Mga Leksion Gikan sa mga Milagro ni Jesus

“KARON sang ikatlo nga adlaw may kasal sa Cana sang Galilea . . . Si Jesus kag ang iya mga disipulo gin-agda man sa sinalusalo sang kasal. Sang maubos ang alak ang iloy ni Jesus nagsiling sa iya: ‘Wala sila sing alak.’ ” Ining hitabo amo ang ginhimuan ni Jesus sang iya una nga milagro.​—⁠Juan 2:​1-3.

Indi bala diutay lamang ukon indi salapakon, yadto nga problema nga dalhon pa sa igtalupangod ni Jesus? Ang isa ka eskolar sang Biblia nagpaathag: “Ang pagkamaabiabihon sa Sidlangan isa ka balaan nga katungdanan . . . Ang matuod nga pagkamaabiabihon, labi na sa isa ka sinalusalo sang kasal, dapat bugana gid. Kon maubusan sing kalan-on kag ilimnon ang isa ka sinalusalo sang kasal, isa ini ka kahuy-anan sa pamilya kag sa mag-asawa.”

Busa naghulag si Jesus. May nakita sia nga “anom ka tadyaw nga napahamtang didto suno sa kinabatasan sang mga Judiyo sa pagpaninlo.” Ang ritwal nga pagpanghugas antes magkaon isa anay ka kinabatasan sa tunga sang mga Judiyo, kag madamo nga tubig ang kinahanglanon para sa tanan nga nagatambong. “Pun-a sing tubig ang mga tadyaw,” sugo ni Jesus sa mga nagaserbe sa mga bisita. Indi si Jesus ang “manugtatap sang sinalusalo,” apang direkta sia kag may awtoridad maghambal. Ang rekord nagasiling: “Sang natilawan sang manugtatap sang sinalusalo ang tubig, nangin alak [ini].”​—⁠Juan 2:​6-9; Marcos 7:⁠3.

Mahimo daw makatilingala nga ang kinaandan nga okasyon subong sang kasal nangin amo pa ang danyag para sa una nga milagro ni Jesus, apang daku ang ginapahayag sining hitabo tuhoy kay Jesus. Isa sia ka soltero, kag sa pila ka okasyon ginpaathag niya sa iya mga disipulo ang mga bentaha sang pagkadiminyo. (Mateo 19:12) Apang, ang iya pagtambong sa isa ka sinalusalo sang kasal nagpakita nga indi sia batok sa pag-asawahay. Balanse sia kag masinakdagon sa kahimusan sang pag-asawahay; gintamod niya ini subong butang nga dungganon sa panulok sang Dios.​—⁠Ipaanggid ang Hebreo 13:⁠4.

Si Jesus indi madinguton sa kaugalingon subong amo ang paglaragway sa iya sang mga pintor sang iglesia. Maathag nga nalipay sia makig-upod sa mga tawo kag wala nagalikaw sa paghililuong. (Ipaanggid ang Lucas 5:29.) Ang iya ginhimo sa amo nangin sulundan para sa iya mga sumulunod. Personal nga ginpakita ni Jesus nga indi sila dapat mangin sobra ka serioso ukon masinulub-on​—⁠nga subong bala ang pagkamatarong nagakahulugan sing paglikaw sa kalipay. Sa kabaliskaran, ang mga Cristiano ginsugo sang ulihi: “Magkalipay pirme sa Ginuo.” (Filipos 4:⁠4) Ang mga Cristiano karon nagahalong gid nga huptan nga rasonable ang paglingawlingaw. May kalipay sila sa pag-alagad sa Dios, apang sa pagsunod sa huwaran ni Jesus, nagalipaylipay sila kon kaisa upod sa iban sa isa ka sosyal nga pagtinipon.

Talupangda man ang malulo nga balatyagon ni Jesus. Indi sia obligado nga maghimo sing milagro. Wala sing tagna tuhoy sa sini nga dapat niya tumanon. Mahimo gid nga natandog si Jesus sang kabalaka sang iya iloy kag sang kahimtangan sang ginakasal. Nahanuklog sia sa ila ginabatyag kag indi niya luyag nga mahuy-an sila. Wala bala ina nagapalig-on sang imo pagsalig nga si Cristo may matuod gid nga interes sa imo​—⁠bisan sa imo mga problema sa adlaw-adlaw?​—⁠Ipaanggid ang Hebreo 4:​14-16.

Sanglit ang tagsa ka tadyaw “makaunod sing duha ka pulo ukon katluan ka galon” sang tubig, ang milagro nga ginhimo ni Jesus nagdalahig sing madamo nga alak​—⁠ayhan 390 litros (105 ka galon)! (Juan 2:⁠6) Ngaa subong gid sina kadamo? Wala ginpalig-on ni Jesus ang pagpahubog, butang nga ginapakamalaut sang Dios. (Efeso 5:18) Sa baylo, nagpakita sia sing diosnon nga kaalwan. Sanglit ang alak isa sadto ka kinaandan nga ilimnon, ang sobra sarang magamit sa iban pa nga mga okasyon.​—⁠Ipaanggid ang Mateo 14:​14-20; 15:​32-37.

Gin-ilog sang unang mga Cristiano ang huwaran sang kaalwan ni Jesus. (Ipaanggid ang Binuhatan 4:​34, 35.) Kag ginapalig-on man karon ang katawhan ni Jehova nga “magmahinatagon.” (Lucas 6:38) Apang, may matagnaon man nga kahulugan ang una nga milagro ni Jesus. Ginapatalupangod sini ang tion sa palaabuton nga ang Dios maalwan nga magaaman sing “piesta sa matambok nga mga butang, piesta sa mga alak sa labod,” bug-os nga magadula sang gutom.​—⁠Isaias 25:⁠6.

Apang, kamusta naman ang madamong milagro nga ginhimo ni Jesus may kaangtanan sa pagpang-ayo? Ano ang matun-an naton gikan sa sini?

Paghimo sing Maayo sa Adlaw nga Inugpahuway

“Tindog ka, dalha ang imo higdaan kag maglakat.” Ginhambal ni Jesus ining mga pulong sa isa ka tawo nga may balatian sa sulod sang 38 ka tuig. Ang rekord sang Ebanghelyo nagapadayon: “Kag sa gilayon nag-ayo ang tawo, kag nagdala sang iya higdaan kag naglakat.” Sing makapakibot, indi tanan nahamuot sa sining hitabo. Ang rekord nagasiling: “Ginhingabot sang mga Judiyo si Jesus, bangod nga ginhimo niya ini sa Adlaw nga Inugpahuway.”​—⁠Juan 5:​1-9, 16.

Ang Adlaw nga Inugpahuway dapat nga isa ka adlaw sang pahuway kag pagkalipay para sa tanan. (Exodo 20:​8-11) Apang, sang adlaw ni Jesus, nangin isa ini ka mapiguson, hinimo-sang-tawo nga mga pagsulundan. Ang eskolar nga si Alfred Eder­sheim nagsulat nga sa malaba nga mga bahin sang Talmud tuhoy sa Adlaw nga Inugpahuway nga sugo, “ang mga butang serioso nga ginahambalan subong mga butang nga importante gid sa relihion, mga butang nga malaka binagbinagon sing serioso sang isa ka tawo nga may kaligdong.” (The Life and Times of Jesus the Messiah) Ginhatagan sang mga rabbi sing kabuhi-kag-kamatayon nga importansia ang witiwiti, indi rasonable nga mga pagsulundan nga nagkontrol sang halos tanan nga bahin sang kabuhi sang isa ka Judiyo​—⁠sa masami wala nagasapak sang balatyagon sang tawo. Ang isa ka pagsulundan sa Adlaw nga Inugpahuway nagsugo: “Kon ang isa ka tawo matumbahan sang isa ka tinukod kag duhaduha kon sia yadto didto ukon wala, ukon kon bala buhi pa sia ukon patay na, ukon bala gentil sia ukon Israelinhon, mahimo nga hawanon nila ang narumpag nga mga butang sa ibabaw niya. Kon makita nila nga buhi pa sia mahimo nga hawanon nila sing dugang pa ang narumpag nga mga butang sa ibabaw niya; apang kon patay na [sia], pabay-an na lang nila sia.”​—⁠Tulun-an sang Yoma 8:​7, The Mishnah, nga ginbadbad ni Her­bert ­Danby.

Paano gintamod ni Jesus yadtong mga pagsinuay sa diutay nga mga butang sang kasuguan? Sang ginmulay sia bangod sang iya pagpang-ayo sa Adlaw nga Inugpahuway, sia nagsiling: “Ang akon Amay nagapangabudlay tubtob karon, kag nagapangabudlay ako.” (Juan 5:17) Si Jesus wala magtrabaho agod magmanggaranon. Sa baylo, ginahimo niya ang kabubut-on sang Dios. Subong nga ang mga Levinhon ginatugutan sa pagpadayon sang ila balaan nga pag-alagad sa Adlaw nga Inugpahuway, may kinamatarong si Jesus nga himuon ang iya mga katungdanan nga ginhatag sang Dios sa iya subong Mesias nga wala ­nagasupak sa Kasuguan sang Dios.​—⁠Mateo 12:⁠5.

Ang pagpang-ayo ni Jesus sa Adlaw nga Inugpahuway nagbuyagyag man sa Judiyong mga escriba kag mga Fariseo subong ‘lakas katarong’​—⁠estrikto kag indi balanse sa ila panghunahuna. (Manugwali 7:16) Sa pagkamatuod, indi kabubut-on sang Dios nga ang maayong mga buhat himuon lamang sa pila ka adlaw sang semana; wala man gintuyo sang Dios ang Adlaw nga Inugpahuway nga mangin isa ka walay pulos nga pagsulundan. Si Jesus nagsiling sa Marcos 2:27: “Ang adlaw nga inugpahuway ginhimo para sa tawo, kag indi ang tawo para sa adlaw nga inugpahuway.” Ginhigugma ni Jesus ang katawhan, indi ang estrikto nga mga pagsulundan.

Sa amo, maayo para sa mga Cristiano karon nga indi magsobra ka estrikto ukon magsandig pirme sa pagsulundan. Ang mga may awtoridad sa kongregasyon nagalikaw nga pabug-atan ang iban sing sobra nga hinimo-sang-tawo nga mga pagsulundan kag mga talaksan. Ang huwaran ni Jesus nagapalig-on man sa aton nga mangita sing mga kahigayunan sa paghimo sing maayo. Halimbawa, indi gid mangatarungan ang isa ka Cristiano nga ipaambit niya ang mga kamatuoran sang Biblia sa tion lamang nga sia pormal nga nagapakigbahin sa pamalaybalay nga ministeryo ukon kon sia nagapamulongpulong. Ang Cristiano, siling ni apostol Pedro, dapat “pirme handa sa pagpangapin sa atubangan sang kada isa nga nagapangayo sa inyo sing rason para sa paglaum nga yara sa inyo.” (1 Pedro 3:15) Ang paghimo sing maayo wala sing ginapili nga tion.

Leksion Tuhoy sa Pagkaawa

Ang isa pa ka talalupangdon nga milagro narekord sa Lucas 7:​11-17. Suno sa rekord, si Jesus “nagkadto sa isa ka siudad nga gintawag Nain, kag ang iya mga disipulo kag ang dakung kadam-an nag-upod sa iya.” Tubtob sa karon, makita pa gihapon ang mga lulubngan sa bagatnan-sidlangan sang modernong Arabo nga minuro sang Nein. “Sang naghinampot sia sa gawang sang siudad,” nasugata niya ang isa ka magahod nga esena. “Yari karon! may patay nga ginadala paguwa, ang bugtong nga lalaking anak sang iya iloy. Luwas pa, isa sia ka balo. Upod man sa iya ang daku nga kadam-an gikan sa siudad.” Si H. B. Tris­tram nagsiling nga “ang paagi sang paglubong wala magbag-o” halin sang una, nga nagadugang pa: “Nakita ko ang mga babayi nga nagasunod sa lungon, nga ginapangunahan sang propesyonal nga mga babayi nga manughaya. Ginawaras nila ang ila mga butkon, ginagan-it ang ila mga buhok, upod ang pinakamagaris nga pagpakita sing kasubo, kag ginasinggitan ang ngalan sang napatay.”​—⁠East­ern Customs in Bible Lands.

Sa tunga sinang magahod nga kinagubot nagalakat ang isa ka nagapangalisod nga babayi nga balo nga nagapabanaag sa iya nawong sing daku nga kalisod. Bangod balo na sia, gintamod niya ang iya anak nga lalaki subong, suno sa mga pulong sang awtor nga si Her­bert Lock­yer, “suporta sa iya katigulangon, kag paumpaw sa iya kasubo​—⁠ang suporta kag haligi sang puluy-an. Sa pagkapatay sang iya bugtong nga anak, nadula ang nabilin na lang nga suporta.” (All the Miracles of the Bible) Ano ang reaksion ni Jesus? Suno sa talunsay nga mga pulong ni Lucas, “sang nakita sia sang Ginuo, natandog sia sang kaluoy sa iya, kag nagsiling sa iya: ‘Dili ka maghibi.’ ” Ang ekspresyon nga ‘natandog sang kaluoy’ ginkuha sa isa ka Griegong tinaga nga sing literal nagakahulugan sing “mga tinai.” Buot silingon “natandog sing tudok ang balatyagon.” (Vine’s Expository Dictionary of Old and New Testament Words) Huo, natandog ang tudok nga balatyagon ni Jesus.

Ang iloy mismo ni Jesus mahimo gid nga isa ka balo sa sini nga tion, gani mahimo nga nahangpan niya ang kasakit sang pagpangalisod bangod sang pagkapatay sang iya nag-ayop nga amay, nga si Jose. (Ipaanggid ang Juan 19:​25-27.) Indi na dapat nga makitluoy pa ang babayi nga balo kay Jesus. Sa dira gid, “nagpalapit sia kag gintandog ang liyaliya,” walay sapayan sang kamatuoran nga sa idalom sang Mosaikong kasuguan ang pagtandog sa patay magahimo sa isa nga dimatinlo. (Numeros 19:11) Paagi sa iya milagruso nga mga gahom, sarang madula ni Jesus ang kabangdanan mismo sang pagkadimatinlo! “Nagsiling sia: ‘Pamatan-on, nagasiling ako sa imo, Bangon ka!’ Kag ang patay nagbangon, kag nagsugod sa paghambal, kag ginhatag niya sia sa iya iloy.”

Daw ano ini ka makatalandog nga leksion tuhoy sa kaawa! Indi dapat ilugon sang mga Cristiano ang walay gugma, malas-ay nga mga panimuot nga dayag sa sining “katapusan nga mga adlaw.” (2 Timoteo 3:​1-5) Sa kabaliskaran, ang 1 Pedro 3:8 nagalaygay: “Sa katapusan, kamo tanan mag-isa sing hunahuna, nga nagapakita sing kahanuklog, utudnon nga gugma, mapinalanggaon nga kaawa.” Kon ang isa ka abyan namatyan ukon nagamasakit sing grabe, indi kita makahimo sing pagbanhaw ukon ayuhon ang nagamasakit. Apang makatanyag kita sing praktikal nga bulig kag paumpaw, ayhan paagi lamang sa pag-unong kag paghibi upod sa ila.​—⁠Roma 12:⁠15.

Ining dramatiko nga pagbanhaw nga ginhimo ni Jesus nagatudlo man sa palaabuton​—⁠isa ka tion nga ang “tanan nga yara sa handumanan nga lulubngan magapamati sa iya tingog kag magaguwa”! (Juan 5:​28, 29) Sa bug-os nga duta, personal nga maeksperiensiahan sang mga namatyan ang kaluoy ni Jesus kon ang nagtaliwan nga mga iloy, mga amay, kabataan, kag mga abyan magabalik gikan sa lulubngan!

Ang mga Leksion sang mga Milagro

Maathag, nian, nga ang mga milagro ni Jesus indi lamang makakulunyag nga pagpasundayag sing gahom. Naghimaya ini sa Dios, nagahatag sing sulundan para sa mga Cristiano nga ginalaygayan nga ‘maghimaya sa Dios.’ (Roma 15:⁠6) Ginpalig-on sini ang paghimo sing maayo, ang pagpakita sing kaalwan, ang pagpasundayag sing kaawa. Kapin pa ka importante, isa ini ka laragway sang gamhanan nga mga buhat nga pagahimuon sa tion sang Milenyo nga Paggahom ni Cristo.

Sang sa duta sia, ginhimo ni Jesus ang iya gamhanan nga mga buhat sa diutay lamang nga duog. (Mateo 15:24) Subong ginhimaya nga Hari, ang iya ginharian magasakop sang bug-os nga duta! (Salmo 72:⁠8) Sadto anay, ang mga nakabaton sang iya milagruso nga mga pagpang-ayo kag mga pagbanhaw napatay sang ulihi. Sa idalom sang iya langitnon nga pagkahari, ang sala kag kamatayon pagadulaon sing bug-os, magabukas sang dalan para sa kabuhi nga walay katapusan. (Roma 6:23; Bugna 21:​3, 4) Huo, ang mga milagro ni Jesus nagatudlo sa isa ka mahimayaon nga palaabuton. Ang mga Saksi ni Jehova nakabulig sa minilyon sa pagpalambo sing matuod nga paglaum nga mangin bahin sini. Tubtob wala pa ina, matahom gid nga laragway sang mahanabo sa indi madugay ang ginahatag sang mga milagro ni Jesucristo!

[Retrato sa pahina 7]

Ginhimo ni Jesus nga alak ang tubig