila espirituwalidad kag kaangtanan sa iya kag, sa milenyo nga paggahom ni Cristo, banhawon yadtong nagkalamatay. (Salmo 91:​1-10) Kabay nga magpadayon kita sa pagpangamuyo nga si Jehova magasakdag kag magabulig sa aton nakalampuwas nga kauturan sa Rwanda sa sining mabudlay nga tion.​—⁠Salmo 46:⁠1.