Halalban Para sa mga Tulad-Karnero sa Duta sang mga Navajo

ANG hózhóní, sa lenguahe sang mga Navajo Indian, nagakahulugan sing “matahom,” kag amo sina ang paglaragway sang mga Navajo sa ila duta. Kutob sang 1868 ginbahinbahin sang gobierno sang Estados Unidos sa mga Navajo ang mga 62,000 kilometros kuwadrados sang reserbasyon nga lote sa naaminhan-nasidlangan nga Arizona, sa palibot sang ginatawag nga apat ka hilit, diin nagasumalangay ang apat ka estado sang Arizona, Colorado, New Mexico, kag Utah. Ang Monument Valley, nga ginpabantog sang mga pelikula tuhoy sa pangabuhi sa Nakatundan, gintipigan karon subong isa ka Navajo Tribal Park kag nagaganyat sa mga turista gikan sa bug-os nga kalibutan. Makita sa nalupyakan ang matahom nga tatlo ka gatos ka metro kataas nga mapula nga bato nga haligi nga nagatindog sing isahanon sa mataas nga desyerto nga kapatagan. Sing nagakaigo, ang termino sang mga Navajo para sa nalupyakan nagakahulugan sing “ang espasyo sa ulot sang mga igang.”

Sa kabilugan, ang mga Navajo nakilal-an tungod sa ila mapainubuson nga mga batasan, mainit nga pagkamaabiabihon, kag suod nga kaangtanan sa tapik nga mga pamilya. Ang 170,000 ka pumuluyo sa reserbasyon nga lote nagapuyo labi na sa nabaw-ing nga mga komunidad, nga nagasunod sa tradisyon. Ang iban nagasagod gihapon sing mga karnero kag nagapuyo sa nakulapan sing lunang nga de-troso nga mga payag nga ginatawag mga hogan. Ang Navajo nga mga taliambong kag sampaton nga mga buhat sang kamot nangin bantog sing lapnag. Ginapabilihan gid sing daku amo ang ila mga alpombra kag mga habol nga may maduagon nga geometriko ukon tradisyunal nga mga desinyo, nga ginhabol gikan sa balahibo sang karnero. Bantog man amo ang Navajo nga pilak nga alahas nga may turquoise kag iban pa natural nga mga materyal.

Pagdala Sing Maayong Balita sa Duta Sang mga Navajo

Sa kapin sa 30 ka tuig, ang mga Saksi ni Jehova nagkadto sa duta sang mga Navajo indi lamang agod mamasyar kundi agod man magdala sing maayong balita sang Ginharian sang Dios sa mga tawo sa sining nabaw-ing nga duog. (Mateo 24:14) Ang regular kag espesyal payunir nga mga ministro sang mga Saksi ni Jehova nanguna sa pagbantala nga hilikuton. Madamo sa ila ang naghulag sa mga panawagan gikan sa nagalakbay nga mga manugtatap kag sa lokal nga mga Saksi sa pagbulig kon diin mas daku ang kinahanglanon. Ang pila naghalin sa kaingod nga mga kongregasyon, samtang ang iban naman, lakip na ang mga katapo sang lainlain nga mga tribo sang Tumandok nga mga Amerikano, naghalin sa nanuhaytuhay nga bahin sang Estados Unidos.

Ginpaanggid sining masinakripisyuhon sa kaugalingon nga mga lalaki kag mga babayi ang ila ministeryo diri sa isa ka misyonero nga asaynment. Ngaa? Una sa tanan, ang tumandok nga mga hambal mabudlay gid tun-an bangod sang ila masibod nga tunog, pagkahuman, kag mga ekspresyon. Nian, ang tumandok nga mga tawo, sa kalabanan, nagasunod sang ila tradisyunal nga mga paagi sa relihion, pamilya, kag nagasalig sa duta subong palangabuhian. Dugang pa, ang pabalay kag palamugnan maiwat para sa mga indi Indian, nagahimo nga mabudlay para sa mga nagsalaylo ang magtener diri. Sa katapusan, ang malawig nga maragtas sang malain nga pagtratar sa sining mga tawo sa mga kamot sang mga puti halangpunon nga nagpatudok sa ila sing daku nga di-pagsalig sa mga indi Indian.⁠a

Sang primero, sang ang mga Saksi nagpamalaybalay nga nakapanapot sing pormal kag nakakurbata, nasal-an sila nga mga Mormon, kag madamo ang wala magbukas sing ganhaan. Sang nagsuksok sila sing indi tanto ka pormal nga panapton, ginpasulod sila, sing masunson sa sulod sang isa ka oras ukon kapin pa. Kilala na karon sang mga tawo ang mga Saksi ni Jehova, bisan pa nga nagapanapot na sila liwat sing pormal sa ministeryo.

Ang pagduaw sa mga tawo nga nagapuyo sa reserbasyon nga lote sang mga Navajo isa gid ka daku nga hangkat. Kinaandan na ang paglakbay sing minilya sa wala sing karatula nga mga dalan nga ayhan batuhon, balasbalason, kag lunangon. Natural lamang, ang mga salakyan madali maguba kag makakalapoy ini sa mga pasahero. Ang mga salakyan mahimo man nga magguot, apang ang mga nagalabay masunson nga handa sa pagbulig. Ang pagduaw sa mga interesado, pagkadto sa isa ka pagtuon sa Biblia sa puluy-an, ukon pagsugat sa isa pakadto sa Cristianong miting masunson nga nagakinahanglan sing pila ka oras nga paglakbay pakadto-pakari. Apang ang mga Saksi handa magsakripisyo, busa nagapakita sang ila gugma sa tumandok nga mga tawo.​—⁠Ipaanggid ang 1 Tesalonica 2:⁠8.

Ang mga Navajo nanamian makighambal sa Biblia. Sa masami nagatipon sila subong bug-os nga pamilya​—⁠mga anak, mga ginikanan, kag mga lolo kag mga lola​—⁠sa pagpamati nahanungod sa paglaum tuhoy sa palaabuton nga puluy-an nga paraiso para sa katawhan. Sang ginpamangkot kon ano ang panghunahuna niya tuhoy sa Paraiso, ang isa ka Navajo nga lalaki nagsabat, “Berde nga mga halalban, nga may madamo nga karnero,” nagapakita sang ila gugma sa duta kag sa ila mga panong. Ginapabaloran man nila ang mga literatura tuhoy sa Biblia, ginapakita ini kon kaisa paagi sa pag-amot sing mga uyas nga magamit sa paghimo sing mga alahas, habon, de-lata nga gatas, kag iban pa bilang pagsuporta sa ministeryo sang Ginharian. Isa ka espesyal payunir ang nakakuha sing mga 200 ka suskripsion sa Lalantawan kag Magmata! nga magasin sa isa ka tuig, lakip ang duha gikan sa isa ka tawo nga nagasakay sa kabayo.

Pagpatindog Sing “Kampo Sang mga Karnero”

Kon mag-abot ang tig-ilinit, tion ini para sayluhon sang isa ka Navajo nga manugbantay ang iya panong pakadto sa kampo sang mga karnero. Ining puluy-an sa tig-ilinit para sa mga karnero, nga ginpili bangod malapit ini sa berde nga mga halalban kag tuburan sang tubig, nagabulig agod magdamo ang panong. Sa malaragwayon nga kahulugan, ang Kingdom Hall mahimo mapaanggid sa subong sini nga kampo​—⁠isa ka espirituwal nga halalban kag tuburan sang tubig sang kamatuoran. Ang mga tawo nga nagakadto sarang makasapo sing espirituwal nga pagkaon nga nagahimo sa ila nga mapagros kag mabaskog sa espirituwal.

Sa pila ka tion, ang mga miting ginahiwat sa isa ka hulot-klasehan sang eskwelahan sa Kayenta, Arizona. Nian sang Agosto 1992, sa bulig sang ginatos ka Saksi nga boluntaryo gikan sa pila ka estado, isa ka bag-ong Kingdom Hall ang ginpatindog sa Kayenta. Ining Kingdom Hall kag ang pila pa sa rehiyon nagapatudok sa hunahuna sang lokal nga katawhan sang pagkapermanente sang pagbantala nga hilikuton. Ang iban pa nga Kingdom Hall sa sining malapad nga teritoryo nagalakip sang didto sa Tuba City kag Chinle, lunsay yara sa reserbasyon, ang isa sa Keams Camyon sa Hopi nga duta sang tribo sa sulod sang Navajo nga reserbasyon, kag ang pila pa sa mga banwa sa dulunan sang reserbasyon. Ano ang nangin resulta?

Tumalagsahon nga Sabat sa Mensahe Sang Ginharian

Sa Kayenta kapin sa isa ka dosena ka lokal nga tawo ang ginbawtismuhan sugod sang ginpatindog ang Kingdom Hall, nagapakita sang pagpakamaayo ni Jehova sa sining duog sang matuod nga pagsimba. Ang tilipunan nagahatag sing pamatuod nga ang mga Saksi ni Jehova magadugay diri kag nagatukod sing pagsalig sa maayong balita sang Ginharian nga ginabantala nila. Sining karon lang ang nahaunang diskurso publiko sa Biblia sa Navajo nga lenguahe ginhatag didto. Ang 40 ka katapo sang kongregasyon nalipay sa pag-abiabi sa 245 sa pamulongpulong tuhoy sa mga responsabilidad sang pagkaginikanan. Upod ang mainapresyahon nga tagipusuon, isa ka pamilya nga may walo ka katapo ang naglakbay sing tatlo ka oras sa pagpakadto lamang agod mamati sa sining pamulongpulong​—⁠ang ila nahauna gid nga pagduaw sa Kingdom Hall.

Ang isa pa ka mabuligon nga kagamitan nga gin-aman ni Jehova amo ang brosyur nga Agoma ang Kabuhi sa Duta sing Dayon! sa Navajo nga lenguahe. Ang pagbadbad sa brosyur sa Navajo, nga masibod gid katama nga lenguahe, isa ka daku nga hangkat. Ang mga manugbadbad nakahinguyang sing tingob sing kapin sa 1,000 ka oras sa pagpat-od nga ang brosyur nagapaalinton sing nagakaigo sang mensahe sang Ginharian. Kutob sang ginbalhag ini sang talipuspusan sang 1995, ang lokal nga mga Saksi nakapahamtang sing linibo ka kopya sini, nga nagresulta sa madamong pagtuon sa Biblia upod sa mga nagapangita sa kamatuoran.

Sing mainuswagon, ang Navajo nga lenguahe ginagamit sa ministeryo samtang ginatun-an ini sang mga manugbantala sang Ginharian. Ang mga kongregasyon diri nagsugod sa paggamit sing Navajo sa Teokratikong Eskwelahan sa Pagministro, kag ang mga klase sa pagtuon sang Navajo nga lenguahe ginhiwat sa paghanas sa mga manugbantala. Dugang pa, ang programa sa lokal nga mga asambleya ginabadbad man sa Navajo. Ining tanan nga panikasog pat-od gid nga magadul-ong sa daku pa nga sabat sa reserbasyon.

Indi dapat kalimtan sa tunga sang bunga sang Ginharian sa sining Indian nga reserbasyon amo ang tumalagsahon nga espirituwal nga mga kinaiya nga ginpakita sang aton Navajo nga mga kauturan. Sa sulod sang pito ka tuig, gin-upod nanday Jimmy kag Sandra ang ila lima ka anak nga nagakinahanglan sing 120 kilometros nga paglakbay sa pagpakadto lamang agod makatambong sa semanal nga mga miting. Madumduman pa sang pamilya ang pag-amba sing mga ambahanon sa Ginharian kag pagtuon sa Biblia sa tion sang ila malawig nga mga paglakbay. Ang gugma kag kakugi sang mga ginikanan para sa kamatuoran nagpahulag sa mga anak nga sundon ang ila halimbawa nga mangin dedikado nga mga dumalayaw ni Jehova. Apat sa ila ang nagaalagad karon subong mga regular payunir, kag si Jimmy isa ka gulang. Dugang sa kalipay sining pamilya, sining karon lang, ang utod nga babayi ni Jimmy nga si Elsie nangin ang nahaunang tawo nga nagahambal lamang sing Navajo nga nabawtismuhan.

Ang lokal nga mga manugbantay kag ang ila mga panong nagahatag sing kalinong sa bato nga mga monumento nga nagapuni sa Navajo nga reserbasyon. Si manalagna Isaias madugay na nga nagtagna tuhoy kay Jehova: “Sia magapahalab sang iya panong kaangay sang manugbantay. Kungkungon niya sa iya butkon ang mga kordero; kag dalhon sila sa iya dughan. Tuytuyan niya nga may paghalong ang mga nagasuso.” (Isaias 40:11) Paagi sa iya Maayong Manugbantay, nga si Jesucristo, ginatipon ni Jehova sa iya espirituwal nga halalban ang tanan nga didto sa Navajo nga reserbasyon nga maluyag makabati sing maayong balita sang Ginharian kag may kahigayunan nga makabaton sing walay katapusan nga pagpakamaayo.

[Footnote]

[Kapsion sa pahina 24]

Ang Navajo nga mga manugbantay nga babayi nagapamati sing maayong balita