Magpakita sing Malulo nga Pagkamainawaon

“Sul-ob kamo sing malulo nga pagkamainawaon, pagkaayo.” —COLOSAS 3:⁠12.

 1. Ngaa kinahanglanon sing daku karon ang pagkaawa?

WALA pa gid matabo sa maragtas nga ang tuman kadamo nga katawhan nagakinahanglan sing mainawaon nga bulig. Bangod sang balatian, pagkagutom, walay palamugnan, krimen, mga inaway, anarkiya, kag kinaugali nga mga kalamidad, minilyon ang nagakinahanglan sing bulig. Apang may isa ka problema nga mas mabug-at pa, kag amo ina ang desperado nga kahimtangan sa espirituwal sang katawhan. Si Satanas, nga nakahibalo nga malip-ot na lang ang iya tion, “nagapatalang sa bug-os napuy-an nga duta.” (Bugna 12:​9, 12) Busa, ang mga tawo nga yara sa guwa sang matuod nga Cristianong kongregasyon amo labi na ang yara sa katalagman nga madula ang ila kabuhi, kag ang Biblia wala nagahatag sing paglaum nga banhawon ang mga pamatyon sa nagapakari nga adlaw sang paghukom sang Dios.​—⁠Mateo 25:​31-33, 41, 46; 2 Tesalonica 1:​6-9.

 2. Ngaa wala pa ginalaglag ni Jehova ang mga malauton?

² Apang, tubtob sa sining hingapusan nga tinion, nagapakita pa gihapon si Jehova nga Dios sing pailob kag kaawa sa mga dimapinasalamaton kag mga malauton. (Mateo 5:45; Lucas 6:​35, 36) Ginahimo niya ini bangod sang pareho man nga rason sang ginpaatrasar niya ang pagsilot sa dimatutom nga pungsod sang Israel. “ ‘Sa nagakabuhi ako,’ siling sang Soberano nga Ginuong Jehova, ‘nagakahamuot ako, indi sa kamatayon sang isa nga malauton, kundi nga inang isa nga malauton magbiya sa iya dalanon kag magkabuhi. Biya kamo, biya kamo sa inyo malaut nga mga dalanon, kay ngaa bala nga magkalamatay kamo, O panimalay sang Israel?’ ”​—⁠Ezequiel 33:⁠11.

 3. Ano ang aton halimbawa tuhoy sa pagkaawa ni Jehova sa mga tawo nga indi niya katawhan, kag ano ang matun-an naton gikan sa sini?

³ Ang kaawa ni Jehova ginpakita man sa malauton nga mga taga-Ninive. Ginpadala ni Jehova ang iya manalagna nga si Jonas agod paandaman sila tuhoy sa nagahilapit nga kalaglagan. Ginpamatian nila ang ginbantala ni Jonas kag naghinulsol. Nagpahulag ini sa mainawaon nga Dios, nga si Jehova, nga indi pagdayunon ang paglaglag sa siudad sadtong tion. (Jonas 3:10; 4:11) Kon ang Dios nagbatyag sing kaluoy sa mga taga-Ninive, nga may posibilidad nga banhawon, labi pa gid nga nagabatyag sia sing kaawa sa katawhan nga karon nagaatubang sing walay katapusan nga kalaglagan!​—⁠Lucas 11:⁠32.

Isa ka Wala sing Tupong nga Hilikuton sang Pagkamainawaon

 4. Paano si Jehova nagapabutyag sing kaawa sa katawhan karon?

⁴ Nahisanto sa iya mainawaon nga personalidad, ginsugo ni Jehova ang iya mga Saksi nga duawon ang ila mga isigkatawo nga dala ang “maayong balita sang ginharian.” (Mateo 24:14) Kag kon ginaapresyar sang mga tawo ining nagaluwas-kabuhi nga hilikuton, ginabuksan ni Jehova ang ila tagipusuon agod mahangpan ang mensahe sang Ginharian. (Mateo 11:25; Binuhatan 16:14) Sa pag-ilog sa ila Dios, ang matuod nga mga Cristiano nagapakita sing malulo nga kaawa paagi sa pagduaw liwat sa mga interesado, ginabuligan sila, kon mahimo, paagi sa isa ka pagtuon sa Biblia. Sa amo, sang 1993, kapin sa apat ka milyon kag tunga ka Saksi ni Jehova, sa 231 ka pungsod, ang nakahinguyang sing kapin sa isa ka bilyon ka oras sa pagbantala sa balay kag balay kag sa pagtuon sa Biblia upod sa ila mga isigkatawo. Nian, ining bag-ong mga interesado nakatigayon sing kahigayunan nga idedikar ang ila kabuhi kay Jehova kag nagbuylog sa grupo sang iya bawtismado nga mga Saksi. Sa amo, sila man nagbaton sing salabton sa sining wala sing tupong nga hilikuton sang pagkamainawaon para sa mahimo pa mangin mga disipulo nga nasiod gihapon sa nagatagumatayon nga kalibutan ni Satanas.​—⁠Mateo 28:​19, 20; Juan 14:⁠12.

 5. Kon ang kaawa sang Dios makadangat sa limite sini, ano ang matabo sa relihion nga nagapakalain sa Dios?

⁵ Sa indi madugay si Jehova magahikot subong “isa ka isganan nga hangaway.” (Exodo 15:⁠3) Bilang pagkaawa sa iya ngalan kag sa iya katawhan, dulaon niya ang kalautan kag tukuron ang isa ka matarong nga bag-ong kalibutan. (2 Pedro 3:13) Ang una nga makaeksperiensia sang adlaw sang kasingkal sang Dios amo ang mga iglesia sang Cristiandad. Subong nga wala gani pagluwasa sang Dios ang iya mismo templo sa Jerusalem gikan sa kamot sang hari sang Babilonia, indi man niya pagluwason ang relihioso nga mga organisasyon nga nagpakalain sa iya. Ibutang sang Dios sa tagipusuon sang mga katapo sang Nasyones Unidas ang paghapay sa Cristiandad kag sa tanan nga iban pa nga mga porma sang butig nga relihion. (Bugna 17:​16, 17) “Kag tuhoy sa akon,” siling ni Jehova, “ang akon mata indi magpasaylo, ukon magkaawa ako. Itungtong ko sa ila ulo ang ila dalanon.”​—⁠Ezequiel 9:​5, 10.

 6. Sa anong mga paagi ginapahulag ang mga Saksi ni Jehova sa pagpakita sing kaawa?

⁶ Samtang may tion pa, ang mga Saksi ni Jehova padayon nga nagapakita sing kaawa sa ila mga isigkatawo paagi sa makugi nga pagbantala sing mensahe sang kaluwasan halin sa Dios. Kag siempre, kon posible, ginabuligan man nila ang mga tawo nga nagakinahanglan sing materyal nga bulig. Apang, sa sining bahin, ang ila una nga salabton amo ang pag-atipan sang mga kinahanglanon sang suod nga mga katapo sang pamilya kag sang mga may kaangtanan sa ila sa pagtuo. (Galacia 6:10; 1 Timoteo 5:​4, 8) Ang madamo nga misyon sang pagtabang nga nahimo sang mga Saksi ni Jehova para sa mga masigkatumuluo nga nag-antos sing nanuhaytuhay nga mga kalamidad nangin talalupangdon nga mga halimbawa sang kaawa. Walay sapayan, wala nagahulat ang mga Cristiano nga matabo pa ang isa ka krisis antes magpakita sing malulo nga kaawa. Ginapakita nila sa gilayon ining kinaiya sa pag-atubang sang maayo kag malain nga mga hitabo sa adlaw-adlaw nga pagkabuhi.

Bahin sang Bag-ong Personalidad

 7. (a) Sa Colosas 3:​8-13, paano ang kaawa ginaangot sa bag-ong personalidad? (b) Ano ang madali himuon sang mga Cristiano bangod sang pagkalulo?

⁷ Matuod nga ang aton pagkamakasasala kag ang malain nga impluwensia sang kalibutan ni Satanas mga sablag sa aton pagpakita sing malulo nga pagkamainawaon. Amo kon ngaa ginapalig-on kita sang Biblia nga isikway ang “kasingkal, kaakig, kalautan, mapasipalahon nga panghambal, kag malaw-ay nga pululungon.” Sa baylo ginalaygayan kita nga ‘panaptan ang aton kaugalingon sing bag-ong personalidad’​—⁠isa ka personalidad nga nahisanto sa larawan sang Dios. Una sa tanan, ginasugo kita tanan nga panaptan ang aton kaugalingon sing “malulo nga pagkamainawaon, pagkaayo, pagkamapainubuson, pagkalum-ok, kag pagkamainantuson.” Dayon ginapakita sa aton sang Biblia ang isa ka praktikal nga paagi sa pagpasundayag sining mga kinaiya. “Padayon kamo nga magpinaumuray kag magpinatawaray kon ang bisan sin-o may inugsumbong batok sa isa. Subong nga si Jehova nagapatawad sa inyo, amo man kamo.” Mas madali kita magpatawad kon napalambo naton ang ‘malulo nga pagkamainawaon’ sa aton kauturan.​—⁠Colosas 3:​8-13.

 8. Ngaa importante nga mangin mapinatawaron?

⁸ Sa pihak nga bahin, ang kapaslawan sa pagpakita sing mainawaon nga pagpatawad makatalagam sa aton kaangtanan kay Jehova. Mabaskog nga ginpakita ini ni Jesus sa iya ilustrasyon tuhoy sa dimapinatawaron nga ulipon, nga ginpabilanggo sang iya agalon “tubtob nga iya mabayaran ang tanan niya nga nautang.” Nagakaigo lamang nga amo sini ang himuon sa ulipon bangod makapakibot nga wala sia magpakita sing kaawa sa isa ka masigkaulipon nga nagpakiluoy sa iya. Ginhinakpan ni Jesus ang ilustrasyon sa pagsiling: “Amo man ang himuon sang akon langitnon nga Amay sa inyo kon indi kamo magpatawad sing tinagipusuon sang inyo utod.”​—Mateo 18:​34, 35.

 9. Paano naangot ang malulo nga kaawa sa labing importante nga bahin sang bag-ong personalidad?

⁹ Ang pagpakita sing malulo nga pagkamainawaon isa ka importante nga bahin sang gugma. Kag ang gugma amo ang nagapakilala nga tanda sang matuod nga Cristianismo. (Juan 13:35) Busa, ang paglaragway sang Biblia sa bag-ong personalidad nagahinakop: “Luwas pa sa sining tanan nga mga butang, sul-ob kamo sing gugma, kay isa ini ka himpit nga higot sang paghiusa.”​—⁠Colosas 3:⁠14.

Pagkahisa—Isa ka Sablag sa Pagkaawa

 10. (a) Ano ang mahimo bangdan sang pagpanggamot sang kahisa sa aton tagipusuon? (b) Ano ang mahimo mangin malain nga mga resulta sang kahisa?

¹⁰ Bangod sang aton tawhanon nga pagkamakasasala, madali manggamot sa aton tagipusuon ang pagbatyag sing kahisa. Mahimo nga ang isa ka utod nga lalaki ukon babayi ginpakamaayo sing kinaugali nga mga ikasarang ukon materyal nga mga bentaha nga wala sa aton. Ukon ayhan ang isa nakabaton sing pinasahi nga espirituwal nga mga pagpakamaayo kag mga pribilehiyo. Kon mahisa kita sa sini nga mga utod, makapakita bala kita sa ila sing malulo nga kaawa? Ayhan indi. Sa baylo, ang mahisaon nga mga balatyagon mahimo nga sa ulihi magapadayag sa mamulayon nga mga pululungon ukon dimaluluy-on nga mga buhat, kay si Jesus nagsiling tuhoy sa mga tawo: “Sa kabuganaan sang tagipusuon nagapamulong ang iya baba.” (Lucas 6:45) Ang iban mahimo nga magadampig sa sina nga pagmulay. Sa amo mahimo nga matublag ang paghidait sang isa ka pamilya ukon sang isa ka kongregasyon sang katawhan sang Dios.

 11. Paano ang napulo ka utod ni Jose wala magpakita sing kaawa sa ila tagipusuon, kag ano ang resulta?

¹¹ Binagbinaga ang natabo sa isa ka daku nga pamilya. Ang napulo ka daku na nga mga anak ni Jacob nagkahisa sa ila manghod nga si Jose bangod sia ang paborito sang ila amay. Subong resulta, “indi sila makahambal sa iya sing mahidaiton.” Sang ulihi, ginpakamaayo sang Dios si Jose sing mga damgo, nagapamatuod nga nahamuot sa iya si Jehova. Naghatag ini sa iya mga utod sing “dugang pa nga rason nga dumtan sia.” Bangod wala nila gingabot ang gamot sang pagkahisa gikan sa ila tagipusuon, wala ini magpakita sing kaawa kag nagdul-ong sa mabug-at nga sala.​—⁠Genesis 37:​4, 5, 11.

 12, 13. Ano ang dapat naton himuon kon ang kahisa magsulod sa aton tagipusuon?

¹² Mapintas nga ginbaligya nila si Jose sa pagkaulipon. Sa pagtinguha nga taguon ang ila pagpakasala, ginlimbungan nila ang ila amay sa paghunahuna nga si Jose ginpatay sang isa ka mabangis nga sapat. Pagligad sang pila ka mga tuig nabuyagyag ang ila sala sang mapilitan sila bangod sang tiggulutom nga magdulhog sa Egipto kag magbakal sing kalan-on. Ang manugdumala sang mga kalan-on, nga wala nila makilal-i nga amo si Jose, nagsumbong nga nagapangispiya sila kag ginsilingan sila nga indi na liwat mangayo sing bulig sa iya luwas kon paupdon nila ang ila kamanghuran nga utod, nga si Benjamin. Sini nga tion si Benjamin amo ang nangin paborito sang ila amay, kag nahibaluan nila nga indi magsugot si Jacob nga paupdon sia.

¹³ Gani samtang nagatindog sila sa atubangan ni Jose, ginpahulag sila sang ila konsiensia sa pagbaton: “Sa pagkamatuod nakasala kita nahanungod sa aton utod [Jose], kay nakita naton ang kalisdanan sang iya kalag sang nagpakiluoy sia sa aton, apang wala kita magpamati. Gani nag-abot sa aton ining kalisdanan.” (Genesis 42:21) Paagi sa iya mainawaon apang may kalig-on nga pagpakig-angot, ginbuligan ni Jose ang iya mga utod nga pamatud-an ang pagkamatuod sang ila paghinulsol. Nian nagpakilala sia sa ila kag maalwan nga ginpatawad sila. Napasag-uli ang paghiusa sang pamilya. (Genesis 45:​4-8) Subong mga Cristiano, dapat kita makatuon sing leksion gikan sa sini. Bangod nahibaluan na naton ang malain nga mga resulta sang kahisa, dapat kita mangamuyo kay Jehova agod mangayo sing bulig nga islan ang mahisaon nga mga balatyagon sing ‘malulo nga pagkamainawaon.’

Iban Pa nga mga Sablag sa Pagkaawa

 14. Ngaa dapat naton likawan ang dikinahanglanon nga pagpadayag sa kasingki?

¹⁴ Ang isa pa ka sablag sa aton pagkamainawaon mahimo magresulta gikan sa dikinahanglanon nga pagpadayag sang aton kaugalingon sa kasingki. Ang mga isport kag kalingawan nga nagapakita sing kasingki nagasakdag sang mabaskog nga handum sa kasingki subong isa ka paagi agod makabatyag sing kakunyag. Sang panahon sang Biblia, ang mga pagano pirme nagatan-aw sing gladiatoryal nga mga sambuwa kag iban pa nga mga porma sang pagpaantos sa tawo sa mga arena sang Romanong Emperyo. Yadto nga kalingawan, suno sa isa ka istoryador, “nagdula sang pagbatyag sing kahanuklog sa pag-antos nga nagapatuhay sang tawo gikan sa mga sapat.” Pareho man ang epekto sang madamo nga kalingawan sa modernong kalibutan karon. Ang mga Cristiano, nga nagatinguha sa pagpakita sing malulo nga pagkamainawaon, dapat mangin mapilion gid sa ginapili nila nga balasahon, pelikula, kag mga programa sa TV. Sing maalamon ginatandaan nila ang mga pulong sang Salmo 11:5: “Ang bisan sin-o nga nagahigugma sang kasingki ginadumtan gid [ni Jehova].”

 15. (a) Paano ang isa ka tawo mahimo nga nagapakita sing serioso nga kakulang sing kaawa? (b) Paano ginaatipan sang matuod nga mga Cristiano ang mga kinahanglanon sang mga masigkatumuluo kag mga isigkatawo?

¹⁵ Ang isa ka tawo nga maiyaiyahon mahimo man nga kulang gid sing kaawa. Serioso ini, kay si apostol Juan nagapaathag: “Ang bisan sin-o nga may pangabuhian sining kalibutan kag nagatan-aw sa iya utod nga yara sa kakulangan, apang nagapugong sang iya malulo nga kaawa sa iya, paano bala ang pagpabilin sang gugma sang Dios sa iya?” (1 Juan 3:17) Ini man nga kakulang sing kaawa ginpakita sang nagapakamatarong sa kaugalingon nga saserdote kag sang Levita sa ilustrasyon ni Jesus tuhoy sa mabuligon nga Samaritano. Sang makita ang kahimtangan sang ila halos patay na nga Judiyong utod, nagtabok sila sa pihak nga bahin sang dalan kag nagpadayon sa ila dalanon. (Lucas 10:​31, 32) Sing tuhay, ang mainawaon nga mga Cristiano maabtik nga nagahatag sang materyal kag espirituwal nga mga kinahanglanon sang ila kauturan. Kag kaangay sang Samaritano sa ilustrasyon ni Jesus, ginakabalak-an man nila ang mga kinahanglanon sang mga dumuluong. Sa amo malipayon nga ginahatag nila ang ila tion, kusog, kag manggad sa pagpauswag sang hilikuton nga paghimo sing mga disipulo. Sa sining paagi nagaamot sila sa kaluwasan sang minilyon.​—⁠1 Timoteo 4:⁠16.

Pagkaawa sa mga Nagabalatian

 16. Ano ang aton mga limitasyon sa pagpakig-angot sa mga nagabalatian?

¹⁶ Ang balatian amo ang ginadangatan sang dihimpit, nagakapatay nga katawhan. Indi eksepsion ang mga Cristiano, kag ang kalabanan sa ila indi mga propesyonal sa patag sang pagpamulong, ukon makahimo sila sing mga milagro subong sang ginhimo sang pila sang unang mga Cristiano nga nakabaton sing subong sina nga gahom gikan kay Cristo kag sa iya mga apostoles. Upod sa kamatayon sang mga apostoles ni Cristo kag sang ila mga kaupod sadto, yadtong milagruso nga mga gahom nagtaliwan. Busa, ang aton ikasarang sa pagbulig sa mga nagaantos bangod sang pisikal nga balatian, lakip ang indi normal nga pagpanghikot sang utok kag mga halusinasyon, limitado lamang.​—⁠Binuhatan 8:​13, 18; 1 Corinto 13:⁠8.

 17. Ano nga leksion ang matun-an naton gikan sa pagpakig-angot nga ginpakita sa nagabalatian kag ginapung-awan nga si Job?

¹⁷ Ang kapung-aw masami nga nagaupod sa balatian. Halimbawa, ang mahinadlukon sa Dios nga si Job ginpung-awan gid bangod sang malala nga balatian kag sang mga kalamidad nga ginpahanabo ni Satanas sa iya. (Job 1:​18, 19; 2:7; 3:​3, 11-13) Nagkinahanglan sia sing mga abyan nga magapakita sa iya sing malulo nga pagkaawa kag “magahambal sing malugpayon.” (1 Tesalonica 5:14) Sa baylo, ginduaw sia sang tatlo ka ginatawag nga manuglugpay kag padasudaso nga naghimo sing sayop nga mga konklusion. Ginpalubha pa nila ang kapung-aw ni Job paagi sa pagpahangop nga ang kabangdanan sang mga kalamidad nga nag-abot sa iya amo ang iya pila ka sayop. Bangod may malulo nga pagkamainawaon, ang mga Cristiano magalikaw sa paghimo sini man nga sayop kon ang mga masigkatumuluo nagabalatian ukon ginapung-awan. Kon kaisa, ang importante nga butang nga ginakinahanglan sina nila amo ang pila ka maluluy-on nga mga pagduaw sang mga gulang ukon sang iban pa nga hamtong nga mga Cristiano nga magapamati sing mahinuklugon, magapakita sing paghangop, kag magahatag sing mahigugmaon nga Makasulatanhon nga laygay.​—⁠Roma 12:15; Santiago 1:⁠19.

Pagkaawa sa mga Maluya

 18, 19. (a) Paano dapat makig-angot ang mga gulang sa mga maluya ukon mga nakasala? (b) Bisan pa kon kinahanglanon nga magporma sing isa ka hudisyal nga komite, ngaa importante para sa mga gulang nga pakitaan sing malulo nga kaawa ang mga nakasala?

¹⁸ Ang mga gulang labi na dapat magpakita sing malulo nga pagkamainawaon. (Binuhatan 20:​29, 35) “Kita nga mabakod dapat magdala sang mga kaluyahon sang mga maluya,” sugo sang Biblia. (Roma 15:⁠1) Subong dihimpit, kita tanan nagasayop. (Santiago 3:⁠2) Kinahanglan ang pagkamalulo sa pagpakig-angot sa isa nga “nagahimo sing pila ka sayop nga tikang antes niya matalupangdan ini.” (Galacia 6:⁠1) Indi gid luyag sang mga gulang nga mangin kaangay sang nagapakamatarong sa kaugalingon nga mga Fariseo nga indi makatarunganon sa ila pag-aplikar sang Kasuguan sang Dios.

¹⁹ Sing tuhay, ginasunod sang mga gulang ang mga huwaran ni Jehova nga Dios kag ni Jesucristo nga may malulo nga pagkamainawaon. Ang ila importante nga hilikuton amo ang pagpakaon, pagpalig-on, kag pagparepresko sa mga karnero sang Dios. (Isaias 32:​1, 2) Sa baylo nga kontrolon ang mga butang paagi sa madamo nga mga pagsulundan, ginagamit nila ang maayong mga prinsipio sa Pulong sang Dios. Busa, ang hilikuton sang mga gulang amo dapat ang pagpabakod, ang pagdala sing kalipay kag apresasyon sa kaayo ni Jehova sa tagipusuon sang ila kauturan. Kon ang isa ka masigkatumuluo makahimo sing diutay nga sayop, ang isa ka gulang sa masami magalikaw sa pagsaway sa iya kon may iban nga nagapamati. Kon kinahanglanon gid nga hambalon sia, ang malulo nga kaawa magapahulag sa gulang nga tawgon inang isa kag hambalan ang problema nga indi mabatian sang iban. (Ipaanggid ang Mateo 18:15.) Walay sapayan kon daw ano kabudlay pakig-angutan ang isa ka utod, ang pagpalapit sang gulang dapat mangin mapailubon kag mabuligon. Indi gid sia mangita sing mga rason agod paguwaon inang isa gikan sa kongregasyon. Bisan pa kon kinahanglanon nga magporma sing isa ka hudisyal nga komite, ang mga gulang magapakita sing malulo nga pagkaawa sa pagpakig-angot sa tawo nga nadalahig sa mabug-at nga pagpakasala. Ang ila kalulo mahimo nga magabulig sa sinang isa sa paghinulsol.​—⁠2 Timoteo 2:​24-26.

 20. San-o ang dinagakaigo nga mga pagpabutyag sing kaawa, kag ngaa?

²⁰ Apang, may mga tion nga ang isa ka alagad ni Jehova indi magapakita sing kaawa. (Ipaanggid ang Deuteronomio 13:​6-9.) Mahimo nga isa gid ka pagtilaw para sa isa ka Cristiano ang ‘mag-untat sa pagpakig-upod’ sa isa ka suod nga abyan ukon himata nga nadis­fellow­ship. Sa sina nga kaso, importante nga inang isa indi magpadaug sa pagbatyag sing kaluoy. (1 Corinto 5:​11-13) Ina nga kalig-on mahimo pa gani nga magpalig-on sa nakasala nga maghinulsol. Dugang pa, sa pagpakig-angot sa tuhay nga sekso, dapat likawan sang mga Cristiano ang dinagakaigo nga pagpakita sing kaawa nga makadul-ong sa seksuwal nga imoralidad.

 21. Sa anong iban pa nga mga bahin dapat kita magpakita sing malulo nga kaawa, kag ano ang mga benepisyo?

²¹ Kulang ang lugar sa sining artikulo agod hambalan ang tanan sang madamo nga mga bahin diin kinahanglanon ang malulo nga pagkaawa​—⁠sa pagpakig-angot sa mga tigulang, sa mga namatyan, sa mga ginahingabot sang ditumuluo nga mga tiayon. Ang mapisan nga mga gulang dapat man pakitaan sing malulo nga pagkaawa. (1 Timoteo 5:17) Tahura sila kag sakdaga sila. (Hebreo 13:​7, 17) “Tanan kamo . . . magpakita sing malulo nga pagkamainawaon,” sulat ni apostol Pedro. (1 Pedro 3:⁠8) Paagi sa pagpanghikot sing subong sini sa tanan nga kahimtangan nga nagakinahanglan sini, ginasakdag naton ang paghiusa kag kalipay sa kongregasyon kag ginaganyat ang mga tagaguwa sa kamatuoran. Labaw sa tanan, paagi sa sini ginapadunggan naton ang aton malulo kag mainawaon nga Amay, nga si Jehova.

Mga Pamangkot sa Repaso

◻ Paano si Jehova nagapakita sing kaawa sa makasasala nga katawhan?

◻ Ngaa importante ang magpakita sing malulo nga pagkamainawaon?

◻ Ano ang pila ka mga sablag sa aton pagpakita sing malulo nga pagkamainawaon?

◻ Paano dapat pakig-angutan ang mga nagabalatian kag mga ginapung-awan?

◻ Sin-o labi na ang dapat magpakita sing malulo nga pagkamainawaon, kag ngaa?

[Kahon sa pahina 19]

DIMAINAWAON NGA MGA FARISEO

ANG Adlaw nga Inugpahuway gintuyo nga mangin isa ka espirituwal kag pisikal nga pagpakamaayo para sa katawhan sang Dios. Apang, naghimo ang Judiyong relihiosong mga lider sing madamo nga pagsulundan nga nagtamay sa sugo sang Dios tuhoy sa Adlaw nga Inugpahuway kag naghimo sini nga mabug-at para sa katawhan. Halimbawa, kon ang isa naaksidente ukon nag-antos bangod sa balatian, indi sia makabaton sing bulig sa Adlaw nga Inugpahuway luwas kon ang iya kabuhi yara sa katalagman.

Ang isa ka hubon sang mga Fariseo tuman ka istrikto sa pagpatpat sang kasuguan tuhoy sa Adlaw nga Inugpahuway nga ini nagsiling: “Ang isa wala nagalugpay sa mga nagalalaw, ukon nagaduaw sa nagabalatian nga mga tawo sa Adlaw nga Inugpahuway.” Ang iban nga relihiosong mga lider nagtugot sina nga mga pagduaw sa Adlaw nga Inugpahuway apang nagpaandam: “Ginadumilian ang paghibi.”

Sa amo, nagakaigo nga ginpakamalaut ni Jesus ang Judiyong relihiosong mga lider kay ila ginpatumbayaan ang mas importante nga mga bahin sang Kasuguan, subong sang katarungan, gugma, kag kaluoy. Indi katingalahan nga nagsiling sia sa mga Fariseo: “Ginahimo ninyo nga wala sing pulos ang pulong sang Dios bangod sang inyo tradisyon”!​—⁠Marcos 7:​8, 13; Mateo 23:23; Lucas 11:⁠42.

[Piktyur sa pahina 17]

Sa 231 ka kadutaan ginahimo sang mga Saksi ni Jehova ang isa ka wala sing tupong nga hilikuton sang pagkamainawaon sa puluy-an sang mga tawo, sa mga kalye, bisan sa mga bilangguan

[Piktyur sa pahina 18]

Ang pagpadayag sa kasingki, subong sang yara sa TV, nagapaluya sang malulo nga kaawa