Pagsunod sa mga Tikang sang Akon mga Ginikanan

PANUGIRON NI HILDA PADGETT

“Ang akon kabuhi nadedikar sa pag-alagad sa Labing Mataas,” siling sang report sa pamantalaan, “kag indi ako makaalagad sa duha ka agalon.” Gikan yadtong mga pulong sa akon sulat sa mga awtoridad sang Ministry of Labour and National Service sang Britanya sang 1941 nga nagapangatarungan sang akon pagpamalibad sa ila mando nga mangalagad sa ospital sa tion sang Inaway Kalibutanon II. Wala madugay pagkatapos sadto ginpamatbatan ako nga nakasala kag ginsentensiahan sing tatlo ka bulan nga pagkabilanggo bangod sang akon pagpamalibad.

ANO ang nagdul-ong sa akon sa sining problema? Indi, indi bangod sang pila ka hinurushuros ukon rebelyuso nga paggawi sang isa ka pamatan-on. Sa baylo, kutob pa ini sang bata pa ako.

Ang Kakugi ni Tatay Para sa Ginharian

Natawo ako sang Hunyo 5, 1914, sa Hors­forth malapit sa ­Leeds, sa aminhan sang Inglaterra. Ang akon mga ginikanan, sanday At­kinson kag Pat­tie Padgett, mga manunudlo sa Sunday-school kag mga katapo sang koro sang Primi­tive Meth­od­ist nga Simbahan diin nagatokar sing organ si Tatay. Sang lapsag pa ako, malipayon ang amon puluy-an luwas lamang sa isa ka butang. Nabalaka si Tatay sa mga kahimtangan sang kalibutan. Ginpakamalaut niya ang inaway kag kasingki kag nagapati sa sugo sang Biblia: “Dili ka magpatay.”​—⁠Exodo 20:​13, King James Version.

Sang 1915, ginpalig-on ang tanan lamharon nga mga lalaki nga magbuylog sing boluntaryo sa hangaway kag busa likawan nga piliton pa. Upod ang pila ka pangduhaduha nagtindog si Tatay bug-os nga adlaw sa ulanan nga nagahulat sang iya turno sa pagpalista subong isa ka soldado. Pagkasunod gid nga adlaw, nagbag-o ang iya bug-os nga kabuhi!

Samtang nagatrabaho subong tubero sa isa ka daku nga balay, nagpakighambal sia sa iban nga mga trabahador tuhoy sa mga hitabo sa kalibutan. Ginhatagan sia sang hardinero sing gamay nga ­tract, nga Gathering the Lord’s Jewels. Gindala ini ni Tatay pauli, ginbasa ini, kag ginbasa liwat. “Kon amo ini ang kamatuoran,” siling niya, “nian butig ang tanan nga iban pa.” Pagkasunod nga adlaw, nagpangabay sia sing dugang nga impormasyon, kag sa sulod sang tatlo ka semana bug-os nga gab-i tubtob sa kaagahon, gintun-an niya ang Biblia. Nahibal-an niya nga iya nasalapuan ang kamatuoran! Domingo, Enero 2, 1916, nagasiling ang iya lista-adlawan: “Nagkadto sa Simbahan sang aga, nagkadto sa I.B.S.⁠A. [In­ter­na­tional Bi­ble Stu­dents As­so­cia­tion, subong amo ang pagkilala anay sa mga Saksi ni Jehova sa Inglaterra] sa gab-i​—⁠gintun-an ang Hebreo 6:​9-20​—⁠ang akon una nga pagduaw sa mga kauturan.”

Wala madugay nagluntad ang pagpamatok. Ginhunahuna sang amon mga himata kag kaupdanan sa simbahan nga nagbuang si Tatay. Apang nakadesisyon na sia. Ang mga miting kag pagtuon amo ang panguna nga mga butang sa iya kabuhi, kag pag-abot sang Marso ginsimbuluhan niya ang iya dedikasyon kay Jehova paagi sa pagpabawtismo sa tubig. Pagkatapos sang pila ka semana nga nagaisahanon si Tatay sa pagkadto sa mga miting, nag-untat si Nanay sa pagpamalibad nga magkadto sa mga miting. Ginbutang niya ako sa akon kareton kag ginlakat ang 8 kilometros padulong sa ­Leeds, nga nag-abot pagkatapos lang gid sang miting. Mahanduraw mo ang kalipay ni Tatay. Sugod sadto, nahiusa ang amon pamilya sa pag-alagad kay Jehova.

Mabudlay gid ang kahimtangan ni Tatay​—⁠isa ka boluntaryo nga hangaway kag nian sa sulod sang pila ka semana, isa nga nagadumili sa pag-alagad sa armadong kusog bangod sang relihioso nga mga prinsipio. Sang ginpatawag sia sa serbisyo nagpamalibad sia sa pag-uyat sing pusil, kag sang Hulyo 1916 gin-atubang niya ang una sang lima ka kaso sa korte-militar, kag ginsentensiahan sing 90 ka adlaw nga pagkabilanggo. Pagkatapos mapangalagaran ang una nga sentensia, may duha ka semana nga kahilwayan si Tatay, nga ginsundan sing isa pa ka kaso sa korte-militar kag dugang nga 90 ka adlaw nga pagkabilanggo. Pagkatapos sang iya ikaduha nga pagkabilanggo, ginsaylo sia sa Ro­yal Ar­my Me­dical ­Corps, kag sang Pebrero 12, 1917, nagpanakayon sia paagi sa sakayan sang mga soldado padulong sa ­Rouen, Pransya. Ginaasoy sang iya lista-adlawan nga labi sia nga natak-an kada adlaw didto bangod sang iya kahimtangan. Narealisar niya nga ginaatipan lamang niya ang pilason nga mga soldado agod makapakig-away liwat.

Sa liwat namalibad sia sa pagkooperar. Sa sining tion ginsentensiahan sia sang korte-militar sing lima ka tuig sa Britaniko nga bilangguan sang militar sa ­Rouen. Sang nangabay si Tatay nga sayluhon sa sibil nga prisuhan subong isa nga nagadumili sa pag-alagad sa militar bangod sang relihioso nga mga prinsipio, ginsilutan sia sing tatlo ka bulan nga tinapay kag tubig nga kalan-on, nga ginasundan sing kinaandan nga kalan-on sang priso tubtob nga magbug-at sia; nian ginsulit ining pagpakaon. Ginabaklid sia nga napusasan sa likod kon adlaw kag napusasan sa atubangan kon gab-i kag kon tigkalaon. Sa bug-os niya nga kabuhi, yara ang pinalian sa iya mga butkon bangod sang gutok nga pusas, nga nagtuga sing nagahubag nga mga pilas. Ginkadenahan man sia sa tiil nga gin-angot sa iya hawak.

Ginhimo sang mga awtoridad sa militar ang tanan nila nga masarangan agod mapahuyang sia sa iya determinasyon apang sa wala sing kapuslanan. Ginkuha ang iya Biblia kag mga libro. Wala sia sing nabaton nga sulat gikan sa puluy-an, kag indi man sia makapadala. Pagkatapos sing duha ka tuig ginpakita niya ang iya pagkasinsero paagi sa indi pagkaon. Sa sulod sang pito ka adlaw gintuman niya ang iya desisyon, wala magkaon kag wala mag-inom, nga nagresulta sa pagsaylo sa iya sa ospital sang prisuhan, nga nagamasakit sing malubha. Ginpamatud-an niya ang iya pagkasinsero, bisan pa diutayan lang sia mapatay subong resulta. Sang ulihi nga tinuig gin-ako niya nga nagsayop sia sa paghalit sang iya kabuhi sa sining paagi, kag indi na gid sia magliwat.

Natapos ang inaway sang Nobiembre 1918 nga nabilanggo pa gihapon si Tatay sa ­Rouen, apang sang maaga nga bahin sang masunod nga tuig, ginsaylo sia sa sibil nga prisuhan sa Inglaterra. Handurawa lamang ang iya kalipay sa pagbaton sang tanan nga sulat ni Nanay kag mga pinutos nga nasupot, upod sa iya hamili nga Biblia kag mga libro! Gindala sia sa Win­ches­ter Prison, diin nakilala niya ang isa ka lamharon nga utod nga lalaki nga ang inagihan sa tion sang inaway pareho man sa iya. Sia amo si Frank Platt, nga sang ulihi nag-alagad sa London Bethel sa sulod sang madamong tinuig. Naghimo sila sing kahimusan nga magkitaay sa masunod nga adlaw, apang sa amo nga tion nasaylo na si Frank sa iban nga duog.

Sang Abril 12, 1919, nakabaton si Nanay sing telegrama: “Hallelujah! Manugpauli​—⁠nagatawag sa London.” Daw ano nga tion sang pagkasadya pagkatapos sang tatlo ka tuig nga pagtilaw, kabudlayan, kag pagbulagay! Ang una nga ginhunahuna ni Tatay amo ang pagtawag kag magpakigkita sa mga kauturan sa London Bethel. Sa 34 Craven Terrace, gin-abiabi sia sing mahigugmaon. Pagkatapos makapaligo kag makapamarbas kag nag-ilis sing hinulaman nga panapton kag kalo, nagpauli si Tatay. Mahanduraw mo bala ang amon pagkitaay? Malapit na ako maglima ka tuig sadto, kag wala ko sia madumduman.

Ang una nga miting nga gintambungan ni Tatay pagkatapos nga nahilway sia amo ang Memoryal. Samtang nagapasaka sa tilipunan, ang una nga utod nga iya nasugata amo si Frank Platt, nga ginsaylo sa isa ka ospital sang militar sa ­Leeds. Malipayon gid sila nga nagsugiray sang ila mga eksperiensia! Kutob sadto pagkatapos nga ginhilway sia, ginhimo ni Frank nga iya ikaduha nga puluy-an ang amon balay.

Matutom nga Pag-alagad ni Nanay

Sa mga tion nga wala si Tatay sa balay, nagapanglabada si Nanay agod dugangan ang iya hawot-hawot nga kita gikan sa gobierno. Maalwan gid ang mga kauturan sa amon. Kada pila ka semana isa sang mga gulang sa kongregasyon ang nagadaho sa iya sing sobre nga nagaunod sing indi mahibal-an nga regalo. Pirme ginasiling sang akon iloy nga ang gugma sang mga kauturan ang nagpasuod sa iya kay Jehova kag nagbulig sa iya nga mabatas yadtong mga tion sang pagtilaw. Matutom sia nga nagtambong sa mga miting sa kongregasyon bisan wala si Tatay. Ang iya pinakamabudlay nga pagtilaw amo ang, sing kapin sa isa ka tuig, wala sia makahibalo kon bala buhi pa si Tatay ukon patay na. Subong dugang pa nga kabug-atan, sang 1918 nagbalatian kami ni Nanay sing trangkaso Espanyola. Nagakapatay ang mga tawo sa palibot namon. Ang mga kaingod nga nagakadto sa pagbulig sa mga kaingod nagakalatnan sing balatian kag nagakapatay. Walay duhaduha nga ang kakulang sa pagkaon sadtong tion nag-amot sa pagpanubo sing resistensia sang mga tawo sa inpeksion.

Ang mga pulong ni apostol Pedro nangin matuod gid sa amon pamilya: “Sa tapos nga nakaantos kamo sa malip-ot nga tion, . . . ang Dios . . . magapalig-on sa inyo, magapabakod sia sa inyo”! (1 Pedro 5:10) Ang pag-antos sang akon mga ginikanan nagbulig sa ila nga mapalambo ang dimationg nga pagtuo kay Jehova, isa ka bug-os nga pasalig nga sia nagaulikid sa amon kag wala sing bisan ano nga makapahamulag sa amon gikan sa gugma sang Dios. Ginpakamaayo gid ako nga ginpadaku sa sinang pagtuo.​—⁠Roma 8:​38, 39; 1 Pedro 5:⁠7.

Pag-alagad sang Pamatan-on Pa

Pagkatapos mahilway si Tatay, nangin sentro sang amon kabuhi ang pag-alagad sa Ginharian. Wala ako sing nadumduman nga nawasi ko ang isa ka miting, luwas kon nagabalatian. Wala madugay pagkatapos nga nakapauli si Tatay, ginbaligya niya ang iya ­plate nga kamera kag ang bulawan nga pulsiras ni Nanay agod may kuwarta nga gamiton sa pagtambong sa kombension. Bisan pa nga indi kami makasarang magbakasyon, wala gid namon ginwasi ining mga pagtilipon, lakip na yadtong sa London.

Ang una nga duha ukon tatlo ka tuig pagkatapos sang inaway mga tion sang kaumpawan. Ginhingalitan nanday Tatay kag Nanay ang tanan nga kahigayunan sa pagpakig-upod kag pagtilipon. Madumduman ko ang pagduaw namon sa iban nga utod nga mga lalaki kag mga babayi, kag ako, subong isa ka bata, nagapungko nga nagakolor ukon nagadrowing samtang ang mga hamtong nagaistoryahanay sing madamong inoras tuhoy sa bag-o nga paghangop sa kamatuoran. Ang paghambalanay sing tingob, ang pag-inamba nga ginaupdan sang tokar sang organ, ang makalilipay nga pagpakig-upod, nakapahalipay kag nakaparepresko sa ila.

Estrikto kaayo ang akon mga ginikanan sa paghanas sa akon. Sa eskwelahan nabantugan ako nga tuhay, bisan sang lima pa lamang ako ka tuig, ginadala ang akon “Bag-o nga Testamento” agod basahon samtang ang klase nagatuon sing katekismo. Sang ulihi ginparada ako sa atubangan sang bug-os nga eskwelahan subong isa nga “nagadumili sa pag-alagad sa militar bangod sang relihioso nga mga prinsipio” bangod indi ako makigbahin sa pagsaulog sang Remembrance Day.a Wala ko ginhinulsuli ang pagpadaku sa akon. Sa katunayan, isa yadto ka proteksion kag nagpahapos nga makapabilin sa ‘makitid nga dalan.’ Bisan diin magkadto ang akon mga ginikanan, sa mga miting ukon sa pag-alagad, didto man ako.​—⁠Mateo 7:​13, 14.

Labi ko gid nga madumduman yadtong Domingo sang aga sang una ko nga pagbantala sing kinaugalingon. Dose anyos pa lamang ako sadto. Sang tin-edyer pa ako, madumduman ko nga ginsiling ko sang isa ka Domingo sang aga nga mapabilin ako sa balay. Wala sing nag-akig sa akon ukon nagpilit sa akon nga magbantala, gani nagpulupungko ako sa hardin nga nagatuon sang akon Biblia apang wala ako malipay. Pagkatapos sang isa ukon duha ka semana nga amo sini, ginsilingan ko si Tatay: “Sa banta ko maupod ako sa imo subong nga aga!” Sugod sadto padayon ako nga nag-uswag sa espirituwal.

Makalilipay gid yadtong tuig sang 1931! Wala lamang namon mabaton ang amon bag-o nga ngalan, nga mga Saksi ni Jehova, kundi ginbawtismuhan ako sa tion sang pungsudnon nga kombension sa Alexandra Palace, London. Indi ko gid malipatan yadto nga adlaw. Nagasuksok kami sing malaba, itom nga panapton, kag ang ginasuksok ko basa bangod nagamit na ini sang isa pa ka kandidato!

Ang akon handum subong isa ka bata amo pirme nga mangin isa ka col­por­teur, subong nga amo ang pagtawag anay sa bug-os tion nga manugbantala. Samtang nagadaku ako, nabatyagan ko nga kinahanglan maghimo sing dugang pa sa pag-alagad kay Jehova. Gani sang Marso 1933, sa edad nga 18, nagbuylog ako sa bug-os tion nga mga alagad.

Pinasahi gid nga kalipay para sa amon ang mga “Pioneer Week” sa pila ka dalagku nga mga siudad, nga sa amo nga tion tubtob sa isa ka dosena nga bug-os tion nga mga alagad ang nagatingob, nagadayon sa lokal nga mga utod, kag nagapanghikot subong isa ka grupo. Ginhatagan namon sing mga pulyeto ang relihioso nga mga lider kag iban pa kilala nga mga tawo. Nagakinahanglan sing kaisog ang pagpalapit sa ila. Masami nga ginayaguta kami, kag madamo sa amon ang ginasirahan gulpi sing pwertahan. Wala namon ini ginsapak, kay daku gid ang amon kakunyag amo kon ngaa nagkasadya kami nga ginmulay kami tungod kay Cristo.​—⁠Mateo 5:​11, 12.

Sa Leeds ginkombinar namon ang isa ka bangka, traysikol, kag ang motorsiklo kag side­car ni Tatay, kag sang ulihi ang iya kotse agod kargahan sing ponograpo nga may dalagku nga mga loud­speaker. Ginadala sang duha ka utod nga lalaki ang ponograpo sa kalye, ginapatokar ang musika agod buyukon ang mga tawo nga magguwa sa ila mga ganhaan, nian ginasundan ini sing lima ka minutos nga pamulungpulong nga ginrekord ni Utod Rutherford. Pagkatapos nagasaylo sila sa masunod nga kalye samtang kami, nga mga manugbantala, nagasunod kag nagatanyag sing mga literatura sa Biblia.

Sa sulod sang tinuig, kada Domingo sang gab-i pagkatapos sang miting, nagakadto kami sa ­Town Hall ­Square diin may isa ka Speaker’s Corner kag nagasuporta kami paagi sa pagpamati sa isa sang mga ginrekord nga isa ka oras nga pamulongpulong ni Utod Ruther­ford, nga nagapanghatag sing gamay nga balasahon kag ginapakig-angutan ang nagapakita sing interes. Nagbantog kami didto. Bisan ang mga pulis nagataha sa amon. Sang isa ka gab-i nagatipon kami subong sang kinaandan sang, sa unhan, nabatian namon ang tunog sang mga tambor kag banda. Wala madugay isa ka parada sang mga isa ka gatos ka katapo sang Pasismo ang nagamartsa sa dalan. Nagmartsa sila palibot sa likuran namon kag nagdulog nga ginapataas ang ila mga bandera. Nag-untat ang banda, kag nangibabaw ang kalinong sang naglanog ang tingog ni Utod Ruther­ford: “Pabayai sila nga magsaludo sa ila mga bandera kag magsaludo sa mga tawo kon luyag nila. Magasimba kag magasaludo lamang kita kay Jehova nga aton Dios!” Nahangawa kami sa kon ano ang masunod nga matabo! Wala sing natabo, luwas lamang nga napanaksihan sila, kag ginpahipos sila sang mga pulis agod mabatian namon ang pamulongpulong.

Sa amo nga tion nangin mapuslanon ang ponograpo sa amon paghatag sing dakung panaksi. Sa mga ganhaan, ginabantayan namon sing mahalungon ang plaka agod palig-unon ang mga tawo sa pagpamati sa bug-os lima ka minutos nga ginrekord nga sermon sa Biblia. Masami kami nga ginapasulod sang mga tagbalay kag luyag nila nga magbalik kami kag magpabati sing dugang nga mga plaka.

Ang tuig 1939 tuman kasako kag mabudlay, bangod sang lapnag nga pagpamatok kag kasingki. Antes sang isa sang amon mga kombension, gin-eskandalo kag ginsinggitan sang akig nga mga grupo sa kalye ang mga kauturan. Gani sa tion sang asambleya, nagplano sila sing isa ka espesyal nga grupo sang mga kauturan nga lalaki nga nagasakay sa kotse sa pagbantala sa magamo nga mga lugar samtang ang mga utod nga babayi kag ang iban nga utod nga lalaki nagakadto sa mas matawhay nga mga duog. Nagapanghikot upod sa isa ka grupo sa isa ka kalye, nagsulod ako sa makitid nga dalan agod duawon ang mga balay sa likod. Samtang yara sa ganhaan, nakabati ako sing kinagula​—⁠may nagasinggit kag nagapanawag sa kalye. Ginpadayon ko lang ang pagpakighambal sa tawo sa ganhaan, ginapalawig ang paghambalanay tubtob nga naglinong. Nian naglakat ako kag nagguwa sa kalye kag sadto ko narealisar nga nagkinarankaran gali ang kauturan nga mga lalaki kag mga babayi sang wala nila ako makita! Apang, sang ulihi sinang adlaw, gintinguhaan sang mga nagapanggamo nga tublagon ang amon miting, apang gindul-ong sila pagguwa sang mga utod nga lalaki.

Nag-abot ang Inaway Kalibutanon II

Sa karon ang pilit nga pagpalista ginpatuman, kag madamo lamharon nga utod nga lalaki ang ginbilanggo sa sulod sang 3 tubtob 12 ka bulan. Nian nakabaton si Tatay sing pahanugot sa pagduaw sa mga kauturan sa prisuhan. Kada Domingo nagadumala sia sing pagtinuon sa Lalantawan sa lokal nga bilangguan. Kon Mierkoles sang gab-i ginaduaw niya ang kauturan nga mga lalaki sa ila selda. Bangod may malawig kag mabudlay nga inagihan sia mismo sa prisuhan sang una nga inaway kalibutanon, nalipay gid sia nga mangalagad sa sadtong nagaeksperiensia sing kaangay nga pagtilaw. Ginhimo niya ini sa sulod sang 20 ka tuig, tubtob nga napatay sia sang 1959.

Sang 1941 naanad na kami sa pagtamay kag pagpamatok nga ginpakita sang madamo nga tawo bangod sang amon pagkaneutral. Indi mahapos ang magtindog sa kalye nga may mga magasin kag atubangon ini. Sa amo man nga tion, nagkalipay kami sa pagbulig sa mga refu­gee nga nagapuyo sa amon duog. Mga taga-Latvia, taga-Poland, taga-Estonia, mga Aleman​—⁠makalilipay gid nga makita sila nga nasadyahan sang makita nila Ang Lalantawan ukon ang Consolation (karon Magmata) sa ila kaugalingon nga lenguwahe!

Nian ginkasaba ako bangod sang akon neutral nga tindog sa tion sang Inaway Kalibutanon II. Nakandaduhan sa akon selda sa sulod sang 19 ka oras sa kada 24 ka oras, nasapwan ko nga mabudlay ang kabuhi sang priso. Ang una nga tatlo ka adlaw amo ang pinakamabudlay, kay nagaisahanon ako. Sa ikap-at nga adlaw, ginpatawag ako sa opisina sang gobernador diin nakita ko ang duha pa ka babayi nga nagatindog. Ang isa naghutik sa akon: “Ngaa napriso ka?” Nagsiling ako: “Matingala ka kon mahibaluan mo.” Namangkot sia sing pahutik: “JW ka bala?” Nabatian sia sang isa pa ka babayi kag ginpamangkot kami nga duha: “Mga JW bala kamo?” kag naghaksanay kami nga tatlo. Wala na kami nagaisahanon!

Makalilipay nga Pag-alagad sing Bug-os Tion

Nahilway sa bilangguan, ginpadayon ko ang akon bug-os tion nga pag-alagad, kag nagbuylog sa akon ang isa ka 16 anyos lamharon nga babayi nga bag-o lang mag-untat sa pag-eskwela. Nagsaylo kami sa Ilkley, isa ka matahom nga banwa sa panghigaron sang York­shire ­Dales. Sa sulod sang bug-os anom ka bulan, nanikasog gid kami nga makakita sing isa ka nagakabagay nga duog para sa amon mga miting. Sang ulihi gin-arkilahan namon ang isa ka magamay nga garahe, nga ginhimo namon nga isa ka Kingdom Hall. Ginbuligan kami ni Tatay sa sining mabudlay nga hilikuton, pagtakod sing mga suga kag sistema sang pangpainit. Ginpunihan man niya ang tinukod para sa amon. Sa sulod sang mga tinuig ginsakdag kami sang malapit nga kongregasyon, paagi sa pagpadala sa mga utod nga lalaki kada semana sa paghatag sing pamulongpulong publiko. Bangod sang pagpakamaayo ni Jehova nag-uswag kami kag nagtubo, kag sang ulihi natukod ang isa ka kongregasyon.

Sang Enero 1959, hinali nga nagbalatian si Tatay. Ginpapauli ako, kag napatay sia sang Abril. Mabudlay ang nagsunod nga mga tinuig. Naglain ang panglawas ni Nanay subong man ang iya memorya, nga nagpabudlay sa akon. Apang ang espiritu ni Jehova nagbulig sa akon nga makapadayon, kag gin-atipan ko sia tubtob napatay sia sang 1963.

May madamo ako nga pagpakamaayo gikan kay Jehova sa sulod sang mga tinuig. Tuman gid ini kadamo kon isipon. Nakita ko ang pagtubo kag pagbahin sing apat ka beses sang akon ginabuylugan nga kongregasyon, nagapadala sing mga manugbantala kag mga payunir, ang pila subong mga misyonero sa malayo subong sa Bolivia, Laos, kag Uganda. Wala magtugot ang mga sirkunstansia nga makapamana ukon makapamilya ako. Wala ini nagpasubo sa akon; tuman gid ako kasako. Bisan pa nga wala ako sing mga himata sa unod, may madamo ako nga anak kag mga apo sa Ginuo, ginatos pa gani.​—⁠Marcos 10:​29, 30.

Masami ko nga ginaagda ang lamharon nga mga payunir kag iban pa nga mga pamatan-on sa akon puluy-an agod magkalipay sa Cristianong paghiliupod. Nagahanda kami sing tingob para sa Pagtinuon sa Lalantawan. Nagasugiray man kami sing mga eksperiensia kag nagaamba sing mga ambahanon sang Ginharian, subong amo ang naandan nga ginhimo sang akon mga ginikanan. Ginapalibutan sing masinadyahon nga grupo sang mga pamatan-on, nahuptan ko ang bataon kag malipayon nga panimuot. Wala na sing mas maayo pa nga kabuhi para sa akon sangsa magpayunir. Mapinasalamaton gid ako kay Jehova nga may pribilehiyo ako nga magsunod sa mga tikang sang akon mga ginikanan. Nagapangamuyo ako nga makapadayon ako sa pag-alagad kay Jehova tubtob sa walay katapusan.

[Footnote]

[Retrato sa pahina 23]

Si Hilda Padgett upod sa iya mga ginikanan, sanday Atkinson kag Pattie

[Retrato sa pahina 23]

Ang tract nga nagpainteres kay Tatay sa kamatuoran