Ang mga Padya sang Pagpadungog sa Tigulang nga mga Ginikanan

ANG matuod nga mga sumilimba sang Dios nagatahod, nagapadungog, kag nagaatipan sa ila tigulang nga mga ginikanan bangod ginahigugma nila sila. Bahin ini sang ila pagsimba. Ang Biblia nagasiling: ‘Patun-a anay ang [mga kabataan ukon mga apo] sa paghimo sing diosnon nga debosyon sa ila kaugalingon nga panimalay kag padayon nga magbayad sing nagakabagay nga balos sa ila mga ginikanan kag mga lolo kag lola, kay ini kalahamut-an sa itululok sang Dios.’ (1 Timoteo 5:⁠4) Bataon man kita ukon tigulang, nagakaigo nga ihatag naton ang “nagakabagay nga balos” sa aton mga ginikanan kag mga lolo kag lola. Sa sining paagi ginapakita naton ang aton apresasyon sa ila gugma, sa ila lakas nga pagpangabudlay, kag sa ila pag-atipan sa aton sa sulod sang madamo nga tinuig. Utang naton sa aton mga ginikanan ang aton kabuhi!

Talupangda nga ang pagbayad sing nagakabagay nga balos sa mga ginikanan kag mga lolo kag lola “kalahamut-an sa itululok sang Dios.” May kaangtanan ini sa aton “diosnon nga debosyon.” Sa amo, paagi sa pagtuman sining laygay, ginapadyaan kita, bangod nahibaluan naton nga ginahimo naton ang kalahamut-an sa Dios. Nagahatag ini sa aton sing kalipay.

May kalipay sa paghatag sa iban, ilabi na kon nagahatag kita sa mga nagahatag sa aton sing maalwan. (Binuhatan 20:35) Nian, makapaladya gid ang paghimo sing nahisuno sa Biblia nga prinsipio: “Pasadyaha ang imo amay kag ang imo iloy, kag magkasadya sia nga nagpanganak sa imo”!​—⁠Hulubaton 23:​25, The New English Bible.

Paano kita makahatag sing nagakabagay nga balos sa aton mga ginikanan kag mga lolo kag lola? Sa tatlo ka paagi: sa materyal, emosyonal, kag sa espirituwal. Ang tagsa nagahatag sing padya.

Paghatag Sing Materyal

Nahibaluan sang mga nagaalagad sa Dios nga importante ang pag-aman sing materyal para sa suod nga mga katapo sang pamilya. Si apostol Pablo naglaygay: “Kon ang bisan sin-o wala nagaaman para sa ila nga yara sa iya, kag ilabi na para sa mga katapo sang iya panimalay, napanghiwala na niya ang pagtuo kag malain pa sa tawo nga wala sing pagtuo.”​—⁠1 Timoteo 5:⁠8.

Sanday Tunji kag Joy nagapuyo sa Katundan nga Aprika. Bisan pa pigado sila, gin-agda nila ang tigulang nga mga ginikanan ni Joy nga magpuyo upod sa ila. Nagbalatian ang amay ni Joy kag napatay sang ulihi. Si Tunji nagsiling: “Sang mapatay si Tatay, ginhakos ni Nanay ang akon asawa kag nagsiling: ‘Ginhimo mo ang tanan nga mahimo mo. Wala gid sing rason nga konsiensiahon ikaw sa kamatayon sang imo amay.’ Walay sapayan nga napatay si Tatay, nahibaluan namon nga ginbakal namon ang labing maayo nga bulong para sa iya kag ginpabatyag namon sa iya nga naluyagan sia kag ginakinahanglan; ginhimo namon ang labi namon nga masarangan agod tumanon ang amon hatag-Dios nga responsabilidad. Nalipay kami bangod sini.”

Sa pagkamatuod, indi tanan ang mahimo nga makabulig sa iban sa materyal. Ang isa ka tawo nga nagapuyo sa Nigeria nagsiling: “Kon ang isa ka tawo haluson gani makabuhi sa iya kaugalingon, paano sia makabulig sa iban nga tawo?” Sa madamo nga kadutaan ang kahimtangan mahimo nga maglain pa gid sa palaabuton nga mga tinuig. Suno sa panan-aw sang Nasyones Unidas, sa indi madugay katunga sang populasyon sa sub-Saharan nga Aprika ang magakabuhi sa tuman nga kaimulon.

Kon pigado gid ang imo kahimtangan, ayhan malugpayan ikaw sang matuod nga istorya tuhoy sa imol nga balo nga babayi. Sang yari si Jesus sa duta, nakita niya ang isa ka balo nga babayi nga nag-amot sing diutay nga kantidad sa bahandian sang templo. Naghatag lamang sia sing ‘duha ka magamay nga sensilyo nga diutay kaayo ang balor.’ Apang, bangod nahibaluan ang iya kahimtangan, si Jesus nagsiling: “Matuod gid nagasiling ako sa inyo, Ining balo nga babayi, bisan pa imol, naghulog sing labi pa sangsa ila tanan. Kay sila tanan naghulog sing mga dulot gikan sa ila kabuganaan, apang ining babayi gikan sa iya kinawad-on naghulog sing tanan nga palangabuhian niya.”​—⁠Lucas 21:​1-4.

Sing kaanggid, kon ginahimo naton ang aton labi nga masarangan sa pag-atipan sa aton mga ginikanan ukon mga lolo kag lola sa materyal, walay sapayan nga mahimo diutay lamang ini, nakita kag nahamut-an ina ni Jehova. Wala sia nagapaabot nga himuon naton ang labaw sa aton masarangan. Ayhan amo man sina ang mabatyagan sang aton mga ginikanan ukon mga lolo kag lola.

Paghatag Sing Suporta sa Emosyon

Ang pag-aman sa aton mga ginikanan ukon mga lolo kag lola wala lamang nagalakip sing pag-atipan sang ila materyal nga mga kinahanglanon. Tanan kita may emosyonal nga pagkinahanglan. Ang tanan, lakip ang mga tigulang, maluyag nga sila ginapalangga, ginakinahanglan kag naluyagan, kag mangin isa ka importante nga katapo sang pamilya.

Si Mary nga nagapuyo sa Kenya, nag-atipan sa iya tigulang nga ugangan nga babayi sa sulod sang tatlo ka tuig. Si Mary nagasiling: “Luwas sa pag-aman sang iya materyal nga mga kinahanglanon, pirme kami nagapakighambal sa iya. Wala na sing madamo nga mahimo si Nanay sa sulod sang balay, apang nagaistoryahanay kami kag nangin suod kami nga mag-abyan. Kon kaisa nagahambalanay kami tuhoy sa Dios, kon kaisa tuhoy sa mga tawo sa duog nga amon anay ginapuy-an. Walay sapayan nga kapin na sia sa 90 anyos, maayo gihapon ang iya memorya. Madumduman pa niya kag ginaistorya ang tuhoy sa kabuhi sang bata pa sia, ang mga inadlaw antes sang 1914.”

Si Mary nagapadayon: “Indi mahapos ang pag-atipan sa tigulang nga tawo, apang ang pagtener niya sa amon naghatag sing daku nga mga padya. May kalinong kag paghiusa kami sa amon pamilya. Ang akon paghatag sa iya nagpalambo sing mahinatagon nga espiritu sa iban nga katapo sang pamilya. Gintahod pa gid ako sang akon bana. Kag kon mabatian ni Nanay nga may nagahambal sa akon sing masakit, nagasaligbat sia gilayon sa pag-apin sa akon. Kon yara sia, wala sing isa nga makahambal sa akon sing masakit nga tinaga!”

Paghatag sa Espirituwal nga Paagi

Subong nga ang paghatag sing materyal kag sing emosyonal nga suporta nagadala sing mga padya sa isa nga nagahatag, amon man kon tuhoy sa espirituwal nga mga butang. Si apostol Pablo nagsulat sa Cristianong kongregasyon sa Roma: “Nagahandum ako sa pagpakigkita sa inyo, agod nga mapaambit ko sa inyo ang pila ka espirituwal nga mga hiyas agod mapalig-on kamo; ukon, sa baylo, agod may pagbayluhanay sing pagpalig-on sa tunga ninyo, ang kada isa paagi sa pagtuo sang iban, ang inyo kag ang akon.”​—⁠Roma 1:​11, 12.

Sa amo man nga paagi, kon tuhoy sa espirituwal nga paghatag sa mga tigulang nga nagaalagad sa Dios, masami nga may pagpalig-unay. Si Osondu nga nagapuyo sa Nigeria, nagsiling: “Ang akon gid nanamian tuhoy sa akon lolo kag lola amo ang kahigayunan nga ginahatag nila sa akon agod makakuha sing ideya tuhoy sa nagligad. Malipayon gid ang akon lolo samtang nagaistorya tuhoy sa iya teritoryo subong isa ka bug-os tion nga ministro sang mga dekada 1950 kag 1960. Ginapaanggid niya ang kongregasyon karon sa kon ano ini anay sang nangin Saksi sia. Nabuligan ako sining mga eksperiensia sa akon pag-alagad subong isa ka payunir.”

Ang iban sa kongregasyon makabulig man sa paghatag sa mga tigulang. Ginpaathag ni Tunji, nga ginhinambitan kaina, ang natabo sa iya kongregasyon: “Gindala sang isa ka lamharon nga payunir nga gintangduan nga maghatag sing pamulongpulong publiko ang balayan kay Tatay agod mahandaan nila ini nga duha. Ang manugdumala sa Pagtinuon sang Lalantawan nagkadto man kag nagsiling kay Tatay: ‘Eksperiensiado ikaw. Ano ang masiling mo agod mabuligan ako nga mag-uswag?’ Nakahatag si Tatay sing pila ka maayo nga panugda sa sadto nga gulang. Madamong beses nga ginasambit sang kauturan nga lalaki ang ngalan ni Tatay sa mga pangamuyo sa kongregasyon. Ini tanan nagpabatyag sa iya nga naluyagan sia.”

Ang Maayo nga Paggawi Nagabuyok Sang mga Tawo sa Dios

Kon kaisa, bangod ginapadunggan naton kag ginahigugma ang aton mga ginikanan kag mga lolo kag lola, ginabuyok naton ang mga tawo padulong sa Dios. Si apostol Pedro nagsulat: “Hupti ang inyo maayong pagginawi sa tunga sang mga pungsod, agod, paagi sa butang nga ginahambal nila batok sa inyo subong mga malauton, sila subong resulta sang inyo maayong binuhatan nga ila nasaksihan magahimaya sa Dios.”​—⁠1 Pedro 2:⁠12.

Si Andrew nga isa ka Cristianong gulang sa Katundan nga Aprika, nagalakbay sing 95 kilometros makaduha sa isa ka semana agod atipanon ang iya nagamasakit nga amay, nga indi tumuluo. Sia nagpanaysayon: “Sang nangin isa ako sang mga Saksi ni Jehova, namatok gid ang akon amay. Apang sang makita niya kon paano ko sia ginaatipan sang nagmasakit sia, padayon niya nga ginasilingan ang akon mga manghod nga lalaki kag babayi, ‘Dapat kamo magbuylog sa relihion sang inyo utod!’ Nagpahulag yadto sa ila, kag karon ang siam ka kabataan sang akon amay mga Saksi ni Jehova tanan.”

Ang pagpadungog kag pag-atipan sa aton tigulang nga mga ginikanan mahimo nga isa ka hangkat, ilabi na sa tion sang kapigaduhon. Apang kon ginapanikasugan ini sang mga Cristiano, nagaani sila sing madamo nga padya. Labaw sa tanan, maeksperiensiahan nila ang kalipay sa paghatag, upod ang kaayawan sa paghibalo nga ginapahamut-an nila si Jehova nga Dios, nga amo mismo ang “Amay sang tanan nga tawo.”​—⁠Efeso 4:⁠6.

[Kahon sa pahina 6]

Diosnon nga Laygay Para sa mga Ginaatipan kag Para sa mga Nagaatipan

Mangin Makapalig-on: “Ang tagsa sa aton magpahamuot sa iya isigkatawo sa kon ano ang maayo sa pagpalig-on sa iya.”​—⁠Roma 15:⁠2.

Mangin Mainunungon: “Indi kita mag-untat sa paghimo sing maayo, kay sa nagakaigo nga tion magaani kita kon indi kita pagpunawon.”​—⁠Galacia 6:⁠9.

Mangin Mapainubuson: ‘Dili maghimo sing bisan ano gikan sa pagkamaiyaiyahon ukon pagpadayawdayaw, kundi upod ang pagkamapainubuson kabiga ang iban nga mas maayo sa imo.’​—⁠Filipos 2:⁠3.

Mangin Manugbuhat Sing Maayo: “Padayon nga pangitaon sang kada isa, indi ang iya kaugalingon nga kaayuhan, kundi ang kaayuhan sang iban nga tawo.”​—⁠1 Corinto 10:⁠24.

Mangin Makatarunganon: “Tuguti nga ang inyo pagkamakatarunganon makilala sang tanan nga tawo.”​—⁠Filipos 4:⁠5.

Mangin Maawaon: “Mangin mabuot sa isa kag isa, malulo kag maawaon, hilway nga nagapatawad sa isa kag isa.”​—⁠Efeso 4:⁠32.

[Kapsion sa pahina 7]

Ang lamharon nga mga gulang makabenepisyo gikan sa eksperiensia sang mga tigulang