Wala sing Paghidait Para sa Butig nga mga Mensahero!

“Ang mga malauton pagautdon . . . apang ang mga mahagop magapanubli sang duta, kag magakalipay sila sa kabuganaan sang paghidait.”​—⁠SALMO 37:​9, 11.

1. Ngaa makapaabot kita nga makakita sing matuod kag butig nga mga mensahero sa “tion sang katapusan”?

MGA mensahero​—⁠butig ukon matuod? May butig kag matuod nga mga mensahero sang panahon sang Biblia. Apang kamusta karon? Sa Daniel 12:​9, 10, mabasa naton nga ginhambalan sang isa ka langitnon nga mensahero ang manalagna sang Dios: “Ang mga pulong gintago kag ginpat-inan tubtob sa tion sang katapusan. Madamo ang magapaninlo sang ila kaugalingon kag magapaputi sang ila kaugalingon kag pagaulayon. Kag ang mga malaut magahimo sing kalautan, kag wala sing malaut nga makahangop; apang ang mga maalam makahangop.” Nagakabuhi kita karon sa sinang “tion sang katapusan.” Nakit-an bala naton ang maathag nga kinatuhayan sa ulot sang “mga malauton” kag sang “mga maalam”? Huo sa pagkamatuod!

2. Paano nagakatuman karon ang Isaias 57:​20, 21?

² Sa kapitulo 57, bersikulo 20 kag 21, mabasa naton ang pinamulong sang mensahero sang Dios nga si Isaias: “ ‘Ang mga malauton kaangay sang dagat nga nagaalimbukad, bangod wala nagakanay, ang tubig sini padayon nga nagatus-on sing dag-ot kag lunang. Wala sing paghidait,’ siling sang akon Dios, ‘para sa mga malauton.’ ” Nagakaigo gid nga ginalaragway sining mga pinamulong ang kalibutan samtang nagahinampot ini sa ika-21 nga siglo! Ang iban nagapamangkot pa gani, ‘Makadangat gid ayhan kita sa sina nga siglo?’ Ano ang ginasiling sa aton sang maalam nga mga mensahero?

3. (a) Anong pagpaanggid ang ginpakita sang 1 Juan 5:​19? (b) Paano ginlaragway ang “mga maalam” sa Bugna kapitulo 7?

³ Si apostol Juan may inspirado sang Dios nga kaalam. Ang 1 Juan 5:​19, nagasiling: “Nahibaluan ta nga naghalin kita sa Dios, apang ang bug-os nga kalibutan yara sa gahom sang malauton.” Sa kabaliskaran sining kalibutan amo ang 144,000 espirituwal nga mga Israelinhon, nga tigulang na nga nagkalabilin nga yari pa sa duta. Nagabuylog sa ila karon amo ang “dakung kadam-an . . . gikan sa tanan nga kapungsuran kag tribo kag katawhan kag hambal,” nga nagadamo na karon sing kapin sa lima ka milyon, nga may kaalam man. “Ini sila amo ang nagguwa gikan sa dakung kapipit-an.” Kag ngaa ginpadyaan sila? Bangod ila man “ginlabhan ang ila malaba nga mga panapton kag ginpaputi ini sa dugo sang Kordero” paagi sa pagtuo sa gawad ni Jesus. Subong mga mensahero sang kapawa, sila man “nagaalagad sa [Dios] sa adlaw kag gab-i.”​—⁠Bugna 7:​4, 9, 14, 15.

Ang Ginatawag nga mga Mensahero sang Paghidait

4. (a) Ngaa ang gintawag mga mensahero sang paghidait sa kalibutan ni Satanas napaslawan? (b) Paano naaplikar karon ang Efeso 4:​18, 19?

⁴ Apang, kamusta, ang ginatawag nga mga mensahero sang paghidait sa kalibutanon nga sistema ni Satanas? Sa Isaias kapitulo 33, bersikulo 7, aton mabasa: “Yari karon! Ang ila mga baganihan nagasinggit sa dalanon; ang mga mensahero sang paghidait magahibi sing mapait.” Matuod gid ini sa mga nagadangop gilayon sa mga kapital sang kalibutan, sa panikasog nga matigayon ang paghidait! Wala gid sing pulos! Ngaa? Bangod ginalubad nila ang mga sintoma sang mga balatian sang kalibutan sa baylo sang gamot nga mga kabangdanan sini. Una, bulag sila sa pagluntad ni Satanas, nga ginalaragway ni apostol Pablo subong “ang dios sining sistema sang mga butang.” (2 Corinto. 4:4) Si Satanas nagsab-ug sing mga binhi sang kalautan sa tunga sang katawhan, amo kon ngaa ang kalabanan, lakip ang madamo sang mga manuggahom, nagakaigo karon sa ginalaragway sang Efeso 4:​18, 19: “Gindulman sila sa ila paghangop, kag nahamulag sa kabuhi nga iya sang Dios, bangod sang ila pagkawalay hinalung-ong, bangod sang katig-a sang ila mga tagipusuon. Bangod naglabang sila sa tanan moral nga igbalatyag, nagpatuyang sila sa lugak nga pagginawi sa pagbuhat sing tanan nga kahigkuan nga may pagkamahamkunon.”

5. (a) Ngaa napaslawan ang tawhanon nga mga ahensia subong mga manugpaluntad sing paghidait? (b) Anong makapaumpaw nga mensahe ang ginapaalinton sang Salmo 37?

⁵ Walay ahensia sang dihimpit nga mga tawo ang makadula gikan sa tagipusuon sang tawo sing pagkamahamkunon, kakagod, kag pagdumot nga lapnag gid karon. Ang aton lamang Manunuga, ang Soberanong Ginuong Jehova, ang makahimo sina! Dugang pa, ang mga mahagop lamang, nga minoridad sa tunga sang katawhan, ang handa sa pagpasakop sa iya panuytoy. Ang mga resulta sa ila kag sa mga malauton sang kalibutan ginpaanggid sa Salmo 37:​9-11: “Ang mga malauton pagautdon, apang yadtong nagalaum kay Jehova amo ang magapanag-iya sang duta. Kag sa indi lamang madugay, kag ang malauton wala na . . . Apang ang mga mahagop magapanag-iya sang duta, kag magakalipay sila sa kabuganaan sang paghidait.”

6, 7. Anong rekord sang mga relihion sa kalibutan ang nagapakita nga napaslawan sila sa pag-alagad subong mga mensahero sang paghidait?

⁶ Nian, makit-an ayhan ang mga mensahero sang paghidait sa tunga sang mga relihion sining nagabalatian nga kalibutan? Ti, ano bala ang rekord sang relihion tubtob sa karon? Ginapakita sang maragtas nga ang relihion nakigbahin, huo, nangin manugsugyot pa gani sang madamong pagpatulo sing dugo sa sulod sang mga siglo. Halimbawa, ang The Christian Century sang semana sang Agosto 30, 1995, nga nagreport tuhoy sa kinagamo sa anay Yugoslavia, nagsiling: “Sa kontrolado sang Serbia nga Bosnia, ang mga pari nagapungko sa unahan nga kubay sang ila gintawag nga parlamento, kag yara man sa unahan, nga nagabendisyon sa mga soldado kag sa mga armas pa gani antes sang inaway.”

⁷ Ang isa ka siglo sang pagpanghikot sang mga misyonero sang Cristiandad sa Aprika wala makadala sing maayo nga mga resulta, subong sang ginlaragway sa Rwanda, isa ka pungsod nga nakilal-an nga 80 porsiento nga Katoliko. Ang The New York Times sang Hulyo 7, 1995, nagreport: “Ang Golias, isa ka liberal, Katoliko nga magasin nga ginbalhag sa Lyons [Pransia], nagaplano nga ibuyagyag ang dugang 27 ka pari kag apat ka madre sa Rwanda nga ginasiling nga nagpatay ukon nagpalig-on sa pagpamatay sa Rwanda sang nagligad nga tuig.” Ang African Rights, isa ka organisasyon sang tawhanon nga mga kinamatarong sa London, nagkomento: “Dugang sa iya paghipos, ang simbahan dapat man manabat sa aktibo nga pagpakigbahin sang pila sang mga kaparian sini, sang mga pastor kag mga madre sa pagpapas sa rasa.” Kaanggid ini sa kahimtangan anay sa Israel sang ginlaragway sang matuod nga mensahero ni Jehova nga si Jeremias, ang “kahuy-anan” sang Israel, upod sa iya mga manuggahom, mga saserdote, kag mga manalagna, nga nagadugang: “Sa imo mga sidsid makit-an ang mga dugo sang mga kalag sang mga makaluluoy nga wala sing sala.”​—⁠Jeremias 2:​26, 34.

8. Ngaa masiling nga si Jeremias isa ka mensahero sang paghidait?

⁸ Si Jeremias masami ginatawag nga manalagna sang kalalat-an, apang matawag man sia nga mensahero sang paghidait sang Dios. Ginpatuhuyan niya ang paghidait subong kasunson sang ginhimo anay ni Isaias. Gingamit ni Jehova si Jeremias, sa pagpahibalo sing paghukom sa Jerusalem, nga nagasiling: “Ini nga siudad, nangin kabangdanan sang akon kaakig kag sang akon kasingkal, kutob sang gintukod nila ini, tubtob sini nga adlaw, agod nga kuhaon ko ini sa akon atubangan, bangod sang tanan nga kalautan sang mga anak sang Israel kag sang mga anak sang Juda nga ginhimo nila sa pagpaakig sa akon, sila, ang ila mga hari, ang ila mga prinsipe, ang ila mga saserdote kag ang ila mga manalagna, kag ang mga tawo sang Juda kag ang mga pumuluyo sang Jerusalem.” (Jeremias 32:​31, 32) Ginlandong sini ang paghukom ni Jehova sa mga manuggahom kag mga klero sang Cristiandad sa karon. Agod magluntad ang matuod nga paghidait, dapat dulaon ining mga manugsugyot sang kalainan kag kasingki! Indi gid sila mga mensahero sang paghidait.

Ang Nasyones Unidas Subong Manugpatuman sing Paghidait?

9. Paano nangangkon ang Nasyones Unidas subong mensahero sing paghidait?

⁹ Apang, indi bala mahimo nga ang Nasyones Unidas mangin isa ka matuod nga mensahero sang paghidait? Ti, ang preambulo sa karta sini, nga ginsumiter sang Hunyo 1945, 41 ka adlaw lamang antes ginhapay sang bomba atomika ang Hiroshima, nagsambit sang iya katuyuan: “sa pagluwas sa masunod nga mga kaliwatan gikan sa kahalitan sang inaway.” Ang 50 anay ka potensiyal nga katapo sang Nasyones Unidas “naghiusa sang [ila] kusog agod huptan ang internasyonal nga paghidait kag kalig-unan.” Sa karon ang Nasyones Unidas may 185 ka katapo nga pungsod, nga nadedikar sa pareho nga tulumuron.

10, 11. (a) Paano ginpabutyag sang mga lider sang relihion ang ila pagsakdag sa Nasyones Unidas? (b) Sa anong paagi sayop nga ginrepresentar sang mga papa “ang Maayong Balita sang Ginharian sang Dios”?

¹⁰ Sa sulod sang mga tinuig, ang Nasyones Unidas mabaskog nga gindayaw, ilabi na sang mga lider sang relihion. Sang Abril 11, 1963 ginlagdaan ni Papa Juan XXIII ang iya pangkabilugan nga sulat nga natig-uluhan “Pacem in Terris” (Paghidait sa Duta) diin nagsiling sia: “Hanuot namon nga handum nga ang organisasyon sang Nasyones Unidas​—⁠sa kahimusan sini kag sa mga pamaagi sini​—⁠makasarang sa pagdumala sa kadakuon kag pagkahalangdon sang iya mga hilikuton.” Sang ulihi, sang Hunyo 1965, ang mga lider sang relihion, nga ginsiling nga nagatiglawas sa katunga sang populasyon sang kalibutan, nagsaulog sa San Francisco sing ika-20 nga kaadlawan sang Nasyones Unidas. Subong man sang 1965, si Papa Paulo VI, sa isa ka pagduaw sa Nasyones Unidas, naglaragway sini subong “ang katapusan nga paglaum sang paghiusa kag paghidait.” Sang 1986, si Papa Juan Paulo II nagbulig sa pagpasanyog sing Internasyonal nga Tuig sang Paghidait sang Nasyones Unidas.

¹¹ Sa liwat, sa iya pagduaw sang Oktubre 1995, ang papa nagpahayag: “Karon nga adlaw ginasaulog naton ang Maayong Balita sang Ginharian sang Dios.” Apang matuod gid bala sia nga mensahero sang Dios tuhoy sa maayong balita sang Ginharian? Nagahambal tuhoy sa mga problema sang kalibutan, nagsiling sia: “Samtang ginaatubang naton ining daku nga mga hangkat, indi bala dapat nga kilalahon naton ang papel sang Organisasyon sang Nasyones Unidas?” Ang Nasyones Unidas, sa baylo sang Ginharian sang Dios, amo ang ginpili sang papa.

Mga Rason sa ‘Paghibi sing Mapait’

12, 13. (a) Paano ang Nasyones Unidas nagpanghikot sa paagi nga ginlaragway sa Jeremias 6:​14? (b) Ngaa ang mga lider sang Nasyones Unidas nalakip sa ginalaragway sa Isaias 33:​7?

¹² Ang pagsaulog sa ika-50 nga anibersaryo sang Nasyones Unidas napaslawan sa pagpakita sing bisan anong matuod nga paglaum sang “paghidait sa duta.” Ang isa ka rason ginpakita sang isa ka manunulat sa The Toronto Star sang Canada, nga nagsulat: “Ang Nasyones Unidas isa ka leon nga wala sing ngipon, nga nagangurob kon nagaatubang sa kapintas sang tawo, apang kinahanglan maghulat sa iya mga katapo nga butangan sia sing pustiso antes makakagat.” Sa masami ini nga pagkagat maluya kag atrasado na. Ang mga mensahero sang paghidait sa karon nga sistema sang kalibutan, kag ilabi na sa Cristiandad, nagapalanog sing mga pinamulong sang Jeremias 6:​14: “Gin-ayo nila sing hapaw ang pilas sang akon katawhan, nga nagasiling, ‘May Paghidait! May Paghidait!’ samtang wala sing paghidait.”

¹³ Ang sunod-sunod nga mga sekretaryo-heneral sang Nasyones Unidas nagpangabudlay sing lakas, kag walay duhaduha sing sinsero, agod magmadinalag-on ang Nasyones Unidas. Apang ang padayon nga binangig sa tunga sang iya 185 ka katapo nga may lainlain nga mga katuyuan tuhoy sa kon paano mabuhinan ang inaway, ginplano nga pagsulundan, kag pag-uyat sang kuwarta nag-upang sa mga paglaum nga magmadinalag-on. Sa iya tuigan nga report para sa 1995, ang nagapangalagad nga sekretaryo-heneral nagsulat tuhoy sa nagabuhin nga “kahadlok sa bug-os globo nga nuklear nga kapahamakan” subong nagabukas sing dalanon para sa “mga pungsod nga magbuligay padulong sa ekonomiko kag sosyal nga kauswagan para sa bug-os nga katawhan.” Apang nagdugang sia: “Sing makapasubo, ang rekord sang mga hilikuton sa kalibutan sang nagligad nga pila ka tuig naghimutig sining optimistiko nga mga pagpaabot.” Sa pagkamatuod, ining kuno mensahero sang paghidait ‘nagahibi sing mapait.’

14. (a) Ngaa masiling nga ang Nasyones Unidas naputo sa pinansial kag sa moral? (b) Paano natuman ang Jeremias 8:​15?

¹⁴ Ang isa ka pangulong dinalan sa The Orange County Register sang California mabasa: “Ang Nasyones Unidas Naputo sa Pinansial kag Moral.” Ang artikulo nagsiling nga sa ulot sang 1945 kag 1990, kapin sa 80 ka inaway, ang nagkutol sing kapin sa 30 milyones ka kabuhi. Ginkutlo sini ang isa ka manunulat para sa Oktubre 1995 nga guwa sang Reader’s Digest nga “nagalaragway sa militar nga mga pagpanghikot sang Nasyones Unidas nga nakilal-an bangod sang ila ‘disangkol nga mga kumander, wala disiplina nga mga soldado, mga kaalyado sang mga kaaway, kapaslawan sa pag-upang sa mga kinagamo kag kon kaisa nagadugang pa gani sa kahadlok.’ Dugang pa, ‘ang kasangkaron sang uyang, pagdaya, kag pag-abuso daku gid.’ ” Sa isa ka seksion nga natig-uluhan “Ang Nasyones Unidas sa 50 Anyos,” ang The New York Times may ulong dinalan nga “Ang Sayop nga Pagdumala kag Uyang Nagaguba sang Pinakamaayong mga Tulumuron sang Nasyones Unidas.” Ang The Times sang London, Inglaterra, may pangulong artikulo nga nagasiling, “Maluya sa Ikasingkuenta​—⁠Ang NU kinahanglan mag-ehersisyo agod maumpawan.” Sa katunayan, kasubong gid ini sang aton mabasa sa Jeremias kapitulo 8, bersikulo 15: “Nagahulat kita sing paghidait, apang wala sing kaayuhan nga nag-abot; sing tion sa pag-ayo, apang, yari karon! kakugmat!” Kag ang peligro sang nuklear nga inaway padayon nga nagapahadlok sa katawhan. Sing maathag, ang Nasyones Unidas indi ang mensahero sang paghidait nga ginakinahanglan sang katawhan.

15. Paano ang dumaan nga Babilonia kag ang iya relihioso nga binhi napamatud-an nga malaglagon kag makapahubog?

¹⁵ Ano ang mangin resulta sining tanan? Ang matagnaon nga Pulong ni Jehova maathag gid. Una, ano ang nagahulat sa butig nga mga relihion sang kalibutan nga masami gid nga mainabyanon sa Nasyones Unidas? Mga anak ini gikan sa isa nga ginhalinan, ang dumaan nga Babilonia. Sing nagakaigo, ginlaragway sila sang Bugna 17:5 subong ang “Babilonia nga Daku, ang iloy sang mga makihilawason kag sang mga kalangil-aran nga butang sa duta.” Ginlaragway ni Jeremias ang kalaglagan sining salimpapaw nga organisasyon. Kaangay sa isa ka makihilawason, ginahaylo nila ang mga politiko sa duta, ginainto ang Nasyones Unidas kag nagapakighilawas sa politikal nga mga kagamhanan nga katapo sini. Nanguna sila sa pagbuylog sa mga inaway sang maragtas. Ang isa ka komentarista nagsiling tuhoy sa relihiosong inaway sa India: “Gintawag ni Karl Marx ang relihion subong ang opyum sang katawhan. Apang daw indi ina husto kay ang opyum isa ka downer, nagapahubog ini sa tawo. Sa baylo, ang relihion kaangay sang crack cocaine. Nagatuga ini sing daku nga kasingki kag tuman ka malaglagon nga puwersa.” Apang sayop man ina nga manunulat. Ang butig nga relihion pareho nga makapahubog kag malaglagon.

16. Ngaa dapat magguwa karon ang bunayag sing tagipusuon nga mga tawo gikan sa Babilonia nga Daku? (Tan-awa man ang Bugna 18:​4, 5.)

¹⁶ Ano, nian, ang dapat himuon sang bunayag sing tagipusuon nga mga tawo? Ang mensahero sang Dios nga si Jeremias nagahatag sa aton sing sabat: “Palagyo gikan sa tunga sang Babilonia, luwason sang tagsa ka tawo ang iya kaugalingon nga kalag. . . . Kay tion ini sang pagtimalos ni Jehova.” Malipayon kita kay minilyon na ang nakapalagyo gikan sa pagkabihag sa Babilonia nga Daku, ang bug-os kalibutan nga emperyo sang butig nga relihion. Isa ka bala sa ila? Kon amo mahangpan mo sing maathag kon paano naapektuhan sang Babilonia nga Daku ang mga pungsod sa duta: “Ang mga pungsod nag-inom sang iya alak. Amo sina kon ngaa ang mga pungsod nangin mga buangbuang.”​—⁠Jeremias 51:​6, 7.

17. Anong paghukom ang ipatuman sa indi madugay sa Babilonia nga Daku, kag ano ang magasunod sa amo nga buhat?

¹⁷ Sa indi madugay, ang ‘buangbuang” nga mga katapo sang Nasyones Unidas maniobrahon ni Jehova nga salakayon ang butig nga relihion, subong sang ginalaragway sang Bugna 17:​16: “Ini sila magadumot sa makihilawason nga babayi, magahapay kag magapahubo sa iya, kag magakaon sang iya unod kag magasunog sa iya sing bug-os sa kalayo.” Amo ini ang tanda sang pagsugod sang dakung kapipit-an nga ginpatuhuyan sa Mateo 24:​21 kag nga magalab-ot sa Armagedon, ang inaway sang dakung adlaw sang Dios nga Labing Gamhanan. Kaangay sang dumaan nga Babilonia, ang Babilonia nga Daku magaagom sang paghukom nga ginpahibalo sa Jeremias 51:​13, 25: “ ‘O babayi nga nagapuyo sa madamong tubig, bugana sa mga bahandi, ang imo katapusan nag-abot na, ang talaksan sang imo pagkamahamkunon. Yari karon ako batok sa imo, O malaglagon nga bukid,’ nagasiling si Jehova, ‘ikaw nga manuglaglag sang bug-os nga duta; kag untayon ko ang akon kamot batok sa imo kag paligiron ikaw gikan sa mga igang kag himuon ikaw nga bukid nga sunog.’ ” Ang malaut, maawayon nga mga pungsod magasunod sa kalaglagan sang butig nga relihion bangod maagom man nila ang pagtimalos ni Jehova.

18. San-o kag paano matuman ang Isaias 48:​22?

¹⁸ Ang 1 Tesalonica 5:​3, nagasiling tuhoy sa malauton: “Kon magsiling sila: ‘Paghidait kag kalig-unan!’ nian sa hinali ang kalaglagan magaabot sa ila subong nga ang kasakit sa pag-anak nagaabot sa babayi nga nagadala; kag indi sila mas-a nga makapalagyo.” Amo ini sila ang ginapatuhuyan ni Isaias: “Yari karon! . . . ang mga mensahero sang paghidait magahibi sing mapait.” (Isaias 33:7) Sa pagkamatuod, subong sang aton mabasa sa Isaias 48:​22, “ ‘wala sing paghidait,’ siling ni Jehova, ‘para sa mga malauton.’ ” Apang ano nga palaabuton ang nagahulat sa mga mensahero sang diosnon nga paghidait? Ang aton masunod nga artikulo magasugid tuhoy sini.

Mga Pamangkot sa Repaso

◻ Sa anong mabaskog nga mga pinamulong ginbuyagyag sang mga manalagna sang Dios ang butig nga mga mensahero?

◻ Ngaa napaslawan ang tawhanon nga mga ahensia sa pagtinguha nga paluntaron ang mapinadayunon nga paghidait?

◻ Paano ang matuod nga mga mensahero sang paghidait tuhay kon ipaanggid sa mga sumalakdag sang Nasyones Unidas?

◻ Ano ang dapat nga himuon sang mga mahagop agod magkalipay sa ginsaad nga paghidait ni Jehova?

[Kapsion sa pahina 15]

Sanday Isaias, Jeremias, kag Daniel nagtagna tanan tuhoy sa kapaslawan sang mga panikasog sang tawo sa paghidait

[Kapsion sa pahina 16]

“Ang bug-os nga kalibutan yara sa idalom sang gahom sang isa nga malaut.”​—⁠Apostol Juan

[Kapsion sa pahina 17]

“Yara sila sa kadudulman sa painuino.”—⁠Apostol Pablo