Nakasapo Sila sing Paghidait sa Magamo nga Kalibutan

ANG panghapin sining magasin nagalaragway sing danyag sang mainit nga inaway sa Bos­nia kag Her­ze­go­vina. Makaluntad bala ang paghidait sa sinang mga duog? Sing makapakibot, ang sabat huo. Samtang ang Romano Katoliko, Sidlangan nga Ortodokso kag mga komunidad sang Muslim sa sinang makahalanusbo nga duog nagailinaway bangod sang teritoryo, madamong indibiduwal ang nagahandum sing paghidait, kag may pila nga nakasapo sini.

Ang mga Djorem pumuluyo sang Sarajevo, kag mga Saksi ni Jehova sila. Sa tunga sang tanan nga kinagamo sa sinang siudad, tayuyon nga ginaduaw nila ang ila mga kaingod agod ipaambit sa ila ang maayong balita tuhoy sa Ginharian sang Dios. (Mateo 24:14) Ngaa? Bangod nahibaluan sang pamilya Djorem nga ining Ginharian matuod, nga natukod na ini sa mga langit, kag nga amo ini ang lamang kag pinakamaayo nga paglaum sang katawhan para sa paghidait. Ang mga Saksi ni Jehova may bug-os nga pagsalig sa gintawag ni apostol Pablo nga ‘maayong balita sang paghidait.’ (Efeso 2:17) Bangod sang mga tawo nga kaangay nanday Bozo kag Hena Djorem, madamo ang nakasapo sing paghidait sa Bos­nia kag Her­ze­go­vina.

Magaabot ang Tunay nga Paghidait

May madamo pa nga masiling tuhoy sa mga Djorem. Apang, hambalan naton anay ang isa ka mag-asawa nga nakatigayon sing pagsalig sa Ginharian sang Dios. Ang ila ngalan amo si Artur kag Arina. Sila kag ang ila lamharon nga mga anak nga lalaki nagpuyo anay sa isa ka republika sa teritoryo sang anay Unyon Sobyet. Sang nagdabdab ang inaway sibil, nagpakig-away si Artur para sa isa ka bahin sang nagapakig-away nga grupo. Apang, wala madugay, ginpamangkot niya ang iya kaugalingon, ‘Ngaa nagapakig-away ako batok sa sining mga tawo nga mga kaingod ko anay?’ Nagbiya sia sa pungsod kag, sa tapos sang madamong kabudlayan, nag-abot upod sa iya lamharon nga pamilya sa Esto­nia.

Sang magduaw sia sa St. Petersburg, nakilala ni Artur ang mga Saksi ni Jehova kag nagdayaw sang iya natun-an tuhoy sa Ginharian sang Dios. Ang kabubut-on ni Jehova amo nga sa indi madugay ang Ginharian sang Dios amo lamang ang magagahom sa katawhan. (Daniel 2:44) Nian ang duta mangin mahidaiton nga duog, nga wala na sing mga inaway sibil ukon internasyonal nga nga mga pag-ilinaway. Si Isaias nagtagna tuhoy sa sinang tion: “Indi sila maghalit ukon maglaglag sa bug-os ko nga bukid nga balaan; kay ang duta matugob sang pagkilala kay Jehova subong nga ang mga tubig nagatabon sang dagat.”​—⁠Isaias 11:⁠9.

Sang matalupangdan ang laragway sang palaabuton mahidaiton nga kalibutan sa isa ka bulig sa pagtuon sang Biblia nga ginpakita sang Saksi sa iya, nagsiling si Artur nga nagapuyo sia anay sa isa ka duog nga daw kaangay sina. Apang, karon, ginlaglag na ini sang inaway sibil. Pabalik sa Esto­nia, si Artur kag ang iya pamilya nagatuon sing dugang pa tuhoy sa Ginharian sang Dios paagi sa pagtuon sing Biblia upod sa mga Saksi ni Jehova.

Paghidait sa Tion sang Kinagamo

Ang Salmo 37:37 nagasiling: ‘Talupangda ang matarong nga tawo kag tan-awa ang matadlong, kay ang palaabuton sina nga tawo mahidaiton.’ Sa katunayan, ang paghidait sang isa nga matarong kag matadlong sa mga mata sang Dios indi limitado sa iya palaabuton. Matigayon niya ini karon. Paano ina posible? Binagbinaga ang eksperiensia sang isa ka tawo nga si Paul.

Nagapuyo si Paul sa isa ka naligwin nga kampo sang mga ref­u­gee sa bagatnan-nakatundan nga Ethi­opia, bisan pa nga sa pagkamatuod naghalin sia sa malapit nga duog. Sa iya natawhan nga duog, nakasumalang sia sing isa sang mga Saksi ni Jehova nga nagatrabaho sa kompanya sang langis, kag ginhatagan sia sining tawo sing isa ka bulig sa pagtuon sa Biblia nga Ang Kamatuoran nga Nagadul-ong sa Kabuhi nga Dayon.a Wala na gid makita liwat ni Paul ang Saksi, apang gintun-an niya sing maayo ang libro. Ang inaway sibil amo ang nagdul-ong sa iya sa kampo sang mga ref­u­gee sa Ethi­opia, kag didto ginasugid niya sa iban ang nahanungod sa iya natun-an. Ang isa ka magamay nga grupo nagbaton sini subong kamatuoran. Pasad sa kon ano ang ila natun-an, wala magdugay nagabantala na sila sa iban sa kampo.

Nagsulat si Paul sa ulong-talatapan sang ­Watch Tow­er So­ciety nga nagapangabay sing bulig. Ang ministro nga ginpadala gikan sa Ad­dis Aba­ba nahayanghag sa pagsapo sing 35 ka tawo nga nagahulat sa iya, handa sa pagtuon sing dugang pa nahanungod sa Ginharian sang Dios. Ginhimo ang mga kahimusan agod mabuligan sila sing regular.

Paano masiling nga ang mga tawo kaangay ni Paul nakatigayon sing paghidait? Indi mahapos ang ila pagkabuhi, apang may pagtuo sila sa Dios. Kon apektado sang kagamo sining kalibutan, ginaaplikar nila ang laygay sang Biblia: “Dili kamo maghimud-os sa bisan ano, kundi sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay.” Subong resulta, may pagkakontento sila nga talagsahon sa karon. Ang mga pulong ni apostol Pablo sa kongregasyon sang Filipos napadapat sa ila: “Ang paghidait sang Dios nga nagalabaw sa tanan nga paghangop magatipig sang inyo mga tagipusuon kag sang inyo mga painuino paagi kay Cristo Jesus.” Sa pagkamatuod, nagabatyag sila sing suod nga kaangtanan kay Jehova, “ang Dios sang paghidait.”​—⁠Filipos 4:​6, 7, 9.

Paghidait sa Karon

Ang ginpapungko nga Hari sa Ginharian sang Dios amo si Jesucristo, gintawag sa Biblia nga “Prinsipe sang Paghidait.” (Isaias 9:⁠6) Tuhoy sa iya ang dumaan nga manalagna nagsiling: “Magapamulong sia sing paghidait sa mga pungsod; kag ang iya pagginahom mangin kutob sa dagat pa dagat kag kutob sa Suba tubtob sa mga ukbong sang duta.” (Zacarias 9:10) Ang inspirado nga mga pulong kaangay sini may daku nga epekto sa kabuhi sang isa ka tawo nga si José.

Sang isa ka bes si José nabilanggo. Isa sia anay ka terorista kag gin-aresto samtang nagahanda sia sa pagpalupok sing isa ka kuwartel sang mga pulis. Ginhunahuna niya nga kasingki lamang ang makapuwersa sa panguluhan sa pagpauswag sing mga kahimtangan sa iya pungsod. Samtang didto sia sa prisuhan, ginsugdan sang mga Saksi ni Jehova ang pagtuon sing Biblia sa iya asawa.

Sa tapos nga nahilway si José, nagtuon man sia sa Biblia, kag wala madugay ang mga pulong sa Salmo 85:8 napadapat sa iya: “Pamatian ko ang ipamulong sang matuod nga Dios nga si Jehova, kay magapamulong sia sing paghidait sa iya katawhan kag sa iya mga balaan.” Apang inang bersikulo nagahinakop sing paandam: ‘Indi sila magbalik sa pagsalig sa kaugalingon.’ Busa, ang isa nga nagapangita sing paghidait ni Jehova indi magpangahas sa paghikot sing independiente ukon sa pagpamatok sa Iya kabubut-on.

Sa karon, si José kag ang iya asawa mga Cristianong ministro na. Ginatuytuyan nila ang iban padulong sa Ginharian ni Jehova subong amo ang solusyon sa mga problema nga gintinguhaan anay ni José nga lubaron paagi sa ginhimo nga mga bomba. Handa sila sa pagsalig sa Biblia, nga nagasiling: “Si Jehova, sa iya bahin, magahatag sa kon ano ang maayo.” (Salmo 85:12) Sa pagkamatuod, ginduaw sining karon lang ni José ang kuwartel nga ginplano niya nga wasakon. Ngaa? Agod sa pagsugid sa mga pamilya didto tuhoy sa Ginharian sang Dios.

Mahidaiton nga Katawhan

Sa Salmo 37:​10, 11, ang Biblia nagasiling: “Kay sa diutay pa nga tion, kag ang malauton wala na; bisan talupangdon mo sing makugihon ang iya duog, wala na sia didto. Apang ang mapainubuson magapanubli sang duta, kag magakalipay sila sa kabuganaan sang paghidait.” Daw ano ka mahimayaon nga paglaum!

Apang, talupangda, nga ang paghidait ni Jehova para lamang sa “mga mapainubuson.” Yadtong nagapangita sing paghidait dapat magtuon nga mangin mahidaiton. Amo ini sa kahimtangan ni ­Keith, nga nagapuyo sa New Zea­land. Ginlaragway si ­Keith subong “mabukod sing panglawas kag maisog, agresibo, kag palabais.” Katapo sia sang isa ka gang kag nagapuyo sa isa ka balay nga isa ka mabakod nga kuta, nga ginapatrolyahan sang tatlo ka nagabantay nga ido ang hardin agod wala sing mga taga-guwa nga makasulod. Ginbulagan sia sang iya asawa, ang iloy sang iya anom ka kabataan.

Sang nakapakigsugilanon si ­Keith sa mga Saksi ni Jehova, may daku nga epekto sa iya ang maayong balita. Wala magdugay sia kag ang iya kabataan nagtambong sa mga miting sang mga Saksi. Ginpaguntingan niya ang iya tubtob sa hawak kalaba nga buhok kag nagsugod sa paghambal nahanungod sa Ginharian sang Dios sa iya anay mga kaupdanan. Ang pila sa ila nagsugod man sa pagtuon sing Biblia.

Kaangay sa minilyon sang matadlong sing tagipusuon sa bug-os nga kalibutan, ginsugdan ni ­Keith nga iaplikar ang mga pulong ni apostol Pedro: “Sia nga buot maghigugma sing kabuhi kag magtan-aw sing mga adlaw nga maayo, . . . maglikaw sia sa kalautan kag maghimo sing matarong; magpangita sia sing paghidait kag magsunod sini.” (1 Pedro 3:​10, 11) Ang anay asawa ni ­Keith nagpasugot nga pamanahon sia liwat, kag nagatuon na sia karon sa ‘pagpangita sing paghidait kag sundon ini.’

Ang paghidait ni Jehova nangin manluluwas sing kabuhi para sa madamo, lakip ang isa ka manughampang anay nga natawo sa anay U.S.S.R. Ining tawo nagdaug sing mga medalya sa paindis-indis sa Olympiada, apang nabang-awan sia kag nagliso sa mga droga kag alkohol. Pagkatapos sang mga hitabo sa sulod sang 19 ka tuig nga naglakip sang tatlo ka tuig nga sentensia sa kampo palangabudlayan sa Sibe­ria, nagapanago nga pagpanakayon sa dagat padulong sa Can­ada, kag duha ka beses nga diutayan na lang mapatay bangod sang iya bisyo sa droga, nangamuyo sia sa Dios sing bulig sa pagpangita sing tunay nga katuyuan sa kabuhi. Isa ka pagtuon sa Biblia upod sa nagahambal sing Ruso nga mga Saksi ni Jehova ang nagbulig sa iya nga masapwan ang sabat sa iya mga pamangkot. Karon ining tawo, kaangay sang minilyon nga iban pa, nakasapo sing paghidait sa Dios kag sa iya kaugalingon.

Ang Pagkabanhaw nga Paglaum

Sa katapusan, balikan naton sanday Bozo kag Hena Djorem sa Sarajevo. Ining mag-asawa may lima ka tuig nga anak nga babayi, si Magdalena. Sang nagligad nga Hulyo, sila nga tatlo naglakat sa pagpakigbahin liwat sa ila pagbantala nga hilikuton sang sila tanan napatay sang naglupok nga bala. Kamusta naman ang paghidait nga ila ginbantala sa iban? Ang bala nga nagkuha sang ila kabuhi nagapakita bala nga ini indi matuod nga paghidait?

Indi gid! Sa sining sistema sang mga butang, ang mga trahedya nagakatabo. Ang mga tawo nagakapatay sa mga bomba ukon mga bala. Ang iban nagakapatay bangod sang balatian ukon sa mga aksidente. Madamo ang nagakapatay bangod sang katigulangon. Yadtong nakatigayon sing paghidait sang Dios wala nahilway sa sinang mga hitabo, apang ang posibilidad sinang mga hitabo wala nagabilin sa ila nga walay paglaum.

Ginsaaran ni Jesus ang iya abyan nga si Marta: “Ako ang pagkabanhaw kag ang kabuhi. Ang nagatuo sa akon, bisan mapatay sia, magakabuhi.” (Juan 11:25) Nagatuo sa sini ang mga Djorem, subong man ang tanan nga mga Saksi ni Jehova. Kag ang mga Djorem may pagtuo nga kon mapatay sila, pagabanhawon sila sa isa ka duta nga nian isa gid ka mahidaiton nga duog. “Pahiran [ni Jehova nga Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”​—⁠Bugna 21:⁠4.

Antes sia mapatay, nagsiling si Jesus sa iya mga sumulunod: “Ang akon paghidait ginahatag ko sa inyo. . . . Dili malisang ang inyo mga tagipusuon.” (Juan 14:27) Nagakalipay kami upod sa mga Djorem nga may subong sina nga paghidait kag pat-od nga magakalipay sa sini sing bug-os sa pagkabanhaw. Nalipay kami para sa tanan nga mga nagasimba kay Jehova, ang Dios sang paghidait. Sila may kalinong sang hunahuna. Natigayon nila ang paghidait sa Dios. Ginapalambo nila ang paghidait sa iban. Kag may pagsalig sila sa mahidaiton nga palaabuton. Huo, nakasapo sila sing paghidait walay sapayan nga nagakabuhi sila sa magamo nga kalibutan. Sa pagkamatuod, ang tanan nga nagasimba sa Dios sa espiritu kag kamatuoran nagatigayon sing paghidait. Kabay nga ikaw man makasapo sinang paghidait.

[Footnote]

[Retrato sa pahina 7]

Nakasapo sila sing paghidait walay sapayan nga nagakabuhi sa magamo nga kalibutan