Ang Dios Nagaulikid sa Imo

SI Mary, isa ka Cristianong babayi nga nagahinampot sa 50 anyos, nag-antos sing tuman sa iya kabuhi. Ang pagpakighilahi sang iya bana nagdul-ong sa pagdiborsio kapin sa isa ka dekada na ang nagligad. Sa tapos sadto, naghimakas si Mary sa pagtungod sang iya papel subong nagasolo nga ginikanan sa iya apat ka kabataan. Apang masinulub-on sia gihapon, kag kon kaisa ang kasubo daw indi na masarangan. Naghunahuna si Mary, ‘Nagakahulugan bala ini nga wala nagaulikid ang Dios sa akon kag sa akon wala sing amay nga mga kabataan?’

Nakaeksperiensia ka man sing amo nga kabudlayan ukon wala, pat-od nga magabuylog ka sa mga balatyagon ni Mary. Tanan kita nag-antos sing mabudlay nga mga kahimtangan, kag ayhan nagahunahuna kita sa kon san-o kag paano si Jehova magpanghikot tungod sa aton. Ang pila sining mga eksperiensia talangkod nga resulta sang aton pagtuman sa mga kasuguan sang Dios. (Mateo 10:​16-18; Binuhatan 5:29) Ang iban resulta sang aton tawhanon nga pagkadihimpit nga nagakabuhi sa kalibutan nga ginagamhan ni Satanas. (1 Juan 5:19) Si apostol Pablo nagsulat: “Ang bug-os nga tinuga nagaugayong sa kasakit sing tingob.”​—⁠Roma 8:⁠22.

Apang, ang katunayan nga nagaatubang ikaw sing daku nga pagtilaw wala nagakahulugan nga ginpabay-an ikaw ni Jehova ukon indi sia interesado sa imo kaayuhan. Paano mo mapat-od ini? Ano ang nagapakita nga nagaulikid ang Dios sa imo?

Isa ka Dumaan nga Halimbawa

Ang Biblia nagaaman sing maathag nga pamatuod sang pag-ulikid ni Jehova sa katawhan subong mga indibidual. Binagbinaga si David. Si Jehova may personal nga interes sa sining lamharon nga manugbantay, nasapwan sia nga ‘isa ka tawo nga kalahamut-an sa iya tagipusuon.’ (1 Samuel 13:14) Sang ulihi, sang naggahom si David subong hari, nagsaad si Jehova sa iya: “Magaupod ako sa imo bisan diin ka magkadto.”​—⁠2 Samuel 7:⁠9.

Nagakahulugan bala ini nga si David nagkabuhi sing “masulhay,” nga wala sing bisan ano nga kabudlayan? Indi, nag-atubang si David sing daku nga mga pagtilaw antes kag sa tion sang iya paggahom. Sa sulod sang madamong tinuig antes sia nangin hari, walay untat sia nga ginhingabot sang manugpatay nga si Hari Saul. Sa sining tion sang iya kabuhi, si David nagsulat: “Ang akon kalag yara sa tunga sang mga leon . . . bisan pa sa mga anak sang tawo, nga ang ila mga ngipon, mga bangkaw kag mga baslay.”​—⁠Salmo 57:⁠4.

Sa gihapon, sa tanan sining kabudlayan kumbinsido si David sang personal nga pag-ulikid ni Jehova. “Ang akon mga paglagaw ginaisip mo,” ginsiling niya sa iya pangamuyo kay Jehova. Huo, para kay David subong ini nga ginrekord ni Jehova ang bug-os nga pagtilaw. Nian nagdugang si David: “Isulod sa imo suludlan nga panit ang akon mga luha. Wala bala sila sa imo tulun-an?”a (Salmo 56:⁠8) Paagi sining ilustrasyon, ginpabutyag ni David ang iya pagsalig nga si Jehova nakahibalo indi lamang sang iya kahimtangan kundi sang resulta man sini sa emosyon.

Tubtob sa katapusan sang iya kabuhi, si David nakasulat gikan sa personal nga eksperiensia: “Si Jehova nagapalig-on sang mga paglakat sang tawo, kag nagakalipay Sia sa iya dalanon. Bisan mapukan sia, indi sia mapukan sing bug-os, kay si Jehova nagabayaw sa iya sa kamot.” (Salmo 37:​23, 24) Ikaw man makasalig nga bisan pa ang imo mga pagtilaw nagapadayon, ginatalupangod kag ginapabaloran ni Jehova ang imo pagbatas. Si Pablo nagsulat: “Ang Dios indi dimatarong nga malimot sang inyo binuhatan kag sang gugma nga ginpakita ninyo tungod sa iya ngalan nga nag-alagad kamo sa mga balaan kag nagaalagad pa.”​—⁠Hebreo 6:⁠10.

Dugang pa, si Jehova makapanghikot tungod sa imo paagi sa paghatag sa imo sing kusog sa pagbatas sa bisan anong kasablagan nga ginabutang sa imo dalanon. “Madamo ang kapipit-an sang matarong,” sulat ni David, “apang si Jehova nagaluwas sa iya sa sini tanan sa ila.” (Salmo 34:19) Sa pagkamatuod, ang Biblia nagasugid sa aton nga ang mga mata ni Jehova “nagapanuloktulok sa bug-os nga duta sa pagpakita nga sia mabakod tungod sa ila nga may tagipusuon nga himpit ayon sa iya.”​—⁠2 Cronica 16:⁠9.

Si Jehova Nagabuyok sa Imo

Ang dugang nga pamatuod sang personal nga pag-ulikid ni Jehova masapwan sa mga pinamulong ni Jesus. “Walay tawo nga makakari sa akon,” siling niya, “kon indi sia pagbuyukon sang Amay nga nagpadala sa akon.” (Juan 6:44) Huo, si Jehova nagabulig sa mga tawo sing indibidual sa pagpanginpulos sing mga benepisyo sang halad ni Cristo. Paano? Sa dakung kasangkaron, paagi ini sa pagbantala sing Ginharian nga hilikuton. Matuod, ining hilikuton nagaalagad subong “saksi sa tanan nga kapungsuran,” apang nagalab-ot ini sa katawhan sing indibidual. Ang katunayan nga nagapamati ka kag nagabaton sa mensahe sang maayong balita pamatuod sang personal nga kabalaka ni Jehova sa imo.​—⁠Mateo 24:⁠14.

Paagi sa balaan nga espiritu, ginabuyok ni Jehova ang mga indibidual ayon sa iya Anak kag sa paglaum nga kabuhi nga dayon. Ginabuligan sini ang kada isa nga mahangpan kag maaplikar ang espiritual nga mga kamatuoran walay sapayan sang duna nga mga limitasyon kag dikahimpitan. Sa pagkamatuod, indi mahangpan sang isa ang mga katuyuan sang Dios kon wala ang bulig sang espiritu sang Dios. (1 Corinto 2:​11, 12) Subong sang ginsulat ni Pablo sa mga taga-Tesalonica, ‘indi ang tanan nga tawo may pagtuo.’ (2 Tesalonica 3:⁠2) Si Jehova nagahatag lamang sang iya espiritu sa mga maluyag nga buyukon niya.

Ginabuyok ni Jehova ang katawhan bangod ginahigugma niya sila subong mga indibidual kag luyag niya nga matigayon nila ang kaluwasan. Daw ano nga pamatuod sang personal nga pag-ulikid ni Jehova! Si Jesus nagsiling: “Indi kabubut-on sang akon Amay nga yara sa langit nga mawala ang isa sining mga magamay.” (Mateo 18:14) Huo, sa mga mata sang Dios ang tagsa ka tawo importante subong pinasahi nga indibidual. Amo sina kon ngaa nagsulat si Pablo: “Magahatag sia sa tagsa ka tawo suno sa iya mga buhat.” (Roma 2:⁠6) Kag si apostol Pedro nagsiling: “Ang Dios walay ginapasulabi, apang sa tagsa ka pungsod ang tawo [ang indibidual nga tawo] nga nagakahadlok sa iya kag nagahimo sing katarungan kalahamut-an sa iya.”​—⁠Binuhatan 10:​34, 35.

Ang mga Milagro ni Jesus

Ang personal nga interes sang Dios sa mga tawo ginpakita sing makatalandog sa mga milagro nga ginhimo sang iya Anak, si Jesus. Ining mga pagpang-ayo gin-updan sang tudok nga balatyagon. (Marcos 1:​40, 41) Sanglit si Jesus “indi makahimo sing bisan ano sa iya kaugalingon, kundi lamang ang nakita niya nga ginahimo sang Amay,” ang iya pagkamaawaon nagapakita sing mahigugmaon nga pag-ulikid ni Jehova sa tagsa sang iya mga alagad.​—⁠Juan 5:⁠19.

Binagbinaga ang rekord sang isa ka milagro nga ginhimo ni Jesus, nga narekord sa Marcos 7:​31-37. Gin-ayo diri ni Jesus ang isa ka tawo nga bungol kag apa. “Ginkuha [niya ang tawo] sing pahain sa kadam-an,” siling sang Biblia. Nian, “sang nagahangad sa langit nanghakroy sia kag nagsiling sa iya: ‘Eph΄pha·tha,’ kon sayuron ‘Magbukas ka.’ ”

Ngaa ginpahilayo ni Jesus ining tawo gikan sa kadam-an? Ti, mahimo nga ang bungol nga tawo nga indi makahambal mahuya sa atubangan sang mga tumalan-aw. Ayhan natalupangdan ni Jesus nga nahuya ining tawo, kag amo kon ngaa ginpakamaayo niya nga ayuhon sia sing pribado. “Ang bug-os nga estorya,” siling sang isa ka eskolar sa Biblia, “maathag gid nga nagapakita sa aton nga wala ginkabig ni Jesus ang tawo subong isa ka pasyente lamang; ginkabig niya sia subong isa ka indibidual. Ang tawo may pinasahi nga kinahanglanon kag pinasahi nga problema, kag upod ang labing malulo nga pagpasunaid ginpakig-angutan sia ni Jesus sa paagi nga indi masakitan ang iya mga balatyagon kag sa paagi nga iya mahangpan.”

Ining rekord nagapakita nga si Jesus may personal nga pag-ulikid sa mga tawo. Makapat-od ikaw nga nagaulikid man sia sa imo. Matuod, ang iya mahalaron nga kamatayon isa ka ekspresyon sang gugma sa bug-os nga kalibutan sang galawaron nga katawhan. Apang sarang mo nga batunon yadtong buhat sing personal, subong sang ginhimo ni Pablo, nga nagsulat: “Ang Anak sang Dios . . . naghigugma sa akon kag nagtugyan sang iya kaugalingon tungod sa akon.” (Galacia 2:20) Kag sanglit ginpatalupangod ni Jesus nga ‘ang nakakita sa iya nakakita man sa Amay,’ makapat-od kita nga si Jehova may amo man nga pag-ulikid sa tagsa sang iya mga alagad.​—⁠Juan 14:⁠9.

Si Jehova Nangin Manugbalos

Ang pagkuha sing ihibalo tuhoy sa Dios nagalakip sang paghibalo sang tagsa ka bahin sang iya personalidad subong ginapakita ini sa Biblia. Ang ngalan mismo nga Jehova nagakahulugan sing “Sia nga Nagapahanabo,” nagapahangop nga si Jehova makahimo sing bisan ano nga luyag niya agod sa pagtuman sang iya kabubut-on. Sa bug-os nga maragtas, nagatungod sia sing nanuhaytuhay nga katungdanan, nga nagalakip sang Manunuga, Amay, Soberanong Ginuo, Manugbantay, Jehova sang kasuldadusan, Manugpamati sang pangamuyo, Hukom, Dakung Manunudlo, kag Manunubos.b

Agod mahangpan ang bug-os nga kahulugan sang ngalan sang Dios, dapat man naton mahibaluan ang papel ni Jehova subong Manugbalos. Si Pablo nagsulat: “Sa walay pagtuo indi mahimo ang pagpahamuot sa iya, kay ang nagapalapit sa Dios kinahanglan magtuo nga amo sia kag nga sia manugbalos sa mga nagapangita sa iya..”​—⁠Hebreo 11:⁠6.

Si Jehova nagsaad sing kabuhi nga walay katapusan sa paraiso nga duta sa mga nagapili karon sa pag-alagad sa iya sing bug-os tagipusuon. Indi kakagod ang magpaabot sa katumanan sinang daku nga saad, ukon pagkamatinaastaason ang paghanduraw sa kaugalingon nga nagapuyo didto. Si Moises ‘nagtan-aw sing hanuot sa balos.’ (Hebreo 11:26) Si Pablo malangkagon man nga nagpaabot sa katumanan sang saad sang Dios para sa matutom hinaplas nga mga Cristiano. Sia nagsulat: “Nagapadayon ako padulong sa lalambuton tungod sa padya sang mataas nga pagtawag sang Dios nga yara kay Cristo Jesus.”​—⁠Filipos 3:⁠14.

Ikaw man mahimo makapaabot sa padya nga ginsaad ni Jehova sa mga nagabatas. Ang pagpaabot sinang padya isa ka daku nga bahin sang imo ihibalo sa Dios kag sang imo pagbatas sa pag-alagad sa iya. Busa pamalandungi adlaw-adlaw ang mga pagpakamaayo nga gintigana ni Jehova para sa imo. Si Mary, nga ginhinambitan sa panugod, naghimo sing pinasahi nga panikasog sa paghimo sini. “Sa una nga tion sa akon kabuhi,” siling niya, “ginbaton ko sining karon lang nga ang halad gawad ni Jesus napadapat sa akon. Nabatyagan ko nga si Jehova nagaulikid sa akon subong persona. Nangin Cristiano ako sa sulod sang kapin sa 20 ka tuig, apang sining karon lamang nga nagpati gid ako sa sini.”

Paagi sa pagtuon kag tinagipusuon nga pagpamalandong sa Biblia, si Mary, upod sa minilyon ka iban pa, nagasugod sa pagtuon nga si Jehova nagaulikid sa iya katawhan indi lamang subong isa ka grupo kundi subong mga indibidual man. Kumbinsido gid sa sini si apostol Pedro amo nga nagsulat sia: “Itugyan ang tanan ninyo nga kabalaka sa [Dios], kay nagaulikid sia sa inyo.” (1 Pedro 5:⁠7) Huo, ang Dios nagaulikid sa imo!

[Mga Footnote]

[Kahon sa pahina 6]

Ang Pagkabanhaw​—⁠Pamatuod nga Nagaulikid ang Dios

ANG makapakumbinsi nga pamatuod sang interes sang Dios sa tagsa ka indibidual masapwan sa Biblia sa Juan 5:​28, 29: “Ang takna magaabot nga ang tanan nga yara sa handumanan nga mga lulubngan magapamati sa tingog [ni Jesus] kag magaguwa.”

Sing talalupangdon, gingamit diri ang Griegong tinaga nga mne·mei΄on (handumanan nga lulubngan) tigaylo sang ta΄phos (lulubngan). Ang tinaga nga ta΄phos nagapaalinton lamang sing ideya sang isa ka paglubong. Apang ang mne·mei΄on nagapanugda nga ang pagkabuhi sang isa ka tawo nga napatay ginadumdom.

Tuhoy sini, hunahunaa lamang kon ano ang ginakinahanglan ni Jehova nga Dios tuhoy sa pagbanhaw. Agod buhion liwat ang isa ka tawo, dapat niya mahibaluan ang tanan tuhoy sinang isa​—⁠lakip ang iya napanubli nga mga kinaiya kag bug-os nga memorya. Sa amo lamang nga paagi nga inang indibidual mabuhi liwat nga may pareho nga identidad.

Sa pagkamatuod, imposible ini sa tawhanon nga pagtamod, apang ‘ang tanan nga butang posible sa Dios.’ (Marcos 10:27) Sarang pa gani niya mapat-od kon ano ang yara sa tagipusuon sang isa ka tawo. Bisan pa ang isa ka tawo napatay na sa sulod sang madamong siglo, ang memorya sang Dios sa iya nagapadayon; wala ini nagakapanas. (Job 14:​13-15) Busa, sang ginhinambitan si Abraham, Isaac, kag Jacob, si Jesus nakasiling bisan pa sang siniglo sa tapos nga napatay sila nga si Jehova “isa ka Dios, indi sang mga patay, kundi sang mga buhi, kay sila tanan nagakabuhi sa iya.”​—⁠Lucas 20:⁠38.

Sa amo, binilyon sang mga napatay ang yara sa memorya ni Jehova nga Dios sa bug-os nga detalye. Daw ano ka makadalayaw nga pamatuod nga nagaulikid ang Dios sa mga tawo sing indibidual!

[Retrato sa pahina 7]

Si Jesus nagpakita sing personal nga interes sa iya mga ginpang-ayo